တၢ်သးဝံၣ်တဖၣ်အတၢ်သးဝံၣ် ၂:၁-၁၇
၂ ပှၤၡူလမးမုၣ်ဖိ တဲဝဲလၢ “ယမ့ၢ်ဒၣ် ဖီဝံဒံၣ်တဖီးလၢ ပီၣ်လဲၣ်ကၢၢ်ခိၣ်ဒီးဖီဒ့ၣ်ညါတဖီးလၢ တၢ်တြီၤပူၤလီၤ.”+
၂ ပှၤကွၢ်သိဖိ တဲဝဲလၢ “လၢမုၣ်လိၣ်ဘိတဖၣ်အကျါန့ၣ် ယသးခိၣ်မ့ လီၤဂာ်ဒီးဖီဒ့ၣ်ညါတဖီးလၢ တၤဆှုၣ်တၤမဲ အကျါလီၤ.”
၃ ပှၤၡူလမးမုၣ်ဖိ တဲဝဲလၢ “လၢဖိၣ်သၣ်ခွါတဖၣ် အကျါန့ၣ် ယပှၤသးဘိလီၤဂာ်ဒ်သိးဒီး ဖီသၣ်အထူၣ်တထူၣ်လၢ သ့ၣ်လၢပှၢ်လၢ်ကျါတဖၣ် အကျါလီၤ.
ယအဲၣ်ဒိးဆ့ၣ်နီၤဘၣ်ယဲလၢ အကဒုလာ် သပှၢ်တၢၢ်ဒီးအသၣ်တဖၣ်န့ၣ် ဝံၣ်ဘၣ် ယၤလီၤ.
၄ အဝဲလဲၤကိးယၤလၢ တၢ်အီၣ်မူး အဒၢး,အတၢ်အဲၣ် မ့ၢ်ထဲလၢယဂီၢ်န့ၣ် ပှၤထံၣ်ဝဲသ့ ကိးဂၤဒဲးလီၤ.
၅ မ့ၢ်လၢ ယဘၣ်ဒိလၢ တၢ်အဲၣ်အဃိမၤဖှံထီၣ်ယသးလၢ စပံးသၣ်ဃ့တဖၣ်+ဒီးမၤဆူၣ်ထီၣ်ယဂံၢ်ယဘါ လၢဖီသၣ်တဖၣ်မီၤ.
၆ ယတခၢၣ်ဃာ် အစုလၢအစ့ၣ်တခီဒီးအစုထွဲ ဖိးဟုယၤလီၤ.+
၇ ပှၤယရူၤၡလ့ၣ်မုၣ်သ့ၣ်ဧၢ, ယကမၢသုအၢၣ်လီၤတၢ်လၢတၤဟိမိၢ်ဒီးတၤဟိဖါလၢ+ အအိၣ်လၢ တၢ်ပျီပူၤ အမဲာ်ညါလီၤ.
ယတၢ်အဲၣ် မ့ၢ်တဟဲအိၣ်ထီၣ် အနီၢ်ကစၢ်ဒံးဘၣ်န့ၣ် တဘၣ် ဂုာ်ကျဲးစၢး ထိၣ်ဟူးထိၣ်ဂဲၤထီၣ် ယတၢ်အဲၣ်တဂ့ၤ.+
၈ အိ ယပှၤသးဘိ အကလုၢ်မၢၤ.
အဟဲဝဲလံ.
အဟဲလၢ ကစၢၢ်ကလိတဖၣ်အကျါ ဒီးဟဲဃ့ၢ်ဝဲလၢ တၢ်လူၢ်တဖၣ် အကျါလံ.
၉ ယပှၤသးဘိန့ၣ် လီၤဂာ်ဒီး တၤဟိ ဒီးတၤဃီၤဖါဖိလီၤ.+
အဝဲဆၢထၢၣ်လၢ ပတၢ်ဒူၣ်အလီၢ်ခံဒီးကွၢ်စိဃီၤတၢ်လၢ ပဲတြီဖိအပူၤဒီးကွၢ်ဃီၤတၢ်လၢ ပဲတြီဖိ အတၢ်ထူၣ်ဖျိတဖၣ် အပူၤလီၤ.
၁၀ ယပှၤသးဘိ တဲယၤလၢ‘ယသးခိၣ်မ့ဧၢ, ဂဲၤဆၢထၢၣ်,ယမုၣ်ဃံလၤဖိဧၢ, က့ၤပိာ်ယခံဟီ.
၁၁ တၢ်ဂိၢ်ခါ လဲၤတလၢကွံာ်ဒီးတၢ်စူၤခါ ပူၤကွံာ်လံ.
၁၂ ဖီဖိတဖၣ် ဘိၣ်ထီၣ်ဖးထီၣ်ဝဲလၢ ကီၢ်ပူၤလံ.+
အခါဘၣ်လၢ ပှၤကတံာ် စပံးဒ့တဖၣ်လံ.+
ဒီးပှၤနၢ်ဟူဘၣ် ထိၣ်လွံၢ်ဖိတဖၣ် ပှ့ၤထီၣ်ဝဲလၢ ပကီၢ်ပူၤလံ.+
၁၃ ချၢၣ်ဒၢသၣ်လၢ အသၣ်ဆိန့ၣ် မံထီၣ်လံ.+
စပံးမုၢ်တဖၣ် ဘိၣ်ထီၣ်ဖးထီၣ် ဒီးဟ့ၣ်ထီၣ် တၢ်နၢမူလံ.
ယသးခိၣ်မ့ဧၢ, ဂဲၤဆၢထၢၣ်,ယမုၣ်ဃံလၤဖိဧၢ, က့ၤပိာ်ယခံဟီ.
၁၄ ယထိၣ်လွံၢ်ဖိလၢ အအိၣ်လၢ လၢၢ်ကဆူး+ဒီးအအိၣ်ခူသူၣ်လၢ တၢ်အိၣ်ခူသူၣ်အလီၢ် လၢလ့ကပၤဧၢ,မ့ၢ်လၢ နကလုၢ်မုာ်ကထါဆၢ ဒီးနဒိၣ်တၢ်လီၤအဲၣ်လီၤကွံအဃိ+ဟ့ၣ်ကွၢ်ယၤလၢနမဲာ်ဖိ ဒီးဒုးနၢ်ဟူယၤလၢ နကလုၢ်ဖိမီၤ.’”+
၁၅ ပှၤၡူလမးမုၣ်ဖိ အကၠီတဖၣ် တဲဝဲလၢ “ပစပံးမုၢ်တဖၣ် ဖီထီၣ်ဖးထီၣ်လံ.
ထွံၣ်မံၤတဖၣ်လၢ အမၤဟးဂီၤ စပံးကျီးတဖၣ်န့ၣ်လူၤဖီၣ်အဝဲသ့ၣ်သၢၤ.”
၁၆ ပှၤၡူလမးမုၣ်ဖိ တဲဝဲလၢ “ယပှၤသးဘိန့ၣ် မ့ၢ်ယတၢ် ဒီးယမ့ၢ်အတၢ်လီၤ.+
ဒီးအဝဲကွၢ်သိလၢ+ ဖီဒ့ၣ်ညါတဖၣ် အကျါလီၤ.+
၁၇ ယပှၤသးဘိဧၢ, တချုးဖဲ ကလံၤဖိဟဲအူထီၣ် ဒီးသ့ၣ်ကဒုဝၣ်ကဒု ဟါမၢ်ကွံာ်ဒံးဘၣ်န့ၣ်ဟဲက့ၤချ့ချ့နီၤ.
ဒ်တၤဟိ+ မ့တမ့ၢ် တၤဃီၤဖါဖိ တဒုအသိးန့ၣ်+ ဟဲခီဂာ် ကစၢၢ်တဖၣ်လၢ အမၤလီၤဖးပှၤနီၤ.
