မးသဲ ၂၂:၁-၄၆
၂၂ ယ့ၣ်ၡူး တဲကဒီးအဝဲသ့ၣ် တၢ်ကတိၤဒိတဖၣ် ဒီးတဲဝဲလၢ
၂ “မူခိၣ်အဘီအမုၢ်န့ၣ် လီၤဂာ်ဒီး စီၤပၤတဂၤလၢ အမၤန့ၢ်ဝဲအဖိခွါ အတၢ်ဖျီအမူးလီၤ.+
၃ အဝဲမၢလီၤ အကုၢ်အပှၤ ဒ်သိး ကလဲၤကိးဝဲ ပှၤလၢအဘၣ် တၢ်ကွဲမုာ်အီၤတဖၣ်လၢ ကဟဲလၢ တၢ်ဖျီအမူးလီၤ. ဘၣ်ဆၣ် ပှၤသ့ၣ်တဖၣ်န့ၣ် တအဲၣ်ဒိး ဟဲဝဲဘၣ်.+
၄ အဝဲဆှၢလီၤကဒီး အကုၢ်အပှၤလၢအဂၤတဖၣ် ဒီးမၤလိာ် အဝဲသ့ၣ်လၢ ‘တဲဘၣ်ပှၤလၢ အဘၣ်တၢ်ကွဲမုာ်အီၤတဖၣ်လၢ “ယကတဲာ်ကတီၤပာ်စၢၤ ဟါတၢ်အီၣ်ဝံၤလံ. ယကျီၢ် ဒီးယဆၣ်ဖိကီၢ်ဖိ ဘီၣ်ဘီၣ်သိသိတဖၣ်စ့ၢ်ကီး ဘၣ်တၢ်မၤသံအီၤလံ. ဒီးတၢ်ခဲလၢာ် ကတဲာ်ကတီၤသး ဝံၤလံအဃိ ဟဲလၢ တၢ်ဖျီအမူးတက့ၢ်.”’
၅ ဘၣ်ဆၣ် ပှၤသ့ၣ်တဖၣ်န့ၣ် တပာ်ဝဲလၢ တၢ်နီတမံၤဘၣ် ဒီးလဲၤဝဲလၢ တၢ်လီၢ်အဂၤလီၤ. တဂၤန့ၣ် လဲၤဝဲလၢ အစံာ်ပျီ, မ့မ့ၢ် အဝဲတဂၤန့ၣ် လဲၤဆါတၢ်ပှ့ၤတၢ်လီၤ.+
၆ ဒီးအဂၤတဖၣ်န့ၣ် ဖီၣ်န့ၢ်ဝဲ အကုၢ်တဖၣ် ဝံၤဒီးတီၢ်ဝဲ ဒီးမၤသံ အဝဲသ့ၣ်လီၤ.
၇ “စီၤပၤ သးဒိၣ်ထီၣ်တၢ် ဒီးဆှၢလီၤဝဲ အသုးမုၢ်သံၣ်ဘိတဖၣ်လီၤ. ဒီးမၤသံကွံာ်ဝဲ ပှၤလၢ အမၤသံတၢ်တဖၣ်န့ၣ် ဒီးဒွဲၣ်အူထီၣ်ကွံာ် အဝဲသ့ၣ်အဝ့ၢ်လီၤ.+
၈ ဒီးစီၤပၤတဲဘၣ် အကုၢ်အပှၤတဖၣ်လၢ ‘တၢ်အီၣ်တၢ်အီလၢ တၢ်ဖျီအမူးအဂီၢ်န့ၣ် အိၣ်ကတဲာ်ကတီၤအသးလံ. ဘၣ်ဆၣ် ပှၤလၢအဘၣ် တၢ်ကွဲမုာ်အီၤတဖၣ် တကြၢးဝဲဘၣ်ဝဲလၢ ကဟဲထီၣ်မူးအံၤအဂီၢ်ဘၣ်.+
၉ အဃိ လဲၤလၢ ကျဲမုၢ်တဖၣ် ဒီးကွဲမုာ် ပှၤတဂၤဂ့ၤ တဂၤဂ့ၤလၢ နထံၣ်အီၤ ဒ်သိး အကဟဲထီၣ် တၢ်ဖျီအမူးတက့ၢ်.’+
၁၀ အဃိ ကုၢ်တဖၣ်န့ၣ် လဲၤဝဲလၢ ကျဲမုၢ်တဖၣ် ဒီးကွဲမုာ်ဝဲ ပှၤလၢ အဝဲသ့ၣ်ထံၣ်ဝဲ ကိးဂၤဒဲး ဒီးဒုးအိၣ်ဖှိၣ်ဝဲ ပှၤအအၢမ့ၢ်ဂ့ၤ, ပှၤအဂ့ၤမ့ၢ်ဂ့ၤ ဒီးတၢ်ဖျီအမူးအလီၢ်န့ၣ် ပှဲၤဝဲဒီး ပှၤအီၣ်တၢ်အီတၢ်တဖၣ်လီၤ.
၁၁ “ဖဲစီၤပၤဟဲကွၢ် ပှၤတမှံၤတဖၣ်အခါ အဝဲထံၣ်ဘၣ် ပှၤတဂၤလၢ အတသိးဝဲ တၢ်ဖျီအမူး အကူအသိးဘၣ်.
၁၂ အဃိ အတဲဝဲ ပှၤတဂၤန့ၣ်လၢ ‘ခွါဧၢ, နတဟဲသိး တၢ်ဖျီအမူး အကူအသိးဒၢး နဟဲနုာ်လီၤဘၣ်ဒ်လဲၣ်.’ ဒီးပှၤတဂၤန့ၣ် တတဲဆၢက့ၤအီၤ နီတမံၤဘၣ်.
၁၃ ဒီးစီၤပၤတဲဘၣ် အကုၢ်အပှၤလၢ ‘စၢဃာ်အစုအခီၣ် ဒီးထုးထီၣ်ကွံာ်အီၤ ဆူတၢ်ချၢလၢ တၢ်ခံးကျါတက့ၢ်. ဖဲန့ၣ်န့ၣ် အဝဲကဟီၣ်ကယၢၤ ဒီးကအ့ၣ်တဃံး အမဲလီၤ.’
၁၄ “ပှၤလၢအဘၣ် တၢ်ကွဲမုာ်အီၤန့ၣ် အိၣ်ဒီဒူၣ်လီၤ. ဘၣ်ဆၣ် ပှၤလၢအဘၣ် တၢ်ဃုထၢအီၤန့ၣ် အိၣ်ဒၣ်ထဲ စှၤဂၤလီၤ.”
၁၅ ဒီးပှၤဖၤရံၤၡဲတဖၣ် က့ၤကူၣ်ထီၣ်ဖးလီၤတၢ် ဒ်သိးယ့ၣ်ၡူး ကတဲကမၣ်တၢ် အဂီၢ်လီၤ.+
၁၆ ဒီးအဝဲသ့ၣ် ဆှၢလီၤဝဲ အပျဲၢ်အဘီၣ်တဖၣ် ဒီးစီၤဟ့ၤရိာ် အပျဲၢ်အဘီၣ်တဖၣ်လၢ+ ယ့ၣ်ၡူးအအိၣ် ဒီးတဲဝဲလၢ “သရၣ်ဧၢ, ပသ့ၣ်ညါလၢ နတဲ တၢ်မ့ၢ်တၢ်တီ ဒီးနသိၣ်လိ ယွၤအကျဲ တီတီလိၤလိၤလီၤ. နတမၤဒ်သိး နကဒိးန့ၢ်ဘၣ် ပှၤဂၤအတၢ်ဘၣ်သး အဂီၢ်ဘၣ်. ဒီးနတစံၣ်ညီၣ်ပှၤဂၤ ဒ်နထံၣ်တၢ်လၢ အအိၣ်ဖျါ လၢခိအသိးဘၣ်.
၁၇ အဃိ ပကြၢးဟ့ၣ် တၢ်ခိတၢ်သွဲလၢ ကဲစၢ်ဧါ ပတကြၢးဟ့ၣ်ဘၣ်ဧါ. မ့ၢ်နဆိကမိၣ်ဒ်လဲၣ်န့ၣ် တဲပှၤတက့ၢ်.”
၁၈ ဘၣ်ဆၣ် ယ့ၣ်ၡူးသ့ၣ်ညါ အဝဲသ့ၣ် အတၢ်ကူၣ်အၢကူၣ်သီ အဃိ အဝဲတဲဝဲလၢ “ပှၤပာ်မၤအသးသ့ၣ်ဧၢ, သုမၤကွၢ်ယၤဘၣ်လဲၣ်.
၁၉ ဒုးနဲၣ်ယၤ စ့တဘ့ၣ်လၢ တၢ်ခိတၢ်သွဲ အဂီၢ်တက့ၢ်.” ဒီးအဝဲသ့ၣ် ဟဲစိာ်န့ၢ်အီၤ စ့ဒန့ၤရံၤတဘ့ၣ်လီၤ.*
၂၀ ယ့ၣ်ၡူးတဲဘၣ် အဝဲသ့ၣ်လၢ “ဖဲအံၤ မ့ၢ်မတဂၤ အဂီၤလဲၣ် ဒီးမ့ၢ်မတဂၤ အမံၤလဲၣ်.”
၂၁ ဒီးအဝဲသ့ၣ် တဲဝဲလၢ “ကဲစၢ်လီၤ.” ယ့ၣ်ၡူး တဲအဝဲသ့ၣ်လၢ “တၢ်လၢအဘၣ်ဃးဒီး ကဲစၢ်န့ၣ် ဟ့ၣ်က့ၤလၢ ကဲစၢ်တက့ၢ်. ဘၣ်ဆၣ် တၢ်လၢအဘၣ်ဃးဒီး ကစၢ်ယွၤန့ၣ် ဟ့ၣ်က့ၤလၢ ကစၢ်ယွၤတက့ၢ်.”+
၂၂ ဖဲအဝဲသ့ၣ် နၢ်ဟူဝဲဒ်န့ၣ်အခါ အဝဲသ့ၣ် ကမၢကမၣ်ဝဲဒီး ဟးထီၣ်လၢအအိၣ် ဒီးက့ၤဝဲလီၤ.
၂၃ ဖဲတၢ်တနံၤန့ၣ် ပှၤစးဒူၤကဲလၢ အတဲဝဲလၢ တၢ်ဂဲၤဆၢထၢၣ် သမူထီၣ်က့ၤ တအိၣ်ဘၣ်န့ၣ်+ ဟဲသံကွၢ် ယ့ၣ်ၡူးလၢ+
၂၄ “သရၣ်ဧၢ, စီၤမိၤၡ့ တဲဝဲလၢ ‘ပှၤတဂၤမ့ၢ်သံ ဒီးအဖိမ့ၢ်တအိၣ် နီတဂၤဘၣ်န့ၣ် အဒီပုၢ်ဝဲၢ်ခွါ ကဘၣ်ဖျီက့ၤအသးဒီးအမါ ဒီးဒုးအိၣ်ထီၣ် အစၢၤအသွဲၣ်လၢ အဒီပုၢ်ဝဲၢ်ခွါလၢ အသံတဂၤ အဂီၢ်လီၤ.’+
၂၅ ပှၤဒီပုၢ်ဝဲၢ်ခွါ အိၣ်ဝဲနွံဂၤလီၤ. အဒိၣ်ကတၢၢ်တဂၤန့ၣ် ဖျီအသး ဒီးတချုးလၢ အစၢၤအသွဲၣ် အိၣ်ထီၣ်ဒံးဘၣ်န့ၣ် သံဝဲလီၤ. ဒီးအဒီပုၢ်ဝဲၢ်ခွါ ဘၣ်ဖျီက့ၤအသးဒီးအမါလီၤ.
၂၆ အဃိ ခံဂၤတဂၤန့ၣ် ဟံးန့ၢ်ပိာ်မုၣ်အံၤလၢအမါ ဝံၤဒီးအဝဲစ့ၢ်ကီး သံဝဲ တချုးလၢ အစၢၤအသွဲၣ် အိၣ်ထီၣ်ဒံးဘၣ် အခါလီၤ. တကးဒံးဘၣ် ပှၤသၢဂၤတဂၤ ဒီးတုၤလီၤလၢ ပှၤနွံဂၤတဂၤန့ၣ် တၢ်မၤအသးဒီး အဝဲသ့ၣ် ဒ်န့ၣ်စ့ၢ်ကီးလီၤ.
၂၇ လၢခံကတၢၢ်န့ၣ် ပိာ်မုၣ်တဂၤန့ၣ်သံဝဲ စ့ၢ်ကီးလီၤ.
၂၈ မ့ၢ်လၢအဝဲကဲ ပှၤနွံဂၤလၢာ် အမါအဃိ ဖဲပှၤသံ ဂဲၤဆၢထၢၣ် သမူထီၣ်က့ၤအခါ လၢပှၤနွံဂၤအံၤအကျါန့ၣ် အဝဲကကဲ မတဂၤအမါလဲၣ်.”
၂၉ ယ့ၣ်ၡူးတဲဆၢ အဝဲသ့ၣ်လၢ “မ့ၢ်လၢ သုတနၢ်ပၢၢ် တၢ်ကွဲးအသး ဒီးကစၢ်ယွၤ အတၢ်စိတၢ်ကမီၤဘၣ် အဃိ သုတၢ်နၢ်ပၢၢ်န့ၣ် ကမၣ်ဝဲလီၤ.+
၃၀ ဖဲပှၤသံ ဂဲၤဆၢထၢၣ် သမူထီၣ်က့ၤ အခါန့ၣ် ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ တဆီဟံၣ်ဆီဃီလၢၤဘၣ်. အဝဲသ့ၣ် ကအိၣ်ဒ်သိးဒီး မူခိၣ်ကလူးတဖၣ်လၢ မူခိၣ်လီၤ.+
၃၁ ကစၢ်ယွၤတဲသု ဘၣ်ဃးဒီး ပှၤသံကဂဲၤဆၢထၢၣ် သမူထီၣ်က့ၤန့ၣ် သုတဖးဘၣ် အဂ့ၢ်ဧီၤ. ကစၢ်ယွၤ တဲဝဲလၢ
၃၂ ‘ယမ့ၢ် စီၤအၤဘြၤဟၣ်အယွၤ, စီၤအံၤစဲးအယွၤ ဒီးစီၤယၤကိာ်အယွၤလီၤ.’+ အဃိ ကစၢ်ယွၤတမ့ၢ် ပှၤသံတဖၣ် အယွၤဘၣ်, မ့ၢ်ဝဲပှၤမူတဖၣ် အယွၤလီၤ.”+
၃၃ ဖဲပှၤဂီၢ်မုၢ်တဖၣ် နၢ်ဟူ ယ့ၣ်ၡူးအတၢ်သိၣ်လိအခါ အဝဲသ့ၣ် ကမၢကမၣ်ဝဲလီၤ.+
၃၄ ဖဲပှၤဖၤရံၤၡဲတဖၣ် နၢ်ဟူဝဲလၢ ယ့ၣ်ၡူးမၤဘှ့ၣ် ပှၤစးဒူၤကဲတဖၣ်အခါ အဝဲသ့ၣ် ပာ်ဖှိၣ်ထီၣ်အသးဒီး ပှၤစးဒူၤကဲ ဒ်ပှၤတဒူၣ်ဃီ အသိးလီၤ.
၃၅ လၢအဝဲသ့ၣ်အကျါ ပှၤလၢအသ့ စီၤမိၤၡ့ အတၢ်သိၣ်တၢ်သီတဂၤန့ၣ် မၤကွၢ်ယ့ၣ်ၡူးဒီး သံကွၢ်အီၤလၢ
၃၆ “သရၣ်ဧၢ, လၢစီၤမိၤၡ့ အတၢ်သိၣ်တၢ်သီအပူၤ တၢ်မၤလိာ်လၢ အဒိၣ်ကတၢၢ်န့ၣ် မ့ၢ်ဖဲလဲၣ်တထံၣ်လဲၣ်.”+
၃၇ ယ့ၣ်ၡူး တဲဘၣ်အီၤလၢ “‘နကဘၣ်အဲၣ် နကစၢ် ယဟိဝၤယွၤ* လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ ဒီးလၢနတၢ်ကူၣ်တၢ်ဆး ခဲလၢာ်လီၤ.’+
၃၈ အဝဲအံၤမ့ၢ်ဝဲ တၢ်မၤလိာ် အဒိၣ်ကတၢၢ် ဒီးအဆိကတၢၢ် တထံၣ်လီၤ.
၃၉ ခံထံၣ်တထံၣ်န့ၣ် လီၤဂာ်ဒီးအီၤ ဒီးမ့ၢ်ဝဲ ‘နကဘၣ်အဲၣ် ပှၤလၢနဃၢၤ ဒ်နအဲၣ်လီၤ နနီၢ်ကစၢ်အသး အသိးလီၤ.’+
၄၀ စီၤမိၤၡ့ အတၢ်သိၣ်တၢ်သီခဲလၢာ် ဒီးဝံအတၢ်စံးပာ်တဖၣ်န့ၣ် ဒိးသန့ၤထီၣ်အသးလၢ တၢ်မၤလိာ်ခံထံၣ်အံၤ အဖီခိၣ်လီၤ.”+
၄၁ ဖဲပှၤဖၤရံၤၡဲတဖၣ် အိၣ်ဖှိၣ်ဝဲဖဲန့ၣ် တပူၤဃီဒံးအခါ ယ့ၣ်ၡူးသံကွၢ် အဝဲသ့ၣ်လၢ+
၄၂ “ဘၣ်ဃးဒီးခရံာ်န့ၣ် မ့ၢ်သုဆိကမိၣ်ဒ်လဲၣ်. အဝဲမ့ၢ်မတဂၤ အဖိခွါလဲၣ်.” ဒီးအဝဲသ့ၣ် တဲဆၢအီၤလၢ “စီၤဒၤဝံး အဖိခွါလီၤ.”*+
၄၃ ဒီးယ့ၣ်ၡူးသံကွၢ် အဝဲသ့ၣ်လၢ “မ့မ့ၢ်ဒ်န့ၣ်န့ၣ် ဘၣ်မနုၤအဃိ သးစီဆှံ ထိၣ်ဟူးထိၣ်ဂဲၤထီၣ်+ စီၤဒၤဝံးလၢ ကကိးအီၤလၢ ကစၢ်လဲၣ်. စီၤဒၤဝံး တဲဝဲလၢ
၄၄ ‘ယဟိဝၤယွၤ တဲဘၣ် ယကစၢ်လၢ “ဆ့ၣ်နီၤလၢ ယစုထွဲ တုၤလီၤလၢ ယပာ်နဒုၣ်နဒါလၢ နခီၣ်အဖီလာ်တက့ၢ်.”’+
၄၅ စီၤဒၤဝံး မ့ၢ်ကိးခရံာ်လၢ ကစၢ်န့ၣ် အဝဲကဲ စီၤဒၤဝံးအဖိခွါ ကသ့ဒ်လဲၣ်.”+
၄၆ ဒီးပှၤတဲဆၢက့ၤ ယ့ၣ်ၡူး ထဲတၢ်ကတိၤတဖျၢၣ်မး တဘၣ်နီတဂၤလၢၤဘၣ် ဒီးစးထီၣ်ဖဲ တၢ်တနံၤန့ၣ် ပှၤသံကွၢ်အီၤတၢ်တဘူၣ် နီတဂၤလၢၤဘၣ်.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ကွၢ် တၢ်ကတိၤအခီပညီ.
