စံးထီၣ်ပတြၢၤ ၇၁:၁-၂၄
၇၁ အိ ယဟိဝၤယွၤဧၢ, ယဃုတၢ်အိၣ်သဒၢအလီၢ် လၢနအိၣ်လီၤ.
တဘၣ်ပျဲလၢ ယကထံၣ်ဘၣ် တၢ်မဲာ်ဆှးနီတဘျီတဂ့ၤ.+
၂ အုၣ်က့ၤခီၣ်က့ၤယၤ ဒီးမၤပူၤဖျဲးယၤ ခီဖျိ နတၢ်တီတၢ်လိၤတက့ၢ်.
ဒိးနနၢ်လၢယအိၣ်* ဒီးမၤပူၤဖျဲးယၤတက့ၢ်.+
၃ ကဲထီၣ်တၢ်အိၣ်တဒၢ အလၢၢ်တဖျၢၣ်လၢယလဲၤနုာ်လၢအပူၤ သ့ထီဘိန့ၣ်တက့ၢ်.
နမ့ၢ်ယလ့ ဒီးယတၢ်ပူၤဖျဲးအလီၢ်အဃိဟ့ၣ်လီၤတၢ်ကလုၢ်လၢ ပှၤကအုၣ်က့ၤခီၣ်က့ၤယၤတက့ၢ်.+
၄ အိ ကစၢ်ယွၤဧၢ, မၤပူၤဖျဲးယၤလၢ ပှၤအၢပှၤသီအစုပူၤ+ဒီးမၤပူၤဖျဲးယၤလၢ ပှၤတတီတလိၤလၢ အဆီၣ်တံၢ်မၤနၢၤတၢ် အတၢ်ဖီၣ်ဃံးန့ၣ်တက့ၢ်.
၅ အိ တၢ်ပၢကစၢ် ယဟိဝၤယွၤဧၢ, နမ့ၢ်ယတၢ်မုၢ်လၢ်ဒီးယနာ်န့ၢ်နၤလၢ ယနီၢ်ဆံးခါ လံၤလံၤလံ.+
၆ စးထီၣ်လၢ ယအိၣ်ဖျဲၣ်ထီၣ်န့ၣ် ယသန့ၤယသးလၢနၤဒီးပှၤလၢအထုးထီၣ်ယၤလၢ ယမိၢ်အဒၢလီၢ်န့ၣ် မ့ၢ်နၤလီၤ.+
ယစံးထီၣ်ပတြၢၤနၤ ထီဘိလီၤ.
၇ လၢပှၤအါဂၤအတၢ်ထံၣ်န့ၣ် ယလီၤဂာ်ဒ်သိးဒီး တၢ်လီၤလိၢ်လီၤလးတခါလီၤ.
ဘၣ်ဆၣ် ယသ့ၣ်ညါလၢ နမ့ၢ်ယတၢ်အိၣ်သဒၢအလီၢ်လၢ အကျၢၤလီၤ.
၈ ယထးခိၣ် ပှဲၤဒီး တၢ်စံးထီၣ်ပတြၢၤနၤ+ဒီးယကတဲ နတၢ်ဃံတၢ်လၤအဂ့ၢ် ဒီတနံၤကျၢၤလီၤ.
၉ ဖဲယသးပှၢ်ထီၣ်အခါ တဘၣ်ပာ်တ့ၢ်ကွံာ်ယၤတဂ့ၤ.+
ဒီးဖဲယဂံၢ်ယဘါ လၢာ်ကွံာ်အခါ တဘၣ်လဲၤသဒၣ်ယၤတဂ့ၤ.+
၁၀ ယဒုၣ်ယဒါတဖၣ် တဲအၢတဲသီယၤဒီးပှၤလၢအဃုမၤသံယၤန့ၣ် ကူၣ်အၢယၤ+
၁၁ ဒီးတဲဝဲလၢ “ကစၢ်ယွၤ ပာ်တ့ၢ်ကွံာ်အီၤလံ,ပှၤမၤပူၤဖျဲးအီၤ တအိၣ်နီတဂၤဘၣ်. ပလဲၤလူၤဖီၣ်အီၤဟီ.”+
၁၂ အိ ကစၢ်ယွၤဧၢ, တဘၣ်အိၣ်ယံၤဒီးယၤတဂ့ၤ.
အိ ယကစၢ်ယွၤဧၢ, ဟဲမၤစၢၤယၤမ့ၢ်ချ့.+
၁၃ ပှၤလၢအထီဒါယၤန့ၣ်မ်အဝဲသ့ၣ်ဒိးန့ၢ်ဘၣ် တၢ်မဲာ်ဆှး ဒီးဟးဂီၤကွံာ်တက့ၢ်.+
ပှၤလၢအအဲၣ်ဒိး မၤကီမၤခဲယၤန့ၣ်မ်ပှၤဒုၣ်ဒွဲၣ်ဒီး မၤမဲာ်ဆှး အဝဲသ့ၣ်တက့ၢ်.+
၁၄ မ့မ့ၢ်ယၤန့ၣ် ယကအိၣ်ခိးနၤထီဘိဒီးယကစံးထီၣ်ပတြၢၤ အါထီၣ်နၤလီၤ.
၁၅ ယထးခိၣ်ကတဲဖျါထီၣ် နတၢ်တီတၢ်လိၤလီၤ.+
နတၢ်အုၣ်က့ၤခီၣ်က့ၤအတၢ်မၤ အိၣ်ဝဲအါတလၢ တုၤဒၣ်လဲာ်ယသ့ၣ်ညါအီၤ* တလၢာ်ဘၣ်သနာ်က့ ယကတဲဖျါထီၣ်အီၤ ဒီတနံၤညါ.+
၁၆ အိ တၢ်ပၢကစၢ် ယဟိဝၤယွၤဧၢ,ယကလဲၤတဲဘၣ်ဃးဒီး နတၢ်မၤလၢ အဒိၣ်အမုၢ်တဖၣ်အဂ့ၢ်ဒီးယကတဲဖျါထီၣ် ထဲနၤတဂၤ အတၢ်တီတၢ်လိၤ အဂ့ၢ်လီၤ.
၁၇ အိ ကစၢ်ယွၤဧၢ, နသိၣ်လိယၤ စးထီၣ်လၢ ယသးစၢ်လံၤလံၤလံ.+
ဒီးယတဲဖျါထီၣ် နတၢ်မၤလၢ အလီၤလိၢ်လီၤလးတဖၣ်အဂ့ၢ် တုၤလၢခဲအံၤလီၤ.+
၁၈ အိ ကစၢ်ယွၤဧၢ, ယသးမ့ၢ်ပှၢ်ထီၣ် ဒီးယခိၣ်ဆူၣ်မ့ၢ်ဝါထီၣ် သနာ်က့ တဘၣ်ပာ်တ့ၢ်ကွံာ်ယၤတဂ့ၤ.+
ပျဲယတဲဘၣ် ပှၤလၢခံတစိၤ ဘၣ်ဃးဒီး နတၢ်စိတၢ်ကမီၤဒီးပျဲယတဲဘၣ် ပှၤလၢကဟဲလၢခံတဖၣ် ဘၣ်ဃးဒီး နတၢ်ဂံၢ်တၢ်ဘါတက့ၢ်.+
၁၉ အိ ကစၢ်ယွၤဧၢ, နတၢ်တီတၢ်လိၤ ဒိၣ်ဝဲဒိၣ်မး,+နမၤတ့ၢ်တၢ်လၢ အဒိၣ်အမုၢ်တဖၣ်လီၤ.
အိ ကစၢ်ယွၤဧၢ, ပှၤဒ်သိးဒီးနၤ တအိၣ်နီတဂၤဘၣ်.+
၂၀ နဒုးလဲၤခီဖျိယၤလၢ တၢ်ကိၢ်တၢ်ဂီၤ ဒီးတၢ်ကီတၢ်ခဲဒီဒူၣ်+ဘၣ်ဆၣ် မၤဆူၣ်ထီၣ်ကဒီး ယဂံၢ်ယဘါတက့ၢ်.
ထုးထီၣ်က့ၤယၤလၢ ဟီၣ်ခိၣ်အတၢ်ယိာ်* ပူၤတက့ၢ်.+
၂၁ ဝံသးစူၤ မၤအါထီၣ်ယလၤကပီၤ,အိၣ်ဝးတရံးယၤ ဒီးမၤမုာ်ထီၣ်က့ၤယၤတက့ၢ်.
၂၂ အိ ကစၢ်ယွၤဧၢ, ခီဖျိလၢ နတၢ်သးတီအဃိ+ယကဒ့သီတူၢ် ဒီးသးဝံၣ်စံးထီၣ်ပတြၢၤနၤလီၤ.
အိ အံၣ်စရ့လး အကစၢ်ယွၤလၢအစီဆှံတဂၤဧၢ,ယကဒ့တနၢ် ဒီးသးဝံၣ်စံးထီၣ်ပတြၢၤနၤလီၤ.
၂၃ နမၤပူၤဖျဲးတ့ၢ် ယသးသမူ* အဃိ+ဖဲယသးဝံၣ် စံးထီၣ်ပတြၢၤနၤအခါ ယထးခိၣ် ကကိးပသူထီၣ်လၢ တၢ်သူၣ်ခုသးခုအပူၤလီၤ.+
၂၄ ယပျ့ၤကတဲ* ဘၣ်ဃးဒီး နတၢ်တီတၢ်လိၤအဂ့ၢ် ဒီတနံၤကျၢၤလီၤ.+
ပှၤလၢအလူၤမၤဟးဂီၤယၤန့ၣ် ကဒိးန့ၢ်ဘၣ် တၢ်မဲာ်ဆှးလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သကူာ်လီၤသးလၢ ကဒိကနၣ်.”
^ မ့ၢ်စ့ၢ်ကီး “ဂံၢ်ထီၣ်ဒွးထီၣ်အီၤ.”
^ မ့ၢ်စ့ၢ်ကီး “ထံယိာ်.”
^ မ့ၢ်စ့ၢ်ကီး “ပှ့ၤက့ၤ ယသးသမူ.”
^ မ့ၢ်စ့ၢ်ကီး “ဆိကမိၣ်ထံ.”
