မးသဲ ၁၆:၁-၂၈
၁၆ ပှၤဖၤရံၤၡဲ ဒီးပှၤစးဒူၤကဲတဖၣ် ဟဲလၢယ့ၣ်ၡူးအအိၣ် ဒ်သိး ကမၤကွၢ်အီၤအဂီၢ်လီၤ. အဃိ အဝဲသ့ၣ်မၢအီၤလၢ ကမၤတၢ်လီၤလးတခါလၢ အဟဲလၢ ယွၤအအိၣ်လီၤ.+
၂ ယ့ၣ်ၡူးတဲဆၢ အဝဲသ့ၣ်လၢ “ဖဲမုၢ်ဟါလီၤ အဆၢကတီၢ်န့ၣ် သုတဲလၢ ‘မ့ၢ်လၢ တၢ်အၢၣ်ဂီၤဆှုၣ်ကလာ်အဃိ မူခိၣ်ကလံၤသီၣ်ဂီၤ ကဂ့ၤလီၤ.’
၃ ဒီးလၢဂီၤခီန့ၣ် သုတဲလၢ ‘မ့ၢ်လၢ မူခိၣ်ဂီၤဒီး တၢ်အၢၣ်ခံးသူအဃိ ကလံၤကအူ ဒီးတၢ်ကစူၤလီၤ.’ သုကွၢ်ထီၣ်မူခိၣ်ဒီး သုနၢ်ပၢၢ်တၢ်လၢ အကမၤအသးတဖၣ်, ဘၣ်ဆၣ်တၢ်မၤအသးလၢ ဆၢကတီၢ်ခဲအံၤန့ၣ် သုတနၢ်ပၢၢ် အခီပညီဘၣ်.
၄ ပှၤအၢပှၤသီလၢ အတတီဒီးယွၤ* တစိၤအံၤန့ၣ် အဲၣ်ဒိးထံၣ်တၢ်လီၤလး ဘၣ်ဆၣ် တၢ်တဒုးထံၣ် အဝဲသ့ၣ်ဘၣ်.+ တၢ်ကဒုးထံၣ် အဝဲသ့ၣ် ထဲဒၣ်ဝံယိၤနါ အတၢ်လီၤလး တမံၤလီၤ.”+ ဝံၤဒီး ယ့ၣ်ၡူး ဟးထီၣ်ကွံာ်လၢ အဝဲသ့ၣ်အအိၣ် ဒီးလဲၤတၢ်လီၤ.
၅ ဒီးအပျဲၢ်အဘီၣ်တဖၣ် လဲၤလၢဝၢ်ဘးခီ ဒီးသးပ့ၤနီၣ် လဲၤစိာ်ကိၣ်လီၤ.+
၆ ယ့ၣ်ၡူး တဲဘၣ်အဝဲသ့ၣ်လၢ “ပလီၢ်သုသးလၢ ပှၤဖၤရံၤၡဲ ဒီးပှၤစးဒူၤကဲ အကိၣ်မံၣ်နီၤ.”+
၇ ဒီးအဝဲသ့ၣ် တဲလိာ်အသး ကဒဲကဒဲလၢ “ပတဟဲစိာ် ကိၣ်နီတလိၣ်ဘၣ်.”
၈ ယ့ၣ်ၡူး သ့ၣ်ညါဝဲအဃိ အဝဲတဲဝဲလၢ “ပှၤလၢ အတၢ်နာ်စှၤသ့ၣ်ဧၢ, ဘၣ်မနုၤအဃိ သုတဲလိာ်သးကဒဲကဒဲလၢ သုကိၣ် တအိၣ်ဘၣ်အဂ့ၢ်လဲၣ်.
၉ သုတနၢ်ပၢၢ်ဒံးဧီၤ. ယဒုးအီၣ် ပှၤအဂၤ ၅,၀၀၀ လၢကိၣ်ယဲၢ်လိၣ် ဒီးသုထၢဖှိၣ်အဘျဲၣ် အိၣ်ကုပှဲၤဒုလဲၣ်န့ၣ် သုတနီၣ်ဘၣ်လၢၤဧီၤ.+
၁၀ ဒီးယဒုးအီၣ် ပှၤအဂၤ ၄,၀၀၀ လၢကိၣ်နွံလိၣ် ဒီးသုထၢဖှိၣ်အဘျဲၣ် အိၣ်ကုဖးဒိၣ်ပှဲၤဒုလဲၣ်န့ၣ် သုတနီၣ်ဘၣ်စ့ၢ်ကီးလၢၤဧီၤ.+
၁၁ ဖဲမၢကၢာ် ယတတဲသုဘၣ်ဃးဒီး ကိၣ်အဂ့ၢ်ဘၣ်န့ၣ် ဘၣ်မနုၤအဃိ သုတနၢ်ပၢၢ်ဘၣ်လဲၣ်. ယတဲသုလၢသုကဘၣ် ပလီၢ်သုသးလၢ ပှၤဖၤရံၤၡဲ ဒီးပှၤစးဒူၤကဲ အကိၣ်မံၣ် အဂ့ၢ်ဟီ.”+
၁၂ ဖဲန့ၣ်အဆၢကတီၢ် အဝဲသ့ၣ် နၢ်ပၢၢ်ထီၣ်ဝဲလၢ ယ့ၣ်ၡူးတအဲၣ်ဒိးတဲ ကိၣ်မံၣ်အဂ့ၢ်ဘၣ်. လၢတၢ်န့ၣ်အလီၢ် အဝဲအဲၣ်ဒိးတဲဝဲလၢ အဝဲသ့ၣ်ကဘၣ်ပလီၢ်အသး ဘၣ်ဃးဒီး ပှၤဖၤရံၤၡဲ ဒီးပှၤစးဒူၤကဲ အတၢ်သိၣ်လိတဖၣ်လီၤ.
၁၃ ဖဲယ့ၣ်ၡူးလဲၤတုၤလၢ ဖံလံးပံၤ ကဲၤစါရံၤ အဟီၣ်ကဝီၤအခါ သံကွၢ်အပျဲၢ်အဘီၣ်တဖၣ်လၢ “ပှၤကညီဖိခွါန့ၣ် ပှၤတဲဝဲလၢ အမ့ၢ်မတဂၤလဲၣ်.”+
၁၄ အဝဲသ့ၣ်တဲဝဲလၢ “ပှၤတနီၤနီၤ တဲဝဲလၢ အမ့ၢ် ပှၤဘျၢတၢ်စီၤယိၤဟၣ်+ ဒီးတနီၤန့ၣ် တဲဝဲလၢ ဝံအ့ၤလံယၤ,+ မ့မ့ၢ် ပှၤအဂၤတနီၤန့ၣ် တဲဝဲလၢ အမ့ၢ် ဝံယံးရမံယၤ မ့တမ့ၢ် ဝံအဂၤတဂၤဂၤလီၤ.”
၁၅ ဒီးယ့ၣ်ၡူး တဲအဝဲသ့ၣ်လၢ “သုမီၤ, မ့ၢ်သုကတဲလၢ ယမ့ၢ် မတဂၤလဲၣ်.”
၁၆ စီၤၡံမိၣ်ပ့းတရူး တဲဆၢဝဲလၢ “နမ့ၢ်ခရံာ်+ လၢအမ့ၢ်ယွၤလၢ အမူဝဲတဂၤအဖိခွါလီၤ.”+
၁၇ ယ့ၣ်ၡူးတဲအီၤလၢ “စီၤယိၤနါ အဖိခွါစီၤၡံမိၣ်ဧၢ, ပှၤဟီၣ်ခိၣ်ဖိ* တပာ်ဖျါထီၣ်န့ၢ်နၤ တၢ်ဂ့ၢ်တခါအံၤဘၣ်. ယပၢ်အိၣ်လၢမူခိၣ် ပာ်ဖျါထီၣ်န့ၢ်နၤအဃိ သးခုတက့ၢ်.+
၁၈ ယကတဲစ့ၢ်ကီးနၤ, နမ့ၢ်စီၤပ့းတရူး+ ဒီးလၢလၢၢ်တဖျၢၣ်အံၤ အဖီခိၣ်န့ၣ်+ ယကသူၣ်ထီၣ် ယတၢ်အိၣ်ဖှိၣ် ဒီးတၢ်သွၣ်ခိၣ်အတြဲၤန့ၣ်* မၤနၢၤအီၤတန့ၢ်ဘၣ်.
၁၉ ယကဟ့ၣ်လီၤနၤ မူခိၣ်ဘီမုၢ် အသီးခွဲးတဖၣ်လီၤ. ဒီးတၢ်လၢနစၢဃာ်လၢ ဟီၣ်ခိၣ်ချၢန့ၣ် မ့ၢ်တၢ်လၢ အစၢဃာ်ပာ်စၢၤအသးလၢ မူခိၣ်လံ. ဒီးတၢ်လၢနဃဲၣ်လီၤလၢ ဟီၣ်ခိၣ်ချၢန့ၣ် မ့ၢ်တၢ်လၢ အဃဲၣ်လီၤပာ်စၢၤအသးလၢ မူခိၣ်လီၤ.”
၂၀ ဝံၤဒီးယ့ၣ်ၡူး မၤလိာ် အပျဲၢ်အဘီၣ်တဖၣ်ဆူၣ်ဆူၣ် ဒ်သိးအသု တတဲဘၣ်ပှၤဂၤလၢ အမ့ၢ် ခရံာ်တဂ့ၤအဂီၢ်လီၤ.+
၂၁ စးထီၣ်ဖဲန့ၣ်ဝံၤအလီၢ်ခံ ယ့ၣ်ၡူးတဲနၢ်ပၢၢ် အပျဲၢ်အဘီၣ်လၢ အဝဲကဘၣ်လဲၤလၢ ဝ့ၢ်ယရူၤၡလ့ၣ် ဒီးပှၤသူၣ်က့သးပှၢ်တဖၣ်, ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် ကမၤအၢမၤနးအီၤလီၤ. ဒီးအကဘၣ် တၢ်မၤသံအီၤ ဘၣ်ဆၣ် လၢသၢသီတသီန့ၣ် အကဘၣ် တၢ်ဒုးဂဲၤဆၢထၢၣ်က့ၤအီၤလီၤ.+
၂၂ ဒီးစီၤပ့းတရူး ကိးဃီၤယ့ၣ်ၡူးလၢတၢ်ကပၤ ဒီးသိၣ်အီၤလၢ “ကစၢ်ဧၢ, သးကညီၤလီၤနသးသၢၤ. တၢ်သ့ၣ်တဖၣ်န့ၣ် တဘၣ် ကဲထီၣ်အသးဒီးနၤ နီတစဲးဘၣ်.”+
၂၃ ယ့ၣ်ၡူးဃၣ်ကွံာ်အသး ဒီးတဲစီၤပ့းတရူးလၢ “စၤတၣ်ဧၢ,* ယတကနၣ်ဃုာ် နတၢ်ကတိၤဘၣ်. နမ့ၢ်တၢ်လီၤဃံၢ်အလီၢ် လၢယဂီၢ်လီၤ. နတၢ်ဆိကမိၣ်န့ၣ် တမ့ၢ်ကစၢ်ယွၤ အတၢ်ဆိကမိၣ်ဘၣ်. မ့ၢ်ပှၤဟီၣ်ခိၣ်ဖိ အတၢ်ဆိကမိၣ်လီၤ.”+
၂၄ ဝံၤဒီးယ့ၣ်ၡူး တဲဘၣ်အပျဲၢ်အဘီၣ်လၢ “ပှၤလၢ အအဲၣ်ဒိးပိာ်ယခံ တဂၤဂၤန့ၣ် အတဘၣ်အိၣ်မူလၢ အနီၢ်ကစၢ်အဂီၢ်လၢၤဘၣ်. ဒီးအဘၣ်ယိးထီၣ် အတၢ်မၤအၢမၤနး အသ့ၣ်တၢၣ်* ဒီးပိာ်ယခံ ထီဘိလီၤ.+
၂၅ ပှၤလၢ အအဲၣ်ဒိးမၤပူၤဖျဲး အနီၢ်ကစၢ် အသးသမူန့ၣ် အသးသမူ ကလီၤမၢ်ကွံာ်ဝဲလီၤ. မ့မ့ၢ်ပှၤလၢ အသးသမူ လီၤမၢ်ကွံာ်ဝဲလၢယဃိန့ၣ် ကအိၣ်မူဘၣ်ကဒီး လၢအသီတဘျီလီၤ.+
၂၆ ပှၤတဂၤမ့ၢ်န့ၢ်ဘၣ် ဟီၣ်ခိၣ်ဒီတဘ့ၣ်ညါ သနာ်က့ အသးသမူ မ့ၢ်လီၤမၢ်ကွံာ်န့ၣ် မ့ၢ်အဘျုးကအိၣ် လၢအဂီၢ်ဒ်လဲၣ်.+ ဒီးပှၤတဂၤ ခီလဲဝဲ အသးသမူဒီး တၢ်မနုၤကကဲလဲၣ်.+
၂၇ ပှၤကညီဖိခွါအံၤ ကဟဲတုၤဝဲဒီး အပၢ်အလၤကပီၤ ဃုာ်ဒီးအမူခိၣ်ကလူးတဖၣ် ဒီးကဟ့ၣ်ဆၢက့ၤ ပှၤတဂၤစုာ်စုာ် ဒ်အတၢ်မၤဒၣ်ဝဲအသိးလီၤ.+
၂၈ ယကတဲဘၣ်သု တီတီလၢ ပှၤလၢ အဆၢထၢၣ်ဖဲအံၤတနီၤနီၤ, တချုးလၢ အသံဒံးဘၣ်န့ၣ် အဝဲသ့ၣ် ကထံၣ်ဘၣ်ဆိ ပှၤကညီဖိခွါအံၤ ဟဲဝဲလၢ အဘီမုၢ်အပူၤလီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤလၢအဲၣ်ဘၢတၢ်.”
^ မ့ၢ်စ့ၢ်ကီး “တၢ်ညၣ်ဒီးတၢ်သွံၣ်.”
^ လၢကြံးကျိာ် မ့ၢ်ဝဲ ဟ့ဒံ(စ်). ကွၢ် တၢ်ကတိၤအခီပညီ.
^ ဖဲအံၤ ယ့ၣ်ၡူးအဲၣ်ဒိးကိးဝဲ စီၤပ့းတရူးလၢ “ပှၤလၢအထီဒါတၢ်” ခီဖျိလၢ “စၤတၣ်” အခီပညီမ့ၢ်ဝဲ ပှၤလၢအထီဒါတၢ်.
^ ကွၢ် တၢ်ကတိၤအခီပညီ.
