နၤဃူၣ် ၁:၁-၁၅
၁ အဝဲအံၤမ့ၢ် တၢ်စံၣ်ညီၣ်အကစီၣ်လၢဘၣ်ဃးဒီး ဝ့ၢ်နံၤနဝ့+ ဒီးမ့ၢ်ဝဲလံာ်လၢ အပာ်ဖျါထီၣ် စီၤအ့လကိၤၡးအဖိခွါ စီၤနၤဃူၣ်* အတၢ်ထံၣ်လၢညါခီလီၤ.
၂ ယဟိဝၤယွၤ မ့ၢ်ကစၢ်လၢ အမၤလိာ်ဝဲလၢပှၤကဘၣ် တီဒီးအီၤလၢ သးဒီဖျၢၣ်+ ဒီးမ့ၢ်ကစၢ်လၢ အဟ့ၣ်ကၣ်တၢ်လီၤ.
ယဟိဝၤယွၤန့ၣ် ဟ့ၣ်ကၣ်တၢ် ဒီးအိၣ်ကတဲာ်ကတီၤအသး လၢကပာ်ဖျါထီၣ် အတၢ်သးဒိၣ်လီၤ.+
ယဟိဝၤယွၤ ကဟ့ၣ်ကၣ် အဒုၣ်အဒါတဖၣ်ဒီးအပာ်ဖှိၣ်ဃာ် အတၢ်သးဒိၣ်လၢ အဒုၣ်အဒါတဖၣ် အဂီၢ်လီၤ.
၃ ယဟိဝၤယွၤန့ၣ် အစိအကမီၤဒိၣ်ဝဲ+ ဒီးတသးဒိၣ်ထီၣ်တၢ် ချ့ချ့ဘၣ်.+
ဘၣ်ဆၣ် ပှၤလၢအမၤ တၢ်ဒဲးဘးန့ၣ် လ့ၤတက့ၤ ယဟိဝၤယွၤ တပျဲဝဲလၢ အဝဲသ့ၣ်ကပူၤဖျဲးဒီး တၢ်စံၣ်ညီၣ်ဘၣ်.+
ဖဲအဟဲဝဲအခါ အဟဲဝဲဒီး ကလံၤမုၢ်လၢ အမၤဟးဂီၤတၢ်ဒီးတၢ်အၢၣ်တဖၣ်န့ၣ် မၤအသးဒ် ဟီၣ်ခိၣ်ကမူၣ်အသိးလၢ အခီၣ်ဖီလာ်လီၤ.+
၄ အဝဲဒူဝဲ ပီၣ်လဲၣ်+ ဒီးမၤလီၤသံးကွံာ် ဝဲလီၤ.
ဒီးအဝဲ မၤလီၤသံးကွံာ် ထံကျိတဖၣ် ခဲလၢာ်လီၤ.+
ဒီးဘၤၡၣ် ဒီးကၢ်မ့ၤလး ဃ့ထီကွံာ်ဝဲ+ဒီးတၢ်မုၢ်တၢ်ဘိလၢ လဘၤနိၣ်န့ၣ် လီၤညွံးလီၤဘဲကွံာ်ဝဲလီၤ.
၅ ကစၢၢ်ကလိတဖၣ် ဟူးဝးဝဲလၢအဃိဒီးတၢ်လူၢ်တဖၣ် ပှံၢ်လီၤဝဲလီၤ.+
ခီဖျိလၢ အလီၣ်ဖျါထီၣ်အသးအဃိ ဟီၣ်ခိၣ်ကဟူးဝးဝဲဃုာ်ဒီးတၢ်လီၢ်တၢ်ကျဲ ဒီးပှၤလၢအအိၣ်လၢ အပူၤတဖၣ်လီၤ.+
၆ ဖဲအသးဒိၣ်ထီၣ်တၢ်အခါ မတဂၤ ဆၢထၢၣ်လၢ အမဲာ်ညါ ကကဲတဂၤလဲၣ်.+
မတဂၤ တူၢ်အတၢ်သးဒိၣ်ဖးဒိၣ် ကန့ၢ်တဂၤလဲၣ်.+
အတၢ်သးဒိၣ် ကလူလီၤအသးဒ် မ့ၣ်အူအသိးဒီးလၢၢ်တဖၣ် ကလီၤကလဲကွံာ် လၢအဃိလီၤ.
၇ ယဟိဝၤယွၤန့ၣ် ဂ့ၤဝဲလီၤ.+ ဒီးဖဲတၢ်ကိၢ်တၢ်ဂီၤ အမုၢ်နံၤန့ၣ် အဝဲ မ့ၢ်တၢ်အိၣ်သဒၢ အလီၢ်လီၤ.+
ဒီးအဝဲသ့ၣ်ညါ* ပှၤလၢအဃု တၢ်ပူၤဖျဲး လၢအအိၣ်လီၤ.+
၈ ဒီးကစၢ်ယွၤ ကမၤဟးဂီၤကွံာ် ဝ့ၢ်နံၤနဝ့* လၢာ်လၢာ်ဆ့ဆ့ ခီဖျိလၢ ထံလုၢ်ဘၢတၢ်လၢ အယွၤလီၤ ဆူၣ်ဆူၣ် အဃိလီၤ.
ဒီးကစၢ်ယွၤ အဒုၣ်အဒါတဖၣ်န့ၣ် ကဘၣ်အိၣ်လၢ တၢ်ခံးသူကျါလီၤ.
၉ အဝဲသ့ၣ်ကူၣ်ထီၣ်တၢ်အၢ ဒ်သိးကထီဒါ ယဟိဝၤယွၤအဂီၢ် ကသ့ဒ်လဲၣ်.
အဝဲကမၤဟးဂီၤတၢ် လၢာ်လၢာ်ဆ့ဆ့ဒီးအတလိၣ် မၤဟးဂီၤတၢ် ခံဘျီဘၣ်.+
၁၀ ပှၤနံၤနဝ့ဖိတဖၣ်န့ၣ် လီၤဂာ်ဒ်သိးဒီး တၤဆှုၣ်တၤမဲလၢ အခဲတဖၣ်ဒီးအဝဲသ့ၣ် လီၤဂာ်ဒီး ပှၤမူၤဘံၤယၤလီၤ.
ဘၣ်ဆၣ် အဝဲသ့ၣ် ကအူအီၣ်ဒ် လီၢ်ဘိဃ့ အသိးလီၤ.
၁၁ ပှၤတဂၤလၢအဟဲထီၣ်လၢ န* ပူၤန့ၣ် အကကူၣ်ထီၣ်တၢ်အၢ ဒ်သိးကထီဒါ ယဟိဝၤယွၤအဂီၢ်ဒီးအကဟ့ၣ်ထီၣ် တၢ်ဟ့ၣ်ကူၣ်လၢ အတကဲဘျုးဘၣ်တဖၣ်လီၤ.
၁၂ ယဟိဝၤယွၤ တဲဝဲလၢ“ပှၤအၤၡူၢ်ဖိတဖၣ်န့ၣ်* အဂံၢ်ဆူၣ်ဘါဆူၣ် ဒီးအနီၣ်ဂံၢ် အါဝဲဒိၣ်မးဘၣ်ဆၣ် အဝဲသ့ၣ် ကဘၣ်တၢ်ဒီၣ်တဲာ်ကွံာ်အီၤ ဒီးကသံဝဲလီၤ.
အိ ယူဒၤဧၢ, လၢညါန့ၣ် ယသိၣ်ဃီၣ်သု ဘၣ်ဆၣ် ယတသိၣ်ဃီၣ် သုလၢၤဘၣ်.
၁၃ ယကမၤကၢ်ကွံာ် ပှၤအၤၡူၢ်ဖိ* အနီၣ်ယိးဘိလၢ အအိၣ်လၢသုလိၤ+ဒီးတၢ်လၢအစၢဃာ်သုန့ၣ် ယကမၤတဲာ်ကွံာ်အီၤ ခံကူာ်လီၤ.
၁၄ ဝ့ၢ်နံၤနဝ့ဧၢ,* ဘၣ်ဃးဒီးနၤန့ၣ် ယၤ, ယဟိဝၤယွၤ တဲဝဲလၢ‘နမံၤ တအိၣ်ဂၢၢ်ကျၢၤလၢၤဘၣ်.
ယကမၤဟးဂီၤကွံာ် တၢ်ဂီၤတၢ်ဖှီၣ်တဖၣ် ဒီးတၢ်ဂီၤတၢ်ဖှီၣ်ထးတဖၣ် လၢအအိၣ်လၢ နယွၤတဖၣ် အတၢ်လုၢ်ဟံၣ်အပူၤလီၤ.
ဒီးမ့ၢ်လၢ နလီၤသးဘၣ်အၢအဃိ ယကခူၣ်လီၤ တၢ်သွၣ်ခိၣ် လၢနဂီၢ်လီၤ.’
၁၅ ကွၢ်မီၤ, လၢကစၢၢ်လိၤန့ၣ် ပှၤစိာ် တၢ်သးခုကစီၣ်ဒီးပှၤလၢ အစံၣ်တဲၤတဲလီၤ တၢ်မုာ်တၢ်ခုၣ် အကစီၣ်န့ၣ် ဟဲလံ.+
ယူဒၤဧၢ, မၤသုဘူၣ်တဖၣ်+ ဒီးမၤလၢပှဲၤသုတၢ်အၢၣ်လီၤ ဒ်သုအၢၣ်လီၤအသိးတက့ၢ်.
ပှၤအၢပှၤသီတဖၣ်န့ၣ် တဟဲဒုးသုလၢၤဘၣ်.
ဒီးအဝဲသ့ၣ် ကဘၣ်တၢ်မၤဟးဂီၤကွံာ်အီၤ လၢာ်လၢာ်ဆ့ဆ့လီၤ.”
တၢ်ဂ့ၢ်အဘျဲၣ်တဖၣ်
^ အခီပညီမ့ၢ်ဝဲ “ပှၤမၤမုာ်ထီၣ်တၢ်.”
^ မ့ၢ်စ့ၢ်ကီး “ကွၢ်ထွဲ.”
^ အခီပညီလိၤလိၤ “အတၢ်လီၢ်.”
^ မ့ၢ်ဝဲ ဝ့ၢ်နံၤနဝ့.
^ အခီပညီလိၤလိၤ “အဝဲသ့ၣ်.”
^ အခီပညီလိၤလိၤ “အဝဲ.”
^ မ့ၢ်စ့ၢ်ကီး “ပှၤအၤၡူၢ်ဖိ.”
