ယိၤနါ ၃:၁-၁၀
၃ ယဟိဝၤယွၤ တဲဘၣ် စီၤယိၤနါ ခံဘျီတဘျီလၢ+
၂ “ဂဲၤဆၢထၢၣ် လဲၤလၢဝ့ၢ်နံၤနဝ့+ လၢအမ့ၢ် ဝ့ၢ်ဖးဒိၣ်တဖျၢၣ် ဒီးတဲဘၣ်အီၤ တၢ်ကစီၣ်လၢ ယတဲဘၣ်နၤန့ၣ်တက့ၢ်.”
၃ စီၤယိၤနါ ဒိကနၣ် ယဟိဝၤယွၤ အကလုၢ်+ ဒီးအဝဲဂဲၤဆၢထၢၣ် ဒီးလဲၤဝဲလၢ ဝ့ၢ်နံၤနဝ့လီၤ.+ နံၤနဝ့ မ့ၢ်ဝ့ၢ်ဖးဒိၣ်တဖျၢၣ်လၢ ပှၤဘၣ်ဟးလၢပှၤခီၣ် ယံာ်ဝဲသၢသီကျဲညါလီၤ.
၄ စီၤယိၤနါ လဲၤနုာ်လီၤလၢဝ့ၢ်ပူၤ ဒီးဖဲအဟးဝဲ တသီကျဲအခါ အဝဲ ဘိးဘၣ်သ့ၣ်ညါဝဲလၢ “လၢခံအသီ ၄၀ န့ၣ် ဝ့ၢ်နံၤနဝ့ ကဘၣ်တၢ်မၤဟးဂီၤအီၤလီၤ.”
၅ ပှၤနံၤနဝ့ဖိတဖၣ် စူၢ်က့ၤနာ်က့ၤ ကစၢ်ယွၤ+ ဒီးအဝဲသ့ၣ် တဲလိာ်အသး တဂၤဒီးတဂၤလၢ ကဒုၣ်တၢ်အီၣ် ဒီးသိးထီၣ်ဝဲ ထၢၣ်တၢ်ကံးညာ် စးထီၣ်လၢ ပှၤအဒိၣ် တုၤလီၤလၢ ပှၤအဆံးလီၤ.
၆ ဖဲတၢ်ကစီၣ်လဲၤတုၤလၢ နံၤနဝ့ အစီၤပၤအအိၣ်အခါ အဝဲဂဲၤဆၢထၢၣ်လၢ အလီၢ်ပစိာ် ဒီးအဝဲဘ့ၣ်လီၤကွံာ် စီၤပၤအတၢ်ကူတၢ်ကၤ ဒီးသိးထီၣ်ဝဲ ထၢၣ်တၢ်ကံးညာ် ဒီးဆ့ၣ်နီၤဝဲလၢ ဖၣ်ဆါကျါလီၤ.
၇ စီၤပၤဟ့ၣ်လီၤတၢ်ကလုၢ်လၢ ဝ့ၢ်နံၤနဝ့ဒီဘ့ၣ် အပူၤလီၤ.
“စီၤပၤဒီး အပဒိၣ်ပပှၢ်တဖၣ် ဟ့ၣ်လီၤတၢ်ကလုၢ်လၢ ပှၤဟီၣ်ခိၣ်ဖိမ့ၢ်ဂ့ၤ, ဆၣ်ဖိကီၢ်ဖိ လၢအမ့ၢ် ကျီၢ်မ့ၢ်ဂ့ၤ, သိဒီးမဲာ်တဲးလဲးမ့ၢ်ဂ့ၤ တဘၣ်အီၣ် တၢ်နီတမံၤဘၣ်. အဝဲသ့ၣ် တဘၣ်အီၣ် တၢ်အီၣ်ဘၣ် ဒီးတဘၣ်အီထံစ့ၢ်ကီးဘၣ်.
၈ ဆၣ်ဖိကီၢ်ဖိဒီး ပှၤကညီ ဘၣ်သိးထီၣ်ထၢၣ်တၢ်ကံးညာ် ဒီးဘၣ်ကိးထီၣ် ကစၢ်ယွၤလၢ တၢ်သူၣ်ဆူၣ်သးဆူၣ်အပူၤဒီးဃၣ်ကွံာ်အသးလၢ ကျဲအၢကျဲသီ ဒီးတဘၣ် မၤဆူၣ်မၤစိးတၢ်လၢၤဘၣ်.
၉ ဘၣ်သ့ၣ်သ့ၣ် ယွၤလၢအမ့ၢ်အတီတဂၤ ကက့ၤဆိကမိၣ်ထံ တၢ်လၢအကမၤဝဲ ဒီးအတၢ်သးထီၣ် ကလီၤမၢ် ဒီးအတမၤဟးဂီၤ ပှၤလၢၤဘၣ်.”
၁၀ ဖဲယွၤလၢ အမ့ၢ်အတီတဂၤ ထံၣ်ဘၣ်တၢ်လၢ အဝဲသ့ၣ်မၤဝဲ ဒီးအဝဲသ့ၣ် ဃၣ်ကွံာ်အသးလၢ ကျဲအၢကျဲသီအခါ+ ကစၢ်ယွၤ က့ၤဆိကမိၣ်ထံက့ၤ အတၢ်ဆၢတဲာ် ဒီးတစံၣ်ညီၣ် အဝဲသ့ၣ် ဒ်အတဲပာ်စၢၤဝဲအသိးလၢၤဘၣ်.+
