ဖံလံးပံၤ ၄:၁-၂၃
၄ ဒီပုၢ်ဝဲၢ်လၢ ယအဲၣ်ဘၣ် ဒီးယသးသယုၢ်ဘၣ်အီၤ သ့ၣ်ဧၢ, သုမ့ၢ်ယတၢ်သးခု ဒီးယခိၣ်သလုးလီၤ.+ ယပှၤသးဘိသ့ၣ်ဧၢ, ယဟ့ၣ်သဆၣ်ထီၣ်သုလၢ သုကဆဲးသးတီ+ ဒီးကစၢ်လီၤ.*
၂ ယဟ့ၣ်သဆၣ်ထီၣ် နီၢ်အူၤအိဒံၤ ဒီးနီၢ်စူၣ်တူဃ့ၤ ဒ်သိးကအိၣ်ဒီး တၢ်သးတဖျၢၣ်ဃီ ဒ်ကစၢ် အပျဲၢ်အဘီၣ်အသိးလီၤ.+
၃ ဒီးနၤစ့ၢ်ကီး ဒ်နမ့ၢ်ယပှၤမၤသကိးတၢ် အနီၢ်ကီၢ်တဂၤအသိး ယဃ့နၤလၢ နကဆဲးမၤစၢၤ ပိာ်မုၣ်တဖၣ်အံၤလီၤ. အဝဲသ့ၣ် မၤသကိးတၢ်ဒီးယၤလၢ တၢ်သးခုကစီၣ်အဂီၢ် ဃုာ်ဒီးစီၤကျ့မ့ၤ ဒီးယပှၤမၤသကိးတၢ်လၢ အဂၤတဖၣ် လၢအမံၤအိၣ်လၢ လံာ်တၢ်မူအပူၤလီၤ.+
၄ သးခုလၢကစၢ်အဃိ ထီဘိတက့ၢ်. ယကတဲကဒီး သးခုတက့ၢ်.+
၅ သုတမ့ၢ် ပှၤလၢအခိၣ်ကိၤဘၣ်န့ၣ်+ မ်အအိၣ်ဖျါထီၣ်လၢ ပှၤခဲလၢာ် အမဲာ်ညါတက့ၢ်. ကစၢ်အိၣ်ဘူးဒီးပှၤလီၤ.
၆ တဘၣ် သူၣ်ကိၢ်သးဂီၤတၢ် နီတမံၤတဂ့ၤ.+ လၢတၢ်ခဲလၢာ်အပူၤန့ၣ် တဲဖျါထီၣ် သုတၢ်ဃ့တဖၣ်လၢ ကစၢ်ယွၤအအိၣ်+ ခီဖျိလၢ တၢ်ဃ့ထုကဖၣ် ဒီးတၢ်ဃ့ကညးတၢ် ဃုာ်ဒီး တၢ်စံးဘျုးစံးဖှိၣ်က့ၤတၢ်တက့ၢ်.
၇ ဒီးတၢ်သူၣ်မံသးမုာ်လၢ+ အဟဲလၢ ကစၢ်ယွၤအအိၣ် လၢအဒိၣ်န့ၢ်ယိာ်န့ၢ်တၢ်လၢ ပနၢ်ပၢၢ်အီၤသ့န့ၣ် ကပၢၤသုသးဒီး+ သုတၢ်ဆိကမိၣ်တဖၣ် ခီဖျိလၢ ယ့ၣ်ၡူးခရံာ်လီၤ.
၈ အဃိ ယဒီပုၢ်ဝဲၢ်သ့ၣ်ဧၢ, တၢ်လၢအမ့ၢ်အတီ, တၢ်လၢအရ့ဒိၣ်, တၢ်လၢအတီအလိၤ, တၢ်လၢအစီဆှံ, တၢ်လၢ အထိၣ်ဟူးထိၣ်ဂဲၤထီၣ်ပှၤ လၢကအဲၣ်တၢ်, တၢ်လၢ အကဲထီၣ်တၢ်ဂံၢ်တၢ်ဘါ, တၢ်လၢအဂ့ၤ ဒီးတၢ်လၢ အလီၤစံးပတြၢၤတဖၣ်န့ၣ် ဆိကမိၣ် တၢ်ဂ့ၢ်သ့ၣ်တဖၣ်န့ၣ် ထီဘိတက့ၢ်.+
၉ တၢ်လၢ သုမၤလိဘၣ်အီၤ, တူၢ်လိာ်အီၤ, နၢ်ဟူဘၣ်အီၤ ဒီးထံၣ်အီၤလၢ ယအိၣ်တဖၣ်န့ၣ် မၤထွဲအီၤတက့ၢ်.+ သုမ့ၢ်မၤဒ်န့ၣ်န့ၣ် ကစၢ်လၢအဟ့ၣ်လီၤ တၢ်သူၣ်မံသးမုာ်န့ၣ် ကအိၣ်ဒီးသုလီၤ.
၁၀ ဒီးသုပာ်ဖျါထီၣ်ကဒီးလၢ သုသးအိၣ်ယၤအဃိ ယသးခုဒိၣ်မး ဒီးယစံးဘျုးကစၢ်လီၤ.+ နီၢ်ကီၢ်န့ၣ် သုသးအိၣ်ယၤထီဘိလီၤ. ဘၣ်ဆၣ် သုတအိၣ်ဒီးတၢ်ခွဲးတၢ်ယာ်လၢ သုကပာ်ဖျါထီၣ် သုတၢ်သးအိၣ်ယၤဘၣ်.
၁၁ ယတဲဒ်အံၤန့ၣ် တမ့ၢ်လၢ ယလိၣ်ဘၣ်တၢ် တမံၤမံၤအဃိဘၣ်. ယတၢ်အိၣ်သးမ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ ယန့ၢ်ဘၣ်တၢ်မၤလိလၢ ယကသးမံလၢ တၢ်လၢအအိၣ်ဒီးယၤလီၤ.+
၁၂ ယတၢ်အိၣ်အါမ့ၢ်ဂ့ၤ, စှၤမ့ၢ်ဂ့ၤ ယအိၣ်သ့လီၤ.+ လၢတၢ်ခဲလၢာ်အပူၤ ဒီးလၢတၢ်အိၣ်သး အကလုာ်ကလုာ်အဖီခိၣ် ယမၤလိန့ၢ်တၢ်ခူသူၣ်တခါ လၢအမ့ၢ် ယအီၣ်ဘၣ်တၢ် ဘျဲဘျဲ* မ့ၢ်ဂ့ၤ, ယလီၤဘဲ* မ့ၢ်ဂ့ၤ, ယတၢ်အိၣ်အါမ့ၢ်ဂ့ၤ, ယတၢ်တအိၣ်ဘၣ်မ့ၢ်ဂ့ၤ ယသူၣ်မံသးမံလီၤ.
၁၃ ယအိၣ်ဒီး တၢ်ဂံၢ်တၢ်ဘါလၢ ယကလဲၤခီဖျိတၢ်ခဲလၢာ် ခီဖျိပှၤတဂၤလၢ အဟ့ၣ်ယၤ တၢ်စိကမီၤန့ၣ်အဃိလီၤ.+
၁၄ ဒ်လဲၣ်ဂ့ၤဒ်လဲၣ်ဂ့ၤ ဖဲယထံၣ်ဘၣ်တၢ်နးတၢ်ဖှီၣ်အခါ သုမၤစၢၤယၤအဃိ သုမၤတၢ်ဂ့ၤလီၤ.
၁၅ နီၢ်ကီၢ်န့ၣ် သုဝဲပှၤဖံလံးပံၤဖိသ့ၣ်ဧၢ, သုသ့ၣ်ညါစ့ၢ်ကီးလၢ သုနၢ်ဟူဘၣ် တၢ်သးခုကစီၣ် အဆိကတၢၢ် တဘျီဝံၤအလီၢ်ခံ ဖဲယဟးထီၣ်လၢ ကီၢ်မၤက့းဒနံအခါ သုမ့ၢ်တၢ်အိၣ်ဖှိၣ်ထဲတဖုလၢ အမၤစၢၤယၤလီၤ. တၢ်အိၣ်ဖှိၣ်လၢအဂၤ တမၤစၢၤယၤဘၣ်.+
၁၆ ဖဲယအိၣ်လၢ ဝ့ၢ်သ့းစၤလနံအပူၤအခါ သုဆှၢန့ၢ်ယၤ တၢ်လၢ ယလိၣ်ဘၣ်တဖၣ်န့ၣ် တမ့ၢ်ထဲတဘျီဘၣ်, သုဆှၢန့ၢ်ယၤ ခံဘျီညါလီၤ.
၁၇ တမ့ၢ်လၢ ယဃုတၢ်ဟ့ၣ်တဖၣ်ဘၣ်. အိၣ်ဒၣ်ယအဲၣ်ဒိးလၢ သုကဒိးန့ၢ်ဘၣ်အမၠး လၢအဟဲခီဖျိ သုမၤတၢ်ဂ့ၤအဃိလီၤ.
၁၈ ဘၣ်ဆၣ်ခဲအံၤ မ့ၢ်လၢ ယဒိးန့ၢ်ဘၣ် တၢ်လၢသုဆှၢန့ၢ်ယၤ ခီဖျိလၢ စီၤအ့းပၤဖရီးဒံတူး+ အစုပူၤအဃိ ယအိၣ်ဒီးတၢ်ခဲလၢာ် လၢယလိၣ်ဘၣ်အီၤ ဒီးအိၣ်ဝဲအါန့ၢ်ဒံး တၢ်လၢ ယလိၣ်ဘၣ်အီၤလီၤ. သုတၢ်ဟ့ၣ်န့ၣ် လီၤဂာ်ဒ် တၢ်လုၢ်တၢ်ပာ်လၢ ကစၢ်ယွၤ ဘၣ်သူၣ်ဘၣ်သးဝဲ ဒီးနၢမူနၢဆှီလၢ+ အမဲာ်ညါလီၤ.
၁၉ အဃိ ဒ်ကစၢ်ယွၤ အိၣ်ဒီးတၢ်ထူးတၢ်တီၤ လၢအပှဲၤဒီး တၢ်လၤကပီၤအသိး အကဟ့ၣ်သုတၢ်လၢ သုလိၣ်ဘၣ်ခဲလၢာ်+ ခီဖျိလၢ ယ့ၣ်ၡူးခရံာ်လီၤ.
၂၀ မ်တၢ်လၤကပီၤ အိၣ်ဒီးပပၢ်ကစၢ်ယွၤ လီၤထူလီၤယိာ်တက့ၢ်. အၤမ့ၣ်.
၂၁ ဆၢဂ့ၤဆၢဝါန့ၢ်ယၤ ပှၤစီဆှံကိးဂၤဒဲး လၢအမ့ၢ် ယ့ၣ်ၡူးခရံာ် အပျဲၢ်အဘီၣ်တက့ၢ်. ဒီပုၢ်ဝဲၢ်တဖၣ် လၢအအိၣ်ဒီးယၤန့ၣ် ဆၢဂ့ၤဆၢဝါသု စ့ၢ်ကီးလီၤ.
၂၂ ပှၤစီဆှံခဲလၢာ် လီၤဆီဒၣ်တၢ် ပှၤစီဆှံတဖၣ်လၢ အအိၣ်လၢ ကဲစၢ်အနီပူၤန့ၣ်+ ဆၢဂ့ၤဆၢဝါသုလီၤ.
၂၃ မ့ၢ်လၢ သုအိၣ်ဒီး တၢ်ပာ်သူၣ်ပာ်သး လၢအဂ့ၤအဃိ မ်ကစၢ် ယ့ၣ်ၡူးခရံာ် ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢသုဖီခိၣ်တက့ၢ်.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဆၢထၢၣ်ဂၢၢ်ကျၢၤလၢ ကစၢ်အပူၤ.”
^ မ့ၢ်စ့ၢ်ကီး “လၢအီၣ်.”
^ မ့ၢ်စ့ၢ်ကီး “သၣ်ဝံၤ.”
