စံးထီၣ်ပတြၢၤ ၃၁:၁-၂၄
လၢတၢ်သူၣ်ဝံၣ်သးဆၢ အခိၣ်အဂီၢ်. စီၤဒၤဝံးအထါ.
၃၁ အိ ယဟိဝၤယွၤဧၢ, ယဃုတၢ်အိၣ်သဒၢ လၢနအိၣ်လီၤ.+
တဘၣ်ပျဲလၢ ယကထံၣ်ဘၣ် တၢ်မဲာ်ဆှး နီတဘျီတဂ့ၤ.+
ခီဖျိလၢ နတၢ်တီတၢ်လိၤအဃိ မၤပူၤဖျဲးယၤတက့ၢ်.+
၂ ဒိးနနၢ်လၢယအိၣ်တက့ၢ်.*
ဟဲမၤပူၤဖျဲးယၤချ့ချ့,+ကဲထီၣ်ကစၢၢ်လၢ ယက အိၣ်သဒၢအဂီၢ်ဒီးတၢ်လီၢ်လၢ အဘံၣ်အဘၢ ဒ်သိးယကပူၤဖျဲး အဂီၢ်တက့ၢ်.+
၃ နမ့ၢ်ယလၢၢ်ယလ့ ဒီးယတၢ်အိၣ်သဒၢ အလီၢ်လီၤ.+
ခီဖျိလၢ နမံၤအဃိ+ နကဆှၢယၤ ဒီးဟံးစုနဲၣ်ကျဲယၤလီၤ.+
၄ နမ့ၢ် တၢးလၢအကျၢၤ လၢ ယဂီၢ်အဃိ+နကမၤပူၤဖျဲးယၤလၢ ထု* လၢအဝဲသ့ၣ် ပာ်လီၤခူသူၣ်ဝဲ လၢ ယဂီၢ်လီၤ.+
၅ ယအးလီၤယသးလၢ နစုပူၤလီၤ.+
အိ တၢ်မ့ၢ်တၢ်တီကစၢ် ယဟိဝၤယွၤဧၢ, နပှ့ၤက့ၤယၤလံ.+
၆ ယသးဟ့ ပှၤလၢ အဘူၣ်ထီၣ်ဘါထီၣ် တၢ်ဂီၤတၢ်ဖှီၣ်လၢ အဘျုးတအိၣ်ဘၣ်တဖၣ်လီၤ.
ဘၣ်ဆၣ် မ့မ့ၢ်ယၤန့ၣ် ယနာ်န့ၢ် ယဟိဝၤယွၤလီၤ.
၇ နထံၣ်လီၤ ယတၢ်နးတၢ်ဖှီၣ်လံ အဃိ+ယကသးခု ဒိၣ်ဒိၣ်မုၢ်မုၢ်လၢ နတၢ်အဲၣ်လၢအတီအဃိလီၤ.
ဒီးနသ့ၣ်ညါ ယတၢ်ကိၢ်တၢ်ဂီၤလၢ အဒိၣ်အမုၢ်တဖၣ်လီၤ.
၈ နတဟ့ၣ်လီၤကွံာ်ယၤလၢ ဒုၣ်ဒါ အစုပူၤဘၣ်,လၢတၢ်န့ၢ်အလီၢ် နဒုးဆၢထၢၣ်ယၤဖဲ တၢ်လီၢ်လၢ အအိၣ်ဒီး တၢ်ဘံၣ် တၢ်ဘၢလီၤ.
၉ အိ ယဟိဝၤယွၤဧၢ, ယဘၣ်ကိၢ်ဘၣ်ဂီၤအဃိ သးကညီၤယၤတက့ၢ်.
တၢ်သးအုး မၤစၢ်လီၤ ယမဲာ်ချံအဂံၢ်+ ဒီးယနီၢ်ခိ ဒီတဂၤညါလီၤ.+
၁၀ ယတၢ်အိၣ်မူအံၤ ပှဲၤဒီးတၢ်သးအုး+ဒီးတၢ်ကအုကစွါလီၤ.+
ခီဖျိလၢ ယတၢ်ကမၣ်အဃိ ယဂံၢ် ယဘါလီၤစၢ်ဒီးယဃံကၠီးထီၣ်လံ.+
၁၁ ယဒုၣ်ယဒါခဲလၢာ် လီၤဆီဒၣ်တၢ်ပှၤလၢယခိၣ်ယဃၢၤတဖၣ်န့ၣ် ထံၣ်ဆံးယၤလံ.+
ဒီးယသကိးတဖၣ်န့ၣ် ပျံၤယၤ သပှၢ်တၢၢ်လံ.
ဖဲအဝဲသ့ၣ် ထံၣ်ယၤလၢ တၢ်ချၢအခါန့ၣ် အဝဲသ့ၣ် ဃ့ၢ်ကွံာ်ဝဲလီၤ.+
၁၂ ဒ်ပှၤသံတဂၤလၢ ပှၤတသ့ၣ်နီၣ်ထီၣ်က့ၤအီၤလၢၤဘၣ် အသိးန့ၣ် အဝဲသ့ၣ် ထုးထီၣ်ယၤလၢ အခိၣ်နူာ်ပူၤလံ.
ယလီၤဂာ်ဒ် ပလီလၢ အသ့ၣ်ဖး တဖျၢၣ်လီၤ.
၁၃ ယနၢ်ဟူဘၣ် တၢ်ကစီၣ်လၢ အအၢအသီအါမံၤဒီးတၢ်လၢ အလီၤပျံၤလီၤဖုး အိၣ်ဝးတရံးယၤလီၤ.+
အဝဲသ့ၣ် ပာ်ဖှိၣ်အသး ဒ်သိး ကထီဒါယၤဒီးကူၣ်ထီၣ်လၢ ကမၤသံယၤလီၤ.+
၁၄ အိ ယဟိဝၤယွၤဧၢ, မ့မ့ၢ်ယၤန့ၣ် ယနာ်န့ၢ်နၤလီၤ.+
ဒီးယတဲလၢ “နမ့ၢ် ယကစၢ်ယွၤလီၤ.”+
၁၅ ယတၢ်အိၣ်မူန့ၣ် အိၣ်လၢနစုပူၤလီၤ.
မၤပူၤဖျဲးယၤလၢ ယဒုၣ်ယဒါ ဒီးပှၤလၢ အမၤအၢမၤနးယၤတဖၣ် အစုပူၤတက့ၢ်.+
၁၆ ပာ်ဖျါထီၣ်လၢ နဘၣ်သူၣ်ဘၣ်သး နခ့နပှၤ ယၤအံၤတက့ၢ်.+
မၤပူၤဖျဲးယၤ ခီဖျိ နတၢ်အဲၣ်လၢအတီတက့ၢ်.
၁၇ အိ ယဟိဝၤယွၤဧၢ, ဖဲယကိးထီၣ်နၤအခါ မ်ယသုတထံၣ်ဘၣ် တၢ်မဲာ်ဆှးတဂ့ၤ.+
မ်ပှၤအၢပှၤသီထံၣ်ဘၣ် တၢ်မဲာ်ဆှး+ဒီးမ်အဝဲသ့ၣ် အိၣ်ဘှ့ၣ်လၢ တၢ်သွၣ်ခိၣ်* အပူၤတက့ၢ်.+
၁၈ ပှၤလၢအလံၣ်တၢ်, ပှၤလၢအဒုၣ်ဒွဲၣ်စံးအၢ ပှၤတီပှၤလိၤ လၢတၢ်ပာ်ထီၣ်ထီသးအပူၤဒီးလၢတၢ်တပာ်ကဲဘၣ်အပူၤန့ၣ် မ်အတဲတၢ် သုတသ့လၢၤတဂ့ၤ.+
၁၉ နတၢ်ဂ့ၤတၢ်ဝါ အိၣ်ဝဲအါဒိၣ်မး+ဒီးနပာ်ဖှိၣ်ဃာ်အီၤလၢ ပှၤလၢအပျံၤနၤအဂီၢ်လီၤ.+
နပာ်ဖျါထီၣ်အီၤလၢ ပှၤခဲလၢာ်အမဲာ်ညါ လၢပှၤလၢ အဃုတၢ်အိၣ်သဒၢ လၢနအိၣ်တဖၣ် အဖီခိၣ်လီၤ.+
၂၀ ဖဲတၢ်အိၣ်ခူသူၣ်အလီၢ်လၢ အအိၣ်ဘူးဒီးနၤန့ၣ် နကပာ်သဒၢအဝဲသ့ၣ်+လၢပှၤကူၣ်အၢတၢ်တဖၣ် အစုပူၤလီၤ.
နကပာ်ခူသူၣ်ကွံာ် အဝဲသ့ၣ်လၢ နဒဲပူၤဒ်သိးကပာ်သဒၢအဝဲသ့ၣ် လၢပှၤလၢအတဲဆါတၢ်တဖၣ်လီၤ.+
၂၁ မ်ယဟိဝၤယွၤ ဘၣ်တၢ်စံးထီၣ်ပတြၢၤအီၤတက့ၢ်.
ဖဲယအိၣ်လၢ ဝ့ၢ်လၢအဘၣ် တၢ်ကဝီၤဃာ်အီၤ+ အပူၤအခါ အဝဲပာ်ဖျါထီၣ်န့ၢ်ယၤ အတၢ်အဲၣ်လၢအတီ+ လၢကျဲလၢ အလီၤကမၢကမၣ်လီၤ.
၂၂ မ့မ့ၢ်ယၤန့ၣ် ယပျံၤတၢ်ဖုးတၢ်ဒိၣ်မး ဒီးယတဲလၢ“ယကတုၤလၢတၢ်ဟးဂီၤ လၢနမဲာ်ညါလီၤ.”+
ဘၣ်ဆၣ် ဖဲယကိးပသူထီၣ် လၢနအိၣ်အခါ နနၢ်ဟူ ယတၢ်ဃ့ကညးလၢ တၢ်မၤစၢၤအဂီၢ်လီၤ.+
၂၃ ပှၤလၢအတီဒီး ယဟိဝၤယွၤ ခဲလၢာ်သ့ၣ်ဧၢ, အဲၣ်အီၤတက့ၢ်.+
ယဟိဝၤယွၤ ဒီသဒၢ ပှၤလၢ အသးတီ,+မ့မ့ၢ် ပှၤလၢအပာ်ထီၣ်ထီသးန့ၣ် အဝဲကဟ့ၣ်ကၣ်က့ၤဝဲ အါအါလီၤ.+
၂၄ ပှၤလၢအအိၣ်ခိး ယဟိဝၤယွၤ သ့ၣ်ဧၢ,+ပာ်သုသးဂၢၢ်ဂၢၢ်ကျၢၤကျၢၤ* ဒီးအိၣ်ဒီး တၢ်သူၣ်ဒူသးဒူတက့ၢ်.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သကူးလီၤသးလၢ ကဒိကနၣ်.”
^ အခီပညီလိၤလိၤ “ပှာ်ဧိၤစၤဧိၤ.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ပာ်ဆူၣ်သး.”
