စံးထီၣ်ပတြၢၤ ၂၂:၁-၃၁
လၢတၢ်သူၣ်ဝံၣ်သးဆၢအခိၣ်အဂီၢ်, ဒ် “တၤဟိမိၢ်လၢ မုၢ်ဆ့ၣ်ဝါထီၣ်”* အသီၣ်အသိး. စီၤဒၤဝံးအထါ.
၂၂ ယကစၢ်ယွၤဧၢ, ယကစၢ်ယွၤဧၢ, ဘၣ်မနုၤအဃိ နပာ်တ့ၢ်ကွံာ်ယၤလဲၣ်.+
ဘၣ်မနုၤအဃိ နတဟဲမၤပူၤဖျဲး ယၤလဲၣ်,ဘၣ်မနုၤအဃိ နတနၢ်ဟူ ယတၢ်ကိးပသူထီၣ်လၢ တၢ်သးအုး အပူၤဘၣ်လဲၣ်.+
၂ ယကစၢ်ယွၤဧၢ, ယကိးထီၣ်နၤလၢ မုၢ်ဆါခီ ဘၣ်ဆၣ် နတစံးဆၢ ယၤဘၣ်.+
ဒီးလၢမုၢ်နၤခီန့ၣ် ယဆဲးကိးထီၣ် နၤဒံးလီၤ.
၃ ဘၣ်ဆၣ် နမ့ၢ်ပှၤစီဆှံ+ဒီးအံၣ်စရ့လး အတၢ်စံးပတြၢၤတဖၣ် အိၣ်ဝးတရံးနၤလီၤ.
၄ ပမိၢ်ပၢ်ဖံဖုလၢပျၢၤတဖၣ် နာ်န့ၢ်နၤ+ဒီးခီဖျိလၢ အဝဲသ့ၣ် နာ်န့ၢ်နၤအဃိ နမၤပူၤဖျဲး အဝဲသ့ၣ်ထီဘိလီၤ.+
၅ အဝဲသ့ၣ် ကိးပသူထီၣ်လၢနအိၣ် ဒီးနမၤပူၤဖျဲး အဝဲသ့ၣ်လီၤ.
အဝဲသ့ၣ် နာ်န့ၢ်နၤအဃိ အဝဲသ့ၣ် အသးတဟးဂီၤဘၣ်.*+
၆ မ့မ့ၢ်ယၤန့ၣ် ယတမ့ၢ် ပှၤကညီတဂၤလၢၤဘၣ်. ယမ့ၢ် ထိးကလဲာ် တဘိလၢပှၤသးဘၣ်အၢဝဲ ဒီးတဲဆါဝဲန့ၣ်လီၤ.+
၇ ပှၤကိးဂၤဒဲးလၢ အထံၣ်ယၤန့ၣ် ဒုၣ်ဒွဲၣ်ယၤ,+အဝဲသ့ၣ် နံၤဆဲးအဲးယၤ ဒီးဂံၤဂုၤအခိၣ်သၣ်ဃံ+
၈ ဒီးတဲဝဲလၢ “အဝဲနာ် ယဟိဝၤယွၤအဃိ ပျဲကစၢ်ယွၤ မၤပူၤဖျဲး အီၤသၢၤ.
ကစၢ်ယွၤ မ့ၢ်ဘၣ်သူၣ်ဘၣ်သးအီၤ ထဲန့ၣ်ညါန့ၣ် ပျဲကစၢ်ယွၤ အုၣ်က့ၤ ခီၣ်က့ၤအီၤသၢၤ.”+
၉ နမ့ၢ်ပှၤတဂၤလၢ အဒုးဟးထီၣ်ယၤလၢ ယမိၢ်အဒၢလီၢ်ပူၤ+ဒီးဖဲယအီ ယမိၢ်အနုၢ်အခါ နကဟုကယာ်ယၤလီၤ.
၁၀ စးထီၣ်လၢ ယအိၣ်ဖျဲၣ်ထီၣ်န့ၣ် တၢ်အးလီၤယၤလၢ နတၢ်ကွၢ်ထွဲ အဖီလာ်လီၤ.
စးထီၣ်လၢ ယအိၣ်လၢ ယမိၢ်အဒၢလီၢ်ပူၤန့ၣ် နကဲယကစၢ်ယွၤလီၤ.
၁၁ ဒီးမ့ၢ်လၢ တၢ်ကီတၢ်ခဲ အိၣ်ဘူးဒီးယၤ ဒီးပှၤအဂၤလၢ အကမၤစၢၤယၤ တအိၣ်နီတဂၤဘၣ်အဃိ+တဘၣ်အိၣ်ယံၤဒီးယၤတဂ့ၤ.+
၁၂ ကျီၢ်ဖါဖိ အိၣ်ဝးတရံးယၤအါမး+ဒီးဘၤၡၣ် အကျီၢ်ဖါလၢ အဂံၢ်ဆူၣ်တဖၣ် ကဝီၤဃာ်ယၤလီၤ.+
၁၃ ဒ်ခ့ယုၢ် လၢအကညီၤတၢ် ဒ်သိးကအ့ၣ်ဖှီကွံာ်အဆၣ် တက့ဘၣ် တက့အသိး+အဝဲသ့ၣ် အိးထီၣ်အကိာ်ပူၤဖးလဲၢ် ထီဒါယၤလီၤ.+
၁၄ တၢ်လူလီၤယၤ ဒ်ထံအသိး,ယဃံတဖၣ် အဆၢတပျာ်လံ.
ယသးမၤသးဒ်သိးဒီး ဃိး*+ဒီးအပှံၢ်လီၤဝဲလၢ ယကိပူၤလီၤ.+
၁၅ ယဂံၢ်ယဘါ ဃ့ထီကွံာ်ဝဲ ဒ်ဟီၣ်ခိၣ်သပၢၤ တက့အသိးလီၤ.+
ယပျ့ၤဘုးတာ်လိာ်သးဒီး ယမဲကူၤ+ဒီးနပာ်လီၤယၤလၢတၢ်သံ အဟီၣ်ခိၣ်ကမူၣ်ကျါလီၤ.+
၁၆ ပှၤအၢပှၤသီတဒူၣ် ကဝီၤဃာ်ယၤ,+ဟဲသဖှိဃီၤယၤ ဒ်ထွံၣ်တဖၣ်အသိး+ဒီးအဝဲသ့ၣ် အ့ၣ်ယစုယခီၣ် ဒ်ခ့ယုၢ်အသိးလီၤ.+
၁၇ ယဂံၢ် ယဃံ ဘၣ်ကိးဘိဒဲးလီၤ.+
အဝဲသ့ၣ်ကွၢ်ဃီၤဝဲဒီး ကွၢ်ထံယၤလီၤ.
၁၈ အဝဲသ့ၣ် နီၤဖးလိာ်အသးလၢ ယတၢ်ကူတၢ်သိးတဖၣ်ဒီးအဝဲသ့ၣ် ဖးတၢ်လၢ ယတၢ်ကူ တၢ်သိး အဂီၢ်လီၤ.+
၁၉ အိ ယဟိဝၤယွၤဧၢ, မ့မ့ၢ်နၤန့ၣ် အိၣ်ယံၤဒီးယၤတဂ့ၤ.+
နမ့ၢ်ယဂံၢ်ယဘါအဃိ ဟဲမၤစၢၤယၤမ့ၢ်ချ့.+
၂၀ မၤပူၤဖျဲးထီၣ်ယၤလၢနးဒီးယသးသမူလၢ အလုၢ်ဒိၣ်ပှ့ၤဒိၣ်လၢ ထွံၣ်တဖၣ် အစုပူၤတက့ၢ်.+
၂၁ အုၣ်က့ၤခီၣ်က့ၤယၤလၢ ခ့ယုၢ်အကိာ်ပူၤ+ ဒီးကျီၢ်ဖါတဖၣ်* အနၢၤတက့ၢ်.
စံးဆၢယၤဒီး အုၣ်က့ၤခီၣ်က့ၤ ယၤတက့ၢ်.
၂၂ ယကဘိးဘၣ်သ့ၣ်ညါနမံၤလၢ ယဒီပုၢ်ဝဲၢ်ခွါတဖၣ်အအိၣ်+ဒီးလၢတၢ်အိၣ်ဖှိၣ်အခၢၣ်သးန့ၣ် ယကစံးထီၣ်ပတြၢၤနၤလီၤ.+
၂၃ သုဝဲလၢအပျံၤ ယဟိဝၤယွၤသ့ၣ်ဧၢ, စံးထီၣ်ပတြၢၤအီၤတက့ၢ်.
စီၤယၤကိာ် အစၢၤအသွဲၣ် ခဲလၢာ်သ့ၣ်ဧၢ, မၤလၤကပီၤအီၤတက့ၢ်.+
စီၤအံၣ်စရ့လး အစၢၤအသွဲၣ် ခဲလၢာ်သ့ၣ်ဧၢ, ယူးယီၣ်ပာ်ကဲအီၤတက့ၢ်.
၂၄ ပှၤလၢအဘၣ်တၢ်ဆီၣ်သနံးအီၤ အတၢ်နးတၢ်ဖှီၣ်န့ၣ် ယွၤတကွၢ်ကပာ်ကွံာ်ဝဲဘၣ် ဒီးအတပာ်အသးဒ် အတသ့ၣ်ညါဝဲအသိးဘၣ်.+
ယွၤတပာ်သဒၢအမဲာ်လၢ အအိၣ်ဘၣ်.+
ဖဲအဝဲကိးထီၣ်ယွၤလၢ တၢ်မၤစၢၤအဂီၢ်န့ၣ် ယွၤဒိကနၣ်ဝဲလီၤ.+
၂၅ ယကစံးထီၣ်ပတြၢၤနၤလၢ တၢ်အိၣ်ဖှိၣ်ဖးဒိၣ်အပူၤ+ဒီးလၢပှၤလၢအပျံၤနၤ အမဲာ်ညါန့ၣ် ယကမၤလၢပှဲၤ ယတၢ်အၢၣ်လီၤတဖၣ်လီၤ.
၂၆ ပှၤလၢအဆီၣ်လီၤသးန့ၣ် ကအီၣ်ဘၣ်တၢ် ဒီးသူၣ်မံသးမုာ်ဝဲလီၤ.+
ပှၤလၢအဃု ယဟိဝၤယွၤန့ၣ် ကစံးထီၣ်ပတြၢၤအီၤလီၤ.+
မ်သုအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်တက့ၢ်.
၂၇ ပှၤလၢဟီၣ်ခိၣ်ဒီဖျၢၣ် ကသ့ၣ်နီၣ်ထီၣ် ယဟိဝၤယွၤ ဒီးဃၣ်အသး ဆူအအိၣ်လီၤ.
ပှၤကလုာ်တဖၣ် အဒူၣ်ဖိထၢဖိခဲလၢာ် ကဟဲဘူၣ်ထီၣ်ဘါထီၣ်အီၤလီၤ.+
၂၈ ယဟိဝၤယွၤ မ့ၢ်စီၤပၤလီၤ.+
ကစၢ်ယွၤပၢဝဲ ပှၤကလုာ်တဖၣ်လီၤ.
၂၉ ပှၤလၢအဘီၣ်ထီၣ်ညီထီၣ်လၢ ဟီၣ်ခိၣ်ချၢခဲလၢာ် ကအီၣ်တၢ် ဒီးဘူၣ်ထီၣ်ဘါထီၣ်အီၤလီၤ.
ပှၤလၢအကလဲၤလီၤလၢ ဟီၣ်ခိၣ်ကမူၣ်ကျါခဲလၢာ်န့ၣ် ကချံးလီၤခီၣ်လၢ အမဲာ်ညါလီၤ.
အဝဲသ့ၣ် တဂၤမး မၤပူၤဖျဲးလီၤ အနီၢ်ကစၢ် အသးသမူ တသ့ဘၣ်.
၃၀ အဝဲသ့ၣ် အစၢၤအသွဲၣ်တဖၣ် ကမၤကစၢ်ယွၤအတၢ်ဒီးပှၤလၢခံတစိၤန့ၣ် ကနၢ်ဟူဘၣ် ယဟိဝၤယွၤအဂ့ၢ်လီၤ.
၃၁ အဝဲသ့ၣ် ကဟဲတဲဘၣ်ဃးဒီး အတၢ်တီတၢ်လိၤလီၤ.
ဒီးတၢ်လၢ အမၤတ့ၢ်ဝဲတဖၣ်န့ၣ် အဝဲသ့ၣ် ကတဲဘၣ် ပှၤလၢအက ဟဲ အိၣ်ဖျဲၣ်ထီၣ်တဖၣ်လီၤ.
တၢ်ဂ့ၢ်အဘျဲၣ်တဖၣ်
^ ဘၣ်သ့ၣ်သ့ၣ် တၢ်သးဝံၣ်အသီၣ် မ့တမ့ၢ် တၢ်သးဝံၣ်တကလုာ်.
^ မ့ၢ်စ့ၢ်ကီး “တဒိးန့ၢ်ဘၣ် တၢ်မဲာ်ဆှးဘၣ်.”
^ ဖျါလၢအဲၣ်ဒိးတဲဝဲ တၢ်အသံးအကာ်လၢအပှံၢ်လီၤညီလၢ ကနဲဒုးအိၣ်ထီၣ်ဝဲ.
^ အခီပညီလိၤလိၤ “ကျီၢ်မံၤအဖါတဖၣ်.”
