မၤလကံ ၁:၁-၁၄
၁ တၢ်ကစီၣ်
လၢယဟိဝၤယွၤ တဲဘၣ်ပှၤအံၣ်စရ့လးဖိ ခီဖျိလၢ စီၤမၤလကံန့ၣ်* အိၣ်ဝဲဒ် လၢလာ်အံၤအသိးလီၤ.
၂ ယဟိဝၤယွၤ တဲဝဲလၢ “ယပာ်ဖျါထီၣ်တ့ၢ် တၢ်အဲၣ်လၢ သုဖီခိၣ်လံ.”+
ဘၣ်ဆၣ် သုတဲလၢ “နပာ်ဖျါထီၣ် တၢ်အဲၣ်လၢ ပဖီခိၣ်ဒ်လဲၣ်.”
ယဟိဝၤယွၤ တဲဝဲလၢ “စီၤဧ့ၡီၤ ကဲစီၤယၤကိာ် အဒီပုၢ်ဝဲၢ်တမ့ၢ်ဧီၤ.+ ယအဲၣ်စီၤယၤကိာ်
၃ ဘၣ်ဆၣ် စီၤဧ့ၡီၤန့ၣ် ယသးဟ့အီၤလီၤ.+ ယဒုးအိၣ်သယုၢ် အကစၢၢ်တဖၣ်+ ဒီးယဒုးကဲထီၣ် အတၢ်န့ၢ်သါလၢ ထွံၣ်မံၤလၢ အအိၣ်လၢ ပှၢ်မုၢ်ကနၢတဖၣ် အတၢ်အိၣ်တၢ်ဆိး အလီၢ်လီၤ.”+
၄ “စီၤအဒိၣ်* တဲဝဲလၢ ‘ပဟးဂီၤလံ, ဘၣ်ဆၣ် ပကဟဲက့ၤကဒါက့ၤဒီး သူၣ်ထီၣ်က့ၤတၢ်လၢ အဟးဂီၤတဖၣ်.’ သနာ်က့ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘အဝဲသ့ၣ် ကသူၣ်ထီၣ်တၢ် ဘၣ်ဆၣ် ယကမၤလီၢ်ပှီၢ်ကွံာ်တၢ် ဒီးတၢ်လီၢ်န့ၣ် ပှၤကကိးဝဲလၢ “တၢ်အၢတၢ်သီ အဟီၣ်ကဝီၤ” ဒီးပှၤကကိးအဝဲသ့ၣ်လၢ “ပှၤဂီၢ်မုၢ်လၢ ယဟိဝၤယွၤ စံၣ်ညီၣ်ဝဲ လီၤထူလီၤယိာ်လီၤ.”+
၅ သုကထံၣ်ဘၣ်လၢ သုမဲာ်ဒီး သုကတဲလၢ “မ်ယဟိဝၤယွၤ ဘၣ်တၢ်မၤလၤကပီၤအီၤလၢ အံၣ်စရ့လး အဟီၣ်ကဝီၤပူၤတက့ၢ်.”’”
၆ သုဝဲ ပှၤလုၢ်တၢ်ဒိၣ်တဖၣ်လၢ အတပာ်ကဲ ယမံၤဘၣ်န့ၣ်+ ယၤ, တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲသုလၢ “‘ဖိခွါန့ၣ် မၤလၤကပီၤအပၢ်+ ဒီးကုၢ်န့ၣ် မၤလၤကပီၤ အကစၢ်လီၤ. အဃိ ယမ့မ့ၢ်ပၢ်န့ၣ်+ ဘၣ်မနုၤအဃိ သုတမၤလၤကပီၤ ယၤဘၣ်လဲၣ်.+ ဒီးယမ့မ့ၢ် ကစၢ်န့ၣ် ဘၣ်မနုၤအဃိ သုတပျံၤယၤဘၣ်လဲၣ်.’
“‘ဘၣ်ဆၣ် သုတဲလၢ “ပတပာ်ကဲနမံၤဘၣ် ဒ်လဲၣ်.”’
၇ “‘ခီဖျိ သုလုၢ်ထီၣ် တၢ်အီၣ်လၢ အတကဆှီဘၣ် လၢယတၢ်လုၢ်လီၢ်အဃိ.’
“‘ဒီးသုတဲလၢ “ပမၤဘၣ်အၢဘၣ်နၤ ဒ်လဲၣ်.”’
“‘ခီဖျိ သုတဲလၢ “ယဟိဝၤယွၤ အစီၢ်နီၤခိၣ်န့ၣ်*+ တလီၤပာ်ကဲဘၣ်.”’
၈ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘ဖဲသုဟ့ၣ်လုၢ်ထီၣ် ဆၣ်ဖိကီၢ်ဖိ လၢအမဲာ်ဘျီၣ်အခါ သုတဲလၢ “အတဘၣ် တၢ်နီတမံၤဘၣ်.” ဒီးဖဲသုဟ့ၣ်လုၢ်ထီၣ် ဆၣ်ဖိကီၢ်ဖိလၢ အဆိးက့ ဒီးအစုအခီၣ် တဂ့ၤဘၣ်အခါ သုတဲလၢ “အတဘၣ် တၢ်နီတမံၤဘၣ်.”’”+
“ဝံသးစူၤ လဲၤဟ့ၣ်ကွၢ် ဆၣ်ဖိကီၢ်ဖိတဖၣ်န့ၣ် လၢသုပဒိၣ်ပပှၢ် အအိၣ်မီၤ. မ့ၢ်အကတူၢ်လိာ် သုတၢ်ဟ့ၣ်ဒီး ဘၣ်သူၣ်ဘၣ်သးသု စ့ၢ်ကီးဧါ.”
၉ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “သုမ့ၢ် ဟ့ၣ်လုၢ်ထီၣ်တၢ် ဒ်န့ၣ်န့ၣ် ကစၢ်ယွၤ တူၢ်လိာ်သုဒီး ဘၣ်သူၣ်ဘၣ်သးသု ကသ့ဒ်လဲၣ်. ဒ်သိး ကစၢ်ယွၤ ကပာ်ဖျါထီၣ် တၢ်သးကညီၤအဂီၢ် ခဲအံၤန့ၣ် ဝံသးစူၤ ဃ့ကညးအီၤတက့ၢ်.”
၁၀ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “လၢသုကျါန့ၣ် မတဂၤသးအိၣ်ပံး တၢ်လုၢ်ဟံၣ် အတြဲၤတဖၣ်လဲၣ်.*+ သုမ့ၢ်တန့ၢ်ဘၣ် အဘူးအလဲဘၣ်န့ၣ် သုမးတမၤကဲၤထီၣ် မ့ၣ်အူလၢ ယတၢ်လုၢ်လီၢ်အဖီခိၣ်ဘၣ်.+ ယတဘၣ်သူၣ်ဘၣ်သးသု နီတစဲးဘၣ်. ဒီးတၢ်ဟ့ၣ်လၢ သုလုၢ်ထီၣ် တခါဂ့ၤတခါဂ့ၤန့ၣ် ယတဘၣ်သူၣ်ဘၣ်သးဘၣ်.”+
၁၁ တၢ်သုးမုၢ်ဂီၢ်မုၢ်အကစၢ် ယဟိဝၤယွၤတဲဝဲလၢ “ယမံၤကဘၣ် တၢ်မၤလၤကပီၤအီၤလၢ ပှၤကလုာ်တဖၣ် အကျါ စးထီၣ်လၢမုၢ်ထီၣ် တုၤလၢ မုၢ်နုာ်လီၤ.+ ဒီးခီဖျိလၢ ယမံၤကဘၣ် တၢ်မၤလၤကပီၤအီၤလၢ ပှၤကလုာ်တဖၣ်အကျါအဃိ လၢတၢ်လီၢ်ကိးတီၤဒဲးန့ၣ် ပှၤကဒွဲၣ်ခုၣ်ထီၣ် တၢ်လုၢ်တဖၣ် ဒီးပှၤကလုၢ်ထီၣ် တၢ်ဟ့ၣ်လၢအဂ့ၤ ဒ်သိးပှၤကမၤလၤကပီၤ ယမံၤအဂီၢ်လီၤ.”+
၁၂ “ဘၣ်ဆၣ် သုမၤစှၤလီၤယမံၤ အလၤကပီၤ+ ခီဖျိသုတဲလၢ ‘ယဟိဝၤယွၤ အစီၢ်နီၤခိၣ်န့ၣ် တကဆှီဘၣ်. ဒီးတၢ်လုၢ်လၢ ပှၤပာ်ထီၣ်လၢ အစီၢ်နီၤခိၣ်အဖီခိၣ်န့ၣ် လီၤသးဘၣ်အၢညါ.’+
၁၃ ဒီးတၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘တကးဒံးဘၣ် သုတဲလၢ သုမၤတၢ်မၤအဝဲန့ၣ် တကဲလၢၤဘၣ်.’ ဒီးသုနၢဆဲးအဲး တၢ်သ့ၣ်တဖၣ်န့ၣ်လီၤ.” ယဟိဝၤယွၤ တဲဝဲလၢ “ဆၣ်ဖိကီၢ်ဖိလၢ သုဟုၣ်န့ၢ်မ့ၢ်ဂ့ၤ, အစုတဂ့ၤခီၣ်တဂ့ၤဘၣ်မ့ၢ်ဂ့ၤ, အဆိးက့မ့ၢ်ဂ့ၤ သုဟဲစိာ်ဒီး သုဟဲဟ့ၣ်လုၢ်ထီၣ်အီၤ ဒ်တၢ်ဟ့ၣ်အသိးလီၤ. အဃိ မ့ၢ်ယကြၢးတူၢ်လိာ် သုတၢ်ဟ့ၣ်လုၢ်ထီၣ် တဖၣ်န့ၣ်ဧါ.”+
၁၄ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “ပှၤလၢ အလံၣ်အီၣ်လီအီၣ်တၢ်န့ၣ် မ်အဘၣ်ဆိၣ်အၢတက့ၢ်. ပှၤတဖၣ်န့ၣ် အိၣ်ဒီး ဆၣ်ဖိကီၢ်ဖိအဖါလၢ အလၢအပှဲၤ လၢအဆၣ်ဖိကီၢ်ဖိ အကျါဘၣ်ဆၣ် အဝဲသ့ၣ် အၢၣ်လီၤတၢ်ဒီး လုၢ်ထီၣ်တၢ်လၢ အတလၢတပှဲၤဘၣ်လၢ ယၤ, ယဟိဝၤယွၤ အအိၣ်လီၤ. ယမ့ၢ်စီၤပၤဖးဒိၣ်+ ဒီးယမံၤကဘၣ် တၢ်ယူးယီၣ်ပာ်ကဲအီၤလၢ ပှၤကလုာ်တဖၣ်အကျါလီၤ.”+
တၢ်ဂ့ၢ်အဘျဲၣ်တဖၣ်
^ အခီပညီမ့ၢ်ဝဲ “ယပှၤစိာ်တၢ်ကစီၣ်ဖိ.”
^ မ့ၢ်ဝဲ စီၤဧ့ၡီၤ အမံၤလၢအဂၤတဖျၢၣ်.
^ မ့ၢ်ဝဲ အတၢ်လုၢ်လီၢ်.
^ ဖျါလၢအဲၣ်ဒိးတဲဝဲ မူဒါလၢ ပှၤကဘၣ်ပံးတၢ်လုၢ်ဟံၣ်အတြဲၤတဖၣ်.
