မးသဲ ၁၄:၁-၃၆
၁၄ ဖဲန့ၣ်အဆၢကတီၢ် ပဒိၣ်စီၤဟ့ၤရိာ် နၢ်ဟူဘၣ် ယ့ၣ်ၡူး အကစီၣ်လီၤ.+
၂ ဒီးစီၤဟ့ၤရိာ် တဲဘၣ်အပျဲၢ်တဖၣ်လၢ “အဝဲမ့ၢ် ပှၤဘျၢတၢ် စီၤယိၤဟၣ်လီၤ. မ့ၢ်လၢအဝဲ ဂဲၤဆၢထၢၣ်သမူထီၣ်က့ၤ လၢတၢ်သံအဃိ အမၤဝဲ တၢ်လီၤလးတဖၣ်အံၤလီၤသၢၤ.”+
၃ လၢအပူၤကွံာ် စီၤဟ့ၤရိာ်န့ၣ်* ဖီၣ်ဝဲစီၤယိၤဟၣ် ဒီးစၢဃာ်အီၤ ဒီးထၢနုာ်အီၤလၢဃိာ်ပူၤ, မ့ၢ်လၢအဒီပုၢ်ဝဲၢ်ခွါ စီၤဖံလံးပူးအမါ နီၢ်ဟ့ၤရိၤဒံအဃိလီၤ.+
၄ လၢညါ စီၤယိၤဟၣ် တဲစီၤဟ့ၤရိာ် တဘျုးဘျီလၢ “နဟံးန့ၢ် ပိာ်မုၣ်တဂၤအံၤန့ၣ် တဘၣ် တၢ်သိၣ်တၢ်သီဘၣ်.”+
၅ အဃိ စီၤဟ့ၤရိာ် အဲၣ်ဒိးမၤသံ စီၤယိၤဟၣ်လီၤ. ဘၣ်ဆၣ် မ့ၢ်လၢ ပှၤဂီၢ်မုၢ်တဖၣ် ပာ်စီၤယိၤဟၣ် ဒ်ဝံတဂၤအသိးအဃိ စီၤဟ့ၤရိာ် ပျံၤအဝဲသ့ၣ်လီၤ.+
၆ ဒီးဖဲစီၤဟ့ၤရိာ် မၤဝဲတၢ်အိၣ်ဖျဲၣ်ဆၢက့ၤ အမုၢ်နံၤအခါ+ နီၢ်ဟ့ၤရိၤဒံအဖိမုၣ် ဟဲဂဲၤကလံၣ် ဒီးစီၤဟ့ၤရိာ် ဘၣ်သူၣ်ဘၣ်သးဝဲ ဒိၣ်မးလီၤ.+
၇ အဃိ အဝဲအၢၣ်လီၤဝဲလၢ ကဟ့ၣ်အီၤတၢ်လၢအဃ့ဝဲ တမံၤဂ့ၤတမံၤဂ့ၤလီၤ.
၈ ဒီးပိာ်မုၣ်တဂၤန့ၣ် ဒ်အမိၢ်ဟ့ၣ်ကူၣ်အီၤအသိး အတဲဝဲလၢ “ဟ့ၣ်လီၤယၤ ပှၤဘျၢတၢ်စီၤယိၤဟၣ် အခိၣ်လၢ လီခီဖးလဲၢ်အပူၤမီၤ.”+
၉ အဃိ စီၤပၤသးအုးဝဲ ဘၣ်ဆၣ် မ့ၢ်လၢအမၤတ့ၢ် တၢ်အၢၣ်လီၤလၢ ပှၤလၢ အအီၣ်သကိးတၢ်ဒီးအီၤတဖၣ် အမဲာ်ညါဝံၤလံအဃိ အဝဲဟ့ၣ်လီၤ တၢ်ကလုၢ်လၢ ပှၤကမၤဝဲ ဒ်န့ၣ်လီၤ.
၁၀ အဃိ အဝဲမၢပှၤလဲၤဒီၣ်တဲာ်ကွံာ် စီၤယိၤဟၣ်အခိၣ်လၢ ဃိာ်ပူၤလီၤ.
၁၁ ဒီးပှၤဟဲစိာ် စီၤယိၤဟၣ်အခိၣ်လၢ လီခီဖးလဲၢ်အပူၤ ဒီးဟ့ၣ်လီၤဝဲ ပိာ်မုၣ်တဂၤန့ၣ် ဒီးအဝဲက့ၤစိာ်ဝဲလၢ အမိၢ်အအိၣ်လီၤ.
၁၂ ဒီးစီၤယိၤဟၣ် အပျဲၢ်အဘီၣ်တဖၣ် ဟဲဟံးန့ၢ်အစိၣ် ဒီးလဲၤခူၣ်လီၤကွံာ်အီၤလီၤ. လၢခံ အဝဲသ့ၣ် လဲၤတဲဘၣ်ယ့ၣ်ၡူး တၢ်ဂ့ၢ်တခါအံၤလီၤ.
၁၃ ဖဲယ့ၣ်ၡူး နၢ်ဟူဝဲအခါ အဝဲဒိးထီၣ်ကဘီ ဒီးလဲၤဝဲလၢ တၢ်လီၢ်လၢ ပှၤတအိၣ် နီတဂၤဘၣ်အလီၢ် ဒ်သိး အကအိၣ်ဝဲထဲတဂၤလီၤ. ဘၣ်ဆၣ် ဖဲပှၤဂီၢ်မုၢ်တဖၣ် နၢ်ဟူဝဲအခါ အဝဲသ့ၣ် ဟးထီၣ်လၢဝ့ၢ်ပူၤဒီး လဲၤဝဲလၢအခီၣ် ဒီးလူၤပိာ်ယ့ၣ်ၡူးအခံလီၤ.+
၁၄ ဖဲယ့ၣ်ၡူးလဲၤတုၤလၢ ထံကၢၢ်နံၤအခါ အဝဲထံၣ်ဘၣ်ဝဲ ပှၤဂီၢ်မုၢ်ဖးဒိၣ် ဒီးသးကညီၤဘၣ် အဝဲသ့ၣ်+ ဒီးမၤဘျါဝဲ ပှၤဆူးပှၤဆါတဖၣ်လီၤ.+
၁၅ ဘၣ်ဆၣ် ဖဲမုၢ်ဟါလီၤအခါ အပျဲၢ်အဘီၣ်တဖၣ် ဟဲတဲအီၤလၢ “တၢ်လီၢ်တခါအံၤ အိၣ်ဖးယံၤညါ ဒီးမုၢ်ဟါလီၤလံအဃိ ပျဲက့ၤပှၤဂီၢ်မုၢ်တဖၣ်အံၤ ဒ်သိးအဝဲသ့ၣ် ကလဲၤပှ့ၤအီၣ်တၢ်လၢ သဝီတဖၣ်အပူၤမီၤ.”+
၁၆ ဘၣ်ဆၣ် ယ့ၣ်ၡူးတဲဝဲလၢ “အဝဲသ့ၣ် တလိၣ်က့ၤဘၣ်. သုကဘၣ်ဒုးအီၣ် အဝဲသ့ၣ်တၢ်အီၣ်လီၤ.”
၁၇ အဝဲသ့ၣ် တဲဆၢအီၤလၢ “ပတၢ်တအိၣ် နီတမံၤဘၣ်, အိၣ်ဒၣ်ထဲ ကိၣ်ယဲၢ်လိၣ် ဒီးညၣ်ခံဘ့ၣ်လီၤ.”
၁၈ ဒီးယ့ၣ်ၡူးတဲဝဲလၢ “ဟဲစိာ် လၢယအိၣ်မီၤ.”
၁၉ ယ့ၣ်ၡူး မၢပှၤဂီၢ်မုၢ်တဖၣ် ဆ့ၣ်နီၤလၢ နီၣ်အဖီခိၣ်လီၤ. ဒီးယ့ၣ်ၡူးဟံးထီၣ် ကိၣ်ယဲၢ်လိၣ်ဒီး ညၣ်ခံဘ့ၣ် ဒီးကွၢ်ထီၣ်တၢ်လၢမူခိၣ် ဒီးဃ့တၢ်ဆိၣ်ဂ့ၤလီၤ.+ ဝံၤဒီး အဝဲဘိးကၢ်ဝဲကိၣ် ဒီးဟ့ၣ်လီၤဝဲ အပျဲၢ်အဘီၣ်တဖၣ် ဒီးအဝဲသ့ၣ် ဟ့ၣ်နီၤလီၤဝဲ ပှၤဂီၢ်မုၢ်တဖၣ်လီၤ.
၂၀ အဃိ ပှၤခဲလၢာ်အီၣ်ဝဲတုၤအဘျဲ ဒီးအဝဲသ့ၣ် ထၢဖှိၣ်က့ၤဝဲ ကိၣ်အဘျဲၣ်အစဲၢ်န့ၣ် ပှဲၤကု ၁၂ ဒုလီၤ.+
၂၁ ဒီးလၢပှၤအီၣ်တၢ်အကျါန့ၣ် ထဲဒၣ်ပိာ်ခွါတဖၣ် ကအိၣ်ဝဲအဂၤ ၅,၀၀၀ လီၤ. ပိာ်မုၣ်ဒီး ဖိသၣ်တဖၣ် အီၣ်တၢ်စ့ၢ်ကီးလီၤ.+
၂၂ ဝံၤဒီး ယ့ၣ်ၡူးမၢ အပျဲၢ်အဘီၣ်တဖၣ် ဒိးထီၣ်ကဘီ တဘျီဃီ ဒ်သိးကလဲၤဆိလၢ အမဲာ်ညါလၢ ဝၢ်ဘးခီလီၤ. ဒီးအဝဲပျဲက့ၤဝဲ ပှၤဂီၢ်မုၢ်တဖၣ်လီၤ.+
၂၃ ဖဲအဝဲပျဲက့ၤ ပှၤဂီၢ်မုၢ်တဖၣ်ဝံၤအခါ အဝဲလဲၤထီၣ်လၢ ကစၢၢ်ခိၣ်ထဲတဂၤ ဒ်သိး ကဃ့ထုကဖၣ်တၢ် အဂီၢ်လီၤ.+ ဖဲမုၢ်နၤခီ အဆၢကတီၢ်န့ၣ် အဝဲအိၣ်ဝဲဖဲန့ၣ် ထဲတဂၤလီၤ.
၂၄ ဖဲန့ၣ်အဆၢကတီၢ် ကဘီန့ၣ်အိၣ်ယံၤဒီး ထံကၢၢ်နံၤဖးယံၤညါ* ဒီးမ့ၢ်လၢလပီဒီး ကလံၤအူတၢ် ဆူၣ်မးအဃိ အပျဲၢ်အဘီၣ်တဖၣ် ဘၣ်ပၢၤဃာ်ဝဲ ကဘီနးမးလီၤ.
၂၅ ဘၣ်ဆၣ် ဖဲတၢ်ခိးကွၢ်တၢ်လၢ မုၢ်နၤခီလွံၢ်တီၤတတီၤန့ၣ်* ယ့ၣ်ၡူးဟးလၢထံဖံးခိၣ် ဒီးလဲၤလၢအဝဲသ့ၣ်အအိၣ်လီၤ.
၂၆ ဖဲအပျဲၢ်အဘီၣ်တဖၣ် ထံၣ်အဟးလၢ ပီၣ်လဲၣ်ပူၤအခါ အဝဲသ့ၣ် သူၣ်ကိၢ်သးဂီၤတၢ် ဒီးတဲဝဲလၢ “လၢန့ၣ် တၢ်လီၤဆီတခါ.”* ဒီးအဝဲသ့ၣ် ကိးပသူထီၣ်လၢ တၢ်ပျံၤတၢ်ဖုးအပူၤလီၤ.
၂၇ ဘၣ်ဆၣ် ယ့ၣ်ၡူးတဲအဝဲသ့ၣ် တဘျီဃီလၢ “ပာ်ဆူၣ်သုသးသၢၤ. မ့ၢ်ဒၣ်ယၤလီၤ, ပျံၤတၢ်တဂ့ၤ.”+
၂၈ စီၤပ့းတရူး တဲဆၢက့ၤအီၤလၢ “ကစၢ်ဧၢ, မ့မ့ၢ်နၤန့ၣ် မၢယဟဲလၢနအိၣ် လၢထံဖံးခိၣ်မီၤ.”
၂၉ ဒီးယ့ၣ်ၡူး တဲဘၣ်အီၤလၢ “ဟဲသၢၤ.” ဒီးစီၤပ့းတရူး ဟးထီၣ်လၢကဘီပူၤ ဒီးဟးဝဲလၢထံဖံးခိၣ် ဒီးလဲၤဝဲလၢ ယ့ၣ်ၡူးအအိၣ်လီၤ.
၃၀ ဘၣ်ဆၣ် ဖဲအကွၢ်ဝဲ ကလံၤမုၢ်အခါ အဝဲပျံၤတၢ်လီၤ. ဒီးဖဲအဝဲစးထီၣ် လီၤဘျၢအခါ အကိးပသူထီၣ်ဝဲလၢ “ကစၢ်ဧၢ, မၤစၢၤယၤ.”
၃၁ ဒီးယ့ၣ်ၡူး ယူာ်ဃီၤအစုတဘျီဃီ ဒီးဖီၣ်အီၤ ဒီးတဲအီၤလၢ “ပှၤလၢ အတၢ်နာ်စှၤဧၢ, ဘၣ်မနုၤအဃိ နသးဒ့ဒီလဲၣ်.”+
၃၂ ဖဲအဝဲသ့ၣ်က့ၤထီၣ်လၢ ကဘီပူၤအခါ ကလံၤမုၢ်န့ၣ် ပတုာ်ဝဲလီၤ.
၃၃ ဒီးပှၤအိၣ်လၢ ကဘီပူၤန့ၣ် ထိၣ်လီၤပှီၤအသးလၢ ယ့ၣ်ၡူးအမဲာ်ညါ ဒီးတဲအီၤလၢ “နမ့ၢ်ကစၢ်ယွၤအဖိခွါ နီၢ်ကီၢ်လီၤ.”
၃၄ အဝဲသ့ၣ်ခီဂာ်ဝဲ ပီၣ်လဲၣ်ဝံၤဒီးလဲၤတုၤလၢ ကံးန့ၤရ့သး အလီၢ်ကဝီၤလီၤ.+
၃၅ ပှၤလၢအအိၣ်ဖဲန့ၣ်တဖၣ် ကွၢ်နီၣ်ယ့ၣ်ၡူးဘၣ်အဃိ အဝဲသ့ၣ် တဲဘၣ်ပှၤလၢ အအိၣ်ဘူးဒီး တၢ်လီၢ်ဖဲန့ၣ်တဖၣ်လီၤ. ဒီးပှၤဟဲကိးဝဲ ကယဲၢ်ပှၤလၢ အဆိးက့တဖၣ် လၢယ့ၣ်ၡူးအအိၣ်လီၤ.
၃၆ ဒီးအဝဲသ့ၣ် ဃ့ကညးယ့ၣ်ၡူး ဒ်သိးကထိးဘၣ်ဝဲ အဆ့ကၤအနွံလီၤ.+ ဒီးပှၤလၢ အထိးဝဲ အဆ့ကၤအနွံ ကိးဂၤဒဲးန့ၣ် ဘျါက့ၤဝဲခဲလၢာ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ စီၤဟ့ၤရိာ် အၣ်တံပၤ. ကွၢ် တၢ်ကတိၤအခီပညီ.
^ အခီပညီလိၤလိၤ “စတၤဒံယၤတဖၣ်.” ၁ စတၤဒံယၤန့ၣ် ယံၤဝဲ ၁၈၅ မံထၢၣ် (၆၀၆.၉၅ ပ့ၣ်).
^ မ့ၢ်ဝဲ စးထီၣ်လၢဂီၤခီ ၃ နၣ်ရံၣ်ဃၣ်ဃၣ် တုၤလီၤလၢ ဂီၤခီ ၆ နၣ်ရံၣ်ဃၣ်ဃၣ်.
^ မ့ၢ်စ့ၢ်ကီး “တၢ်ထံၣ်လၢညါခီ.”
