နၤဃူၣ် ၃:၁-၁၉
၃ ပှၤမၤသံတၢ်ဖိအဝ့ၢ်န့ၣ် ကဘၣ်နးဘၣ်ဖှီၣ် သပှၢ်တၢၢ်လီၤ.
ဝ့ၢ်တဖျၢၣ်န့ၣ် အိၣ်ပှဲၤဝဲဒီး တၢ်လံၣ်အီၣ်လီအီၣ်တၢ် ဒီးတၢ်ဟုၣ်တၢ်ဘျၣ်တဖၣ်ဒီးအဂုာ်န့ၢ်ဆူၣ်ပှၤဂၤအတၢ် ထီဘိလီၤ.
၂ ယနၢ်ဟူ ပှၤဖျ့နီၣ်ဖျ့အသီၣ် ဒီးလ့ၣ်ကဟၣ် အပၣ်အသီၣ်ဒီးယထံၣ် ကသ့ၣ်တဖၣ် ဖုဝဲ* ဒီးလ့ၣ်ကဟၣ် လဲၤတၢ်လီၤ.
၃ ပှၤဒိးကသ့ၣ်ဖိတဖၣ် ဒိးဝဲကသ့ၣ်, နးတဖၣ် ကပီၤမျးမျး ဒီးဘီတဖၣ် ကပြုၢ်ကပြီၤလီၤ.
ပှၤလၢအဘၣ် တၢ်မၤသံအီၤ အိၣ်ဝဲ ဒီဒူၣ် ဒီးပှၤသံအစိၣ် ဘၣ်တၢ်ပာ်ပူၣ်ထီၣ်အီၤ တပူၣ်ဘၣ်တပူၣ်လီၤ.
ပှၤသံအစိၣ်တဖၣ်န့ၣ် ပှၤဂံၢ်အီၤ တဘၣ်ဘၣ်.
ဒီးပှၤခီၣ်ဘၣ်တိၢ်လၢ ပှၤသံတဖၣ် အစိၣ် တဘျီဝံၤတဘျီလီၤ.
၄ တၢ်ကကဲထီၣ်အသးဒ်န့ၣ် မ့ၢ်လၢ အဝဲ* လီၤဂာ်ဒီး ပိာ်မုၣ်ဆါလီၤအီၣ်သးလၢ အဆါလီၤအီၣ်အသး အဘျီအါမး အဃိလီၤ.
ဒီးအမ့ၢ် ပှၤအူတၢ်သမူတၢ် အကစၢ်မုၣ်လၢ အလီၤထုးန့ၢ်သူၣ်ထုးန့ၢ်သး ဒီးအလီၤအဲၣ်လီၤကွံလီၤ.
အဝဲဖီၣ်န့ၢ် ပှၤကလုာ်တဖၣ်ခီဖျိလၢ အတၢ်ဆါလီၤအီၣ်သး ဒီးအတၢ်အူတၢ်သမူတဖၣ် အဃိလီၤ.
၅ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ဝ့ၢ်နံၤနဝ့ဧၢ, ယထီဒါနၤလီၤ.+
ဒီးယကတလဲထီၣ် နစကၢး တုၤလၢ အကျၢၢ်ဘၢနမဲာ်သၣ်ဒီးယကဒုးထံၣ် ပှၤကလုာ်တဖၣ်လၢ နတၢ်အိၣ်ဘ့ၣ်ဆ့ဒီးဘီမုၢ်တဖၣ် စ့ၢ်ကီး ကထံၣ်ဘၣ် နတၢ်မဲာ်ဆှးလီၤ.
၆ ယကကွံာ်လီၤ တၢ်ဘၣ်အၢဘၣ်သီ လၢနလိၤဒီးမၤဟးဂီၤ နလၤကပီၤလီၤ.
ဒီးယကဒုးကဲထီၣ်နၤလၢ တၢ်ဟ့ၣ်ပလီၢ်လၢ ပှၤဂၤအဂီၢ်လီၤ.+
၇ ပှၤလၢအထံၣ်နၤ ကိးဂၤဒဲးန့ၣ် ကဃ့ၢ်ဟးထီၣ်ကွံာ် လၢနအိၣ်+ ဒီးကတဲဝဲလၢ‘ဝ့ၢ်နံၤနဝ့ ဘၣ်တၢ်မၤဟးဂီၤကွံာ် အီၤလံ.
မတဂၤ ကသးကညီၤအီၤလဲၣ်.’
မတဂၤ ကအဲၣ်ဒိးမၤမုာ်ထီၣ်နၤလဲၣ်.
၈ မ့ၢ်နဂ့ၤဒိၣ်န့ၢ်ဒံး ဝ့ၢ်နိအၤမိၣ်+ လၢအအိၣ်ဘူးဒီး ထံကျိနံၤလါ အထံကျိၤတဖၣ်ဧါ.+
ထံတဖၣ် အိၣ်ဝးတရံး ဝ့ၢ်တဖျၢၣ်န့ၣ်ဒီးအန့ၢ်ဘၣ်တၢ်ထူးတၢ်တီၤ ခီဖျိလၢပီၣ်လဲၣ် ဒီးအတၢ်ဒူၣ်န့ၣ် မ့ၢ်ဝဲ ပီၣ်လဲၣ်လီၤ.
၉ ဝ့ၢ်အံၤ န့ၢ်ဘၣ်တၢ်ဂံၢ်တၢ်ဘါလၢ ကီၢ်အဲၤသံအီးပး ဒီးကီၢ် အဲၤကူပတူး အအိၣ် အါအါဂီၢ်ဂီၢ်ဒီးပှၤပူၤတၤဖိ+ ဒီးပှၤလံၤဘူဖိတဖၣ် မၤစၢၤအီၤ* လီၤ.+
၁၀ ဘၣ်ဆၣ် အပှၤဝ့ၢ်ဖိတဖၣ် ဘၣ်တၢ်က့ၤဖီၣ်အီၤဒီးအဘၣ်လဲၤကဲကုၢ်လီၤ.+
အဖိတဖၣ် ဘၣ်တၢ်မၤလီၤကလဲကွံာ်အီၤ တက့တခီ လၢကျဲကိးဘိဒဲး အသနၢၣ်လီၤ.
ပှၤကွံာ်လီၤတၢ်ဖးလၢ အကန့ၢ်ဘၣ် အပှၤလၢအရ့ဒိၣ်တဖၣ်ဒီးအပှၤဒိၣ်ပှၤပှၢ်တဖၣ်န့ၣ် ဘၣ်တၢ်စၢဃာ်အီၤ လၢထးကွီၤလီၤ.
၁၁ နၤ* စ့ၢ်ကီး နကလီၤဃံၢ်ဒ် ပှၤမူၤသံးအသိး,+နကဘၣ်အိၣ်ခူသူၣ်ဒီးနကဃု တၢ်ပူၤဖျဲးအလီၢ် ခီဖျိလၢ နဒုၣ်နဒါ အဃိလီၤ.
၁၂ နတၢ်ဒူၣ်လၢ အကျၢၤတဖၣ်န့ၣ် လီၤဂာ်ဒ် ချၢၣ်ဒၢအထူၣ်လၢ အအိၣ်ဒီး အသၣ်ဆိလၢ အမံတဖၣ်ဒီးပှၤမ့ၢ်တရုၤအီၤန့ၣ် အသၣ်ကလီၤတဲာ်ကွံာ်လၢ ပှၤလၢ အအီၣ်ကွံာ်တၢ်တဖၣ် အကိာ်ပူၤလီၤ.
၁၃ နသုးဖိတဖၣ် ကမၤအသး ဒ်သိးဒီး ပှၤပိာ်မုၣ်တဖၣ်ဒီးနကီၢ်အတြဲၤတဖၣ် ကအိးထီၣ်အသး ဖးလဲၢ်လၢ နဒုၣ်နဒါတဖၣ်အဂီၢ်ဒီးမ့ၣ်အူကအီၣ်ကွံာ် နတြဲၤတဖၣ် အနီၣ်ဘိလီၤ.
၁၄ ဒၢၣ်ပာ်စၢၤထံ ဒီးအိၣ်ကတဲာ်ကတီၤနသးလၢ ပှၤကကဝီၤဃာ်နၤအဂီၢ်+ဒီးမၤကျၢၤထီၣ် တၢ်ဒူၣ်လၢ အကျၢၤတဖၣ်တက့ၢ်.
လဲၤလီၤလၢ ကပံာ်ကျါ ဒီးယီၢ်ကပံာ်ဒီးတ့ထီၣ် အူးခဲတဖၣ်တက့ၢ်.
၁၅ နမ့ၢ်မၤဒ်န့ၣ်ဘၣ်ဆၣ် မ့ၣ်အူ ကအီၣ်ကွံာ်နၤဒီးနးကကျီကွံာ်နၤလီၤ.+
ဒီးအကအီၣ်ကွံာ်နၤ ဒ်ဒွဲၣ်တဖၣ် အီၣ်ကွံာ်တၢ် အသိးလီၤ.+
ပှၤအိၣ်လၢနပူၤ အနီၣ်ဂံၢ် မ့ၢ်အါထီၣ် ဒ်ဒွဲၣ်တဖၣ်အသိး သနာ်က့ မ့ၣ်အူဒီးနး ကအီၣ်ကွံာ်အဝဲသ့ၣ် ဒ်ဒွဲၣ်တဖၣ် အီၣ်ကွံာ်တၢ်အသိးလီၤ.
အဃိ မၤအါထီၣ် နပှၤနီၣ်ဂံၢ် ဒ်ဒွဲၣ်တဖၣ်အသိးသၢၤ.
၁၆ နပှၤပှ့ၤတၢ်ဆါတၢ်ဖိတဖၣ်န့ၣ် အိၣ်ဝဲအါမး ဒီးအအါန့ၢ်ဒံး ဆၣ်တဖၣ်လၢမူခိၣ်လီၤ.
တၢ်လၢဒွဲၣ်တဖၣ်န့ၣ် ဆီတလဲအဘ့ၣ် ဒီးယူၤထီၣ်ကွံာ်ဝဲလီၤ.
၁၇ နပှၤခိးတၢ်ဖိတဖၣ် လီၤဂာ်ဒ်သိးဒီး ဒွဲၣ်တဖၣ်ဒီးနပဒိၣ်တဖၣ်န့ၣ် လီၤဂာ်ဒ်သိးဒီး ဒွဲၣ်တဖုလီၤ.
ဖဲတၢ်ဂိၢ်အနံၤန့ၣ် အဝဲသ့ၣ် အိၣ်ကဒုလၢ လၢၢ်ကဆူးဘၣ်ဆၣ် ဖဲမုၢ်ဆဲးလီၤအခါ အဝဲသ့ၣ် ယူၤကွံာ်ဝဲလီၤ.
ဒီးအဝဲသ့ၣ် လဲၤဝဲဖဲလဲၣ်န့ၣ် ပှၤတသ့ၣ်ညါ နီတဂၤဘၣ်.
၁၈ အိ အၤၡူၢ် အစီၤပၤဧၢ, နပှၤကွၢ်သိတဖၣ်န့ၣ် မံခ့ဝဲဒီးနပှၤဒိၣ်ပှၤပှၢ်တဖၣ်န့ၣ် ဆဲးအိၣ်လၢအတၢ်သူၣ်ထီၣ်အပူၤလီၤ.
ဒီးနပှၤဂီၢ်မုၢ်တဖၣ်န့ၣ် လီၤပြံလီၤပြါလၢ ကစၢၢ်ကလိတဖၣ်အကျါဒီးပှၤလၢ ကပာ်ဖှိၣ်ထီၣ် အဝဲသ့ၣ်န့ၣ် တအိၣ်နီတဂၤဘၣ်.+
၁၉ ဖဲတၢ်ကီတၢ်ခဲဖးဒိၣ် ဟဲဘၣ်နၤအခါ ပှၤတမၤစၢၤနၤ နီတဂၤဘၣ်.
ဒီးနတၢ်ပူၤလီၢ်စ့ၢ်ကီး ဘျါက့ၤ တန့ၢ်လၢၤဘၣ်.
ပှၤလၢအတတူၢ်ဘၣ်တၢ် နးနးကျံၤကျံၤလၢ နဃိထီဘိဘၣ်န့ၣ် တအိၣ်နီတဂၤဘၣ်.+
အဃိ ပှၤလၢအနၢ်ဟူ နကစီၣ်န့ၣ် ကဒဲအစု ကိးဂၤဒဲးလီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “စံၣ်.”
^ အဲၣ်ဒိးတဲဝဲ ဝ့ၢ်နံၤနဝ့.
^ အခီပညီလိၤလိၤ “နၤ.”
^ မ့ၢ်ဝဲ ဝ့ၢ်နံၤနဝ့.
