နၤဃူၣ် ၂:၁-၁၃
၂ ဝ့ၢ်နံၤနဝ့ဧၢ, ပှၤလၢအမၤ လီၤပြံလီၤပြါတၢ်တဂၤန့ၣ် အဟဲထီၣ်ထီဒါနၤလံ.+
အဃိ ဒီသဒၢ နဝ့ၢ်ဒူၣ်တဖၣ်ဒီးခိးကွၢ်ကျဲတက့ၢ်.
အိၣ်ကတဲာ်ကတီၤပာ်စၢၤနသး ဒီးမၤဆူၣ်ထီၣ် နဂံၢ်နဘါလၢ တၢ်ဒုးအဂီၢ်တက့ၢ်.
၂ ယဟိဝၤယွၤ ကဒုးအိၣ်ထီၣ်က့ၤ စီၤယၤကိာ်အစၢၤအသွဲၣ် အတၢ်လၤကပီၤဒီးအံၣ်စရ့လး အတၢ်လၤကပီၤ,မ့ၢ်လၢ လၢညါန့ၣ် ဒုၣ်ဒါတဖၣ် မၤဟးဂီၤ အဝဲသ့ၣ်+ဒီးမၤဟးဂီၤကွံာ် အဝဲသ့ၣ် အစပံးမုၢ်တဖၣ်လီၤ.
၃ ပှၤနံၤနဝ့ဖိ အဒုၣ်အဒါ အကတီၤတဖၣ်န့ၣ် ဂီၤဝဲဒီးပှၤသုးဖိတဖၣ် ကူသိးဝဲ တၢ်ဂီၤဆှုၣ်ကလာ်လီၤ.
ဖဲအဝဲသ့ၣ် ကတဲာ်ကတီၤအသးလၢ တၢ်ဒုးအဂီၢ်အခါထးလၢ အဝဲသ့ၣ် ထီထီၣ်ဝဲလၢ အလ့ၣ်ကဟၣ်သုးတဖၣ်အလိၤန့ၣ် ကပီၤဝဲ ဒ်မ့ၣ်အူအသိးလီၤ.
ဒီးအဝဲသ့ၣ် အဘီလၢ အဘၣ်တၢ်တ့အီၤလၢ သ့ၣ်ကၠူနံးဖၢၤန့ၣ် အဝဲသ့ၣ် ယၤထီၣ်ဝဲလံ.
၄ လ့ၣ်ကဟၣ်သုးန့ၣ် ဃ့ၢ်သဖှိဝဲလၢ ကျဲပူၤဒီးဃ့ၢ်ဝဲချ့ချ့ ဒီးဃ့ၢ်ဝဲလၢ ပှၤဆါတၢ်ပှ့ၤတၢ် အလီၢ်လီၤ.
ဒီးအကပီၤဝဲဒ်သိးဒီး ဆှိလၢအကဲၤဝဲ ဒီးအကပြုၢ်ဝဲဒ်သိးဒီး လီဝၢ်ဒံးလီၤ.
၅ အဝဲ* ကကိးဝဲ အပဒိၣ်ပပှၢ်တဖၣ်ဒီးဖဲအဝဲသ့ၣ် လဲၤတၢ်အခါ အဝဲသ့ၣ် အခီၣ်ကဘၣ်တိၢ်ဝဲလီၤ.
အဝဲသ့ၣ် ကလဲၤဃ့ၢ်ဝဲလၢ တၢ်ဒူၣ် အအိၣ်ချ့ချ့ဒီးအဝဲသ့ၣ် ကပာ်လီၤဝဲ တၢ်လၢ အဒီသဒၢတၢ်လီၤ.
၆ ထံကျိတဖၣ်အတြဲၤန့ၣ် ကအိးထီၣ်အသးဒီးနီ* ကလီၤပှီၢ်ကွံာ်ဝဲလီၤ.
၇ တၢ်ဟ့ၣ်လီၤ တၢ်ကလုၢ်လံ. ပှၤအိၣ်လၢဝ့ၢ်တဖျၢၣ်အံၤအပူၤန့ၣ် ဘၣ်တၢ်မၤမဲာ်ဆှးအီၤလီၤ.
ဒီးပှၤက့ၤဖီၣ်အဝဲသ့ၣ် ဒီးကုၢ်မုၣ်တဖၣ် ဒဲလီၤအသးနါပှၢ်လၢ တၢ်သးအုးအပူၤဒီးကုၢ်မုၣ်တဖၣ် ဟီၣ်သီၣ် လီၤဂာ်ဒ် ထိၣ်လွံၢ်အကလုၢ် အသိးလီၤ.
၈ စးထီၣ်လၢ ဝ့ၢ်နံၤနဝ့+ အိၣ်ထီၣ်လံၤလံၤန့ၣ် အလီၤဂာ်ဒ်သိးဒီး ထံကမါတခါလီၤ.
ဘၣ်ဆၣ် ခဲအံၤန့ၣ် ထံတဖၣ် ယွၤလီၤကွံာ်ဝဲလံ.
ဒီးပှၤတနီၤ ကိးထီၣ်လၢ “အိၣ်ပတုာ်, အိၣ်ပတုာ်”ဘၣ်ဆၣ် ပှၤတကွၢ်လီၤလီၢ်ခံ နီတဂၤဘၣ်.+
၉ ဂုာ်န့ၢ် အစ့ညၣ်တဖၣ် ဒီးအထူတဖၣ်သၢၤ.
တၢ်လုၢ်ဒိၣ်ပှ့ၤဒိၣ် လၢအလၢာ်တသ့ဘၣ်န့ၣ် အိၣ်ဝဲဖဲန့ၣ်ဒီးတၢ်ထူးတၢ်တီၤ အကလုာ်ကလုာ်န့ၣ် အိၣ်ဝဲဖဲန့ၣ်လီၤ.
၁၀ ဝ့ၢ်န့ၣ် တၢ်တအိၣ်လၢအပူၤ နီတမံၤလၢၤဘၣ်, အအိၣ်သယုၢ် ဒီးဟးဂီၤဝဲလီၤ.+
ပှၤနံၤနဝ့ဖိန့ၣ် ခီဖျိလၢ အဝဲသ့ၣ် ပျံၤတၢ်အဃိ အသးလီၤစၢ်, အခီၣ်လ့ၢ်ခိၣ်ကနိး ဒီးအခံလီၤဘျ့ဒီးအဝဲသ့ၣ်ခဲလၢာ် အမဲာ်ထီၣ်ဂီၤလီၤ.
၁၁ ခ့ယုၢ်တဖၣ်*+ အလ့ပူၤန့ၣ် ခဲအံၤအအိၣ်ဖဲလဲၣ်. လၢညါန့ၣ် ခ့ယုၢ်ဖိတဖၣ် အီၣ်တၢ်ဖဲ တၢ်လီၢ်ဝဲန့ၣ်လီၤ.
ဒီးလၢညါ ခ့ယုၢ်ဒီးအဖိ ဟးထီၣ်ဟးလီၤ ဖဲန့ၣ်ဒီးအဝဲသ့ၣ် တလိၣ်ပျံၤ ပှၤနီတဂၤဘၣ်.
၁၂ ဒီးခ့ယုၢ် အ့ၣ်ဖှီအဆၣ် ယၢဝဲလၢ* အဖိတဖၣ်အဂီၢ်ဒီးအ့ၣ်သံဝဲ ဆၣ်ဖိကီၢ်ဖိလၢ အခ့ယုၢ်မိၢ်တဖၣ် အဂီၢ်လီၤ.
ဒီးလၢအလ့ပူၤန့ၣ် အိၣ်ပှဲၤဒီး အဆၣ်ဒီးဆၣ်ဖိကီၢ်ဖိတဖၣ်လၢ အအ့ၣ်ဖှီဝဲ တကူာ်တကူာ်လီၤ.
၁၃ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “ယထီဒါနၤလီၤ.+
ယကဒွဲၣ်အူထီၣ် နလ့ၣ်ကဟၣ်သုးတဖၣ်+ဒီးနးကအီၣ်ကွံာ် နခ့ယုၢ်ဖိတဖၣ်လီၤ.
ယကမၤလၢာ်ကွံာ် နဆၣ်လၢ ဟီၣ်ခိၣ်ချၢဒီးပှၤတနၢ်ဟူဘၣ် နပှၤစိာ်တၢ်ကစီၣ်ဖိတဖၣ် အကလုၢ်လၢၤဘၣ်.”+
တၢ်ဂ့ၢ်အဘျဲၣ်တဖၣ်
^ ဘၣ်သ့ၣ်သ့ၣ် အဲၣ်ဒိးတဲဝဲ အၤၡူၢ်အစီၤပၤ.
^ မ့ၢ်စ့ၢ်ကီး “နူၢ်.”
^ ခ့ယုၢ်န့ၣ် မ့ၢ်ဝဲ နံၤနဝ့ဘီမုၢ် အတၢ်ပနီၣ်တခါ.
^ မ့ၢ်စ့ၢ်ကီး “လၢဝဲ.”
