မၢ်ကူး ၁၁:၁-၃၃
၁၁ အဝဲသ့ၣ် လဲၤဘူးကတုၤလၢ ဝ့ၢ်ယရူၤၡလ့ၣ် ဒီးလဲၤတုၤဝဲဖဲ ဘ့ၤသဖၤက့ ဒီးဘ့ၤသနံသဝီ+ လၢအအိၣ်လၢ ကစၢၢ်သ့ၣ်စၤယံး အလိၤလီၤ. ယ့ၣ်ၡူးမၢလီၤ အပျဲၢ်အဘီၣ်ခံဂၤ+
၂ ဒီးတဲအဝဲသ့ၣ်လၢ “လဲၤနုာ်လီၤလၢ သဝီလၢ သုကွၢ်စိအီၤဖျါတဖျၢၣ် ဒီးဖဲသု လဲၤနုာ်လီၤတဘျီဃီအခါန့ၣ် သုကထံၣ် ကသ့ၣ်ယီၤဖိတဒုလၢ ပှၤတဒိးဘၣ်အီၤ နီတဂၤဒံးဘၣ်န့ၣ် ဘၣ်တၢ်စၢဃာ်အီၤလီၤ. ဃဲၣ်လီၤကွံာ်အီၤ ဒီးဟဲက့ၤမူၤအီၤ ဖဲအံၤတက့ၢ်.
၃ ပှၤတဂၤဂၤ မ့ၢ်တဲသုလၢ ‘ဘၣ်မနုၤအဃိ သုမၤဒ်အံၤလဲၣ်’ န့ၣ်သုဘၣ်တဲလၢ ‘ကစၢ်လိၣ်ဘၣ်ဝဲ ဒီးကဆှၢကဒါဝဲဖဲအံၤ လၢအဆိအချ့လီၤ.’”
၄ အဃိ အဝဲသ့ၣ်လဲၤဒီး ထံၣ်ဝဲ ကသ့ၣ်ယီၤဖိ ဘၣ်တၢ်စၢဃာ်အီၤလၢ ဟံၣ်တဖျၢၣ်အတြဲၤမဲာ်ညါ လၢအဘူးဒီး ကျဲလီၤ. ဒီးအဝဲသ့ၣ် ဃဲၣ်လီၤကွံာ်ဝဲလီၤ.+
၅ ဘၣ်ဆၣ် ပှၤလၢ အဆၢထၢၣ်ဖဲန့ၣ်တနီၤ တဲအဝဲသ့ၣ်လၢ “ဘၣ်မနုၤအဃိ သုဃဲၣ်လီၤ ကသ့ၣ်ယီၤဖိအံၤလဲၣ်.”
၆ အဝဲသ့ၣ် တဲဆၢက့ၤဝဲ ဒ်ယ့ၣ်ၡူးတဲဘၣ် အဝဲသ့ၣ်အသိး ဒီးပှၤတဖၣ်န့ၣ် တတြီအဝဲသ့ၣ်လၢၤဘၣ်.
၇ ဒီးအဝဲသ့ၣ်ဟဲက့ၤမူၤ ကသ့ၣ်ယီၤဖိလၢ+ ယ့ၣ်ၡူးအအိၣ် ဒီးဒါလီၤဝဲ အတၢ်ကူတၢ်ကၤလၢ ကသ့ၣ်ယီၤဖိအလိၤ ဒီးယ့ၣ်ၡူး ဆ့ၣ်နီၤဝဲလၢအလိၤလီၤ.+
၈ တကးဒံးဘၣ် ပှၤအါဂၤဒါလီၤ အကူအကၤ လၢကျဲပူၤ ဒီးတနီၤန့ၣ် ကျီန့ၢ်ဝဲသ့ၣ်ဒ့တဖၣ် လၢကျဲကပၤ ဒီးပာ်လီၤဝဲလၢ ကျဲပူၤလီၤ.+
၉ ဒီးပှၤလၢအဟးလၢ အမဲာ်ညါ ဒီးလၢအလီၢ်ခံန့ၣ် ကိးပသူထီၣ်ဝဲလၢ “ပဃ့ကညးနၤလၢ မၤပူၤဖျဲးအီၤတက့ၢ်.*+ ပှၤလၢအဟဲလၢ ယဟိဝၤယွၤ* အမံၤတဂၤအံၤန့ၣ် မ်အဘၣ်ဆိၣ်ဂ့ၤတက့ၢ်.+
၁၀ ပပၢ်စီၤဒၤဝံး အဘီမုၢ်လၢ အကဟဲန့ၣ် မ်အဘၣ်ဆိၣ်ဂ့ၤတက့ၢ်.+ ပှၤလၢအအိၣ်လၢ တၢ်လီၢ်ထီၣ်ထီတဂၤဧၢ, ပဃ့ကညးနၤလၢ မၤပူၤဖျဲးအီၤတက့ၢ်.”
၁၁ ဒီးအဝဲလဲၤနုာ်လီၤလၢ ဝ့ၢ်ယရူၤၡလ့ၣ် ဒီးလဲၤဝဲလၢ တၢ်လုၢ်ဟံၣ်ပူၤလီၤ. ဖဲန့ၣ် အဝဲကွၢ်တရံးတၢ်ကိးမံၤဒဲး ဘၣ်ဆၣ် မ့ၢ်လၢ မုၢ်ဟါလီၤလံအဃိ အဝဲဟးထီၣ်ဒီး လဲၤဝဲဒီးအတၢ်မၢဖိ တဆံခံဂၤ လၢဘ့ၤသနံသဝီလီၤ.+
၁၂ လၢခံတနံၤ ဖဲအဝဲသ့ၣ် ဟးထီၣ်လၢ ဘ့ၤသနံသဝီအခါ ယ့ၣ်ၡူးအဲၣ်ဒိးအီၣ်တၢ်လီၤ.+
၁၃ အဃိ ဖဲယ့ၣ်ၡူးထံၣ်စိဃီၤဝဲ ချၢၣ်ဒၢတထူၣ် အိၣ်ဒီးအလၣ်အခါ ဒ်သိးကထံၣ်ဝဲ မ့ၢ်အသၣ်အိၣ်လၢအလိၤ တဖျၢၣ်ဖျၢၣ်ဧါအဂီၢ် အလဲၤကွၢ်ဝဲလီၤ. ဘၣ်ဆၣ် မ့ၢ်လၢ ချၢၣ်ဒၢသၣ်ထီၣ်ဝဲ အဆၢကတီၢ် တဘၣ်ဒံးဘၣ်အဃိ ဖဲအလဲၤတုၤဝဲအခါ အတထံၣ်အသၣ်နီတဖျၢၣ်ဘၣ်, အိၣ်ထဲ အလၣ်လီၤ.
၁၄ အဃိ ယ့ၣ်ၡူးတဲ ချၢၣ်ဒၢထူၣ်လၢ “မ်ပှၤသုတအီၣ်ဘၣ်နသၣ် နီတဘျီလၢၤတဂ့ၤ.”+ ဒီးအပျဲၢ်အဘီၣ်တဖၣ် နၢ်ဟူဝဲလီၤ.
၁၅ ဒီးအဝဲသ့ၣ် လဲၤတုၤလၢ ယရူၤၡလ့ၣ်လီၤ. ယ့ၣ်ၡူးလဲၤနုာ်လီၤလၢ တၢ်လုၢ်ဟံၣ်အပူၤ ဒီးနီဟးထီၣ်ကွံာ်ဝဲ ပှၤလၢအပှ့ၤတၢ်ဆါတၢ်လၢ တၢ်လုၢ်ဟံၣ်အပူၤလီၤ. ဒီးအဝဲမၤလီၤတကျၢၢ် ပှၤခီလဲစ့ဖိတဖၣ် အစီၢ်နီၤခိၣ် ဒီးပှၤဆါထိၣ်လွံၢ်တဖၣ် အလီၢ်ဆ့ၣ်နီၤလီၤ.+
၁၆ ဒီးပှၤလၢ အလဲၤစိာ် တၢ်ပီးတၢ်လီန့ၣ် ယ့ၣ်ၡူးတပျဲအဝဲသ့ၣ် ခီဂာ် တၢ်လုၢ်ဟံၣ်အပူၤ နီတဂၤဘၣ်.
၁၇ ယ့ၣ်ၡူးသိၣ်လိတၢ် ဒီးတဲအဝဲသ့ၣ်လၢ “တၢ်ကွဲးအသးအိၣ်ဝဲလၢ ‘ယဟံၣ်န့ၣ် ကဘၣ်တၢ်ကိးအီၤလၢ တၢ်ဃ့ထုကဖၣ်အဟံၣ် လၢပှၤကလုာ် ခဲလၢာ်အဂီၢ်လီၤ.’+ ဘၣ်ဆၣ် သုမၤကဲထီၣ်အီၤလၢ တၢ်ဟုၣ်တၢ်ဘျၣ် အဟံၣ်လီၤ.”+
၁၈ ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ် နၢ်ဟူဝဲ တၢ်ဂ့ၢ်အံၤလီၤ. အဃိ အဝဲသ့ၣ် စးထီၣ်ကူၣ်ထီၣ်ဝဲလၢ ကမၤသံ ယ့ၣ်ၡူးလီၤ.+ ဘၣ်ဆၣ် အဝဲသ့ၣ်ပျံၤအီၤ, မ့ၢ်လၢ ပှၤဂီၢ်မုၢ်ခဲလၢာ် ကမၢကမၣ်ဝဲလၢ အတၢ်သိၣ်လိအဃိလီၤ.+
၁၉ တချုးဖဲ တၢ်ခံးလီၤအဆၢကတီၢ်န့ၣ် အဝဲသ့ၣ် ဟးထီၣ်ကွံာ်လၢ ဝ့ၢ်ပူၤလီၤ.
၂၀ ဘၣ်ဆၣ် လၢခံတနံၤ ဖဲအဝဲသ့ၣ်လဲၤတၢ်လၢ ဂီၤခီဂီၤဂီၤ အဆၢကတီၢ်န့ၣ် အဝဲသ့ၣ်ထံၣ်ဝဲလၢ ချၢၣ်ဒၢတထူၣ်န့ၣ် ဃ့ထီဝဲ တုၤလီၤလၢအဂံၢ်လီၤ.+
၂၁ ဒီးစီၤပ့းတရူး သ့ၣ်နီၣ်ထီၣ် သ့ၣ်တထူၣ်န့ၣ်အဂ့ၢ် ဒီးတဲယ့ၣ်ၡူးလၢ “သရၣ်ဧၢ,* ချၢၣ်ဒၢတထူၣ်လၢ နဆိၣ်အၢအီၤန့ၣ် ဃ့ထီကွံာ်လံ.”+
၂၂ ယ့ၣ်ၡူး တဲအဝဲသ့ၣ်လၢ “အိၣ်ဒီးတၢ်နာ် ကစၢ်ယွၤတက့ၢ်.
၂၃ ယကတဲဘၣ်သု တီတီလၢ ပှၤလၢအတဲ ကစၢၢ်တဖျၢၣ်အံၤလၢ ‘သုးနသး ဒီးကွံာ်လီၤနသးလၢ ပီၣ်လဲၣ်ပူၤန့ၣ်’ အဝဲမ့ၢ်နာ်ဝဲလၢ တၢ်ကမၤအသးဒ် အတဲဝဲအသိး ဒီးအသး မ့ၢ်တဒ့ဒီဘၣ်န့ၣ် တၢ်ကမၤအသးဒ်န့ၣ် သပှၢ်တၢၢ်လီၤ.+
၂၄ အဃိ ယကတဲဘၣ်သုလၢ ကယဲၢ်တၢ်လၢ သုဃ့ထုကဖၣ် ဒီးတၢ်လၢ သုဃ့အီၤကိးမံၤဒဲးန့ၣ် သုမ့ၢ်နာ်လၢ သုကန့ၢ်ဘၣ်အီၤန့ၣ် သုကန့ၢ်ဘၣ်အီၤလီၤ.+
၂၅ ဒီးဖဲသုဆၢထၢၣ် ဃ့ထုကဖၣ်တၢ်အခါ ပှၤလၢသုပာ် တၢ်ကမၣ်လၢအလိၤ မ့ၢ်အိၣ်တဂၤဂၤန့ၣ် ပျၢ်ကွံာ်အတၢ်ကမၣ် ခဲလၢာ်တက့ၢ်. သုမ့ၢ်မၤဒ်န့ၣ်န့ၣ် သုပၢ်အိၣ်လၢ မူခိၣ်စ့ၢ်ကီး ကပျၢ်ကွံာ်သု တၢ်ကမၣ်လီၤ.”+
၂၆ *—
၂၇ အဝဲသ့ၣ် ဟဲကဒီးလၢ ယရူၤၡလ့ၣ်လီၤ. ဒီးဖဲယ့ၣ်ၡူးဟးလၢ တၢ်လုၢ်ဟံၣ်ပူၤအခါ ပှၤလုၢ်တၢ်ဒိၣ်အခိၣ်တဖၣ်, ပှၤကွဲးလံာ်ဖိတဖၣ် ဒီးပှၤသူၣ်က့သးပှၢ်တဖၣ် ဟဲဝဲ
၂၈ ဒီးတဲအီၤလၢ “နမၤတၢ်သ့ၣ်တဖၣ်အံၤ လၢမတဂၤ အစိအကမီၤလဲၣ်, မတဂၤဟ့ၣ်နၤ တၢ်စိတၢ်ကမီၤလၢ နကမၤ တၢ်သ့ၣ်တဖၣ်အံၤလဲၣ်.”+
၂၉ ယ့ၣ်ၡူး တဲအဝဲသ့ၣ်လၢ “ယၤနာ်က့ ယကသံကွၢ်သု တၢ်တမံၤ. တဲဆၢယၤဒီး ယၤစ့ၢ်ကီး ယမၤတၢ်သ့ၣ်တဖၣ်အံၤ လၢမတဂၤ အစိအကမီၤလဲၣ်န့ၣ် ယကတဲဘၣ်သုလီၤ.
၃၀ စီၤယိၤဟၣ် အတၢ်ဒိးဘျၢန့ၣ်+ မ့ၢ်အဟဲလၢ ကစၢ်ယွၤလၢ မူခိၣ် အအိၣ်ဧါ မ့တမ့ၢ် အဟဲလၢ ပှၤဟီၣ်ခိၣ်ဖိအအိၣ်ဧါ. တဲဆၢယၤတက့ၢ်.”+
၃၁ ဒီးအဝဲသ့ၣ် တဲလိာ်အသး ကဒဲကဒဲလၢ “ပမ့ၢ်တဲလၢ ‘ယွၤလၢ မူခိၣ် အအိၣ်’ ဒီးအကတဲပှၤလၢ ‘မ့မ့ၢ်ဒ်န့ၣ်န့ၣ် ဘၣ်မနုၤအဃိ သုတနာ်အီၤဘၣ်လဲၣ်.’
၃၂ ဘၣ်ဆၣ် ပတဲအီၤလၢ ‘အဟဲလၢ ပှၤဟီၣ်ခိၣ်ဖိအအိၣ်’” ကဘူၣ်ဧါ. အဝဲသ့ၣ် ပျံၤပှၤဂီၢ်မုၢ်တဖၣ်, မ့ၢ်လၢ ပှၤဂီၢ်မုၢ်နာ်ဝဲလၢ စီၤယိၤဟၣ် မ့ၢ်ဝဲဝံနီၢ်ကီၢ်တဂၤ အဃိလီၤ.+
၃၃ အဃိ အဝဲသ့ၣ် တဲဆၢယ့ၣ်ၡူးလၢ “ပတသ့ၣ်ညါဘၣ်.” ဒီးယ့ၣ်ၡူး တဲဆၢအဝဲသ့ၣ်လၢ “ယၤစ့ၢ်ကီး ယမၤတၢ်သ့ၣ်တဖၣ်အံၤ လၢမတဂၤ အစိအကမီၤလဲၣ်န့ၣ် ယတတဲသုဘၣ်.”
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ တၢ်ဃ့လၢ ကစၢ်ယွၤအအိၣ်လၢ အကမၤပူၤဖျဲးယ့ၣ်ၡူးအဂီၢ်.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “ရၤဘံဧၢ.”
^ ကွၢ် တၢ်ဂ့ၢ်ဘၣ်ထွဲလိာ်သး က၃.
