စံးထီၣ်ပတြၢၤ ၇၅:၁-၁၀
-
ကစၢ်ယွၤ စံၣ်ညီၣ်တၢ် တီတီလိၤလိၤ
-
ပှၤအၢပှၤသီ ကအီဝဲ ယဟိဝၤယွၤ အခွး (၈)
-
လၢတၢ်သူၣ်ဝံၣ်သးဆၢအခိၣ်အဂီၢ်. ဒ် “တဘၣ်မၤဟးဂီၤယၤတဂ့ၤ” အသီၣ်အိၣ်ဝဲအသိး. စီၤအၤစာ်အထါ.+
၇၅ ပစံးဘျုးနၤ, အိ ကစၢ်ယွၤဧၢ, ပစံးဘျုးနၤလီၤ.
နမံၤ အိၣ်ဒီးပှၤ+ဒီးပှၤဟီၣ်ခိၣ်ဖိ တဲဖျါထီၣ် နတၢ်မၤလၢ အလီၤကမၢကမၣ်တဖၣ်လီၤ.
၂ နတဲလၢ “ယပာ်ပနီၣ် တၢ်ဆၢကတီၢ်လၢ ယကစံၣ်ညီၣ်တၢ်ဝံၤဒီးယစံၣ်ညီၣ်တၢ် တီတီလိၤလိၤလီၤ.
၃ ဖဲဟီၣ်ခိၣ် ဒီးပှၤလၢ ဟီၣ်ခိၣ်ချၢခဲလၢာ် ဟူးဝးဝဲ* အခါယမ့ၢ်ပှၤလၢ အဖီၣ်ဂၢၢ်ဃာ် ဟီၣ်ခိၣ်အထူၣ်တဖၣ်လီၤ.” (စ့လၤ)
၄ ပှၤလၢအပာ်ကဖၢလၢသးန့ၣ် ယတဲအီၤလၢ “ပာ်ကဖၢလၢ သုသးလၢၤတဂ့ၤ.”
ဒီးပှၤအၢပှၤသီန့ၣ် ယတဲအီၤလၢ “တဘၣ်တဲဂ့ၤလီၤသုသးလၢ သုဂံၢ်ဆူၣ်အဃိတဂ့ၤ.
၅ တဘၣ်တဲဂ့ၤလီၤသုသးလၢ သုဂံၢ်ဆူၣ်ဒိၣ်မးအဃိတဂ့ၤ.
ဒီးတဘၣ်တဲတၢ်လၢ တၢ်ပာ်ထီၣ်ထီသးအပူၤတဂ့ၤ.
၆ ပှၤဟီၣ်ခိၣ်ဖိ အတၢ်လၤကပီၤန့ၣ်တဟဲလၢ မုၢ်ထီၣ်မ့ၢ်ဂ့ၤ, မုၢ်နုာ်မ့ၢ်ဂ့ၤ, လၢကလံၤထံးမ့ၢ်ဂ့ၤဘၣ်.
၇ ကစၢ်ယွၤ မ့ၢ်စံၣ်ညီၣ်ကွီၢ်တဂၤလီၤ.+
အဝဲဆီၣ်လီၤပှၤတဂၤ ဒီးပာ်ထီၣ်ထီ ပှၤလၢအဝဲတဂၤလီၤ.+
၈ လၢယဟိဝၤယွၤ အစုပူၤန့ၣ် အိၣ်ဒီးခွးလၢ+အပှဲၤဝဲဒီးစပံးထံလၢ အသဘှဲထီၣ် ဒီးအဃါဃုာ်အသးဒီး တၢ်နၢမူနၢဆှီတဖၣ်လီၤ.
အဝဲကလူလီၤဝဲဒီးပှၤအၢပှၤသီလၢ ဟီၣ်ခိၣ်ချၢခဲလၢာ်န့ၣ် ကအီဝဲတုၤလၢ အခံဒးလီၤ.”+
၉ မ့မ့ၢ်ယၤန့ၣ် ယကတဲဖျါထီၣ် တၢ်လၢကစၢ်ယွၤ မၤတ့ၢ်ဝဲ လီၤစိၤလီၤထီလီၤ.
ဒီးယကသးဝံၣ် စံးထီၣ်ပတြၢၤ စီၤယၤကိာ် အကစၢ်ယွၤ,
၁၀ မ့ၢ်လၢ ကစၢ်ယွၤတဲဝဲလၢ “ယကမၤတဲာ်ကွံာ် ပှၤအၢပှၤသီ အဂံၢ်အဘါ,မ့မ့ၢ် ပှၤတီပှၤလိၤန့ၣ် အဂံၢ်အဘါကအါထီၣ်ဝဲလီၤ.”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ပှံၢ်လီၤဝဲ.”
