မးသဲ ၁၅:၁-၃၉
-
ပာ်ဒ့ၣ်ပာ်ကမၣ်ဝဲ ပှၤလၢအမၤထွဲ မိၢ်ပၢ်ဖံဖုလၢပျၢၤ အလုၢ်အလၢ် (၁-၉)
-
တၢ်လၢအဟဲထီၣ်လၢ ပှၤသးပူၤန့ၣ် မ့ၢ်တၢ်လၢ အမၤဘၣ်အၢ ပှၤဟီၣ်ခိၣ်ဖိ (၁၀-၂၀)
-
ပှၤဖံၤနံက့ၤ ပိာ်မုၣ်လၢ အအိၣ်ဒီး တၢ်နာ်ဒိၣ်မး (၂၁-၂၈)
-
ယ့ၣ်ၡူးမၤဘျါက့ၤ ပှၤဆူးပှၤဆါ အကလုာ်ကလုာ် (၂၉-၃၁)
-
ယ့ၣ်ၡူးဒုးအီၣ်ဒုးအီ ပှၤအဂၤ ၄,၀၀၀ (၃၂-၃၉)
၁၅ ပှၤဖၤရံၤၡဲ ဒီးပှၤကွဲးလံာ်ဖိ လၢအအိၣ်လၢ ဝ့ၢ်ယရူၤၡလ့ၣ်န့ၣ် ဟဲလၢ ယ့ၣ်ၡူးအအိၣ်+ ဒီးတဲဝဲလၢ
၂ “ဘၣ်မနုၤအဃိ နပျဲၢ်နဘီၣ်တဖၣ် ကွၢ်ကပာ် မိၢ်ပၢ်ဖံဖု လၢပျၢၤတဖၣ် အလုၢ်အလၢ်လဲၣ်. အဒိ, တချုးလၢ အဝဲသ့ၣ် အီၣ်တၢ်အီၣ်ဒံးဘၣ်န့ၣ် အဝဲသ့ၣ် တသ့အစုဘၣ်.”*+
၃ ယ့ၣ်ၡူးတဲဆၢ အဝဲသ့ၣ်လၢ “ဘၣ်မနုၤအဃိ သုကွၢ်ကပာ် ကစၢ်ယွၤအတၢ်မၤလိာ်တဖၣ် ဒ်သိးသုကမၤထွဲ သုလုၢ်သုလၢ်အဂီၢ်လဲၣ်.+
၄ အဒိ ကစၢ်ယွၤတဲဝဲလၢ ‘ယူးယီၣ်ပာ်ကဲ နမိၢ်ဒီးနပၢ်တက့ၢ်.’+ ဒီး ‘ပှၤလၢ အဒုၣ်ဒွဲၣ်စံးအၢ အမိၢ် မ့တမ့ၢ် အပၢ်န့ၣ် ကဘၣ်တၢ်မၤသံအီၤလီၤ.’+
၅ ဘၣ်ဆၣ် သုတဲလၢ ‘ပှၤလၢအတဲအမိၢ် မ့တမ့ၢ် အပၢ်လၢ “တၢ်လၢအအိၣ်ဒီးယၤ လၢအကကဲဘျုးလၢသုဂီၢ်န့ၣ် ယအၢၣ်လီၤလၢ ယကဟ့ၣ်ကစၢ်ယွၤ ဝံၤလံအဃိ ယမၤစၢၤသု တသ့လၢၤဘၣ်”+ န့ၣ်
၆ အဝဲသ့ၣ် တလိၣ်ယူးယီၣ်ပာ်ကဲ* အမိၢ်အပၢ်လၢၤဘၣ်.’ အဃိ သုကွၢ်ကပာ် ကစၢ်ယွၤအတၢ်မၤလိာ် ခီဖျိလၢသုမၤထွဲ သုလုၢ်သုလၢ်လီၤ.+
၇ ပှၤပာ်မၤအသးသ့ၣ်ဧၢ, ဝံယၡါယၤ တဲဆိပာ်စၢၤသုဂ့ၢ်န့ၣ် ဘၣ်တီတီလီၤ. အဝဲတဲဝဲလၢ+
၈ ‘ပှၤသ့ၣ်တဖၣ်အံၤ မၤလၤကပီၤယၤထဲလၢ အထးခိၣ်လီၤ. မ့မ့ၢ် အသးန့ၣ်ယံၤဝဲဒီးယၤ ဖးယံၤလီၤ.
၉ မ့ၢ်လၢအဝဲသ့ၣ် အတၢ်သိၣ်လိတဖၣ်န့ၣ် မ့ၢ်ဝဲပှၤဟီၣ်ခိၣ်ဖိ အတၢ်မၤလိာ်အဃိ အဝဲသ့ၣ် ဆဲးဘူၣ်ထီၣ်ဘါထီၣ်ယၤ သနာ်က့ မ့ၢ်ဝဲ တၢ်ကလီကလီလီၤ.’”+
၁၀ ဒီးယ့ၣ်ၡူးကိးဃီၤဝဲ ပှၤဂီၢ်မုၢ်တဖၣ်ဒ်သိး ကဟဲလၢအအိၣ်ဒီး အတဲဝဲလၢ “ဒိကနၣ်ဒီးနၢ်ပၢၢ်တၢ်လၢ ယကတဲသုတဖၣ်နီၤ.+
၁၁ တၢ်လၢအနုာ်လီၤလၢ ပှၤကိာ်ပူၤန့ၣ် တမၤဘၣ်အၢ အနီၢ်ကစၢ်ဘၣ်. မ့မ့ၢ်တၢ်လၢ အဟးထီၣ်လၢ ပှၤကိာ်ပူၤန့ၣ် မၤဘၣ်အၢ အနီၢ်ကစၢ်လီၤ.”+
၁၂ ဒီးယ့ၣ်ၡူး အပျဲၢ်အဘီၣ်တဖၣ် ဟဲတဲအီၤလၢ “တၢ်လၢနတဲတဖၣ် မၤဆါ ပှၤဖၤရံၤၡဲ အသးန့ၣ် မ့ၢ်နသ့ၣ်ညါဧါ.”+
၁၃ ယ့ၣ်ၡူး တဲဆၢက့ၤ အဝဲသ့ၣ်လၢ “ကယဲၢ်တၢ်မုၢ်တၢ်ဘိလၢ ယပၢ်အိၣ်လၢမူခိၣ် တသူၣ်လီၤဝဲဘၣ်န့ၣ် ကဘၣ် တၢ်ထဲးထီၣ်ကွံာ်အီၤလီၤ.
၁၄ ကနၣ်ဃုာ် အဝဲသ့ၣ်တဂ့ၤ. အဝဲသ့ၣ်န့ၣ် မ့ၢ်ပှၤမဲာ်တထံၣ်တၢ်လၢ အဟံးစုနဲၣ်ကျဲတၢ်လီၤ. ပှၤလၢ အမဲာ်တထံၣ်တၢ်တဂၤ မ့ၢ်ဆှၢပှၤလၢ အမဲာ်တထံၣ်တၢ်တဂၤန့ၣ် အဝဲသ့ၣ်ခံဂၤလၢာ် ကလီၤတဲာ်လၢ တၢ်ပူၤလီၤ.”+
၁၅ စီၤပ့းတရူး တဲအီၤလၢ “တဲနၢ်ပၢၢ်ပှၤ တၢ်အဒိတခါန့ၣ်မီၤ.”
၁၆ ဒီးယ့ၣ်ၡူး တဲဆၢက့ၤဝဲလၢ “သုစ့ၢ်ကီး သုတနၢ်ပၢၢ်ဒံးဧီၤ.+
၁၇ တၢ်လၢပှၤအီၣ်ဝဲန့ၣ် နုာ်လီၤလၢ ပှၤဟၢဖၢပူၤ ဒီးဟးထီၣ်ကွံာ်ဝဲန့ၣ် သုတသ့ၣ်ညါဧီၤ.
၁၈ ဘၣ်ဆၣ် တၢ်လၢအဟဲထီၣ်လၢ ပှၤကိာ်ပူၤန့ၣ် အိၣ်ပာ်စၢၤလၢ ပှၤသးပူၤလီၤ. တၢ်န့ၣ်မ့ၢ်တၢ်လၢ အမၤဘၣ်အၢ ပှၤဟီၣ်ခိၣ်ဖိလီၤ.+
၁၉ အဒိ တၢ်လၢ အဟဲထီၣ်လၢ ပှၤသးပူၤန့ၣ်မ့ၢ်ဝဲ တၢ်ဆိကမိၣ်လၢ အအၢအသီ+ လၢအဒုးအိၣ်ထီၣ်ဝဲ တၢ်မၤသံပှၤဂၤ, တၢ်အဲၣ်ဘၢမါအဲၣ်ဘၢဝၤ, တၢ်မၤကမၣ်မုၣ်ကမၣ်ခွါ,* တၢ်ဟုၣ်တၢ်, တၢ်အုၣ်အသးကဘျံးကဘျၣ် ဒီးတၢ်ဒုၣ်ဒွဲၣ်စံးအၢတၢ်လီၤ.
၂၀ တၢ်သ့ၣ်တဖၣ်န့ၣ် မၤဘၣ်အၢပှၤဟီၣ်ခိၣ်ဖိလီၤ. တချုးပှၤအီၣ်တၢ်ဒံးဘၣ်အခါ ပှၤမ့ၢ်တသ့အစုဘၣ်* သနာ်က့ တမၤဘၣ်အၢအီၤဘၣ်.”
၂၁ ယ့ၣ်ၡူးဟးထီၣ်ကွံာ် ဖဲန့ၣ်ဒီး လဲၤဝဲလၢ တၢ်လီၢ်လၢအဘူးဒီး ဝ့ၢ်စိၢ်ဒီးစံဒိၣ်လီၤ.+
၂၂ ဒီးပှၤဖံၤနံက့ၤ ပိာ်မုၣ်တဂၤလၢအအိၣ်လၢ ဟီၣ်ကဝီၤဖဲန့ၣ်န့ၣ် ဟဲကိးထီၣ်လၢ အကလုၢ်ဖးဒိၣ်လၢ “စီၤဒၤဝံးအဖိခွါ, ကစၢ်ဧၢ, သးကညီၤယၤမီၤ. ယဖိမုၣ်န့ၣ် တၢ်ဝံတၢ်နါအိၣ်လၢ အလိၤအဃိ အဝဲဘၣ်တူၢ်တၢ်နးမးလီၤ.”+
၂၃ ဘၣ်ဆၣ် ယ့ၣ်ၡူးတတဲဆၢအီၤ နီတမံၤဘၣ်. အဃိ ယ့ၣ်ၡူးအပျဲၢ်အဘီၣ်တဖၣ် ဟဲလၢယ့ၣ်ၡူးအအိၣ် ဒီးဃ့ကညးအီၤလၢ “ပိာ်မုၣ်တဂၤအံၤ ပိာ်ပခံဒီး ကိးပသူထီၣ်ထီဘိအဃိ မၢအက့ၤမီၤ.”
၂၄ ယ့ၣ်ၡူး တဲဆၢဝဲလၢ “ကစၢ်ယွၤမၢလီၤယၤ ဒ်သိးယကလဲၤ ထဲဒၣ်လၢ ပှၤအံၣ်စရ့လးဖိ လၢအမ့ၢ် သိလၢအလီၤမၢ်တဖု အအိၣ်လီၤ.”+
၂၅ ဘၣ်ဆၣ် ပိာ်မုၣ်တဂၤန့ၣ် ဟဲချံးလီၤအခီၣ်လၢ ယ့ၣ်ၡူးအမဲာ်ညါ ဒီးတဲအီၤလၢ “ကစၢ်ဧၢ, မၤစၢၤယၤမီၤ.”
၂၆ ဒီးယ့ၣ်ၡူး တဲဆၢအီၤလၢ “ကိၣ်လၢ ဖိဒံဖိသၣ်အဂီၢ်န့ၣ် တကြၢးလၢ ပှၤဟံးန့ၢ်အီၤ ဒီးကွံာ်လီၤလၢ ထွံၣ်ဖိတဖၣ် အအိၣ်ဘၣ်.”
၂၇ ဒီးပိာ်မုၣ်တဂၤန့ၣ် တဲဝဲလၢ “မ့ၢ်လီၤ ကစၢ်ဧၢ, ဘၣ်ဆၣ် တၢ်အီၣ်လၢ အလီၤဆှုလၢ အကစၢ် အစီၢ်နီၤခိၣ်ဖီလာ်န့ၣ် ထွံၣ်ဖိတဖၣ်အီၣ်ဝဲလီၤ.”+
၂၈ ဒီးယ့ၣ်ၡူး တဲဆၢအီၤလၢ “အိ ပိာ်မုၣ်ဧၢ, နအိၣ်ဒီးတၢ်နာ်ဒိၣ်မး အဃိ မ်တၢ်ကဲထီၣ်အသး ဒ်နဆၢမုၢ်လၢ် အသိးတက့ၢ်.” ဒီးအဖိမုၣ်န့ၣ် ဘျါက့ၤဝဲတဘျီဃီလီၤ.
၂၉ ယ့ၣ်ၡူးဟးထီၣ်ဖဲန့ၣ် ဝံၤအလီၢ်ခံ အဝဲလဲၤဝဲလၢ ပီၣ်လဲၣ်ကၤလံၤလါ+ အဃၢၤလီၤ. ဝံၤဒီး အဝဲလဲၤထီၣ်လၢ ကစၢၢ်ခိၣ် ဒီးဆ့ၣ်နီၤဝဲဖဲန့ၣ်လီၤ.
၃၀ ဒီးပှၤဂီၢ်မုၢ်ဖးဒိၣ် ဟဲလၢအအိၣ် ဒီးဟဲကိးဃုာ်ဒီး ပှၤခီၣ်ဟးဂီၤ, ပှၤစုတဂ့ၤခီၣ်တဂ့ၤ, ပှၤမဲာ်တထံၣ်တၢ်, ပှၤလၢအတဲတၢ်တသ့ဘၣ် ဒီးပှၤအဂၤတဖၣ်လီၤ. ဒီးအဝဲသ့ၣ် ဟဲပာ်လီၤဝဲပှၤတဖၣ်န့ၣ်လၢ ယ့ၣ်ၡူးအခီၣ်ထံး ဒီးယ့ၣ်ၡူး မၤဘျါက့ၤအဝဲသ့ၣ်လီၤ.+
၃၁ ဖဲပှၤဂီၢ်မုၢ်တဖၣ် ထံၣ်ဘၣ်ဝဲလၢ ပှၤလၢ အတဲတၢ်တသ့ဘၣ်တဖၣ် တဲတၢ်သ့ထီၣ်က့ၤ ဒီးပှၤလၢ အစုတဂ့ၤခီၣ်တဂ့ၤတဖၣ် ဂ့ၤထီၣ်က့ၤ ဒီးပှၤလၢ အခီၣ်ဟးဂီၤတဖၣ် ဟးသ့ထီၣ်က့ၤ ဒီးပှၤလၢ အမဲာ်တထံၣ်တၢ်တဖၣ် ထံၣ်ထီၣ်က့ၤတၢ်အခါ ပှၤဂီၢ်မုၢ်တဖၣ် ကမၢကမၣ်ဝဲဒီး မၤလၤကပီၤ အံၣ်စရ့လး အကစၢ်ယွၤလီၤ.+
၃၂ ဒီးယ့ၣ်ၡူး ကိးဃီၤအပျဲၢ်အဘီၣ်တဖၣ် ဆူအအိၣ်ဒီးတဲဝဲလၢ “ပှၤဂီၢ်မုၢ်အံၤ အိၣ်ဒီးယၤသၢသီလံ, ဘၣ်ဆၣ် အဝဲသ့ၣ်အတၢ်အီၣ်တၢ်အီ တအိၣ်နီတမံၤဘၣ်အဃိ ယသးကညီၤဘၣ် အဝဲသ့ၣ်လီၤ.+ ဖဲအဝဲသ့ၣ်လီၤဘဲအခါ ယတအဲၣ်ဒိးပျဲက့ၤ အဝဲသ့ၣ်ဒံးဘၣ်. ယမ့ၢ်မၤဒ်န့ၣ်န့ၣ် အဝဲသ့ၣ် ကလီၤဘှး ဘၣ်ဖုးလၢ ကျဲလီၤ.”+
၃၃ အပျဲၢ်အဘီၣ်တဖၣ် တဲဆၢက့ၤအီၤလၢ “ပအိၣ်တၢ်လီၢ်ယံၤ ထဲထဲအံၤညါအဃိ ပလဲၤဃုန့ၢ်ကိၣ်လၢ ပှၤဂီၢ်မုၢ်ဖးဒိၣ်အံၤ ကအီၣ်ဝဲဘျဲဘျဲအဂီၢ် ကသ့ဒ်လဲၣ်.”+
၃၄ ဒီးယ့ၣ်ၡူး တဲအဝဲသ့ၣ်လၢ “သုကိၣ်အိၣ်ပှဲၤလိၣ်လဲၣ်.” အဝဲသ့ၣ်တဲဝဲလၢ “နွံလိၣ် ဒီးညၣ်ဆံးဆံးဖိ စှၤကိာ်ဘ့ၣ်လီၤ.”
၃၅ ဒီးအဝဲမၤလိာ် ပှၤဂီၢ်မုၢ်ဒ်သိး ကဆ့ၣ်နီၤလၢ ဟီၣ်ခိၣ်လိၤလီၤ.
၃၆ ဒီးယ့ၣ်ၡူးဟံးန့ၢ် ကိၣ်နွံလိၣ်ဒီးညၣ် ဒီးဃ့ထုကဖၣ်တၢ်လီၤ. ဝံၤဒီးအဘိးကၢ်ဝဲကိၣ် ဒီးဟ့ၣ်လီၤ အပျဲၢ်အဘီၣ်တဖၣ် ဒီးအဝဲသ့ၣ် ဟ့ၣ်နီၤလီၤ ပှၤဂီၢ်မုၢ်တဖၣ်လီၤ.+
၃၇ ပှၤခဲလၢာ် အီၣ်ဝဲတုၤအဘျဲ ဝံၤဒီးအဝဲသ့ၣ် ထၢဖှိၣ်က့ၤဝဲ အဘျဲၣ်အစဲၢ်န့ၣ် ပှဲၤဝဲကုဖးဒိၣ်နွံဒုလီၤ.+
၃၈ ဒီးလၢပှၤအီၣ်တၢ်အကျါန့ၣ် ထဲဒၣ်ပိာ်ခွါ အိၣ်ဝဲအဂၤ ၄,၀၀၀ လီၤ. ပိာ်မုၣ်ဒီးဖိသၣ်တဖၣ် အီၣ်တၢ်စ့ၢ်ကီးလီၤ.
၃၉ ဖဲယ့ၣ်ၡူးပျဲက့ၤ ပှၤဂီၢ်မုၢ်ဝံၤအခါ အဝဲလဲၤထီၣ်လၢ ကဘီပူၤ ဒီးလဲၤဝဲလၢ မၤကဒၤလ့ၣ် အဟီၣ်ကဝီၤပူၤလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ တၢ်မၤကဆှီ ဒ်လုၢ်လၢ်အိၣ်ဝဲအသိး.
^ မ့ၢ်စ့ၢ်ကီး “ကွၢ်ထွဲ.”
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
^ မ့ၢ်ဝဲ တၢ်မၤကဆှီ ဒ်လုၢ်လၢ်အိၣ်ဝဲအသိး.
