မၤတၢ် ၂၂:၁-၃၀
၂၂ “ယဒီပုၢ်ဝဲၢ်ခွါတဖၣ် ဒီးယပၢ်သ့ၣ်ဧၢ, ဒိကနၣ်တၢ်လၢ ယကတဲနၢ်ပၢၢ်သု ခဲအံၤတက့ၢ်.”+
၂ ဖဲအဝဲသ့ၣ်နၢ်ဟူ စီၤပီလူး တဲတၢ်ဒီး အဝဲသ့ၣ်လၢ ဧ့ၤဘြံၤကျိာ်အခါ အဝဲသ့ၣ် အိၣ်ဘှ့ၣ်အိၣ်ဘှီၣ်ဝဲ ဒိၣ်န့ၢ်ဒံးအလီၢ် ဒီးစီၤပီလူး တဲဝဲလၢ
၃ “ယမ့ၢ် ပှၤယူဒၤဖိတဂၤ+ ဒီးယအိၣ်ဖျဲၣ်ထီၣ်ဖဲ ဝ့ၢ်တၢ်စူး လၢကံၤလံၤကံ အကီၢ်ရ့ၣ်ပူၤလီၤ.+ ဒီးယဒိးန့ၢ်ဘၣ် တၢ်ကူၣ်ဘၣ်ကူၣ်သ့လၢ စီၤကမၤလ့လး+ အအိၣ် လၢဝ့ၢ်တဖျၢၣ်အံၤအပူၤလီၤ. ဒီးအသိၣ်လိယၤလၢ ယကမၤထွဲ စီၤမိၤၡ့ အတၢ်သိၣ်တၢ်သီ လီၤတံၢ်လီၤဆဲး လၢအကဆူးကတ့ၤ လၢပမိၢ်ပၢ်ဖံဖု လၢပျၢၤတဖၣ် မၤထွဲဝဲ+ ဒီးယသးဆူၣ်လၢ ကစၢ်ယွၤအဂီၢ် ဒ်သုဝဲကိးဂၤဒဲး လၢမုၢ်မဆါတနံၤအံၤ အသိးလီၤ.+
၄ ဒီးပှၤလၢ အပိာ်တၢ်မ့ၢ်တၢ်တီအကျဲအံၤန့ၣ်* အမ့မ့ၢ်ပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ ယစၢဃာ် အဝဲသ့ၣ် ဒီးဟ့ၣ်လီၤကွံာ် အဝဲသ့ၣ် ဒ်သိး အကလီၤဘၣ်လၢ ဃိာ်ပူၤအဂီၢ် ဒီးယမၤနးမၤဖှီၣ် အဝဲသ့ၣ်တုၤလၢ အသံလီၤ.+
၅ ပှၤလုၢ်တၢ်ခိၣ် အဒိၣ်ကတၢၢ် ဒီးပှၤဂီၢ်မုၢ် အပှၤသူၣ်က့သးပှၢ်တဖၣ် အုၣ်အသး ဘၣ်ဃးဒီး တၢ်ဂ့ၢ်တခါအံၤ သ့ဝဲလီၤ. အဝဲသ့ၣ် ဟ့ၣ်လီၤယၤ လံာ်ပရၢတဖၣ်လၢ ယကလဲၤစိာ်လၢ ပဒီပုၢ်ဝဲၢ်တဖၣ်လၢ အအိၣ်လၢ ဝ့ၢ်ဒၤမ့ၤစ့း အပူၤအဂီၢ်လီၤ. ဒီးယလဲၤတၢ် ဒ်သိးကစၢဃာ် ပှၤလၢအအိၣ် ဖဲန့ၣ်တဖၣ် ဒီးဟဲက့ၤကိး အဝဲသ့ၣ်လၢ ယရူၤၡလ့ၣ်ဒ်သိး ပှၤကစံၣ်ညီၣ် အဝဲသ့ၣ်အဂီၢ်လီၤ.
၆ “ဘၣ်ဆၣ် ဖဲယလဲၤဘူးကတုၤလၢ ဝ့ၢ်ဒၤမ့ၤစ့းအခါ ဘၣ်ဖဲမုၢ်ထူၣ်ထီၣ်န့ၣ် တၢ်ကပီၤဖးဒိၣ် လၢမူခိၣ် ကပီၤဝးတရံးယၤ သတူၢ်ကလာ်+
၇ ဒီးယလီၤဃံၢ်လၢ ဟီၣ်ခိၣ်လိၤ ဒီးယနၢ်ဟူ တၢ်ကလုၢ်တဲယၤလၢ ‘စီၤစီလူးဧၢ, စီၤစီလူးဧၢ, နမၤအၢမၤနးယၤ ဘၣ်လဲၣ်.’
၈ ယတဲဆၢက့ၤလၢ ‘ကစၢ်ဧၢ, နမ့ၢ်မတဂၤလဲၣ်.’ အဝဲတဲယၤလၢ ‘ယမ့ၢ် ပှၤနစၤရ့းဖိ ယ့ၣ်ၡူးလၢ နမၤအၢမၤနးအီၤလီၤ.’
၉ ဒီးပှၤလၢ အိၣ်ဒီးယၤတဖၣ် ထံၣ်ဝဲတၢ်ကပီၤ ဘၣ်ဆၣ် အဝဲသ့ၣ် တနၢ်ပၢၢ်ဝဲ ပှၤလၢအတဲတၢ်ဒီးယၤတဂၤ အတၢ်ကတိၤဘၣ်.
၁၀ ဒီးယတဲလၢ ‘ကစၢ်ဧၢ, ယဘၣ်မၤဒ်လဲၣ်.’ ဒီးကစၢ်တဲယၤလၢ ‘ဂဲၤဆၢထၢၣ် လဲၤလၢ ဝ့ၢ်ဒၤမ့ၤစ့းအပူၤ ဒီးဖဲန့ၣ် နကဘၣ်မၤ တၢ်မနုၤလဲၣ်န့ၣ် ပှၤကတဲဘၣ်နၤ ခဲလၢာ်လီၤ.’+
၁၁ ဘၣ်ဆၣ် ခီဖျိလၢ တၢ်ကပီၤန့ၣ် ကပြုၢ်ကပြီၤ ဘၣ်ယၤအဃိ ယတထံၣ်တၢ် နီတမံၤလၢၤဘၣ်. ဒီးပှၤလၢ အအိၣ်ဒီးယၤတဖၣ် မူၤဃီၤယစု တုၤလီၤလၢ ဝ့ၢ်ဒၤမ့ၤစ့း အပူၤလီၤ.
၁၂ “ဒီးပှၤအိၣ်ဝဲတဂၤ လၢအမံၤမ့ၢ် စီၤအနၤနံန့ၣ် အဝဲမ့ၢ်ပှၤလၢ အယူးယီၣ်ယွၤ ဒ်စီၤမိၤၡ့ အတၢ်သိၣ်တၢ်သီ အိၣ်ဝဲအသိး ဒီးပှၤယူဒၤဖိ ဖဲန့ၣ်ခဲလၢာ် ပတြၢၤအီၤလီၤ.
၁၃ အဝဲ ဟဲလၢယအိၣ် ဒီးဆၢထၢၣ်လၢ ယကပၤ ဒီးတဲယၤလၢ ‘ဒီပုၢ်ဝဲၢ် စီၤစီလူးဧၢ, ထံၣ်ထီၣ်က့ၤ တၢ်တက့ၢ်.’ ဖဲန့ၣ်တဘျီဃီ ယကွၢ်ထီၣ်တၢ် ဒီးယထံၣ်အီၤလီၤ.+
၁၄ အဝဲတဲယၤလၢ ‘ပမိၢ်ပၢ်ဖံဖု လၢပျၢၤတဖၣ် အယွၤန့ၣ် ဃုထၢထီၣ်နၤ ဒ်သိး နကသ့ၣ်ညါထီၣ် အတၢ်ဘၣ်သး ဒီးဒ်သိး နကထံၣ်ဘၣ် ပှၤလၢအတီအလိၤတဂၤ+ ဒီးနၢ်ဟူဘၣ် အကလုၢ်,
၁၅ မ့ၢ်လၢ နကဘၣ်ကဲထီၣ် အပှၤအုၣ်အသး လၢပှၤခဲလၢာ် အမဲာ်ညါ ဘၣ်ဃးဒီး တၢ်လၢနထံၣ် ဒီးနၢ်ဟူဘၣ်တဖၣ်လီၤ.+
၁၆ ဘၣ်မနုၤအဃိ နမၤယံာ်မၤနီၢ် နသးလဲၣ်. ဂဲၤဆၢထၢၣ် ဒိးဘျၢထံ ဒီးကစၢ်ယွၤ ကသ့စီကွံာ် နတၢ်ဒဲးဘး+ ခီဖျိနကိးထီၣ် ယ့ၣ်ၡူးအမံၤ အဃိလီၤ.’+
၁၇ “ဒီးယဟဲက့ၤ ကဒါက့ၤလၢ ယရူၤၡလ့ၣ်+ ဒီးဖဲယဃ့ထုကဖၣ်တၢ်လၢ တၢ်လုၢ်ဟံၣ်ပူၤအခါ ယထံၣ်ဘၣ် တၢ်ထံၣ်လၢညါခီတခါ
၁၈ ဒီးယထံၣ် ကစၢ်တဲယၤလၢ ‘မၤချ့ချ့ ဒီးဟးထီၣ်ကွံာ်လၢ ယရူၤၡလ့ၣ်အပူၤ လၢအဆိအချ့တက့ၢ်. နအုၣ်နသးလၢ ယဂ့ၢ်န့ၣ် အဝဲသ့ၣ် တတူၢ်လိာ်ဝဲဘၣ်.’+
၁၉ ဒီးယတဲလၢ ‘ကစၢ်ဧၢ, ပှၤတဖၣ်န့ၣ် သ့ၣ်ညါဂ့ၤဂ့ၤလၢ ယလဲၤလၢ ဘူၣ်ဘျီၣ် တဖျၢၣ်ဝံၤတဖျၢၣ် ဒီးပှၤလၢ အစူၢ်က့ၤနာ်က့ၤနၤန့ၣ် ယဖၢနုာ် အဝဲသ့ၣ်လၢ ဃိာ်ပူၤဒီး ယတီၢ်အဝဲသ့ၣ်လီၤ.+
၂၀ ဒီးဖဲ နပှၤအုၣ်အသး စီၤစတ့းဖၣ် ဘၣ်တၢ်မၤသံအီၤအခါ ယဆၢထၢၣ်ဖဲန့ၣ် ဒီးယဘၣ်သူၣ်ဘၣ်သး တကးဒံးဘၣ် ယကွၢ်ထွဲပှၤလၢ အမၤသံအီၤတဖၣ် အဆ့ကၤလီၤ.’+
၂၁ ဘၣ်ဆၣ် အဝဲတဲယၤလၢ ‘လဲၤတက့ၢ်, ယကဆှၢလီၤနၤလၢ တၢ်လီၢ်အယံၤ လၢပှၤကလုာ်တဖၣ် အအိၣ်လီၤ.’”+
၂၂ အဝဲသ့ၣ် ဒိကနၣ်အီၤ တုၤဖဲန့ၣ်ဝံၤဒီး အဝဲသ့ၣ် မၤဒိၣ်ထီၣ်အကလုၢ် ဒီးတဲဝဲလၢ “တဘၣ်ပာ်မူ ပှၤတဂၤအံၤ လၢၤတဂ့ၤ, အဝဲကြၢးသံလံ.”
၂၃ ဒီးအဝဲသ့ၣ် ကိးပသူထီၣ်, ကွံာ်ထီၣ် အဆ့ကၤတဖၣ် ဒီးဖှံထီၣ် ဟီၣ်ခိၣ်ကမူၣ်လၢ ကလံၤကျါအဃိ+
၂၄ ပှၤသုးဖိတကထိ အခိၣ်တဂၤ ဟ့ၣ်လီၤအကလုၢ် ဒ်သိး ပှၤကဟဲကိး စီၤပီလူးလၢ ပှၤသုးဖိ အိၣ်တၢ်အလီၢ် ဒီးမၢပှၤဖျ့အီၤဒီး သံကွၢ်သံဒိးအီၤ ဒ်သိး အကသ့ၣ်ညါလၢ ဘၣ်မနုၤအဃိ အဝဲသ့ၣ် ကိးဃါအီၤလဲၣ်န့ၣ်လီၤ.
၂၅ ဘၣ်ဆၣ် ဖဲအဝဲသ့ၣ်စၢဃာ် စီၤပီလူး ဒ်သိးကဖျ့အီၤလၢ နီၣ်ဖျ့အခါ စီၤပီလူးတဲဘၣ် သုးခိၣ်လၢ အဆၢထၢၣ်ဖဲန့ၣ် တဂၤလၢ “မ့ၢ်သုအိၣ်ဒီး တၢ်ခွဲးတၢ်ယာ်လၢ သုကဖျ့ ပှၤရိမ့ၤဖိတဂၤလၢ တဘၣ် တၢ်စံၣ်ညီၣ်အီၤ ဒံးဘၣ်န့ၣ်ဧါ.”+
၂၆ ဖဲသုးခိၣ်တဂၤန့ၣ် နၢ်ဟူဝဲ ဒ်န့ၣ်အခါ အဝဲလဲၤတဲဘၣ် တၢ်ဂ့ၢ်တခါအံၤလၢ သုးဖိတကထိ အခိၣ်တဂၤအအိၣ် ဒီးတဲအီၤလၢ “ပှၤတဂၤအံၤမ့ၢ်ဝဲ ပှၤရိမ့ၤဖိအဃိ နအဲၣ်ဒိးမၤဒ်လဲၣ်.”
၂၇ သုးဖိတကထိ အခိၣ်န့ၣ် လဲၤဃီၤလၢအအိၣ် ဒီးတဲအီၤလၢ “တဲဘၣ်ယၤတထံၣ်, နကဲ ပှၤရိမ့ၤဖိဧါ.” စီၤပီလူးတဲဝဲလၢ “မ့ၢ်ဝဲ.”
၂၈ သုးဖိတကထိ အခိၣ်န့ၣ် တဲဆၢက့ၤဝဲလၢ “ဒ်သိး ယကကဲထီၣ် ရိမ့ၤ အပှၤထံဖိကီၢ်ဖိအဂီၢ် ယဘၣ်ဟ့ၣ် ကျိၣ်စ့ဒီဒူၣ်လီၤ.” စီၤပီလူး တဲဝဲလၢ “မ့မ့ၢ်ယၤန့ၣ် ဖဲယအိၣ်ဖျဲၣ်ထီၣ်အခါ ယကဲပာ်စၢၤ ရိမ့ၤအပှၤထံဖိကီၢ်ဖိ တဂၤလံ.”+
၂၉ အဃိ ပှၤလၢကဖျ့အီၤဒီး သံကွၢ်သံဒိးအီၤတဖၣ် သုးယံၤထီၣ်အသးဒီးအီၤ တဘျီဃီလီၤ. ဒီးဖဲသုးဖိတကထိအခိၣ် သ့ၣ်ညါဝဲလၢ စီၤပီလူးကဲ ရိမ့ၤအပှၤထံဖိကီၢ်ဖိ တဂၤအခါ အဝဲပျံၤတၢ်, မ့ၢ်လၢအဝဲစၢဃာ်ဘၣ် စီၤပီလူးလၢ ပျံၤထးအဃိလီၤ.+
၃၀ ဒီးအဝဲအဲၣ်ဒိး သ့ၣ်ညါလီၤတံၢ်ဝဲလၢ ဘၣ်မနုၤအဃိ ပှၤယူဒၤဖိတဖၣ် ပာ်ဒ့ၣ်ပာ်ကမၣ် စီၤပီလူးလဲၣ်. အဃိ လၢခံတနံၤန့ၣ် အဝဲပျၢ်ကွံာ်အီၤဒီးမၤလိာ် ပှၤလုၢ်တၢ်ဒိၣ်အခိၣ်တဖၣ် ဒီးပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ်ခဲလၢာ် လၢကဟဲ အိၣ်ဖှိၣ်လီၤ. ဒီးအဝဲဟဲကိး စီၤပီလူး ဒီးမၢအဝဲဆၢထၢၣ်လၢ အဝဲသ့ၣ်အကျါလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ခရံာ်ဖိအကျဲ.
