မးသဲ ၂၄:၁-၅၁
-
တၢ်ပနီၣ်လၢ အပာ်ဖျါထီၣ်လၢ ယ့ၣ်ၡူးဟဲက့ၤအိၣ်ဒီးပှၤ (၁-၅၁)
၂၄ ဖဲယ့ၣ်ၡူး ဟးထီၣ်လၢ တၢ်လုၢ်ဟံၣ်ပူၤအခါ အပျဲၢ်အဘီၣ်တဖၣ် ဟဲလၢအအိၣ်ဒ်သိး ကဒုးနဲၣ်အီၤလၢ တၢ်လုၢ်ဟံၣ် ဒီးတၢ်သူၣ်ထီၣ်တဖၣ်လၢ အဘၣ်ထွဲ ဒီးတၢ်လုၢ်ဟံၣ်လီၤ.
၂ ဒီးယ့ၣ်ၡူးတဲဆၢက့ၤ အဝဲသ့ၣ်လၢ “သုထံၣ်တၢ်သူၣ်ထီၣ်တဖၣ်န့ၣ် ခဲလၢာ်မ့ၢ်ဧါ. ယကတဲဘၣ်သုတီတီလၢ တၢ်သူၣ်ထီၣ်အလၢၢ်တဖၣ်အံၤ ကဘၣ် တၢ်မၤလီၤပှီၢ်ကွံာ်အီၤခဲလၢာ် ဒီးလ့ၤတက့ၤ လၢၢ်တဖၣ်အံၤ တအိၣ်လၢ တဖျၢၣ်ဒီးတဖျၢၣ် အဖီခိၣ်လၢၤဘၣ်.”+
၃ ဖဲယ့ၣ်ၡူးဆ့ၣ်နီၤလၢ ကစၢၢ်သ့ၣ်စၤယံးလိၤအခါ အပျဲၢ်အဘီၣ်တဖၣ် လဲၤလၢအအိၣ် ဒီးသံကွၢ်ခူသူၣ်အီၤလၢ “တၢ်သ့ၣ်တဖၣ်န့ၣ် ကမၤအသး ဆံးယံာ်လဲၣ်. ဒီးနကဟဲက့ၤအိၣ်ဒီးပှၤ* အဆၢကတီၢ်+ ဒီးတၢ်အစိၤလၢ အလီၢ်ခံကတၢၢ်န့ၣ် အတၢ်ပနီၣ် ကမ့ၢ်မနုၤလဲၣ်န့ၣ်+ တဲဘၣ်ပှၤတက့ၢ်.”
၄ ယ့ၣ်ၡူး တဲဆၢအဝဲသ့ၣ်လၢ “ဒ်သိး ပှၤသုတကွဲန့ၢ်လွဲန့ၢ်သု နီတဂၤတဂ့ၤအဂီၢ် ပလီၢ်သုသးတက့ၢ်.+
၅ ပှၤအါဂၤ ကဟဲလၢယမံၤ ဒီးကတဲဝဲလၢ အမ့ၢ်ခရံာ် ဒီးကကွဲန့ၢ်လွဲန့ၢ် ပှၤအါဂၤလီၤ.+
၆ သုကနၢ်ဟူဘၣ် တၢ်ဒုးတၢ်ယၤအသီၣ် ဒီးတၢ်ဒုးတၢ်ယၤ အကစီၣ်လီၤ. ပျံၤတၢ်တဂ့ၤ, တၢ်သ့ၣ်တဖၣ်န့ၣ် ကဘၣ်ဟဲကဲထီၣ်အသးလီၤ. ဘၣ်ဆၣ် တၢ်အကတၢၢ်န့ၣ် တတုၤဒံးဘၣ်.+
၇ “ပှၤကလုာ် တဒူၣ်ဒီးတဒူၣ် ကဒုးလိာ်အသး ဒီးဘီမုၢ်တဘ့ၣ်ဒီးတဘ့ၣ် ကဒုးလိာ်အသးလီၤ.+ တၢ်သၣ်ဝံၤလီၤဒိ ကအိၣ်ထီၣ်ဝဲ+ ဒီးဟီၣ်ခိၣ်ကဟူးဝဲလၢ တၢ်လီၢ်တတီၤဝံၤတတီၤလီၤ.+
၈ တၢ်မၤအသးသ့ၣ်တဖၣ်န့ၣ် ခဲလၢာ်န့ၣ် မ့ၢ်ဒၣ် တၢ်ကိၢ်တၢ်ဂီၤ* အခီၣ်ထံးဒံးလီၤ.
၉ “ဝံၤဒီး ပှၤကဟ့ၣ်လီၤကွံာ်သု ဒ်သိး ကမၤအၢမၤနးသုအဂီၢ်+ ဒီးပှၤကမၤသံသုလီၤ.+ ဒီးပှၤကလုာ်ခဲလၢာ် ကသးဟ့သုလၢ ယမံၤအဃိလီၤ.+
၁၀ ဒီးပှၤအါဂၤ ကလီၤဃံၢ်ဝဲ ဒီးကဟ့ၣ်လီၤကွံာ်လိာ်အသး တဂၤဒီးတဂၤ ဒီးကသးဟ့လိာ်အသး တဂၤဒီးတဂၤလီၤ.
၁၁ ဝံအဘျၣ်အါဂၤ ကဟဲအိၣ်ထီၣ် ဒီးကကွဲန့ၢ်လွဲန့ၢ်ဝဲ ပှၤအါဂၤလီၤ.+
၁၂ ဒီးမ့ၢ်လၢ တၢ်အၢတၢ်သီ ကအိၣ်အါထီၣ်ဝဲအဃိ ပှၤအါတက့ၢ် အတၢ်အဲၣ်တၢ်ကွံ ကလီၤစှၤဝဲလီၤ.
၁၃ မ့မ့ၢ် ပှၤလၢအတူၢ်တၢ်လၢ တၢ်သးတီအပူၤ တုၤလၢအကတၢၢ်န့ၣ် ကတုၤလၢ တၢ်အုၣ်က့ၤခီၣ်က့ၤလီၤ.+
၁၄ ဒီးဘီမုၢ်တၢ်သးခုကစီၣ်န့ၣ် ကဘၣ် တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်လီၤ.+ ဝံၤဒီး တၢ်အကတၢၢ်န့ၣ် ကတုၤဝဲလီၤ.
၁၅ “အဃိ သုကထံၣ်တၢ်လၢ အလီၤသးဘၣ်အၢ လၢအမၤဟးဂီၤတၢ် ဆၢထၢၣ်လၢ တၢ်စီဆှံအလီၢ်+ ဒ်ဝံဒၤနံးယ့လး တဲပာ်စၢၤဝဲအသိး (မ်ပှၤဖးလံာ်ဖိ ပဲာ်ထံနီၤဖးတၢ်တက့ၢ်.)
၁၆ ဖဲန့ၣ်အခါ မ်ပှၤအိၣ်လၢ ယူဒၤအဟီၣ်ကဝီၤအပူၤန့ၣ် လဲၤဃ့ၢ်ထီၣ်လၢ ကစၢၢ်ကလိတဖၣ်တက့ၢ်.+
၁၇ ဒီးပှၤအိၣ်လၢ ဟံၣ်ခိၣ်န့ၣ် တဘၣ် စံၣ်လီၤလၢဟံၣ်ပူၤ ဒ်သိးကဟံးန့ၢ် တၢ်ဖိတၢ်လံၤ အဂီၢ်တဂ့ၤ.
၁၈ ဒီးပှၤအိၣ်လၢ စံာ်ပျီပူၤန့ၣ် တဘၣ် ဟဲက့ၤဒ်သိး ကဟံးန့ၢ် အတၢ်ကူတၢ်ကၤတဂ့ၤ.
၁၉ လၢမုၢ်နံၤတဖၣ်န့ၣ်အတီၢ်ပူၤ ပှၤမိၢ်ဒၢ ဒီးပှၤလၢအဒုးအီ အဖိနုၢ်န့ၣ် ကဘၣ်ကီဘၣ်ခဲလီၤ.
၂၀ ဒ်သိးသုသု တဘၣ်ဃ့ၢ်လၢ တၢ်ဂိၢ်ခါ မ့တမ့ၢ် မုၢ်အိၣ်ဘှံးနံၤ တဂ့ၤအဂီၢ် ဆဲးဃ့ထုကဖၣ်တၢ်တက့ၢ်.
၂၁ ဒီးဖဲန့ၣ်အခါ တၢ်နးတၢ်ဖှီၣ်ဖးဒိၣ်+ ကအိၣ်ထီၣ်ဝဲလီၤ. ဒီးလၢဟီၣ်ခိၣ် ကဲထီၣ်သီလံၤလံၤ တုၤလီၤလၢ ဆၢကတီၢ်ခဲအံၤန့ၣ် တၢ်နးတၢ်ဖှီၣ် တကဲထီၣ်အသးဒ်အံၤ နီတဘျီဒံးဘၣ်. ဒီးလၢခံစ့ၢ်ကီး တကဲထီၣ်အသး နီတဘျီလၢၤဘၣ်.+
၂၂ ဒီးကစၢ်ယွၤ မ့ၢ်တမၤစှၤလီၤ မုၢ်နံၤတဖၣ်န့ၣ်ဘၣ်န့ၣ် ပှၤ* တတုၤလၢ တၢ်အုၣ်က့ၤခီၣ်က့ၤ နီတဂၤဘၣ်. ဘၣ်ဆၣ် ခီဖျိလၢ ပှၤလၢအဘၣ် တၢ်ဃုထၢအီၤတဖၣ်အဃိ ကစၢ်ယွၤ ကမၤစှၤလီၤ မုၢ်နံၤတဖၣ်န့ၣ်လီၤ.+
၂၃ “ဒီးပှၤတဂၤဂၤ မ့ၢ်တဲသုလၢ ‘ကွၢ်လၢအံၤ, ခရံာ်အိၣ်ဖဲအံၤ’+ မ့တမ့ၢ် ‘အအိၣ်လၢန့ၣ်’ န့ၣ် တဘၣ်နာ်အီၤတဂ့ၤ.+
၂၄ ခရံာ်အဘျၣ် ဒီးဝံအဘျၣ်တဖၣ်+ ကအိၣ်ထီၣ်ဝဲ ဒီးကမၤတၢ်ပနီၣ် ဒီးတၢ်လီၤလး ဖးဒိၣ်တဖၣ် ဒ်သိး ကကွဲန့ၢ်လွဲန့ၢ်တၢ်+ ဒီးမ့ၢ်သ့န့ၣ် ကကွဲန့ၢ်လွဲန့ၢ်စ့ၢ်ကီး ပှၤလၢအဘၣ် တၢ်ဃုထၢအီၤတဖၣ်လီၤ.
၂၅ ယဟ့ၣ်ပလီၢ်ဆိသုလီၤ.
၂၆ အဃိ ပှၤမ့ၢ်တဲနၤလၢ ‘ကွၢ်လၢန့ၣ် ခရံာ်အိၣ်ဝဲလၢ ပှၢ်မုၢ်ကနၢ’ န့ၣ် တဘၣ်လဲၤတဂ့ၤ. ဒီးပှၤမ့ၢ်တဲနၤလၢ ‘ကွၢ်လၢန့ၣ် အဝဲအိၣ်လၢ ဒၢးအပူၤ’ န့ၣ် တဘၣ်နာ်တဂ့ၤ.+
၂၇ ဒ်လီဝၢ်ဒံး အိၣ်ထီၣ်လၢမုၢ်ထီၣ် ဒီးကပီၤထီၣ် ပၢၢ်တုၤလၢ မုၢ်နုာ်အသိး ပှၤကညီဖိခွါအံၤ အတၢ်ဟဲက့ၤအိၣ်ဒီးသု အဆၢကတီၢ်န့ၣ် ကမၤအသးဒ်န့ၣ်အသိး စ့ၢ်ကီးလီၤ.+
၂၈ ဖဲတၢ်သံစိၣ် အိၣ်ဝဲအလီၢ်န့ၣ် လံာ်ကြီကြာ်တဖၣ်* ကအိၣ်ဖှိၣ်ဝဲဖဲန့ၣ်လီၤ.+
၂၉ “ဖဲတၢ်နးတၢ်ဖှီၣ်အံၤ အမုၢ်နံၤတဖၣ် ဝံၤအလီၢ်ခံ တဘျီဃီန့ၣ် မုၢ်ကခံးလီၤ+ ဒီးလါတကပီၤလၢၤဘၣ်. ဒီးဆၣ်တဖၣ် အိၣ်လၢမူခိၣ်န့ၣ် ကလီၤတဲာ်ဝဲ ဒီးမူခိၣ် အစိကမီၤတဖၣ် ကဘၣ်တၢ်မၤဟူးမၤဝးအီၤလီၤ.+
၃၀ ဒီးပှၤကညီဖိခွါ အတၢ်ပနီၣ် ကဟဲအိၣ်ဖျါထီၣ်လၢ မူခိၣ် ဒီးပှၤကလုာ်ဒူၣ်လၢ ဟီၣ်ခိၣ်ချၢခဲလၢာ်န့ၣ် ကဒဲလီၤ အသးနါပှၢ်လၢ တၢ်သးအုးအပူၤ+ ဒီးအဝဲသ့ၣ် ကထံၣ်ဘၣ် ပှၤကညီဖိခွါအံၤ+ ဟဲဝဲလၢမူခိၣ် အတၢ်အၢၣ်တဖၣ်အလိၤ ပှဲၤဒီးတၢ်စိတၢ်ကမီၤ ဒီးတၢ်လၤတၢ်ကပီၤ ဒိၣ်ဒိၣ်မုၢ်မုၢ်လီၤ.+
၃၁ ဒီးကွဲၤကသီၣ်ဖးဒိၣ် ဒီးအဝဲကဆှၢလီၤဝဲ အမူခိၣ်ကလူးတဖၣ် ဒီးအဝဲသ့ၣ် ကပာ်ဖှိၣ်ဝဲ ပှၤလၢအဘၣ် တၢ်ဃုထၢအီၤတဖၣ် လၢကလံၤလွံၢ်ကျိၤ* စးထီၣ်လၢ မူခိၣ်အသနၢၣ် လၢအံၤတခီ ဒီးပၢၢ်တုၤလၢ အဝဲတခီလီၤ.+
၃၂ “ဟံးန့ၢ် တၢ်မၤလိလၢ ချၢၣ်ဒၢထူၣ်အအိၣ်တက့ၢ်. ဖဲအဒ့ဘီၣ်ဟဲထီၣ် ဒီးအလၣ် ဒိးထီၣ်ဝဲအခါန့ၣ် သုသ့ၣ်ညါလၢ တၢ်ကိၢ်ခါ ဘူးကတုၤလံ.+
၃၃ ဒ်န့ၣ်အသိး သုစ့ၢ်ကီး ဖဲသုထံၣ်ဘၣ် တၢ်သ့ၣ်တဖၣ်န့ၣ်ခဲလၢာ် မၤအသးအခါ သုကဘၣ်သ့ၣ်ညါလၢ ပှၤကညီဖိခွါ အိၣ်ဘူးထီၣ်လၢ တြဲၤအခီၣ်ထံးလံ.+
၃၄ ယကတဲဘၣ်သု တီတီလၢ ပှၤတစိၤအံၤ တချုးသံလၢာ်ဒံးဘၣ်န့ၣ် တၢ်သ့ၣ်တဖၣ်န့ၣ် ကမၤအသး ခဲလၢာ်လီၤ.
၃၅ မူခိၣ်ဒီးဟီၣ်ခိၣ် ကဒံကွံာ်ဝဲဘၣ်ဆၣ် ယတၢ်ကတိၤတဖၣ်န့ၣ် လ့ၤတက့ၤ တဒံကွံာ်ဝဲဘၣ်.+
၃၆ “ဘၣ်ဃးဒီး မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ် ပှၤတသ့ၣ်ညါ နီတဂၤဘၣ်.+ မူခိၣ်ကလူးတဖၣ်လၢ မူခိၣ်မ့ၢ်ဂ့ၤ, ဖိခွါမ့ၢ်ဂ့ၤ တသ့ၣ်ညါဝဲဘၣ်. သ့ၣ်ညါထဲဒၣ် ပၢ်တဂၤလီၤ.+
၃၇ ဒ်တၢ်မၤအသးလၢ စီၤနိအၤ အမုၢ်နံၤတဖၣ်အသိးန့ၣ်+ ဖဲပှၤကညီဖိခွါအံၤ ဟဲက့ၤအိၣ်ဒီးသု အဆၢကတီၢ် တၢ်ကမၤအသးဒ်န့ၣ် အသိးစ့ၢ်ကီးလီၤ.+
၃၈ မုၢ်နံၤတဖၣ်လၢ တချုးဖဲ ထံလုၢ်ဘၢတၢ် ဟဲဒံးဘၣ်န့ၣ် ပှၤအီၣ်တၢ်ဒီးအီတၢ် ဒီးန့ၢ်မါန့ၢ်ဝၤ တုၤလီၤလၢ မုၢ်တနံၤဖဲ စီၤနိအၤ လဲၤနုာ်လီၤလၢ ကဘီအပူၤလီၤ.+
၃၉ အဝဲသ့ၣ်န့ၣ် တပာ်သူၣ်ပာ်သးဝဲ တၢ်ကဲထီၣ်အသးတဖၣ်ဘၣ် တုၤလီၤလၢ ထံလုၢ်ဘၢတၢ်ဟဲဒီး စိာ်ကွံာ် အဝဲသ့ၣ်ခဲလၢာ်လီၤ.+ ဖဲပှၤကညီဖိခွါ ဟဲက့ၤအိၣ်ဒီးသု အဆၢကတီၢ်န့ၣ် တၢ်ကမၤအသးဒ်န့ၣ်အသိး စ့ၢ်ကီးလီၤ.
၄၀ ဒီးပိာ်ခွါခံဂၤလၢ အအိၣ်လၢတၢ်ပျီပူၤန့ၣ် တၢ်ကဟံးန့ၢ်အီၤတဂၤ ဒီးတၢ်ကပာ်တ့ၢ်ကွံာ် အီၤတဂၤလီၤ.
၄၁ ဒီးပိာ်မုၣ်ခံဂၤလၢ အဂူာ်ဆၢၣ်ဂူာ်န့ၣ် တၢ်ကဟံးန့ၢ်အီၤတဂၤ ဒီးတၢ်ကပာ်တ့ၢ်ကွံာ် အီၤတဂၤလီၤ.+
၄၂ မ့ၢ်လၢ သုကစၢ်ကဟဲတုၤလၢ မုၢ်နံၤဖဲလဲၣ်တနံၤလဲၣ်န့ၣ် သုတသ့ၣ်ညါဘၣ်အဃိ အိၣ်ပလီၢ်သး ထီဘိတက့ၢ်.+
၄၃ “ဘၣ်ဆၣ် သုကဘၣ်တိၢ်နီၣ် တၢ်ဂ့ၢ်တခါအံၤလီၤ. ဟံၣ်ကစၢ် မ့ၢ်သ့ၣ်ညါလၢ တၢ်ဟုၣ်တၢ်ဘျၣ် ကဟဲလၢ မုၢ်နၤခီ အဆၢကတီၢ်ဖဲလဲၣ်န့ၣ်+ အကအိၣ်ခိးကွၢ်တၢ် ဒီးတပျဲလၢ တၢ်ဟုၣ်တၢ်ဘျၣ် ကဟဲနုာ်လီၤလၢ အဟံၣ်ပူၤဘၣ်.+
၄၄ ဒ်န့ၣ်အသိး နၣ်ရံၣ်လၢ သုတဆိကမိၣ်ဘၣ်န့ၣ် ပှၤကညီဖိခွါအံၤ ကဟဲတုၤဝဲလီၤ. အဃိ သုဝဲစ့ၢ်ကီး အိၣ်ကတဲာ်ကတီၤ သုသးတက့ၢ်.+
၄၅ “ကုၢ်လၢအတီ ဒီးအကူၣ်တၢ်သ့ လၢအကစၢ် ပာ်ထီၣ်အီၤလၢ အကုၢ်အဂၤတဖၣ်အဖီခိၣ် ဒ်သိး ကဒုးအီၣ် အဝဲသ့ၣ်တၢ်အီၣ် ဖဲအဆၢကတီၢ်လၢ အကြၢးဝဲဘၣ်ဝဲန့ၣ် မ့ၢ်မတဂၤလဲၣ်.+
၄၆ ဖဲအကစၢ်ဟဲတုၤဒီး ထံၣ်ဝဲလၢ ကုၢ်အံၤမၤဝဲဒ်န့ၣ်အခါ ကုၢ်အံၤကသးခုဝဲလီၤ.+
၄၇ ယကတဲဘၣ်သု တီတီလၢ အကစၢ် ကပာ်ထီၣ်အီၤလၢ အတၢ်စုလီၢ်ခီၣ်ခိၣ် ခဲလၢာ်အဖီခိၣ်လီၤ.
၄၈ “ဘၣ်ဆၣ် ကုၢ်အဝဲန့ၣ် မ့ၢ်အၢမ့ၢ်သီဒီး မ့ၢ်ဆိကမိၣ်ဘၣ်ဖုးဝဲလၢ အကစၢ် မၤယံာ်မၤနီၢ်အသး+
၄၉ ဒီးအဝဲ မ့ၢ်တီၢ်ဝဲ ကုၢ်လၢအမၤသကိးတၢ်ဒီးအီၤတဖၣ် ဒီးအီၣ်သကိး အီသကိးတၢ်ဒီး ပှၤမူၤသံးတဖၣ်န့ၣ်
၅၀ ကုၢ်အံၤအကစၢ် ကဟဲတုၤ ဖဲမုၢ်နံၤလၢ ကုၢ်အံၤတမုၢ်လၢ်ဝဲဘၣ် ဒီးနၣ်ရံၣ်လၢ အတသ့ၣ်ညါဝဲဘၣ်လီၤ.+
၅၁ ဒီးကုၢ်အံၤအကစၢ် ကစံၣ်ညီၣ်အီၤ အနးကတၢၢ် ဒီးကပာ်အီၤ လၢတၢ်လီၢ်တပူၤဃီဒီး ပှၤပာ်မၤအသးတဖၣ်လီၤ. ဖဲန့ၣ်န့ၣ် အကဟီၣ်ကယၢၤ ဒီးကအ့ၣ်တဃံး အမဲလီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ အခီပညီလိၤလိၤ “ဆါဒ်သိးပှၤမိၢ်ဒၢ အဟၢဖၢဆါ ဖဲအဖိကအိၣ်ဖျဲၣ်အခါ.”
^ အခီပညီလိၤလိၤ “တၢ်ဖံးတၢ်ညၣ်.”
^ ဘၣ်သ့ၣ်သ့ၣ် ကမ့ၢ် “လီကတာ်.”
^ အခီပညီ မ့ၢ်ဝဲကလံၤလၢ အဟဲလၢ ကလံၤစိး, ကလံၤထံး, မုၢ်ထီၣ် ဒီးမုၢ်နုာ်.
