မၤတၢ် ၆:၁-၁၅
၆ ဖဲမုၢ်နံၤတဖၣ်န့ၣ် အတီၢ်ပူၤ ပှၤစူၢ်က့ၤနာ်က့ၤတၢ်တဖၣ် အါထီၣ်ဝဲလီၤ. မ့ၢ်လၢ မုၣ်ကမဲတဖၣ်လၢ အတဲကြံးကျိာ်န့ၣ် တဒိးန့ၢ်ဘၣ် တၢ်အီၣ်တၢ်အီလၢ ပှၤနီၤလီၤဝဲလၢ တနံၤဘၣ်တနံၤအဂီၢ်ဘၣ် အဃိ ပှၤယူဒၤဖိတဖၣ်လၢ အတဲတၢ်လၢ ကြံးကျိာ်န့ၣ် စးထီၣ်ကဒူးကဒ့ၣ်ဝဲ ပှၤယူဒၤဖိတဖၣ်လၢ အတဲဧ့ၤဘြံၤကျိာ်လီၤ.+
၂ အဃိ တၢ်မၢဖိတဆံခံဂၤ ကိးဖှိၣ်ဝဲ ယ့ၣ်ၡူးအပျဲၢ်အဘီၣ်ခဲလၢာ် ဒီးတဲဝဲလၢ “ပမ့ၢ်ဘၣ် ပာ်ပတုာ် တၢ်သိၣ်လိကစၢ်ယွၤ အကလုၢ်ကထါ ဒ်သိး ပကလဲၤနီၤလီၤက့ၤ တၢ်အီၣ်တၢ်အီလၢ စီၢ်နီၤခိၣ်အဂီၢ်န့ၣ် တကြၢးတဘၣ်ဘၣ်.+
၃ အဃိ ဒီပုၢ်ဝဲၢ်ခွါသ့ၣ်ဧၢ, ဃုထၢထီၣ် ပှၤပိာ်ခွါနွံဂၤလၢသုကျါ လၢအမံၤဂ့ၤသၣ်ဂ့ၤ+ ဒီးလၢအအိၣ်ဒီး သးစီဆှံဒီးတၢ်ကူၣ်သ့ လၢလၢပှဲၤပှဲၤ+ ဒ်သိး ပကမၢအကွၢ်ထွဲ တၢ်မၤအံၤ အဂီၢ်တက့ၢ်.+
၄ ဘၣ်ဆၣ် မ့မ့ၢ်ပှၤန့ၣ် ပကဟ့ၣ်လီၤပသးလၢ ကဃ့ထုကဖၣ်တၢ် ဒီးတၢ်သိၣ်လိ ကစၢ်ယွၤ ကလုၢ်ကထါအဂီၢ်လီၤ.”
၅ တၢ်လၢအဝဲသ့ၣ် တဲဝဲတဖၣ်န့ၣ် ပှၤခဲလၢာ် ဘၣ်သူၣ်ဘၣ်သးဝဲအဃိ အဝဲသ့ၣ် ဃုထၢထီၣ်ဝဲ စီၤစတ့းဖၣ် လၢအပှဲၤဒီးတၢ်နာ် ဒီးသးစီဆှံ, စီၤဖံလံးပူး,+ စီၤပြဃီၢ်, စီၤနံၤကါနီၢ်, စီၤတံမိၣ်, စီၤပၢ်မ့းနး ဒီးစီၤနံၤကလါ လၢအမ့ၢ် ပှၤအၣ်တံၤအီာ်ဖိတဂၤ လၢအနုာ်လီၤလၢ ပှၤယူဒၤဖိ အတၢ်ဘူၣ်တၢ်ဘါ အကျါလီၤ.
၆ ဒီးအဝဲသ့ၣ် ဟဲကိးဝဲ ပှၤတဖၣ်အံၤဆူ တၢ်မၢဖိတဖၣ်အအိၣ် ဒီးတၢ်မၢဖိတဖၣ် ဃ့ထုကဖၣ်တၢ်ဝံၤဒီး ပာ်ထီၣ်အစုလၢ အဝဲသ့ၣ် အလိၤလီၤ.+
၇ အဃိ ကစၢ်ယွၤ အကလုၢ်ကထါ ဆဲးရၤလီၤအသး+ ဒီးယ့ၣ်ၡူး အပျဲၢ်အဘီၣ်တဖၣ် ဆဲးအါထီၣ်ဝဲလၢ ဝ့ၢ်ယရူၤၡလ့ၣ်အပူၤ ဒီဒူၣ်လီၤ.+ ဒီးပှၤလုၢ်တၢ်ဒိၣ် အါဂၤန့ၣ် ကဲထီၣ်ဝဲပှၤလၢ အစူၢ်က့ၤနာ်က့ၤတၢ်လီၤ.+
၈ ဒီးစီၤစတ့းဖၣ်န့ၣ် ကစၢ်ယွၤ ဘၣ်သူၣ်ဘၣ်သးအီၤဒိၣ်မး ဒီးဟ့ၣ်အီၤ တၢ်စိတၢ်ကမီၤလီၤ. အဃိ အဝဲမၤဝဲ တၢ်လီၤလိၢ်လီၤလး ဒီးတၢ်ပနီၣ် ဒိၣ်ဒိၣ်မုၢ်မုၢ်တဖၣ်လၢ ပှၤဂီၢ်မုၢ် အကျါလီၤ.
၉ ဘၣ်ဆၣ် ပှၤတနီၤလၢ အပၣ်ဃုာ်လၢ ကရၢတဒူၣ်လၢ ပှၤကိးအီၤလၢ ပှၤသဘျ့ဖိအဘူၣ်ဘျီၣ်န့ၣ် ဟဲဝဲဃုာ်ဒီး ပှၤကူၤရ့ၤန့ဖိ ဒီးပှၤအလ့းစၣ်ဒြူးဖိ ဒီးပှၤတနီၤလၢ ကံၤလံၤကံ ဒီးအၤစံအကီၢ်ရ့ၣ် ဒ်သိး ကတဲအါလိာ်သးဒီး စီၤစတ့းဖၣ် အဂီၢ်လီၤ.
၁၀ ဘၣ်ဆၣ် သးစီဆှံမၤစၢၤ စီၤစတ့းဖၣ် ဒီးအဝဲတဲတၢ်ပှဲၤဒီး တၢ်ကူၣ်သ့အဃိ အဝဲသ့ၣ် တဲအီၤတနၢၤဘၣ်.+
၁၁ ဒီးလၢတၢ်ခူသူၣ်အပူၤ အဝဲသ့ၣ် ကွဲန့ၢ်လွဲန့ၢ် ပှၤဂၤတဖၣ် ဒ်သိး ကတဲဝဲလၢ “ပနၢ်ဟူ စီၤစတ့းဖၣ် ကတိၤထီဒါ စီၤမိၤၡ့ ဒီးကစၢ်ယွၤလီၤ.”
၁၂ ဒီးအဝဲသ့ၣ် ဟ့ၣ်သဆၣ်ထီၣ် ပှၤဂီၢ်မုၢ်တဖၣ်, ပှၤသူၣ်က့သးပှၢ်တဖၣ် ဒီးပှၤကွဲးလံာ်ဖိတဖၣ် ဒ်သိးကဟဲလၢ စီၤစတ့းဖၣ်အအိၣ် တဘျီဃီလီၤ. ဒီးအဝဲသ့ၣ် ဖီၣ်န့ၢ်အီၤ ဒီးလဲၤဆှၢအီၤလၢ ပှၤယူဒၤဖိ အကွီၢ်ဘျီၣ် လၢအဒိၣ်ကတၢၢ် တဖျၢၣ်လီၤ.
၁၃ ဒီးအဝဲသ့ၣ် ဟဲကိးစ့ၢ်ကီးဝဲ ပှၤအုၣ်အသးလၢ အကဘျံးကဘျၣ်တဖၣ် လၢအတဲဝဲလၢ “ပှၤတဂၤအံၤ တဲတၢ်လၢ အထီဒါ တၢ်စီဆှံအလီၢ်အံၤ ဒီးတၢ်လၢ အထီဒါစီၤမိၤၡ့ အတၢ်သိၣ်တၢ်သီ ထီဘိလီၤ.
၁၄ အဒိ ပနၢ်ဟူအတဲဝဲလၢ ပှၤနစၤရ့းဖိ ယ့ၣ်ၡူးန့ၣ် ကမၤလီၤပှီၢ်တၢ်လီၢ်အံၤ ဒီးကဆီတလဲဝဲ တၢ်သိၣ်တၢ်သီတဖၣ်လၢ စီၤမိၤၡ့ ဟ့ၣ်လီၤပှၤလီၤ.”
၁၅ ပှၤခဲလၢာ်လၢ အဆ့ၣ်နီၤလၢ ပှၤယူဒၤဖိ အကွီၢ်ဘျီၣ် လၢအဒိၣ်ကတၢၢ် အပူၤတဖၣ်န့ၣ် ကွၢ်စီၤစတ့းဖၣ် ထံထံလီၤ. ဒီးအဝဲသ့ၣ်ထံၣ်လၢ စီၤစတ့းဖၣ် အမဲာ်သၣ် ဖျါမုာ်မုာ်ခုၣ်ခုၣ် လီၤဂာ်ဒ်သိးဒီး မူခိၣ်ကလူး အမဲာ်သၣ်လီၤ.
