မၤတၢ် ၁၂:၁-၂၅
၁၂ စးထီၣ်ဖဲန့ၣ်န့ၣ် စီၤပၤဟ့ၤရိာ် မၤအၢမၤသီ ပှၤတနီၤလၢ တၢ်အိၣ်ဖှိၣ်အပူၤလီၤ.+
၂ အဝဲမၤသံ စီၤယိၤဟၣ် အဒီပုၢ်ဝဲၢ်ခွါ+ စီၤယၤကိာ်လၢနးလီၤ.+
၃ ဖဲအဝဲထံၣ်ဝဲလၢ ပှၤယူဒၤဖိတဖၣ် ဘၣ်သူၣ်ဘၣ်သးဝဲအခါ အဝဲဖီၣ်န့ၢ်စ့ၢ်ကီး စီၤပ့းတရူးလီၤ. (တၢ်မၤအသး ဒ်အံၤန့ၣ် ဘၣ်ဖဲ ဘူၣ်ကိၣ်လၢအတပၣ်ဒီး ကိၣ်မံၣ်ဘၣ် အဆၢကတီၢ်လီၤ.)+
၄ အဝဲဖီၣ်အီၤဝံၤဒီး ဖၢနုာ်အီၤလၢ ဃိာ်ပူၤဒီး+ ဟ့ၣ်လီၤအီၤလၢ ပှၤသုးဖိ လွံၢ်ကရူၢ်အစုပူၤ ဒ်သိးကခိးအီၤ တကရူၢ်ဝံၤ တကရူၢ်အဂီၢ်လီၤ. ဒီးပှၤသုးဖိ တကရူၢ်စုာ်စုာ်န့ၣ် သုးဖိအိၣ်ဝဲ လွံၢ်ဂၤလီၤ. ဒီးစီၤဟ့ၤရိာ် ပာ်လီၤအသးလၢ ဘူၣ်လဲၤကပာ် မ့ၢ်ဝံၤန့ၣ် အကကိးထီၣ်အီၤလၢ ပှၤဂီၢ်မုၢ်အမဲာ်ညါလီၤ.*
၅ အဃိ စီၤပ့းတရူး အိၣ်ဒံးလၢ ဃိာ်ပူၤ ဘၣ်ဆၣ် တၢ်အိၣ်ဖှိၣ်ဖိတဖၣ် ဃ့ထုကဖၣ် တၢ်လၢအဂီၢ် ဆူၣ်ဆူၣ်လီၤ.+
၆ ဖဲစီၤဟ့ၤရိာ် တချုးထုးထီၣ်အီၤ အနၤန့ၣ် စီၤပ့းတရူးမံဝဲလၢ သုးဖိခံဂၤအဘၢၣ်စၢၤ ဒီးပှၤစၢဃာ်အစုဒီး ပျံၤထးခံဘိလီၤ. ဒီးပှၤပၢၤတၢ်ဖိလၢ အကွၢ်ထွဲဃိာ်န့ၣ် အိၣ်ခိးတၢ်လၢ တြဲၤအခီၣ်ထံးလီၤ.
၇ ဘၣ်ဆၣ် ယဟိဝၤယွၤ* အမူခိၣ်ကလူး ဆၢထၢၣ်ဖဲန့ၣ်+ ဒီးတၢ်ကပီၤတခါ ဟဲကပီၤထီၣ်လၢ ဃိာ်ပူၤလီၤ. ဒီးမူခိၣ်ကလူးခွဲး စီၤပ့းတရူး အကပၤဒ်သိး ကမၤပၢၢ်ထီၣ်အီၤအဂီၢ် ဒီးတဲအီၤလၢ “ဂဲၤဆၢထၢၣ် ချ့ချ့.” ဒီးပျံၤထးတဖၣ်လၢ အစုလိၤန့ၣ် လီၤဃဲၣ်ကွံာ်ဝဲလီၤ.+
၈ မူခိၣ်ကလူး တဲအီၤလၢ “သိးထီၣ် ဆ့ကူဆ့ကၤ ဒီးဒိးထီၣ် နခီၣ်ဖံးဟီ.” ဒီးအဝဲမၤဝဲ ဒ်န့ၣ်လီၤ. လၢခံ မူခိၣ်ကလူး တဲအီၤလၢ “သိးထီၣ် နဆ့ကၤလၢ အဖီခိၣ်တဘ့ၣ် ဒီးပိာ်ထီၣ်ယခံနီၤ.”
၉ အဃိ စီၤပ့းတရူး ဟးထီၣ် ဒီးပိာ်ထီၣ်အခံ ဘၣ်ဆၣ် အဝဲတသ့ၣ်ညါဝဲလၢ တၢ်လၢမူခိၣ်ကလူး မၤဝဲတဖၣ်အံၤ မ့ၢ်တၢ်နီၢ်ကီၢ်ဘၣ်. အဝဲဆိကမိၣ်ဝဲလၢ အထံၣ် တၢ်ထံၣ်လၢညါခီလီၤ.
၁၀ ဒီးဖဲအဝဲသ့ၣ် လဲၤတလၢ ပှၤပၢၤတၢ်ဖိ အဆိကတၢၢ်တဒူၣ် ဒီးခံဒူၣ်တဒူၣ် ဝံၤအလီၢ်ခံ အဝဲသ့ၣ် တုၤဃီၤဝဲလၢ တြဲၤထးလၢ ပှၤလဲၤလၢ ဝ့ၢ်ပူၤလီၤ. ဒီးတြဲၤန့ၣ် အိးထီၣ်အသးလၢ အနီၢ်ကစၢ် အဃိ အဝဲသ့ၣ်ဟးထီၣ်ဖဲန့ၣ် ဒီးလဲၤလီၤဝဲလၢ ကျဲတဘိ ဒီးမူခိၣ်ကလူး ဟးဖးဒီးစီၤပ့းတရူး တဘျီဃီလီၤ.
၁၁ ဖဲန့ၣ်အခါ စီၤပ့းတရူး သ့ၣ်ညါထီၣ်ဝဲ တၢ်မၤအသးဒီးအီၤ ဒ်လဲၣ်အဃိ အတဲဝဲလၢ “ခဲအံၤယသ့ၣ်ညါ သပှၢ်တၢၢ်လၢ ယဟိဝၤယွၤမၢလီၤ အမူခိၣ်ကလူးတဂၤ ဒ်သိး ကမၤပူၤဖျဲးယၤလၢ စီၤဟ့ၤရိာ် အစုပူၤ ဒီးလၢတၢ်ခဲလၢာ်လၢ ပှၤယူဒၤဖိတဖၣ် မုၢ်လၢ်ဝဲလၢ ကကဲထီၣ်အသးဒီးယၤ အဂီၢ်လီၤ.”+
၁၂ စီၤပ့းတရူးနၢ်ပၢၢ်ထီၣ် တၢ်ဂ့ၢ်တခါအံၤ ဝံၤအလီၢ်ခံ အဝဲလဲၤဝဲလၢ စီၤယိၤဟၣ်လၢ ပှၤကိးအီၤလၢ စီၤမၢ်ကူးတဂၤန့ၣ် အမိၢ်နီၢ်မၤရံ အဟံၣ်လီၤ.+ ဒီးပှၤပာ်ဖှိၣ်ထီၣ် အသးဖဲန့ၣ် တဘျုးဂၤညါ ဒီးအဝဲသ့ၣ် ဃ့ထုကဖၣ်တၢ်လီၤ.
၁၃ ဖဲစီၤပ့းတရူး ဒိတကျိာ် ပဲတြီအခါ နီၢ်ရိဒ့ၤ လၢအမ့ၢ် ကုၢ်မုၣ်တဂၤန့ၣ် လဲၤကွၢ်ဝဲ မ့ၢ်မတဂၤ ဟဲလဲၣ်.
၁၄ ဒီးအသ့ၣ်ညါဝဲ လၢအမ့ၢ် စီၤပ့းတရူး အကလုၢ်အဃိ အသးခုဒိၣ်မး သနာ်က့အတအိးထီၣ် ပဲတြီဘၣ် ဒီးက့ၤဃ့ၢ်နုာ်လီၤဝဲလၢ တၢ်ကိပူၤ ဒီးတဲဘၣ်ပှၤဂၤလၢ စီၤပ့းတရူး ဆၢထၢၣ်လၢ ပဲတြီအမဲာ်ညါလီၤ.
၁၅ အဝဲသ့ၣ် တဲဘၣ်အီၤလၢ “နတဲတၢ်န့ၣ် မ့ၢ်အမ့ၢ်စ့ၢ်ကီးဧါ.” ဘၣ်ဆၣ် အတဲဝဲ တဘျီဝံၤတဘျီ လၢတၢ်သးဆူၣ်အပူၤ လၢအမ့ၢ် နီၢ်ကီၢ်လီၤ. အဃိ အဝဲသ့ၣ် တဲဝဲလၢ “အကဲစီၤပ့းတရူး အမူခိၣ်ကလူးလီၤ.”
၁၆ ဘၣ်ဆၣ် စီၤပ့းတရူး အိၣ်ဝဲဖဲန့ၣ် ဒီးဆဲးဒိတကျိာ် ပဲတြီလီၤ. ဖဲအဝဲသ့ၣ် အိးထီၣ်ဝဲ ပဲတြီအခါ အဝဲသ့ၣ် ထံၣ်အီၤ ဒီးကမၢကမၣ်ဝဲ ဒိၣ်မးလီၤ.
၁၇ ဘၣ်ဆၣ် စီၤပ့းတရူး နဲၣ်အစုဒ်သိး အဝဲသ့ၣ် ကအိၣ်ဘှ့ၣ်အဂီၢ် ဝံၤဒီး အတဲဘၣ်အဝဲသ့ၣ် လီၤတံၢ်လီၤဆဲး ဘၣ်ဃးဒီး ယဟိဝၤယွၤ ဒုးဟးထီၣ်အီၤလၢဃိာ်ပူၤ ဒ်လဲၣ်အဂ့ၢ်လီၤ. ဒီးအဝဲတဲဝဲလၢ “တဲဘၣ် စီၤယၤကိာ်ဒီး ဒီပုၢ်ဝဲၢ်ခွါ အဂၤတဖၣ်လၢ တၢ်ဂ့ၢ်တဖၣ်အံၤတက့ၢ်.”+ ဒီးအဝဲဟးထီၣ်ဖဲန့ၣ် ဒီးလဲၤကဒီးလၢ တၢ်လီၢ်အဂၤတတီၤလီၤ.
၁၈ ဖဲမုၢ်ဝါထီၣ်အခါ ဘၣ်ဃးဒီး တၢ်မၤအသးဒီး စီၤပ့းတရူး ဒ်လဲၣ်ဒ်လဲၣ်န့ၣ် တၢ်သဘံၣ်သဘုၣ် ဟဲအိၣ်ထီၣ်လၢ ပှၤသုးဖိတဖၣ်အကျါလီၤ.
၁၉ စီၤဟ့ၤရိာ် လူၤဃုအီၤ သပှၢ်တၢၢ် ဘၣ်ဆၣ် တထံၣ်အီၤဘၣ်. အဃိ အဝဲသံကွၢ်သံဒိးဝဲ ပှၤပၢၤတၢ်ဖိတဖၣ် ဒီးဟ့ၣ်လီၤတၢ်ကလုၢ်လၢ အဝဲသ့ၣ် ကဘၣ်တၢ်စံၣ်ညီၣ်လီၤ.+ ဒီးစီၤဟ့ၤရိာ် အိၣ်လၢ ယူဒၤ အဟီၣ်ကဝီၤ ဒီးလဲၤလီၤဝဲလၢ ဝ့ၢ်ကဲၤစါရံၤ ဒီးအိၣ်ဝဲဖဲန့ၣ် တစိၢ်တလီၢ်လီၤ.
၂၀ လၢညါန့ၣ် ပှၤစိၢ်ဖိ ဒီးပှၤစံဒိၣ်ဖိတဖၣ် အထံကီၢ် ဒိးန့ၢ်ဘၣ် တၢ်အီၣ်တၢ်အီလၢ တၢ်လီၢ်လၢအအိၣ်လၢ စီၤပၤဟ့ၤရိာ် အတၢ်ပၢဖီလာ်လီၤ. ဘၣ်ဆၣ် စီၤပၤဟ့ၤရိာ် သးဒိၣ်ထီၣ် အဝဲသ့ၣ် အဃိ လၢတၢ်သးတဖျၢၣ်ဃီအပူၤ အဝဲသ့ၣ် လဲၤဃ့ကညး စီၤဘျၤစတူး လၢအမ့ၢ် ပှၤကွၢ်ထွဲ စီၤပၤဟ့ၤရိာ်အဟံၣ်ဖိဃီဖိတဂၤ ဒ်သိးကမၤစၢၤ အဝဲသ့ၣ် ဝံၤဒီးအဝဲသ့ၣ်ဃ့ တၢ်ဃူတၢ်ဖိးဒီးစီၤပၤဟ့ၤရိာ်လီၤ.
၂၁ ဖဲမုၢ်နံၤလၢ ပှၤပာ်ပနီၣ်အီၤတနံၤန့ၣ် စီၤပၤဟ့ၤရိာ် ကူထီၣ်ကၤထီၣ်ဝဲ စီၤပၤအကူအကၤ ဒီးဆ့ၣ်နီၤဝဲလၢ ပှၤစံၣ်ညီၣ်တၢ် အလီၢ်ဆ့ၣ်နီၤ ဒီးတဲလီၤတၢ်လၢ ပှၤကမျၢၢ်တဖၣ် အအိၣ်လီၤ.
၂၂ ဒီးပှၤကမျၢၢ်လၢ အဟဲ အိၣ်ဖှိၣ်တဖၣ်န့ၣ် ကိးပသူထီၣ်ဝဲလၢ “အကဲယွၤတဂၤ အကလုၢ်လီၤ, တမ့ၢ် ပှၤကညီ အကလုၢ်ဘၣ်.”
၂၃ ဒီးမ့ၢ်လၢ အဝဲတဟ့ၣ် ကစၢ်ယွၤ တၢ်လၤကပီၤဘၣ်အဃိ ယဟိဝၤယွၤ အမူခိၣ်ကလူး တီၢ်အီၤ တဘျီဃီ ဒီးထိးကလဲာ် အိၣ်ပှဲၤအကိပူၤ ဒီးအသံဝဲလီၤ.
၂၄ ဒီးယဟိဝၤယွၤ အကလုၢ်ကထါ ရၤလီၤအသး ဒီးပှၤစူၢ်က့ၤနာ်က့ၤတၢ် အါထီၣ်ဝဲလီၤ.+
၂၅ မ့မ့ၢ် စီၤဘၢ်နါဘၤ+ ဒီးစီၤစီလူးန့ၣ် အဝဲသ့ၣ်လဲၤဆှၢ တၢ်မၤစၢၤလၢ ဝ့ၢ်ယရူၤၡလ့ၣ်+ ဝံၤအလီၢ်ခံ ဖဲအဝဲသ့ၣ် ဟဲက့ၤအခါ အဝဲသ့ၣ်ကိးဃုာ်ဝဲဒီး စီၤယိၤဟၣ်လၢ+ ပှၤကိးစ့ၢ်ကီးအီၤလၢ စီၤမၢ်ကူးလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ကိးထီၣ်အီၤလၢ ကသမံသမိးအီၤအဂီၢ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
