စံးထီၣ်ပတြၢၤ ၃၃:၁-၂၂
၃၃ ပှၤတီပှၤလိၤသ့ၣ်ဧၢ, ခီဖျိလၢ တၢ်ခဲလၢာ်လၢ ယဟိဝၤယွၤ မၤဝဲအဃိ ကိးပသူထီၣ်လၢ တၢ်သူၣ်ခုသးခုအပူၤတက့ၢ်.+
ပှၤလၢအသးဘျၢတဖၣ် ကြၢးစံးထီၣ်ပတြၢၤအီၤလီၤ.
၂ သးဝံၣ် စံးဘျုးစံးဖှိၣ် ယဟိဝၤယွၤ ဃုာ်ဒီးတနၢ်ဒီးသးဝံၣ်စံးထီၣ်ပတြၢၤအီၤ ဃုာ်ဒီး သီတူၢ်လၢအအိၣ်ဒီး အပျံၤအဘိတဆံတက့ၢ်.
၃ သးဝံၣ်ထီၣ်အီၤလၢ တၢ်သးဝံၣ် အသီတယုၢ်,+ဒ့သီတူၢ်ဂ့ၤဂ့ၤဘၣ်ဘၣ် ဒီးကိးပသူထီၣ်လၢ တၢ်သးခုအပူၤတက့ၢ်.
၄ ယဟိဝၤယွၤ အတၢ်ကတိၤန့ၣ် တီဝဲလိၤဝဲ+ဒီးတၢ်လၢ အမၤဝဲခဲလၢာ်န့ၣ် ပနာ်န့ၢ်အီၤသ့လီၤ.
၅ ကစၢ်ယွၤအဲၣ် တၢ်တီတၢ်လိၤ ဒီးတၢ်စံၣ်ညီၣ်တီလီၤ.+
ဟီၣ်ခိၣ်န့ၣ်ပှဲၤဝဲဒီး ယဟိဝၤယွၤ အတၢ်အဲၣ်လၢအတီလီၤ.+
၆ ယဟိဝၤယွၤ တ့လီၤမူခိၣ် ခီဖျိလၢ အကလုၢ်+ဒီးအဝဲတ့လီၤ တၢ်ခဲလၢာ်လၢ အအိၣ်လၢမူခိၣ် ခီဖျိလၢ တၢ်ကသါလၢ* အဟဲထီၣ်လၢအထးခိၣ်လီၤ.
၇ အဝဲပာ်ဖှိၣ်ပီၣ်လဲၣ်အထံ ဒ်ထံတမၢၣ်အသိး+ဒီးထံလၢ အယွၤလီၤဆူၣ်ဆူၣ်န့ၣ် အဝဲပာ်ဝဲလၢ တၢ်ပာ်ဖှိၣ်အလီၢ်တဖၣ်လီၤ.
၈ မ်ပှၤခဲလၢာ်လၢ အအိၣ်လၢဟီၣ်ခိၣ်ချၢန့ၣ် ပျံၤယဟိဝၤယွၤတက့ၢ်.+
ဒီးမ်ပှၤဟီၣ်ခိၣ်ဖိခဲလၢာ် ယူးယီၣ်ပာ်ကဲအီၤတက့ၢ်.
၉ အဝဲတဲတၢ် ဝံၤဒီး တၢ်ကဲထီၣ်အသး,+အမၤလိာ်ဝဲ ဝံၤဒီး တၢ်ခဲလၢာ် ဟဲအိၣ်ထီၣ်ဝဲလီၤ.+
၁၀ ယဟိဝၤယွၤ မၤဟးဂီၤ ပှၤကလုာ်တဖၣ် အတၢ်ကူၣ်အၢ+ဒီးအဝဲမၤတံာ်တာ် ပှၤဂီၢ်မုၢ်တဖၣ် အတၢ်ကူၣ်ထီၣ်ဖးလီၤလီၤ.+
၁၁ မ့မ့ၢ် ယဟိဝၤယွၤ အတၢ်တိာ်ပာ်န့ၣ် ကအိၣ်ဂၢၢ်ကျၢၤဝဲ လီၤစိၤလီၤထီ+ဒီးအတၢ်ဘၣ်သးန့ၣ် အိၣ်ဝဲ အစိၤစိၤအဃၣ်ဃၣ်လီၤ.
၁၂ ပှၤတကလုာ်လၢ အယွၤမ့ၢ် ယဟိဝၤယွၤ+ဒီးပှၤဂီၢ်မုၢ်လၢ အဃုထၢထီၣ်ဝဲ လီၤလီၤဆီဆီလၢ အနီၢ်ကစၢ် အဂီၢ်န့ၣ်+ ကသးခုဝဲလီၤ.
၁၃ ယဟိဝၤယွၤ အိၣ်လၢမူခိၣ် ဒီးကွၢ်လီၤတၢ်ဒီးအဝဲထံၣ်ဝဲ ပှၤဟီၣ်ခိၣ်ဖိ ခဲလၢာ်လီၤ.+
၁၄ အဝဲအိၣ်လၢ အတၢ်အိၣ်တၢ်ဆိးအလီၢ်ဒီးကွၢ်စိလီၤဝဲ ပှၤလၢအအိၣ်လၢ ဟီၣ်ခိၣ်ချၢလီၤ.
၁၅ ကစၢ်ယွၤ တ့ဝဲ ပှၤကိးဂၤဒဲး အသူၣ်အသးဒီးအဝဲသမံသမိးကွၢ်ဝဲ အဝဲသ့ၣ် အတၢ်မၤခဲလၢာ်လီၤ.+
၁၆ စီၤပၤပူၤဖျဲးဝဲ ခီဖျိလၢ အသုးမုၢ်ဖးဒိၣ်တဖုအဃိ တသ့နီတဂၤဘၣ်.+
ဒီးပှၤလၢ အဂံၢ်ဆူၣ်ဘါဆူၣ်တဂၤ ပူၤဖျဲးဝဲ ခီဖျိ အနီၢ်ကစၢ် အတၢ်ဂံၢ်တၢ်ဘါ အဃိတသ့ဘၣ်.+
၁၇ ကသ့ၣ်အဂံၢ်ဆူၣ်ဘါဆူၣ် ဘၣ်ဆၣ် အတဟ့ၣ်တၢ်မၤနၢၤဘၣ်,ကသ့ၣ်ကမၤပူၤဖျဲး ပှၤကညီန့ၣ် မ့ၢ်ဝဲတၢ်မုၢ်လၢ် ခီလီလီလီၤ.+
၁၈ ယဟိဝၤယွၤ အမဲာ်ချံန့ၣ် ကွၢ်ထွဲဝဲပှၤလၢ အပျံၤအီၤတဖၣ်+ဒီးပှၤလၢအအိၣ်ခိးကွၢ်လၢ် အတၢ်အဲၣ်လၢအတီ
၁၉ ဒ်သိး ကမၤပူၤဖျဲး အဝဲသ့ၣ်လၢ တၢ်သံဒီးကပာ်မူအဝဲသ့ၣ် ဖဲတၢ်သၣ်ဝံၤလီၤဒိ အဆၢကတီၢ်န့ၣ်လီၤ.+
၂၀ ပအိၣ်ခိးကွၢ်လၢ် ယဟိဝၤယွၤလီၤ.
အဝဲမ့ၢ် ပှၤလၢအမၤစၢၤပှၤ ဒီးပကတီၤလီၤ.+
၂၁ ပနာ်န့ၢ် ကစၢ်ယွၤ အမံၤစီဆှံအဃိ+ပသးခုလၢ အဃိလီၤ.
၂၂ အိ ယဟိဝၤယွၤဧၢ, ဖဲပအိၣ်ခိးဒံးနၤ အဆၢကတီၢ်+မ်နတၢ်အဲၣ်လၢအတီ အိၣ်ဒီးပှၤတက့ၢ်.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သးစီဆှံ.”
