မၤတၢ် ၂၆:၁-၃၂
၂၆ စီၤအကြံးပၤ+ တဲဘၣ် စီၤပီလူးလၢ “နတဲဆၢက့ၤတၢ်လၢ နနီၢ်ကစၢ် အဂီၢ်သ့လံ.” ဒ်သိး စီၤပီလူး ကတဲဖျါထီၣ် အဂ့ၢ်လၢ အနီၢ်ကစၢ်အဂီၢ် အဝဲယူာ်ထီၣ်အစု ဒီးတဲဝဲလၢ
၂ “စီၤပၤအကြံးပၤဧၢ, ဘၣ်ဃးဒီး တၢ်ဂ့ၢ်ခဲလၢာ်လၢ ပှၤယူဒၤဖိတဖၣ် ပာ်ဒ့ၣ်ပာ်ကမၣ်ယၤန့ၣ်+ တနံၤညါအံၤ ယန့ၢ်ဘၣ် တၢ်ခွဲးတၢ်ယာ်လၢ ယကတဲဆၢက့ၤ တၢ်လၢ နမဲာ်ညါအဃိ ယသးခုဒိၣ်မး,
၃ လီၤဆီဒၣ်တၢ် မ့ၢ်လၢနသ့ၣ်ညါ ပှၤယူဒၤဖိ အလုၢ်အလၢ်ဒီး အတၢ်ဂ့ၢ်လိာ်ဘှီလိာ် ခဲလၢာ်အဂ့ၢ် ဂ့ၤဂ့ၤဘၣ်ဘၣ် အဃိလီၤ. အဃိ ယဃ့ကညးနၤလၢ နကဒိကနၣ်ယၤလၢ တၢ်သူၣ်စူၤသးစူၤ အပူၤလီၤ.
၄ “လၢယနီၢ်ဆံးခါ လံၤလံၤ ယအိၣ်မူ လၢယပှၤကလုာ်အကျါ ဒီးလၢဝ့ၢ်ယရူၤၡလ့ၣ်အပူၤ ဒ်လဲၣ်န့ၣ် ပှၤယူဒၤဖိခဲလၢာ် သ့ၣ်ညါဝဲဂ့ၤဂ့ၤလီၤ.+
၅ အဝဲသ့ၣ် သ့ၣ်ညါလၢ ယအိၣ်မူတ့ၢ်ဒ် ပှၤဖၤရံၤၡဲလၢ+ အဖီၣ်ဃံး တၢ်ဘူၣ်တၢ်ဘါ အတၢ်သိၣ်တၢ်သီ အဃံးကတၢၢ်လီၤ.+ အဝဲသ့ၣ် အသးမ့ၢ်အိၣ်န့ၣ် အဝဲသ့ၣ် အုၣ်အသးလၢ ယဂ့ၢ်သ့ဝဲလီၤ.
၆ ဘၣ်ဆၣ် ခဲအံၤမ့ၢ်လၢ ယအိၣ်ဒီး တၢ်မုၢ်လၢ်လၢ ကစၢ်ယွၤ အၢၣ်လီၤတ့ၢ်ဝဲ ပမိၢ်ပၢ်ဖံဖု လၢပျၢၤတဖၣ်အဃိ+ ယဘၣ်ဆၢထၢၣ်လၢ ပှၤကသမံသမိးယၤ အဂီၢ်လီၤ.
၇ ဒီးပပှၤကလုာ်အဒူၣ် ၁၂ ဒူၣ် မုၢ်လၢ်ဝဲလၢ ကထံၣ်ဘၣ်ဝဲ တၢ်အၢၣ်လီၤတခါအံၤ ဟဲလၢထီၣ်ပှဲၤထီၣ်ဝဲလီၤ. အဃိ အဝဲသ့ၣ် ဘူၣ်ထီၣ်ဘါထီၣ် ကစၢ်ယွၤဆူၣ်ဆူၣ် လၢမုၢ်ဆါဒီး လၢမုၢ်နၤလီၤ. စီၤပၤဧၢ, မ့ၢ်လၢ တၢ်မုၢ်လၢ်အံၤအဃိ ပှၤယူဒၤဖိတဖၣ် ပာ်ဒ့ၣ်ပာ်ကမၣ်ယၤလီၤ.+
၈ “ကစၢ်ယွၤ ကမၤဂဲၤဆၢထၢၣ် သမူထီၣ်က့ၤပှၤသံန့ၣ် ဘၣ်မနုၤအဃိ သုဆိကမိၣ်လၢ အတမ့ၢ်တၢ်လၢ အလီၤနာ်ဘၣ်လဲၣ်.
၉ လၢညါခါ ယၤစ့ၢ်ကီး ယနာ်သပှၢ်တၢၢ်လၢ ယကြၢးမၤ တၢ်အါမံၤလၢ အထီဒါ ပှၤနစၤရ့းဖိ ယ့ၣ်ၡူးအမံၤလီၤ.
၁၀ အဃိ လၢဝ့ၢ်ယရူၤၡလ့ၣ် အပူၤန့ၣ် ယမၤဘၣ် ဒ်န့ၣ်လီၤ. ဒီးယဒိးန့ၢ်ဘၣ် တၢ်စိတၢ်ကမီၤလၢ ပှၤလုၢ်တၢ်ဒိၣ်အခိၣ်တဖၣ် အအိၣ်အဃိ+ ယဖၢနုာ် ပှၤစီဆှံအါဂၤလၢ ဃိာ်ပူၤလီၤ.+ ဒီးဖဲပှၤစံၣ်ညီၣ်သံ အဝဲသ့ၣ်အခါ ယတူၢ်လိာ်စ့ၢ်ကီးလီၤ.
၁၁ လၢဘူၣ်ဘျီၣ် ခဲလၢာ်အပူၤ ယမၤအၢမၤနး အဝဲသ့ၣ် တလီၢ်လီၢ် ဒီးယဂုာ်ကျဲးစၢး မၤဆူၣ်အဝဲသ့ၣ် ဒ်သိး အကပာ်တ့ၢ်ကွံာ် အတၢ်စူၢ်တၢ်နာ် အဂီၢ်လီၤ. ဒီးမ့ၢ်လၢ ယသးပှံၢ်ထီၣ် အဝဲသ့ၣ် ဒိၣ်မးအဃိ ယလဲၤမၤအၢမၤသီ အဝဲသ့ၣ်လၢ ဝ့ၢ်အဂၤတဖၣ် အပူၤစ့ၢ်ကီးလီၤ.
၁၂ “ဒီးပှၤလုၢ်တၢ်ဒိၣ်အခိၣ်တဖၣ် ဟ့ၣ်ယၤ တၢ်စိတၢ်ကမီၤ ဒီးမူဒါလၢ ယကလဲၤလၢ ဝ့ၢ်ဒၤမ့ၤစ့း ဒ်သိး ယကမၤဒ်န့ၣ်အဂီၢ်လီၤ.
၁၃ စီၤပၤဧၢ, ဖဲယလဲၤလၢကျဲအခါ ဘၣ်ဖဲမုၢ်ထူၣ်န့ၣ် ယထံၣ် တၢ်ကပီၤလၢမူခိၣ် လၢအကပီၤထီၣ် ဒိၣ်န့ၢ်မုၢ်န့ၣ် ကပီၤဝးတရံးယၤ ဒီးပှၤလၢ အလဲၤတၢ်ဒီးယၤတဖၣ်လီၤ.+
၁၄ ဒီးပလီၤဃံၢ်လၢ ဟီၣ်ခိၣ်လိၤကိးဂၤဒဲး ဝံၤဒီးယနၢ်ဟူ တၢ်ကလုၢ်တဲယၤလၢ ဧ့ၤဘြံၤကျိာ်လၢ ‘စီၤစီလူးဧၢ, စီၤစီလူးဧၢ, နမၤအၢမၤနးယၤ ဘၣ်လဲၣ်. နမ့ၢ်ထူနီၣ်ခိၣ်စူန့ၣ် ကမၤဘၣ်ဒိက့ၤနၤလီၤ.’
၁၅ ဘၣ်ဆၣ် ယတဲလၢ ‘ကစၢ်ဧၢ, နမ့ၢ်မတဂၤလဲၣ်.’ ကစၢ်တဲဝဲလၢ ‘ယမ့ၢ် ယ့ၣ်ၡူးလၢ နမၤအၢမၤနးအီၤ တဂၤလီၤ.
၁၆ ဘၣ်ဆၣ် ဂဲၤဆၢထၢၣ်တက့ၢ်. ယလီၣ်ဖျါထီၣ်ယသး လၢနမဲာ်ညါန့ၣ် မ့ၢ်ဒ်သိး ယကဃုထၢထီၣ်နၤ ဒ်တၢ်အခ့အပှၤဒီး ပှၤအုၣ်အသးတဂၤ လၢအဘၣ်ဃးဒီး တၢ်လၢ နထံၣ်ဘၣ်တဖၣ် ဒီးတၢ်လၢ ယကဒုးနဲၣ်နၤ လၢခံတဖၣ်လီၤ.+
၁၇ ဒီးယကမၤပူၤဖျဲးထီၣ်နၤလၢ ပှၤတကလုာ်အံၤ ဒီးပှၤကလုာ်အဂၤ တဖၣ်အအိၣ် ဒီးယကဆှၢလီၤနၤလၢ အဝဲသ့ၣ်အအိၣ်+
၁၈ ဒ်သိးကအိးထီၣ် အဝဲသ့ၣ်အမဲာ်,+ ဒုးဟးထီၣ်ကွံာ် အဝဲသ့ၣ်လၢတၢ်ခံးကျါ+ ဒီးဆှၢအဝဲသ့ၣ် ဆူတၢ်ကပီၤ+ ဒီးမၤထူၣ်ဖျဲးထီၣ်ကွံာ် အဝဲသ့ၣ်လၢ မုၣ်ကီၤလံၢ်* အတၢ်စိတၢ်ကမီၤ အဖီလာ်+ ဒီးဆှၢအဝဲသ့ၣ်ဆူ ကစၢ်ယွၤအအိၣ်လီၤ. အဝဲသ့ၣ်မ့ၢ်မၤ ဒ်န့ၣ်န့ၣ် အဝဲသ့ၣ် အတၢ်ဒဲးဘး ကဘၣ် တၢ်ပျၢ်ကွံာ်အီၤ+ ဒီးအဝဲသ့ၣ်ကန့ၢ်ဘၣ် တၢ်န့ၢ်သါလၢ ပှၤလၢအဘၣ် တၢ်ပာ်စီဆှံအီၤ တဖၣ်အကျါ ခီဖျိလၢ အဝဲသ့ၣ် စူၢ်က့ၤနာ်က့ၤယၤ အဃိလီၤ.’
၁၉ “စီၤပၤအကြံးပၤဧၢ, ယမၤထွဲဒ် တၢ်ထံၣ်လၢညါခီလၢ အဟဲလၢမူခိၣ် အသိးလီၤ.
၂၀ အဃိ ယလဲၤစံၣ်တဲၤတဲလီၤ တၢ်ကစီၣ်အံၤလီၤ. အဆိကတၢၢ်န့ၣ် ယလဲၤလၢ ပှၤလၢအအိၣ်လၢ ဝ့ၢ်ဒၤမ့ၤစ့းအပူၤ+ ဝံၤဒီး ယလဲၤလၢပှၤလၢအအိၣ်လၢ ဝ့ၢ်ယရူၤၡလ့ၣ်အပူၤ+ ဒီးပှၤလၢအအိၣ်လၢ ယူဒၤအဟီၣ်ကဝီၤပူၤဝးဝး တကးဒံးဘၣ် လၢပှၤကလုာ်တဖၣ်အအိၣ်လီၤ. ယမၤဒ်အံၤ ဒ်သိးအဝဲသ့ၣ် ကပီၢ်ယၢ်လီၤက့ၤအသး ဒီးဘူၣ်ထီၣ်ဘါထီၣ် ကစၢ်ယွၤ ဒီးမၤတၢ်လၢ အပာ်ဖျါထီၣ် တၢ်ပီၢ်ယၢ်လီၤက့ၤသးလီၤ.+
၂၁ လၢတၢ်ဂ့ၢ်အံၤအဃိ ပှၤယူဒၤဖိတဖၣ် ဖီၣ်န့ၢ်ယၤလၢ တၢ်လုၢ်ဟံၣ်ပူၤ ဒီးဂုာ်ကျဲးစၢး မၤသံယၤလီၤ.+
၂၂ ဘၣ်ဆၣ်သနာ်က့ မ့ၢ်လၢကစၢ်ယွၤ မၤစၢၤယၤအဃိ ယဆဲး စံၣ်တဲၤတဲလီၤဘၣ် ပှၤလၢအပတီၢ်ဖုၣ်မ့ၢ်ဂ့ၤ အပတီၢ်ထီမ့ၢ်ဂ့ၤ တုၤမုၢ်မဆါတနံၤအံၤလီၤ. ဒီးယတဲထဲ တၢ်ဂ့ၢ်လၢ ဝံတဖၣ် ဒီးစီၤမိၤၡ့ တဲတ့ၢ်ဝဲလၢ အကဟဲ လၢထီၣ်ပှဲၤထီၣ်တဖၣ်လီၤ.+
၂၃ တၢ်ဂ့ၢ်အဝဲန့ၣ် မ့ၢ်ဝဲ ခရံာ်ကဘၣ်တူၢ်တၢ်+ ဒီးဒ်ပှၤ အဆိကတၢၢ်တဂၤလၢ အဂဲၤဆၢထၢၣ်သမူထီၣ်က့ၤ လၢတၢ်သံအသိး+ အဝဲကစံၣ်တဲၤတဲလီၤ တၢ်ကပီၤအဂ့ၢ်လၢ ပှၤတကလုာ်အံၤ ဒီးပှၤကလုာ်အဂၤတဖၣ် အအိၣ်လီၤ.”+
၂၄ ဖဲစီၤပီလူး တဲဆၢက့ၤတၢ် ဒ်အံၤအခါ စီၤဖ့စတူးတဲဝဲလၢ အကလုၢ်ဖးဒိၣ်လၢ “စီၤပီလူးဧၢ, နပျုၢ်လံ. နမၤလိတၢ် အါတလၢအဃိ အမၤပျုၢ်နၤလံ.”
၂၅ ဘၣ်ဆၣ် စီၤပီလူးတဲဝဲလၢ “တၢ်ဒိၣ် စီၤဖ့စတူးဧၢ, ယတပျုၢ်ဘၣ်, ယတဲတၢ်ကတိၤလၢ အမ့ၢ်အတီဒီးလၢ အလီၤနာ်တဖၣ်လီၤ.
၂၆ စီၤပၤဧၢ, နသ့ၣ်ညါ တၢ်ဂ့ၢ်တဖၣ်အံၤ ဂ့ၤဂ့ၤလံအဃိ ယတဲနၤ ဒူဒူဘူၣ်ဝဲလီၤ. မ့ၢ်လၢ တၢ်သ့ၣ်တဖၣ်အံၤန့ၣ် တၢ်တမၤခူသူၣ်အီၤ နီတမံၤဘၣ်အဃိ ယနာ်သပှၢ်ကတၢၢ်လၢ နသ့ၣ်ညါ တၢ်ဂ့ၢ်သ့ၣ်တဖၣ်အံၤ ခဲလၢာ်ဂ့ၤဂ့ၤလီၤ.+
၂၇ စီၤပၤအကြံးပၤဧၢ, နနာ် ဝံတဖၣ်ဧါ. ယသ့ၣ်ညါလၢ နနာ်လီၤ.”
၂၈ ဘၣ်ဆၣ် စီၤအကြံးပၤတဲဘၣ် စီၤပီလူးလၢ “နတဲတၢ်န့ၣ် လီၤထုးန့ၢ်သူၣ်ထုးန့ၢ်သး တုၤဒၣ်လဲာ် တယံာ်လၢၤဘၣ် ယကကဲထီၣ် ခရံာ်ဖိတဂၤလီၤမၢၤ.”
၂၉ ဖဲန့ၣ်အခါ စီၤပီလူးတဲဝဲလၢ “ယဃ့ထုကဖၣ်တၢ်လၢ ကစၢ်ယွၤအအိၣ်လၢ တယံာ်လၢၤဘၣ်မ့ၢ်ဂ့ၤ, တၢ်ဆၢကတီၢ်မ့ၢ်ပူၤကွံာ် ဖးယံာ်မ့ၢ်ဂ့ၤ, ထဲနၤတဂၤတမ့ၢ်ဘၣ်, မ့ၢ်ဒ်သိး ပှၤခဲလၢာ်လၢ အနၢ်ဟူယၤတနံၤအံၤန့ၣ် ကကဲထီၣ် ပှၤဒ်သိးဒီးယၤလီၤ. ဘၣ်ဆၣ် ယတအဲၣ်ဒိးလၢ အဝဲသ့ၣ် ဘၣ်တၢ်စၢဃာ်အီၤလၢ ပျံၤထး ဒ်သိးဒီးယၤဘၣ်.”
၃၀ ဒီးစီၤပၤ ဂဲၤဆၢထၢၣ် ဒီးပဒိၣ်ဖးဒိၣ် ဒီးနီၢ်ဘ့ၢ်နံက့ၤ ဒီးပှၤလၢအဆ့ၣ်နီၤဒီး အဝဲသ့ၣ် ခဲလၢာ်စ့ၢ်ကီး ဂဲၤဆၢထၢၣ်ဃုာ်ဒီးအီၤလီၤ.
၃၁ ဘၣ်ဆၣ်သနာ်က့ ဖဲအဝဲသ့ၣ် ဟးထီၣ်အခါ အဝဲသ့ၣ်တဲလိာ်အသး တဂၤဒီးတဂၤလၢ “ပှၤတဂၤအံၤ အတမၤဘၣ်တၢ်လၢ အကြၢးသံမ့ၢ်ဂ့ၤ, ကြၢးဖၢနုာ်အီၤလၢ ဃိာ်ပူၤမ့ၢ်ဂ့ၤ နီတမံၤဘၣ်.”+
၃၂ ဒီးစီၤအကြံးပၤ တဲစီၤဖ့စတူးလၢ “ပှၤတဂၤအံၤ မ့ၢ်တတီၣ်ထီၣ်တၢ်ဂ့ၢ်လၢ ကဲစၢ်အအိၣ်ဘၣ်န့ၣ် ပှၤပျၢ်ကွံာ်အီၤ သ့ဝဲလီၤ.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “စၤတၣ်.” မံၤအံၤအခီပညီမ့ၢ်ဝဲ “ပှၤလၢအထီဒါတၢ်.”
