မးသဲ ၆:၁-၃၄
-
တၢ်စံၣ်တဲၤတဲလီၤတၢ်လၢ ကစၢၢ်ဒီခိၣ် (၁-၃၄)
-
မၤတၢ်တီတၢ်လိၤလၢ ပှၤဂၤအမဲာ်ညါဒ်သိး ပှၤကပတြၢၤနၤအဂီၢ်တဂ့ၤ (၁-၄)
-
ဘၣ်ဃ့ဘါထုကဖၣ်တၢ်ဒ်လဲၣ် (၅-၁၅)
-
တၢ်အဒိဘၣ်ဃးဒီး တၢ်ဃ့ထုကဖၣ် (၉-၁၃)
-
-
တၢ်ဒုၣ်တၢ်အီၣ် (၁၆-၁၈)
-
တၢ်လုၢ်ဒိၣ်ပှ့ၤဒိၣ် လၢဟီၣ်ခိၣ် ဒီးတၢ်လုၢ်ဒိၣ်ပှ့ၤဒိၣ် လၢမူခိၣ် (၁၉-၂၄)
-
ဘၣ်ယိၣ်တၢ်လၢၤတဂ့ၤ (၂၅-၃၄)
-
ပာ်ဆိယွၤအဘီအမုၢ် (၃၃)
-
-
၆ “ပလီၢ်သုသးလၢ သုသုတမၤ တၢ်တီတၢ်လိၤလၢ ပှၤဂၤအမဲာ်ညါ ဒ်သိး ပှၤကထံၣ်ဝဲအဂီၢ်တဂ့ၤ.+ သုမ့ၢ်မၤဒ်န့ၣ်န့ၣ် သုတဒိးန့ၢ်ဘၣ် ခိၣ်ဖးလၢ သုပၢ်အိၣ်လၢမူခိၣ် အအိၣ်ဘၣ်.
၂ ဖဲသုဟ့ၣ်မၤစၢၤ ပှၤဖှီၣ်ဖိယာ်ဖိအခါ တဘၣ်အူထီၣ်ကွဲၤ ဒ်ပှၤပာ်မၤအသးတဖၣ် မၤဝဲအသိးတဂ့ၤ. အဝဲသ့ၣ် မၤဝဲဒ်န့ၣ်လၢဘူၣ်ဘျီၣ်ပူၤ ဒီးလၢကျဲပူၤ ဒ်သိး ပှၤကမၤလၤကပီၤ အဝဲသ့ၣ်အဂီၢ်လီၤ. ယကတဲဘၣ်သုတီတီလၢ အဝဲသ့ၣ်န့ၣ် ဒိးန့ၢ်ဘၣ်ခိၣ်ဖး လၢလၢပှဲၤပှဲၤလံ.
၃ မ့မ့ၢ်သုန့ၣ် ဖဲသုဟ့ၣ်မၤစၢၤ ပှၤဖှီၣ်ဖိယာ်ဖိအခါ တၢ်လၢသုစုထွဲမၤဝဲန့ၣ် တဘၣ်ဒုးသ့ၣ်ညါ သုစုစ့ၣ်တဂ့ၤ.
၄ သုမ့ၢ်မၤဒ်န့ၣ်န့ၣ် ဖဲသုဟ့ၣ်မၤစၢၤ ပှၤဖှီၣ်ဖိယာ်ဖိအခါ ကကဲထီၣ်တၢ်ခူသူၣ်လီၤ. ဒီးသုပၢ်အိၣ်လၢမူခိၣ် လၢအထံၣ်ဝဲ တၢ်ခူသူၣ်တဂၤန့ၣ် ကဟ့ၣ်ဆၢက့ၤသုလီၤ.+
၅ “တကးဒံးဘၣ် ဖဲသုဃ့ထုကဖၣ်တၢ်အခါ တဘၣ်မၤဒ်သိးဒီး ပှၤပာ်မၤအသးတဖၣ်တဂ့ၤ.+ အဝဲသ့ၣ်န့ၣ် ဆၢထၢၣ်ဃ့ထုကဖၣ်တၢ်လၢ ဘူၣ်ဘျီၣ်ပူၤ ဒီးလၢကျဲမုၢ်ဖးဒ့အခိၣ်ထိး ဒ်သိး ပှၤကထံၣ်အီၤအဂီၢ်လီၤ.+ ယကတဲဘၣ်သုတီတီလၢ အဝဲသ့ၣ် ဒိးန့ၢ်ဘၣ်ခိၣ်ဖး လၢလၢပှဲၤပှဲၤလံ.
၆ မ့မ့ၢ်သုန့ၣ် ဖဲသုကဃ့ထုကဖၣ်တၢ်အခါ လဲၤနုာ်လီၤလၢသုဒၢးပူၤ ဒီးကးပံးဃာ်သုတြဲၤ ဒီးဃ့ထုကဖၣ်တၢ်လၢ သုပၢ်လၢပှၤထံၣ်အီၤတသ့ဘၣ်* တဂၤန့ၣ် အအိၣ်တက့ၢ်.+ သုမ့ၢ်မၤဒ်န့ၣ်န့ၣ် သုပၢ်လၢ အထံၣ်တၢ်ခဲလၢာ်* တဂၤန့ၣ် ကဟ့ၣ်ဆၢက့ၤသုလီၤ.
၇ ဖဲသုဃ့ထုကဖၣ်တၢ်အခါ တဘၣ်တဲဝံၤတဲက့ၤ တၢ်ကတိၤ အလီၢ်လီၢ်တဖၣ် ဒ်ပှၤကလုာ်အဂၤတဖၣ် မၤဝဲအသိးန့ၣ်တဂ့ၤ. အဝဲသ့ၣ် ဆိကမိၣ်ဝဲလၢ အမ့ၢ်တဲတၢ်အါအါဒ်န့ၣ်န့ၣ် ကစၢ်ယွၤ ကဒိကနၣ် အတၢ်ထုကဖၣ်လီၤ.
၈ အဃိ တဘၣ်လီၤဂာ်ဒီး အဝဲသ့ၣ်တဂ့ၤ. တချုးလၢ သုဃ့တၢ်ဒံးဘၣ်န့ၣ် သုပၢ်အိၣ်လၢမူခိၣ် သ့ၣ်ညါပာ်စၢၤဝဲ တၢ်လၢ သုလိၣ်ဘၣ်တဖၣ်လီၤ.+
၉ “သုကဘၣ်ဃ့ထုကဖၣ်တၢ် ဒ်အံၤလီၤ.+
“‘ပပၢ်အိၣ်လၢမူခိၣ်ဧၢ, မ်နမံၤ+ ဘၣ်တၢ်ပာ်စီဆှံအီၤတက့ၢ်.+
၁၀ နဘီနမုၢ်န့ၣ်+ မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး+ ဒ်နတၢ်ဘၣ်သး+ အိၣ်ဝဲအသိးတက့ၢ်.
၁၁ ဟ့ၣ်လီၤပှၤတၢ်အီၣ်* လၢတနံၤအဂီၢ် တနံၤအဂီၢ်တက့ၢ်.+
၁၂ ဒီးပျၢ်ကွံာ်ပတၢ်ကမၣ်* ဒ်ပပျၢ်ကွံာ်ပှၤဂၤ အတၢ်ကမၣ်* အသိးတက့ၢ်.+
၁၃ ဒီးတဘၣ်ပျဲပလဲၤနုာ်လီၤဆူ တၢ်လ့ပစီအပူၤတဂ့ၤ.+ မ့မ့ၢ် မၤပူၤဖျဲးပှၤလၢ မုၣ်ကီၤလံၢ်* အစုပူၤတက့ၢ်.’+
၁၄ “သုမ့ၢ်ပျၢ် ပှၤဂၤအတၢ်ကမၣ်န့ၣ် သုပၢ်အိၣ်လၢမူခိၣ် ကပျၢ်ကွံာ် သုတၢ်ကမၣ်စ့ၢ်ကီးလီၤ.+
၁၅ ဘၣ်ဆၣ် သုမ့ၢ်တပျၢ်ကွံာ် ပှၤဂၤအတၢ်ကမၣ်ဘၣ်န့ၣ် သုပၢ်အိၣ်လၢမူခိၣ် တပျၢ်ကွံာ် သုတၢ်ကမၣ်စ့ၢ်ကီးဘၣ်.+
၁၆ “သုမ့ၢ်ဒုၣ်တၢ်အီၣ်န့ၣ်+ တဘၣ်ဖျါသးအုး ဒ်ပှၤလၢ အပာ်မၤအသးတဖၣ် မၤဝဲအသိးလၢၤတဂ့ၤ. ဒ်သိး ပှၤအဂၤကသ့ၣ်ညါလၢ အဝဲသ့ၣ်ဒုၣ်တၢ်အီၣ်အဂီၢ် အဝဲသ့ၣ် တမၤကဆှဲကဆှီ အမဲာ်ဘၣ်.+ ယကတဲဘၣ်သုတီတီလၢ အဝဲသ့ၣ် ဒိးန့ၢ်ဘၣ်ခိၣ်ဖး လၢလၢပှဲၤပှဲၤလံ.
၁၇ မ့မ့ၢ်သုန့ၣ် ဖဲသုဒုၣ်တၢ်အီၣ်အခါ ဖှူသုခိၣ်လၢသိ ဒီးပျၢ်သုမဲာ်တက့ၢ်.
၁၈ သုမ့ၢ်မၤဒ်န့ၣ်န့ၣ် ပှၤဂၤတသ့ၣ်ညါဝဲလၢ သုဒုၣ်တၢ်အီၣ်ဘၣ်. ဘၣ်ဆၣ် ထဲသုပၢ်အိၣ်လၢမူခိၣ်တဂၤန့ၣ် ထံၣ်ဝဲလီၤ. ဒီးသုပၢ်လၢ အထံၣ်တၢ်ခဲလၢာ်* တဂၤအံၤန့ၣ် ကဟ့ၣ်ဆၢက့ၤသုလီၤ.
၁၉ “တၢ်လုၢ်ဒိၣ်ပှ့ၤဒိၣ်တဖၣ်လၢ ဟီၣ်ခိၣ်ချၢအံၤန့ၣ် အဃၢ်အီၣ်, အထီၣ်အ့ၣ် ဒီးတၢ်ဟုၣ်တၢ်ဘျၣ်တဖၣ် ဟဲဟုၣ်ဝဲသ့လီၤ. အဃိ တဘၣ်ပာ်ဖှိၣ် တၢ်လုၢ်ဒိၣ်ပှ့ၤဒိၣ်တဖၣ်န့ၣ် လၢၤတဂ့ၤ.+
၂၀ လၢတၢ်န့ၣ်အလီၢ် ပာ်ဖှိၣ် တၢ်လုၢ်ဒိၣ်ပှ့ၤဒိၣ်တဖၣ် လၢမူခိၣ်တက့ၢ်.+ ဖဲန့ၣ်န့ၣ် အဃၢ်တအီၣ်ဘၣ်, အတထီၣ်အ့ၣ်ဘၣ်+ ဒီးတၢ်ဟုၣ်တၢ်ဘျၣ်တဖၣ်န့ၣ် ဟဲဟုၣ်ဝဲ တန့ၢ်စ့ၢ်ကီးဘၣ်.
၂၁ ပှၤတဂၤကသးကစၢၢ်ဆၢ တၢ်လၢအပာ်လုၢ်ပာ်ပှ့ၤဝဲတဖၣ်.
၂၂ “နီၢ်ခိအမ့ၣ်အူဒၢန့ၣ် မ့ၢ်ဝဲမဲာ်ချံလီၤ.+ သုမဲာ်ချံ မ့ၢ်ကွၢ် တၢ်ထံထံန့ၣ်* သုနီၢ်ခိဒီတဂၤ ကကပီၤဝဲလီၤ.*
၂၃ ဘၣ်ဆၣ် သုမဲာ်ချံ မ့ၢ်ကွၢ်တၢ်လၢ တၢ်သးက့ၣ်အပူၤန့ၣ်*+ သုနီၢ်ခိဒီဂၤညါ ကခံးဝဲလီၤ. ဒီးတၢ်ကပီၤလၢ အအိၣ်လၢသုပူၤ မ့ၢ်ခံးဝဲန့ၣ် သုနီၢ်ခိ ကခံးဝဲဒိၣ်မးလီၤ.
၂၄ “ပှၤမၤကစၢ်ခံဂၤ အတၢ်မၤတသ့ နီတဂၤဘၣ်, မ့ၢ်လၢ အကသးဟ့ဝဲ ကစၢ်တဂၤ ဒီးကအဲၣ်ဝဲ ကစၢ်အဝဲတဂၤအဃိလီၤ.+ မ့တမ့ၢ် ကဆီၣ်ထွဲဝဲတဂၤ ဒီးကဆိကမိၣ်ဆံးအဝဲတဂၤလီၤ. သုကဲကစၢ်ယွၤအကုၢ် ဒီးတၢ်ထူးတၢ်တီၤအကုၢ် တကတီၢ်ဃီတသ့ဘၣ်.+
၂၅ “ဘၣ်ဃးဒီးတၢ်ဂ့ၢ်တခါအံၤန့ၣ် ယကတဲဘၣ်သုလၢ သုကအီၣ်ဘၣ်ဒ်လဲၣ် သုကအီဘၣ်ဒ်လဲၣ်န့ၣ် ဘၣ်ယိၣ်တၢ်လၢ သုသးသမူအဂီၢ် လၢၤတဂ့ၤ. ဒီးလၢသုနီၢ်ခိအဂီၢ် သုကကူကကၤဘၣ်+ ဒ်လဲၣ်ဒ်လဲၣ်န့ၣ် ဘၣ်ယိၣ်တၢ်လၢၤတဂ့ၤ.+ သးသမူန့ၣ် အလုၢ်အပှ့ၤဒိၣ်န့ၢ်ဒံး တၢ်အီၣ်တၢ်အီ ဒီးတၢ်ကူတၢ်ကၤတဖၣ် တမ့ၢ်ဧီၤ.+
၂၆ ကွၢ်ထိၣ်လၢ တၢ်ဖးဖီတဖၣ်န့ၣ် ထံထံဆးဆးတက့ၢ်.+ ထိၣ်တဖၣ်န့ၣ် တဖှံတၢ်ချံ ဒီးတကူးတၢ် ဒီးတပာ်ဖှိၣ်တၢ်လၢ ဘုဖီပူၤဘၣ်. ဘၣ်ဆၣ် သုပၢ်အိၣ်လၢ မူခိၣ်န့ၣ် ဒုးအီၣ်ဒုးအီ အဝဲသ့ၣ်လီၤ. မ့မ့ၢ် သုဝဲသ့ၣ်အံၤ သုလုၢ်ဒိၣ်ပှ့ၤဒိၣ်န့ၢ်ဒံး ထိၣ်တဖၣ်အံၤ တမ့ၢ်ဧီၤ.
၂၇ သုမၤထီထီၣ် သုသးသမူ ခီဖျိလၢ သုဘၣ်ယိၣ်တၢ်အဃိန့ၣ် ကသ့တစဲးစဲးဧါ.+
၂၈ ဘၣ်မနုၤအဃိ သုဘၣ်ယိၣ်တၢ်လၢ သုကကူဘၣ်ကၤဘၣ်တၢ်ဒ်လဲၣ် အဂီၢ်လဲၣ်. ဟံးန့ၢ်တၢ်မၤလိလၢ ဖီဒ့ၣ်ညါလၢ တၢ်ပျီပူၤန့ၣ်တက့ၢ်. ဖီဒ့ၣ်ညါ တမၤတၢ်ဘၣ် ဒီးတထါတၢ် စ့ၢ်ကီးဘၣ် ဘၣ်ဆၣ် ဖီဒ့ၣ်ညါတဖၣ် မဲထီၣ်ဝဲ ဂ့ၤဂ့ၤဘၣ်ဘၣ်လီၤ.
၂၉ ယကတဲဘၣ်သုလၢ စီၤၡလိၤမိၤန့ၣ်+ အိၣ်ဒီးအလၤအကပီၤ လီၤဘီလီၤမုၢ် သနာ်က့ အကူတၢ်ကၤတၢ်န့ၣ် တဖျါဂ့ၤထဲသိးဒီး ဖီဒ့ၣ်ညါတဖီးဘၣ်.
၃၀ ပှၤလၢ အတၢ်နာ်စှၤသ့ၣ်ဧၢ, တၢ်မုၢ်တၢ်ဘိန့ၣ် မဲထီၣ်လၢ တၢ်ပျီပူၤတနံၤအံၤ ဒီးခဲမုၢ်ဆ့ၣ် ကဘၣ် တၢ်တၢၤလီၤကွံာ်အီၤလၢ မ့ၣ်အူအပူၤလီၤ. ဘၣ်ဆၣ် ကစၢ်ယွၤ မ့ၢ်ဒုးကူဒုးကၤအီၤ ထဲထဲအံၤညါဒီး မ့မ့ၢ်သုဝဲသ့ၣ်န့ၣ် ဒ်သိး သုကကူကကၤဘၣ်အဂီၢ် ကစၢ်ယွၤ ကသးအိၣ်သု အါန့ၢ်အန့ၣ် တမ့ၢ်ဧီၤ.
၃၁ အဃိ တဘၣ်ဘၣ်ယိၣ်တၢ်ဒီး+ တဲလၢ ‘မ့ၢ်ယကအီၣ်ဘၣ်ဒ်လဲၣ်’ ‘မ့ၢ်ယကအီဘၣ်ဒ်လဲၣ်’ မ့တမ့ၢ် ‘မ့ၢ်ယကကူဘၣ်ကၤဘၣ်ဒ်လဲၣ်’+ နီတဘျီတဂ့ၤ.
၃၂ တၢ်သ့ၣ်တဖၣ်န့ၣ်ခဲလၢာ် ပှၤကလုာ်တဖၣ် ဂုာ်ကျဲးစၢးဝဲဆူၣ်ဆူၣ် ဒ်သိးကဒိးန့ၢ်ဘၣ်ဝဲ အဂီၢ်လီၤ. ဘၣ်ဆၣ် သုပၢ်အိၣ်လၢ မူခိၣ်န့ၣ် သ့ၣ်ညါဝဲလၢ သုလိၣ်ဘၣ် တၢ်သ့ၣ်တဖၣ်န့ၣ်လီၤ.
၃၃ “အဃိ ပာ်ဆိယွၤအဘီအမုၢ် ဒီးယွၤအတၢ်ဘျၢလၢ အတီအလိၤတဖၣ်လၢ သုတၢ်အိၣ်မူအပူၤ တက့ၢ်. ဒီးကစၢ်ယွၤကဟ့ၣ်လီၤသု တၢ်လၢသုလိၣ်ဘၣ်တဖၣ်လီၤ.+
၃၄ ခဲမုၢ်ဆ့ၣ်န့ၣ် တၢ်ကိၢ်တၢ်ဂီၤ ကအိၣ်ဒံးအဃိ တဘၣ်သူၣ်ကိၢ်သးဂီၤတၢ်လၢ ခဲမုၢ်ဆ့ၣ်အဂီၢ်တဂ့ၤ.+ တၢ်ကီတၢ်ခဲလၢ တနံၤအံၤ အဂီၢ်န့ၣ် အါဝဲလံ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “လၢအအိၣ်လၢ တၢ်ခူသူၣ်.”
^ မ့ၢ်စ့ၢ်ကီး “လၢအထံၣ်ဝဲ တၢ်ခူသူၣ်.”
^ အခီပညီလိၤလိၤ “ကိၣ်.”
^ အခီပညီလိၤလိၤ “ပကမၢ်တဖၣ်.”
^ အခီပညီလိၤလိၤ “ပှၤလၢအကမၢ်အိၣ်ဒီးပှၤ.”
^ အခီပညီလိၤလိၤ “ပှၤအၢပှၤသီတဂၤ.”
^ မ့ၢ်စ့ၢ်ကီး “လၢအထံၣ်ဝဲ တၢ်ခူသူၣ်.”
^ မ့ၢ်စ့ၢ်ကီး “ဖျါၡဲၡဲ.” အခီပညီလိၤလိၤ “ယိယိဖိ.”
^ မ့ၢ်စ့ၢ်ကီး “ပှဲၤဒီးတၢ်ကပီၤ.”
^ အခီပညီလိၤလိၤ “အတဂ့ၤ, အအၢအသီ.”
