တၢ်သးဝံၣ်တဖၣ်အတၢ်သးဝံၣ် ၆:၁-၁၃
၆ ပှၤယရူၤၡလ့ၣ်မုၣ်တဖၣ် တဲဝဲလၢ “အိ မုၣ်ဃံလၤဖိလၢ အလီၤအဲၣ်ဒိၣ်ကတၢၢ်ဧၢ,နပှၤသးဘိ လဲၤဖဲလဲၣ်.
အလဲၤဖဲလဲၣ် တတီၤလဲၣ်.
ပကလဲၤဃုစၢၤနၤမီၤ.”
၂ ပှၤၡူလမးမုၣ်ဖိ တဲဝဲလၢ “ယပှၤသးဘိန့ၣ် လဲၤလီၤလၢ အတၤသၣ်လီၢ်ပူၤလံ.
အလဲၤဝဲဆူ ကရၢၢ်လၢ ဖီနၢမူတဖၣ် မဲထီၣ်ဝဲဒ်သိး ကကွၢ်အသိတဖၣ်လၢ တၤသၣ်လီၢ်တဖၣ်အကျါဒီးကဒဲးဝဲ ဖီဒ့ၣ်ညါတဖၣ် အဂီၢ်လီၤ.+
၃ ယမ့ၢ် ယပှၤသးဘိအတၢ်ဒီးယပှၤသးဘိန့ၣ် မ့ၢ်ယတၢ်လီၤ.+
ဒီးအဝဲကွၢ်သိလၢ ဖီဒ့ၣ်ညါတဖၣ် အကျါလီၤ.”+
၄ စီၤပၤတဲဝဲလၢ “ပှၤလၢယအဲၣ်ဘၣ်အီၤတဂၤဧၢ,+ နဃံလၤ ဒ်သိးဒီး ဝ့ၢ်တံးရစၣ်*+ဒီးနလီၤအဲၣ်လီၤကွံဒ် ဝ့ၢ်ယရူၤၡလ့ၣ် အသိးလီၤ.+
ဒီးနဒုးလီၤကတုၤယသး ဒ်သုးမုၢ်တဖၣ်လၢ အပာ်ဖှိၣ်ထီၣ်အသးလၢ ကဒုးတၢ် အဂီၢ်လီၤ.+
၅ ဖဲနကွၢ်ယၤအခါ ယသးတအိၣ်လၢ ယလိၤလၢၤဘၣ်,အဃိ ဃၣ်ကွံာ်နမဲာ် လၢယအိၣ်သၢၤ.+
နခိၣ်ဆူၣ်န့ၣ် လီၤဂာ်ဒ်သိးဒီး မဲာ်တဲးလဲးတဖုလၢအဟဲလီၤလၢ ကံးလဧး အ တၢ်လီၤဘံလီၤ.+
၆ နမဲဝါဝါဖိတဖၣ် လီၤဂာ်ဒ် သိတဖုလၢပှၤဒုးလုၢ်အီၤထံဝံၤ အသိးလီၤ.
နမဲတဖၣ်န့ၣ် လီၤဂာ်ဒ်သိဖိသဃံာ်လၢအတလီၤမၢ် နီတဒုဘၣ် အသိးလီၤ.
၇ နဘိးပၤဖိခံခီလၢ အအိၣ်လၢ တၢ်ကျၢၢ်ဘၢမဲာ် အဖီလာ်န့ၣ်ဂီၤဒ်သိးဒီး သလဲသၣ် သ့ၣ်ဖး တခီလီၤ.
၈ ယနီၢ်ပၤမုၣ် အိၣ်ဝဲ အဂၤ ၆၀ဒီးယသံၣ်မါ* အိၣ်ဝဲ အဂၤ ၈၀ဒီးယမုၣ်လိၣ်ဘိတဖၣ်န့ၣ် ပှၤဂံၢ်အီၤတလၢာ်ဘၣ်.+
၉ ဘၣ်ဆၣ် ထဲဒၣ်အီၤန့ၣ် အမ့ၢ်ဝဲ ယထိၣ်လွံၢ်ဖိ+ ဒီးပိာ်မုၣ်လၢပှဲၤလီၤ.
အဝဲမ့ၢ် ဖိမုၣ်လီၤဆီကတၢၢ်တဂၤ လၢအမိၢ်အဂီၢ်လီၤ.
ဒီးမ့ၢ်ဖိမုၣ်လၢ အမိၢ်အဲၣ်အီၤ ဒိၣ်ကတၢၢ်လီၤ.
ဖဲပိာ်မုၣ်သးစၢ်တဖၣ် ထံၣ်အီၤအခါ ပတြၢၤအီၤလီၤ.
နီၢ်ပၤမုၣ်တဖၣ် ဒီးသံၣ်မါတဖၣ်စ့ၢ်ကီး ပတြၢၤအီၤလီၤ.
၁၀ ပှၤပိာ်မုၣ်တဖၣ် တဲဝဲလၢ ‘အဝဲ ကပီၤဝဲဒ် မုၢ်ဝါထီၣ် အတၢ်ကပီၤဒီးဃံလၤဝဲ ဒ်လါဖိကပီၤအသိးဒီးအစီဆှံဝဲဒ် မုၢ်အတၢ်ကပီၤအသိးဒီးအဒုးလီၤကတုၤယသး ဒ်သုးမုၢ်တဖၣ်လၢ အပာ်ဖှိၣ်ထီၣ်အသးလၢ ကဒုးတၢ် အဂီၢ်လီၤ.’”+
၁၁ ပှၤၡူလမးမုၣ်ဖိ တဲဝဲလၢ “ယလဲၤလီၤလၢ တၤသၣ်လီၢ်လၢ အအိၣ်ဒီး သ့ၣ်သူဝၣ်သၣ် အထူၣ်တဖၣ်+ဒ်သိးယကလဲၤကွၢ် တၢ်လၢအဟဲဘိၣ်ထီၣ်ဖးထီၣ်တဖၣ် လၢတၢ်တြီၤပူၤဒီးဒ်သိး ယကလဲၤကွၢ် စပံးမုၢ်တဖၣ် ဟဲဒိးထီၣ်လံဧါ,ဒီးသလဲထူၣ်တဖၣ် ဟဲဖီထီၣ် ဖးထီၣ်လံဧါ.
၁၂ ခီဖျိလၢ ယအဲၣ်ဒိးလဲၤကွၢ် တၢ်သ့ၣ်တဖၣ်န့ၣ်အဃိယလဲၤဘၣ်အတီၤလၢယပှၤကလုာ် အပှၤဒိၣ်ပှၤပှၢ် အလ့ၣ်ကဟၣ်တဖၣ် အိၣ်ဝဲအလီၢ်လီၤ.”
၁၃ စီၤပၤဒီးပှၤဂၤတဲဝဲလၢ “အိ, ပှၤၡူလမးမုၣ်ဖိဧၢ, ဟဲက့ၤနီၤ. ဟဲက့ၤနီၤ.
ပအဲၣ်ဒိးကွၢ်နၤအဃိဟဲက့ၤနီၤ, ဟဲက့ၤနီၤ.”
ပှၤၡူလမးမုၣ်ဖိ တဲဝဲလၢ “ဘၣ်မနုၤအဃိ သုအဲၣ်ဒိးကွၢ်ယၤ, ပှၤၡူလမးမုၣ်ဖိလဲၣ်.”+
စီၤပၤဒီးပှၤဂၤ တဲဝဲလၢ “အဝဲလီၤဂာ်ဒ် ပှၤဂဲၤကလံၣ် ခံဖုအသိးလီၤ.”*
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဝ့ၢ်လၢအမုာ်.”
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “မၤဃန့ၤ အတၢ်ဂဲၤကလံၣ်.”
