မးသဲ ၈:၁-၃၄
၈ ယ့ၣ်ၡူး ဟဲက့ၤလီၤလၢ ကစၢၢ်ခိၣ်ဝံၤဒီး ပှၤဂီၢ်မုၢ်တဖၣ် ပိာ်ထီၣ်အခံ ဒီဒူၣ်လီၤ.
၂ ဒီးပှၤဘၣ်တၢ်ဆါအၢတဂၤ ဟဲလၢအအိၣ် ဒီးချံးလီၤအခီၣ်လၢ အမဲာ်ညါ ဒီးတဲအီၤလၢ “ကစၢ်ဧၢ, ယသ့ၣ်ညါလၢ နသးမ့ၢ်အိၣ် မၤကဆှီထီၣ်က့ၤယၤန့ၣ် နမၤသ့လီၤ.”+
၃ အဃိ ယ့ၣ်ၡူးယူာ်ဃီၤအစု, ထိးအီၤ ဒီးတဲဝဲလၢ “ယသးအိၣ်ဝဲသၢၤ. မ်နကဆှီထီၣ်က့ၤတက့ၢ်.”+ ဒီးအတၢ်ဆါအၢန့ၣ် ဘျါကွံာ်ဝဲ တဘျီဃီလီၤ.+
၄ ဒီးယ့ၣ်ၡူးတဲအီၤလၢ “တဲဘၣ် ပှၤနီတဂၤတဂ့ၤနီၤ.+ ဘၣ်ဆၣ် လဲၤပာ်ဖျါထီၣ်နသးလၢ ပှၤလုၢ်တၢ်ဒိၣ်အအိၣ်+ ဒီးလုၢ်ထီၣ်တၢ်လုၢ်လၢ စီၤမိၤၡ့မၤလိာ်ဝဲ+ ဒ်သိးကကဲထီၣ် တၢ်အုၣ်သးလၢ အဝဲသ့ၣ်အဂီၢ်နီၤ.”
၅ ဖဲယ့ၣ်ၡူးလဲၤနုာ်လီၤလၢ ဝ့ၢ်ကပ့းရနီၣ်အခါ သုးခိၣ်တဂၤ ဟဲလၢအအိၣ် ဒီးဃ့ကညးအီၤ+
၆ ဒီးတဲအီၤလၢ “ကစၢ်ဧၢ, ယပျဲၢ်တဂၤ အိၣ်တဆူၣ်ဘၣ်နးမးအဃိ ဘၣ်အိၣ်လၢဟံၣ်ပူၤ ဒီးအစုလီၤဘျ့ခီၣ်လီၤဘျ့လီၤ.”
၇ ယ့ၣ်ၡူးတဲအီၤလၢ “ယလဲၤမ့ၢ်တုၤန့ၣ် ယကမၤဘျါအီၤလီၤ.”
၈ ဒီးသုးခိၣ်တဂၤန့ၣ် တဲဆၢဝဲလၢ “ကစၢ်ဧၢ, ယတကြၢးတဘၣ်လၢ ယကတူၢ်လိာ်နၤ လၢယဟံၣ်ပူၤဘၣ်. အဃိ ထဲနဟ့ၣ်လီၤနကလုၢ်န့ၣ် ယပျဲၢ်ကဘျါက့ၤလီၤ.
၉ ယၤစ့ၢ်ကီး ယအိၣ်လၢ ပှၤလၢအဒိၣ်န့ၢ်ယၤတဖၣ် အဖီလာ် ဒီးသုးဖိလၢအအိၣ်လၢ ယဖီလာ်အိၣ်ဝဲ စ့ၢ်ကီးလီၤ. ယမ့ၢ်တဲ အဝဲတဂၤလၢ ‘လဲၤ’ န့ၣ် အလဲၤဝဲ ဒီးယမ့ၢ်တဲ အဝဲတဂၤလၢ ‘ဟဲ’ န့ၣ် အဟဲဝဲလီၤ. ဒီးယမ့ၢ်တဲ ယကုၢ်လၢ ‘မၤ’ န့ၣ် အမၤဝဲလီၤ.”
၁၀ ဖဲယ့ၣ်ၡူး နၢ်ဟူဝဲ ဒ်န့ၣ်အခါ အဝဲကမၢကမၣ် ဒီးတဲဘၣ်ပှၤလၢ အပိာ်အခံလၢ “ယကတဲဘၣ်သုတီတီလၢ, လၢပှၤအံၣ်စရ့လးဖိအကျါန့ၣ် ယတထံၣ်ဘၣ် ပှၤလၢ အတၢ်နာ်အိၣ် ထဲအံၤနီတဂၤဘၣ်.+
၁၁ ဘၣ်ဆၣ် ယကတဲဘၣ်သုလၢ ပှၤအါဂၤလၢမုၢ်ထီၣ် ဒီးလၢမုၢ်နုာ်န့ၣ် ကဟဲဆ့ၣ်နီၤအီၣ်တၢ်ဒီး စီၤအၤဘြၤဟၣ်, စီၤအံၤစဲး ဒီးစီၤယၤကိာ်လၢ စီၢ်နီၤခိၣ် လၢမူခိၣ်အဘီမုၢ်အပူၤလီၤ.+
၁၂ မ့မ့ၢ် ဘီမုၢ်အဖိခွါတဖၣ်န့ၣ် ကဘၣ် တၢ်ထုးထီၣ်ကွံာ်အီၤ ဆူတၢ်ချၢ လၢတၢ်ခံးကျါလီၤ. ဖဲန့ၣ်န့ၣ် အဝဲသ့ၣ် ကဟီၣ်ကယၢၤ ဒီးကအ့ၣ်တဃံးအမဲလီၤ.”+
၁၃ ဒီးယ့ၣ်ၡူး တဲဘၣ်သုးခိၣ်လၢ “က့ၤလၢနဟံၣ်, မ့ၢ်လၢ နပာ်ဖျါထီၣ်လၢ နအိၣ်ဒီး တၢ်နာ်အဃိ ဒ်နမုၢ်လၢ်အသိး မ်အဟဲလၢထီၣ်ပှဲၤထီၣ်တက့ၢ်.”+ ဒီးအပျဲၢ်န့ၣ် ဘျါက့ၤဝဲတဘျီဃီလီၤ.+
၁၄ ဖဲယ့ၣ်ၡူးလဲၤနုာ်လၢ စီၤပ့းတရူးအဟံၣ်ပူၤအခါ အထံၣ်ဝဲလၢ စီၤပ့းတရူးအမံၤပှၢ်ပိာ်မုၣ်+ မံနီၤဝဲလၢဟံၣ်ပူၤ ခီဖျိလၢအလိၤကိၢ်အဃိလီၤ.+
၁၅ အဃိ ယ့ၣ်ၡူးဖီၣ်အစု+ ဒီးအတၢ်ကိၢ် ခုၣ်လီၤက့ၤဝဲလီၤ. ဒီးအဝဲဂဲၤဆၢထၢၣ် ကတဲာ်ကတီၤဝဲ တၢ်အီၣ်တၢ်အီလၢ ယ့ၣ်ၡူးအဂီၢ်လီၤ.
၁၆ ဖဲမုၢ်ဟါလီၤအခါ ပှၤဟဲကိး ပှၤလၢတၢ်ဝံတၢ်နါ အိၣ်လၢအလိၤတဖၣ် ဆူယ့ၣ်ၡူးအအိၣ်လီၤ. ဒီးယ့ၣ်ၡူး ဟ့ၣ်လီၤ အကလုၢ် ဒီးနီဟးထီၣ်ကွံာ် တၢ်ဝံတၢ်နါတဖၣ် ဒီးအဝဲမၤဘျါဝဲ ပှၤဆူးပှၤဆါခဲလၢာ်လီၤ.
၁၇ အဃိ ဝံယၡါယၤ အတၢ်စံးပာ် လၢအမ့ၢ် “အဝဲ မၤလီၤမၢ်ကွံာ် ပတၢ်ဆူးတၢ်ဆါ ဒီးပတၢ်အ့ၣ်စိၢ်အ့ၣ်ထုးတဖၣ်” န့ၣ် လၢထီၣ်ပှဲၤထီၣ်လီၤ.+
၁၈ ဖဲယ့ၣ်ၡူး ထံၣ်ဘၣ် ပှၤဂီၢ်မုၢ်တဖၣ် အိၣ်ဝးတရံးအီၤအခါ အဝဲမၢအပျဲၢ်တဖၣ် လဲၤဒီးအီၤလၢ ဝၢ်ဘးခီလီၤ.+
၁၉ ဒီးပှၤကွဲးလံာ်ဖိတဂၤ ဟဲလၢအအိၣ် ဒီးတဲအီၤလၢ “သရၣ်ဧၢ, ဖဲနလဲၤ တပူၤဂ့ၤတပူၤဂ့ၤ ယကပိာ်နခံလီၤ.”+
၂၀ ဘၣ်ဆၣ် ယ့ၣ်ၡူးတဲအီၤလၢ “ထွံၣ်ဟီၣ်ခိၣ်တဖၣ်န့ၣ် အိၣ်ဒီးအပူၤ ဒီးထိၣ်လၢ တၢ်ဖးဖီတဖၣ်န့ၣ် အိၣ်ဒီးအသွံ မ့မ့ၢ် ပှၤကညီဖိခွါအံၤ အနီၢ်ကစၢ်အဟံၣ် တအိၣ်ဘၣ်.”*+
၂၁ ဒီးယ့ၣ်ၡူးအပျဲၢ်အဘီၣ်လၢ အဂၤတဂၤတဲအီၤလၢ “ကစၢ်ဧၢ, ဟ့ၣ်ယၤအခွဲးလၢ ယကက့ၤခူၣ်လီၤဆိ ယပၢ်မီၤ.”+
၂၂ ယ့ၣ်ၡူးတဲဆၢအီၤလၢ “ဆဲးပိာ်ယခံဟီ. ပှၤသံ* ကခူၣ်လီၤကွံာ် ပှၤသံဒၣ်ဝဲ.”+
၂၃ ဖဲယ့ၣ်ၡူး လဲၤထီၣ်လၢ ကဘီပူၤအခါ အပျဲၢ်အဘီၣ်တဖၣ် ပိာ်ထီၣ်အခံလီၤ.+
၂၄ လၢခံ ကလံၤမုၢ်ဖးဒိၣ်လီၤလၢ ပီၣ်လဲၣ်ပူၤ ဒီးလပီတဖၣ် ဟဲဘၣ်ထံးဝဲ ကဘီနးမး တုၤဒၣ်လဲာ် ကဘီဘူးကလီၤဘျၢလီၤ. ဘၣ်ဆၣ် ဖဲန့ၣ်အဆၢကတီၢ် ယ့ၣ်ၡူးမံဘၣ်အသးလီၤ.+
၂၅ အဃိ အပျဲၢ်အဘီၣ်သ့ၣ်တဖၣ် လဲၤကိးပၢၢ်ထီၣ်အီၤ ဒီးတဲအီၤလၢ “ကစၢ်ဧၢ, မၤပူၤဖျဲးပှၤသၢၤ, ပကသံလီၤ.”
၂၆ ဘၣ်ဆၣ် ယ့ၣ်ၡူးတဲအဝဲသ့ၣ်လၢ “ပှၤလၢ အတၢ်နာ်စှၤသ့ၣ်ဧၢ, ဘၣ်မနုၤအဃိ သုပျံၤတၢ် ထဲအံၤညါလဲၣ်.”+ ဒီးအဝဲဂဲၤဆၢထၢၣ် ဒီးမၢကလံၤဒီးပီၣ်လဲၣ် အိၣ်ဂၢၢ် အဃိကလံၤဒီးပီၣ်လဲၣ် အိၣ်ဂၢၢ်ဝဲလီၤ.+
၂၇ အဃိ အပျဲၢ်အဘီၣ်တဖၣ် ကမၢကမၣ်ဒီးတဲဝဲလၢ “ပှၤတဂၤအံၤ မ့ၢ်မတဂၤလဲၣ်. ကလံၤဒီးပီၣ်လဲၣ်မး ဒိကနၣ်အကလုၢ်ဒံး.”
၂၈ ဖဲယ့ၣ်ၡူး လဲၤလၢဝၢ်ဘးခီ တုၤလၢ ကဒါရၤအဟီၣ်ကဝီၤအခါ ပှၤခံဂၤလၢ တၢ်ဝံတၢ်နါအိၣ်လၢအလိၤန့ၣ် ဟဲထီၣ်လၢတၢ်သွၣ်ခိၣ်* ဒီးဟဲသဂၢၢ်အီၤလီၤ.+ အဝဲသ့ၣ်ခံဂၤန့ၣ် ဒူဒီးလီၤပျံၤဒိၣ်မးအဃိ ပှၤလဲၤလၢကျဲတဘိန့ၣ် တဘူၣ်နီတဂၤဘၣ်.
၂၉ ဒီးအဝဲသ့ၣ် ကိးပသူထီၣ်ဝဲလၢ “ကစၢ်ယွၤအဖိခွါဧၢ, နၤဒီးပှၤန့ၣ် ပဘၣ်ဃးလိာ်သး ဒ်လဲၣ်.+ နဟဲဒ်သိး နကမၤနးမၤဖှီၣ်ပှၤ+ တချုးလၢ တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ ဟဲတုၤဒံးဘၣ် န့ၣ်ဧါ.”+
၃၀ ဒီးလၢတၢ်ဒ့ၣ်စၢၤဖးယံၤန့ၣ် ထီးဖးအါတဖု အီၣ်အဆၣ်လီၤ.+
၃၁ အဃိ တၢ်ဝံတၢ်နါ ဃ့ကညးယ့ၣ်ၡူးလၢ “နမ့ၢ်နီဟးထီၣ်ကွံာ်ပှၤန့ၣ် ဒုးလဲၤပှၤလၢ ထီးတဖုန့ၣ် အပူၤမီၤ.”+
၃၂ ဒီးယ့ၣ်ၡူးတဲအဝဲသ့ၣ်လၢ “လဲၤ.” အဃိ အဝဲသ့ၣ်ဟးထီၣ် ဒီးလဲၤနုာ်ဝဲလၢ ထီးတဖုန့ၣ် အပူၤလီၤ. ဒီးထီးဒီတဖုန့ၣ် လဲၤဃ့ၢ်ဝဲလၢ ကၢၢ်ဖးထီအလိၤ ဒီးလီၤတဲာ်သံလၢ ပီၣ်လဲၣ်ပူၤလီၤ.
၃၃ မ့မ့ၢ် ပှၤကွၢ်ထီးတဖၣ်န့ၣ် ဃ့ၢ်ကွံာ်ဝဲ ဒီးလဲၤဝဲလၢဝ့ၢ်ပူၤ ဒီးတဲဖျါထီၣ်ဝဲ တၢ်မၤအသးခဲလၢာ် ဃုာ်ဒီးပှၤခံဂၤလၢ တၢ်ဝံတၢ်နါအိၣ်လၢအလိၤ အဂ့ၢ်လီၤ.
၃၄ ဒီးပှၤအိၣ်လၢ ဝ့ၢ်ပူၤခဲလၢာ် ဟဲသဂၢၢ်ယ့ၣ်ၡူး ဒီးဖဲအဝဲသ့ၣ် ထံၣ်အီၤအခါ ဃ့ကညးအီၤလၢ ကဟးထီၣ်ကွံာ်လၢ အဝဲသ့ၣ် အဟီၣ်ကဝီၤအပူၤလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ကပာ်လီၤအခိၣ်အဂီၢ် တၢ်လီၢ်တအိၣ်ဘၣ်.”
^ ဖျါလၢအဲၣ်ဒိးတဲဝဲ ပှၤသံလၢ နီၢ်သးတကပၤ.
^ မ့ၢ်စ့ၢ်ကီး “ပှၤခူၣ်လီၤပှၤသံအလီၢ်.”
