မၢ်ကူး ၅:၁-၄၃
၅ အဝဲသ့ၣ်လဲၤလၢ ပီၣ်လဲၣ်ဝၢ်ဘးခီ တုၤလၢ ကရၤစံၤ ဟီၣ်ကဝီၤလီၤ.+
၂ ဖဲယ့ၣ်ၡူး ဟးထီၣ်လၢ ကဘီပူၤဝံၤတဘျီဃီန့ၣ် ပှၤလၢ တၢ်ဝံတၢ်နါ အိၣ်လၢအလိၤတဂၤ လၢအအိၣ်လၢ တၢ်သွၣ်ခိၣ်န့ၣ် ဟဲသဂၢၢ်အီၤလီၤ.
၃ အဝဲအိၣ်လၢ တၢ်သွၣ်ခိၣ်အလီၢ် ဒီးပှၤစၢဃာ်အီၤကျၢၤကျၢၤ တန့ၢ်နီတဂၤဘၣ်. ဒီးပှၤစၢအီၤလၢ ပျံၤထးဒၣ်လဲာ် တကျၢၤဘၣ်.
၄ ပှၤစၢအီၤဒီး ထးကွီၤဒီးပျံၤထး တလီၢ်လီၢ် ဘၣ်ဆၣ် အဝဲမၤတဲာ်ဝဲပျံၤထး ဒီးမၤဟးဂီၤဝဲ ထးကွီၤလီၤ. ဒီးပှၤဖီၣ်တံၢ်အီၤ တန့ၢ်နီတဂၤဘၣ်.
၅ အဝဲအိၣ်လၢ တၢ်သွၣ်ခိၣ် ဒီးလၢ ကစၢၢ်ကလိကျါ ဒီးကိးပသူဝဲ ဒီနံၤဒီနၤ ဒီးကူးလီၤအသး လၢလၢၢ်လီၤ.
၆ ဘၣ်ဆၣ် ဖဲအဝဲထံၣ်စိယ့ၣ်ၡူး လၢအယံၤအခါ အဝဲလဲၤဃ့ၢ်လၢ ယ့ၣ်ၡူးအအိၣ် ဒီးချံးလီၤအခီၣ် လၢအမဲာ်ညါလီၤ.+
၇ ဝံၤဒီး အဝဲကိးပသူထီၣ်လၢ အကလုၢ်ဖးဒိၣ်လၢ “ကစၢ်ယွၤ လၢအထီကတၢၢ်တဂၤ အဖိခွါယ့ၣ်ၡူးဧၢ, နၤဒီးယၤန့ၣ် ပဘၣ်ဃးလိာ်သးဒ်လဲၣ်. အၢၣ်လီၤယၤလၢ ကစၢ်ယွၤ အမဲာ်ညါလၢ နတမၤနးမၤဖှီၣ်ယၤဘၣ် န့ၣ်တက့ၢ်.”+
၈ အဝဲတဲဝဲဒ်န့ၣ် မ့ၢ်လၢ ယ့ၣ်ၡူးတဲတ့ၢ်အီၤလၢ “တၢ်ဝံတၢ်နါဧၢ, ဟးထီၣ်လၢ ပှၤတဂၤအံၤ အလိၤတက့ၢ်.”+
၉ ဘၣ်ဆၣ် ယ့ၣ်ၡူး သံကွၢ်အီၤလၢ “နမံၤဒ်လဲၣ်.” အဝဲတဲဆၢဝဲလၢ “ယမံၤမ့ၢ် လ့းကူၣ်, မ့ၢ်လၢ ပအိၣ်အါဂၤအဃိလီၤ.”
၁၀ ဒီးအဝဲ ဆဲးဃ့ကညးယ့ၣ်ၡူး ဒ်သိးအသု တနီဟးထီၣ်ကွံာ် အဝဲသ့ၣ်လၢ ကီၢ်အံၤအပူၤတဂ့ၤလီၤ.+
၁၁ ဒီးထီးဖးအါတဖု+ အီၣ်အဆၣ်လၢ ကစၢၢ်ခိၣ်ဖဲန့ၣ် စ့ၢ်ကီးလီၤ.+
၁၂ အဃိ တၢ်ဝံတၢ်နါတဖၣ် ဃ့ကညးယ့ၣ်ၡူးလၢ “ဟ့ၣ်ပှၤအခွဲးလၢ ပကလဲၤနုာ်လီၤလၢ ထီးတဖုန့ၣ်အပူၤမီၤ.”
၁၃ ယ့ၣ်ၡူး ဟ့ၣ်အဝဲသ့ၣ်အခွဲးအဃိ တၢ်ဝံတၢ်နါတဖၣ်အံၤ ဟးထီၣ်ကွံာ် ဒီးလဲၤနုာ်လီၤဝဲလၢ ထီးတဖုန့ၣ် အပူၤလီၤ. ဒီးထီးအဒု ၂,၀၀၀ န့ၣ်လဲၤဃ့ၢ်ဝဲလၢ ကၢၢ်ဖးထီအလိၤ ဒီးလီၤတဲာ်လၢ ပီၣ်လဲၣ်ပူၤ ဒီးလီၤအုးသံဝဲလီၤ.
၁၄ ဒီးပှၤကွၢ်ထီးတဖၣ်န့ၣ် ဃ့ၢ်ကွံာ်ဝဲဒီး တဲဘၣ်ဝဲ တၢ်မၤအသးတဖၣ်အံၤ လၢဝ့ၢ်ပူၤ ဒီးလၢအခိၣ်အဃၢၤတဖၣ် ဒီးပှၤဟဲကွၢ်ဝဲ တၢ်ကဲထီၣ်အသးလီၤ.+
၁၅ အဝဲသ့ၣ်ဟဲလၢ ယ့ၣ်ၡူးအအိၣ် ဒီးထံၣ်ဝဲပှၤလၢ တၢ်ဝံတၢ်နါလ့းကူၣ် အိၣ်တ့ၢ်လၢ အလိၤတဂၤ သိးဝဲတၢ်ကူတၢ်သိးဒီး ဆ့ၣ်နီၤဝဲလီၤ. ဒီးအသး ဘၣ်လီၢ်ဘၣ်စးက့ၤဝဲ အဃိအဝဲသ့ၣ် ပျံၤတၢ်လီၤ.
၁၆ ဒီးပှၤလၢအထံၣ်တ့ၢ် တၢ်မၤအသးတဖၣ်န့ၣ် တဲဘၣ် အဝဲသ့ၣ်လၢ ပှၤလၢတၢ်ဝံတၢ်နါ အိၣ်လၢအလိၤတဂၤ ဂ့ၤထီၣ်က့ၤဝဲဒ်လဲၣ် ဒီးတၢ်မၤအသးဒီး ထီးတဖုန့ၣ် ဒ်လဲၣ်လီၤ.
၁၇ အဃိ အဝဲသ့ၣ် ဃ့ကညးယ့ၣ်ၡူး ဒ်သိး အကဟးထီၣ်ကွံာ်လၢ အဝဲသ့ၣ် အဟီၣ်ကဝီၤပူၤလီၤ.+
၁၈ ဖဲယ့ၣ်ၡူး ဒိးထီၣ်ကဘီအခါ ပှၤလၢတၢ်ဝံတၢ်နါ ဟးထီၣ်လၢ အလိၤတဂၤန့ၣ် ဃ့ကညးအီၤ ဒ်သိးကလဲၤပိာ်အခံလီၤ.+
၁၉ ဘၣ်ဆၣ် ယ့ၣ်ၡူး တဟ့ၣ်အီၤအခွဲးဘၣ်. ဒီးတဲအီၤလၢ “က့ၤလၢ နအိၣ်တၢ်လီၢ်, လၢနဘူးနတံၢ်အအိၣ် ဒီးတဲဘၣ်အဝဲသ့ၣ် တၢ်ခဲလၢာ်လၢ ယဟိဝၤယွၤ* မၤန့ၢ်နၤ ဒီးတၢ်သးကညီၤလၢ အဝဲပာ်ဖျါထီၣ်လၢ နဖီခိၣ်အဂ့ၢ်တက့ၢ်.”
၂၀ အဃိ ပှၤတဂၤအံၤက့ၤ စံၣ်တဲၤတဲလီၤတၢ်လၢ ဒ့းကၤပလံၣ်* အပူၤ ဘၣ်ဃးဒီး တၢ်လၢ ယ့ၣ်ၡူးမၤန့ၢ်အီၤ ခဲလၢာ် ဒီးပှၤခဲလၢာ် ကမၢကမၣ်ဝဲလီၤ.
၂၁ ယ့ၣ်ၡူး ဒိးထီၣ်ကဒီးကဘီ ဒီးခီဂာ်ဝဲလၢ ဝၢ်ဘးခီ ဝံၤအလီၢ်ခံ ပှၤဂီၢ်မုၢ်ဖးဒိၣ် ဟဲလၢအအိၣ် ဖဲအဝဲအိၣ်လၢ ပီၣ်လဲၣ်နံၤအခါလီၤ.+
၂၂ စီၤယၤအ့ၤရူး လၢအမ့ၢ် ဘူၣ်ဘျီၣ်ခိၣ်တဂၤန့ၣ် ဟဲဝဲ ဒီးဖဲအထံၣ် ယ့ၣ်ၡူးအခါ အချံးလီၤအခီၣ်လၢ ယ့ၣ်ၡူးအမဲာ်ညါလီၤ.+
၂၃ အဝဲဃ့ကညး ယ့ၣ်ၡူးအါဘျီလၢ “ယဖိမုၣ်ဖိ ဆိးက့နးမး,* ဝံသးစူၤဟဲ ပာ်ထီၣ်နစုလၢအလိၤ+ ဒ်သိး အကအိၣ်ဆူၣ်ထီၣ် ဒီးကဆဲးမူဝဲ အဂီၢ်မီၤ.”
၂၄ ဖဲန့ၣ် ယ့ၣ်ၡူးပိာ်ထီၣ် အခံလီၤ. ဒီးပှၤဂီၢ်မုၢ်ဖးဒိၣ်စ့ၢ်ကီး ပိာ်ထီၣ် ယ့ၣ်ၡူးအခံအဃိ အဝဲသ့ၣ် ဘၣ်တိဘၣ်ထံးဒီးအီၤလီၤ.
၂၅ ဒီးပိာ်မုၣ်လၢအအိၣ်ဒီး သွံၣ်လီၤတၢ်ဆါ+ ယံာ်ဝဲ ၁၂ နံၣ်တဂၤ+ အိၣ်ဝဲဖဲန့ၣ်လီၤ.
၂၆ အဝဲ တူၢ်ဘၣ်တၢ်အါမးလၢ ကသံၣ်သရၣ်အါဂၤ အစုပူၤ ဒီးအကျိၣ်အစ့လၢ အအိၣ်ဒီးအီၤတဖၣ် လၢာ်ကွံာ်ဝဲလီၤ. ဘၣ်ဆၣ် အတၢ်ဆါ တကိညၢ်က့ၤဘၣ်အလီၢ် နးထီၣ်ဝဲလီၤ.
၂၇ ဖဲအဝဲနၢ်ဟူဘၣ် ယ့ၣ်ၡူးအဂ့ၢ်အခါ အဝဲဟဲလၢ ပှၤဂီၢ်မုၢ်အကျါ ဒီးလဲၤလၢ ယ့ၣ်ၡူးအလီၢ်ခံ ဒီးထိးဝဲ အဆ့ကၤလီၤ.+
၂၈ ပိာ်မုၣ်တဂၤန့ၣ် မၤဝဲဒ်န့ၣ်မ့ၢ်လၢ အတဲလီၤအနီၢ်ကစၢ်အသးလၢ “ယမ့ၢ်ထိးဘၣ်ထဲ အဆ့ကၤန့ၣ် ယကဘျါက့ၤလီၤ.”+
၂၉ ဒီးအသွံၣ်လီၤန့ၣ် ပတုာ်ဝဲတဘျီဃီ ဒီးအတူၢ်ဘၣ်ဝဲလၢ အတၢ်ဆါလၢအနးတခါအံၤ ဘျါက့ၤဝဲလံ.
၃၀ တဘျီဃီန့ၣ် ယ့ၣ်ၡူး သ့ၣ်ညါလီၤအသးလၢ တၢ်စိတၢ်ကမီၤ+ ဟးထီၣ်လၢအလိၤ အဃိ အဃၣ်ဃီၤအသးလၢ ပှၤဂီၢ်မုၢ်အအိၣ် ဒီးသံကွၢ်ဝဲလၢ “မတဂၤထိးဘၣ် ယဆ့ကၤလဲၣ်.”+
၃၁ ဘၣ်ဆၣ် အပျဲၢ်အဘီၣ်တဖၣ် တဲအီၤလၢ “နထံၣ်လၢ ပှၤဂီၢ်မုၢ်တဖၣ်အံၤ ဟဲဘၣ်တိဘၣ်ထံးနၤဒီး နသံကွၢ်လၢ မတဂၤ ထိးဘၣ်နၤလဲၣ် ဒံးဧါ.”
၃၂ ဘၣ်ဆၣ် ယ့ၣ်ၡူးကွၢ်တရံးတၢ် ဒ်သိး ကထံၣ်ဝဲလၢ မ့ၢ်မတဂၤ ထိးဘၣ်အီၤလဲၣ်.
၃၃ ဒီးပိာ်မုၣ်တဂၤန့ၣ် သ့ၣ်ညါလီၤအသးလၢ အတၢ်ဆါ ဘျါလံအဃိ အပျံၤတၢ်ဒီး ကနိးကစုာ်ဝဲလီၤ. ဒီးအဟဲ ထိၣ်လီၤပှီၤအသးလၢ ယ့ၣ်ၡူးအမဲာ်ညါ ဒီးတဲဘၣ်အီၤ တၢ်မ့ၢ်တၢ်တီ ခဲလၢာ်လီၤ.
၃၄ ယ့ၣ်ၡူးတဲအီၤလၢ “ဖိမုၣ်ဧၢ, နတၢ်နာ် မၤဘျါက့ၤနၤလံ. က့ၤမုာ်မုာ်နီၤ.+ နတတူၢ်ဘၣ် တၢ်ဆါလၢအနးတခါအံၤလၢၤဘၣ်.”+
၃၅ ဖဲအဝဲ တဲတၢ်ဒံးအခါ ပိာ်ခွါတဖၣ်လၢ အအိၣ်လၢ ဘူၣ်ဘျီၣ်ခိၣ်တဂၤ အဟံၣ်န့ၣ် ဟဲတဲဝဲဘူၣ်ဘျီၣ်ခိၣ်လၢ “နဖိမုၣ်သံလံ. တဘၣ်မၤတံာ်တာ် သရၣ်လၢၤတဂ့ၤ.”+
၃၆ ဘၣ်ဆၣ် ယ့ၣ်ၡူးနၢ်ဟူချုး အဝဲသ့ၣ် အတၢ်ကတိၤ ဒီးတဲဘၣ် ဘူၣ်ဘျီၣ်ခိၣ်တဂၤန့ၣ်လၢ “ဘၣ်ယိၣ်တၢ်တဂ့ၤ, အိၣ်ဒီးတၢ်နာ်တက့ၢ်.”+
၃၇ ဒီးအဝဲတပျဲ ပှၤပိာ်အခံနီတဂၤဘၣ်. ပျဲဝဲထဲဒၣ် စီၤပ့းတရူး, စီၤယၤကိာ် ဒီးစီၤယၤကိာ် အဒီပုၢ်ဝဲၢ်ခွါ စီၤယိၤဟၣ်လီၤ.+
၃၈ ဒီးအဝဲသ့ၣ် လဲၤလၢ ဘူၣ်ဘျီၣ်ခိၣ်တဂၤအဟံၣ် ဒီးယ့ၣ်ၡူးထံၣ်ဝဲ ပှၤဟီၣ်ကိးပသူဝဲဒိၣ်မး ဒီးတၢ်သီၣ်တၢ်သဲ သပှၢ်တၢၢ်လီၤ.+
၃၉ ဖဲယ့ၣ်ၡူးလဲၤနုာ်လီၤလၢ ဟံၣ်ပူၤအခါ အတဲဘၣ် ပှၤတဖၣ်န့ၣ်လၢ “သုဟီၣ် ဒီးသုမၤသီၣ်မၤသဲတၢ် ဘၣ်လဲၣ်. ဖိသၣ်တဂၤအံၤ တသံဘၣ်, မ့ၢ်ဒၣ်အမံလီၤ.”+
၄၀ ဒီးအဝဲသ့ၣ် နံၤဆဲးအဲးအီၤလီၤ. ဘၣ်ဆၣ် အဝဲမၢ ပှၤသ့ၣ်တဖၣ်န့ၣ် ဟးထီၣ်လၢ တၢ်ချၢကိးဂၤဒဲး ဒီးကိးန့ၢ်ဝဲ ဖိသၣ်အမိၢ်ဒီးအပၢ် ဒီးပှၤလၢပိာ်အခံတဖၣ် ဒီးလဲၤနုာ်လီၤဝဲလၢ ဖိသၣ်အိၣ်ဝဲ အလီၢ်လီၤ.
၄၁ ဝံၤဒီး အဝဲဟံးန့ၢ် ဖိသၣ်အစု ဒီးတဲအီၤလၢ “တၤလံၤသၤကူမံၤ” လၢအခီပညီ မ့ၢ်ဝဲ “ပိာ်မုၣ်ဖိသၣ်ဧၢ, ယကတဲနၤ ‘ဂဲၤဆၢထၢၣ်ဟီ.’”+
၄၂ တဘျီဃီန့ၣ် ပိာ်မုၣ်ဖိသၣ်အံၤ ဂဲၤဆၢထၢၣ် ဟးဝဲလီၤ. (အသးနံၣ်အိၣ်ဝဲ ၁၂ နံၣ်လီၤ.) အဃိ အဝဲသ့ၣ် ဖုးဘၣ်အသး ဒီးသးခုဝဲ ဒိၣ်မးလီၤ.
၄၃ ဘၣ်ဆၣ် ယ့ၣ်ၡူးမၤလိာ်အဝဲသ့ၣ် တဘျီဝံၤတဘျီလၢ* တဘၣ်ဒုးသ့ၣ်ညါ ပှၤလၢတၢ်ဂ့ၢ်အံၤ နီတဂၤတဂ့ၤ.+ ဒီးအဝဲမၢပှၤ ဒုးအီၣ်ပိာ်မုၣ်ဖိအံၤလၢ တၢ်တမံၤမံၤလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “ဟီၣ်ကဝီၤလၢ အိၣ်ဒီး ဝ့ၢ်အဖျၢၣ်တဆံ.”
^ မ့ၢ်စ့ၢ်ကီး “ဘူးကသံလံ.”
^ မ့ၢ်စ့ၢ်ကီး “မၤလိာ်အဝဲသ့ၣ်ဆူၣ်ဆူၣ်.”
