ယိၤဟၣ် ၁၂:၁-၅၀
-
နီၢ်မၤရံလူလီၤသိလၢ ယ့ၣ်ၡူးအခီၣ်လိၤ (၁-၁၁)
-
ယ့ၣ်ၡူးလဲၤနုာ်လီၤလၢ ယရူၤၡလ့ၣ်အပူၤ ဒ်စီၤပၤတဂၤအသိး (၁၂-၁၉)
-
ယ့ၣ်ၡူးတဲဆိဝဲ ဘၣ်ဃးဒီးအတၢ်သံအဂ့ၢ် (၂၀-၃၇)
-
ပှၤယူဒၤဖိတဖၣ် အတၢ်နာ်တအိၣ်ဘၣ်အဃိမၤလၢထီၣ်ပှဲၤထီၣ်ဝဲ ဝံအတၢ်စံးပာ် (၃၈-၄၃)
-
ယ့ၣ်ၡူးဟဲဒ်သိး ကအုၣ်က့ၤခီၣ်က့ၤ ဟီၣ်ခိၣ် (၄၄-၅၀)
၁၂ ဘူၣ်လဲၤကပာ် တချုးဘၣ်ဒံးဘၣ် ဃုသီန့ၣ် ယ့ၣ်ၡူး လဲၤတုၤဝဲလၢ ဘ့ၤသနံသဝီ ဖဲစီၤလါစရူး+ အိၣ်ဝဲအလီၢ်လီၤ. စီၤလါစရူး မ့ၢ်ဝဲပှၤလၢ ယ့ၣ်ၡူးမၤသမူထီၣ်အီၤလၢ တၢ်သံလီၤ.
၂ ပှၤမၤဝဲဟါတၢ်အီၣ် လၢယ့ၣ်ၡူးအဂီၢ် ဒီးနီၢ်မၢ်သၤ ဟဲစိာ်န့ၢ် အဝဲသ့ၣ် တၢ်အီၣ်တၢ်အီလီၤ.+ ဒီးစီၤလါစရူး ပၣ်ဃုာ်လၢ ပှၤလၢအအီၣ်သကိး တၢ်ဒီးယ့ၣ်ၡူး အကျါလီၤ.
၃ ဒီးနီၢ်မၤရံ ဟံးန့ၢ်ဝဲသိနၢမူ နၢ်ဒူၤအနီၢ်ကီၢ် တလံတြၤ* လၢအပှ့ၤဒိၣ်မး ဒီးအဝဲလူလီၤဝဲလၢ ယ့ၣ်ၡူးအခီၣ်လိၤ ဒီးထွါသူထီၣ်န့ၢ်ဝဲ အခီၣ်လၢ အခိၣ်ဆူၣ်လီၤ. ဒီးသိအံၤနၢမူ ပှဲၤဝဲဟံၣ်ပူၤလီၤ.+
၄ ဘၣ်ဆၣ် ယ့ၣ်ၡူးအပျဲၢ်အဘီၣ်တဂၤ လၢအမ့ၢ် စီၤယူဒၤ အံၣ်စကၤရံၤအိာ်+ လၢအကဟ့ၣ်လီၤကွံာ်အီၤန့ၣ် တဲဝဲလၢ
၅ “သိနၢမူတခါအံၤ ဘၣ်မနုၤအဃိ ပှၤတဆါအီၤလၢ စ့ဒန့ၤရံၤ* ၃၀၀ ဒီးဟ့ၣ်လီၤအီၤလၢ ပှၤဖှီၣ်ဖိယာ်ဖိတဖၣ်ဘၣ်လဲၣ်.”
၆ အဝဲတဲဒ်န့ၣ်န့ၣ် တမ့ၢ်လၢ အဘၣ်ယိၣ်တၢ်လၢ ပှၤဖှီၣ်ဖိယာ်ဖိတဖၣ် အဂီၢ်ဘၣ်, မ့ၢ်လၢအကဲ တၢ်ဟုၣ်တၢ်ဘျၣ်တဂၤ ဒီးအပၢၤစ့ အတလါ ဒီးအဟုၣ်စ့လၢ ပှၤထၢနုာ်လီၤအီၤတဖၣ် အဃိလီၤ.
၇ ယ့ၣ်ၡူးတဲန့ၢ်တၢ်လၢ နီၢ်မၤရံအဂီၢ်လၢ “တြီအီၤတဂ့ၤ. အဝဲမၤထွဲ လုၢ်လၢ်တခါအံၤ ဒ်တၢ်ကတဲာ်ကတီၤလၢ တၢ်ကခူၣ်လီၤယၤ အမုၢ်နံၤအဂီၢ်လီၤ.+
၈ ပှၤဖှီၣ်ဖိယာ်ဖိတဖၣ် ကအိၣ်ဒီးသုထီဘိလီၤ.+ မ့မ့ၢ်ယၤန့ၣ် တမ့ၢ်လၢ ယကအိၣ်ဒီးသုထီဘိဘၣ်.”+
၉ ဖဲန့ၣ်အဆၢကတီၢ် ပှၤဂီၢ်မုၢ်ဖးဒိၣ် လၢအမ့ၢ် ပှၤယူဒၤဖိတဖၣ် သ့ၣ်ညါဝဲလၢ ယ့ၣ်ၡူး အိၣ်ဖဲန့ၣ်လီၤ. ဘၣ်ဆၣ် အဝဲသ့ၣ်ဟဲန့ၣ် တမ့ၢ်ထဲလၢ ယ့ၣ်ၡူးအဃိဘၣ်, မ့ၢ်ဒ်သိး ကထံၣ်ဘၣ်စ့ၢ်ကီး စီၤလါစရူး လၢအမ့ၢ်ပှၤလၢ ယ့ၣ်ၡူး မၤသမူထီၣ်အီၤလၢ တၢ်သံလီၤ.+
၁၀ ဖဲန့ၣ်အခါ ပှၤလုၢ်တၢ်ဒိၣ် အခိၣ်တဖၣ် ကူၣ်ထီၣ်ဖးလီၤဝဲလၢ ကမၤသံ စီၤလါစရူးစ့ၢ်ကီး,
၁၁ မ့ၢ်လၢ အဝဲဒၣ်အဃိ ပှၤယူဒၤဖိအါဂၤ လဲၤဝဲဖဲန့ၣ် ဒီးစူၢ်က့ၤနာ်က့ၤ ယ့ၣ်ၡူးလီၤ.+
၁၂ လၢခံတနံၤန့ၣ် ပှၤဂီၢ်မုၢ်ဖးဒိၣ် လၢအဟဲလၢ ဘူၣ်ပူၤန့ၣ် နၢ်ဟူဝဲလၢယ့ၣ်ၡူး ဟဲလၢကျဲဆူ ဝ့ၢ်ယရူၤၡလ့ၣ်လီၤ.
၁၃ အဃိ အဝဲသ့ၣ် ဟံးန့ၢ်ဝဲ စူၣ်ပလိၣ်အဒ့ ဒီးလဲၤသဂၢၢ်အီၤ ဒီးကိးပသူထီၣ်ဝဲလၢ “ပဃ့ကညးနၤလၢ မၤပူၤဖျဲးအီၤတက့ၢ်.* အံၣ်စရ့လးအစီၤပၤလၢ+ အဟဲလၢ ယဟိဝၤယွၤ* အမံၤတဂၤအံၤန့ၣ်+ မ်အဘၣ်ဆိၣ်ဂ့ၤတက့ၢ်.”
၁၄ ဖဲယ့ၣ်ၡူးထံၣ်ဝဲ ကသ့ၣ်ယီၤဖိ တဒုအခါ အဝဲဒိးထီၣ်ဝဲ+ ဒ်တၢ်ကွဲးအသး အိၣ်ဝဲလၢ
၁၅ “စံယိၣ်အဖိမုၣ်ဧၢ, ပျံၤတၢ်တဂ့ၤ. ကွၢ်မီၤ, နစီၤပၤဟဲဒိးဝဲ ကသ့ၣ်ယီၤဖိလီၤ.”+
၁၆ လၢအခီၣ်ထံးန့ၣ် အပျဲၢ်အဘီၣ်တဖၣ် တနၢ်ပၢၢ်ဝဲ တၢ်ဂ့ၢ်တဖၣ်အံၤဘၣ်. ဘၣ်ဆၣ် ဖဲယ့ၣ်ၡူးဒိးန့ၢ်ဘၣ် တၢ်လၤကပီၤအခါ+ အဝဲသ့ၣ် သ့ၣ်နီၣ်ထီၣ်က့ၤဝဲလၢ တၢ်ဂ့ၢ်တဖၣ်အံၤ အိၣ်ကွဲးပာ်စၢၤအသး ဘၣ်ဃးဒီးအီၤ ဒီးပှၤမၤအီၤဒ်န့ၣ်လီၤ.+
၁၇ ဒီးပှၤဂီၢ်မုၢ်လၢ အအိၣ်ဒီးယ့ၣ်ၡူး ဖဲအဝဲကိးထီၣ် စီၤလါစရူးလၢ တၢ်သွၣ်ခိၣ်အပူၤ+ ဒီးမၤဂဲၤဆၢထၢၣ်က့ၤအီၤလၢ တၢ်သံအခါန့ၣ် ဆဲးအုၣ်အသးလီၤ.+
၁၈ ပှၤဂီၢ်မုၢ်တဖၣ် လဲၤသဂၢၢ်ယ့ၣ်ၡူး မ့ၢ်လၢအဝဲသ့ၣ် နၢ်ဟူဘၣ်ဝဲလၢ အဝဲမၤတ့ၢ် တၢ်လီၤလးအံၤ အဃိလီၤ.
၁၉ ဒီးပှၤဖၤရံၤၡဲတဖၣ် တဲလိာ်အသး ကဒဲကဒဲလၢ “သုထံၣ်ဧါ, ပတၢ်ကူၣ်ထီၣ်ဖးလီၤန့ၣ် တကဲထီၣ် နီတမံၤဘၣ်. ကွၢ်မီၤ, ပှၤခဲလၢာ်* ပိာ်ထီၣ်အခံလံ.”+
၂၀ ဒီးပှၤလၢအဟဲ ဘူၣ်ထီၣ်ဘါထီၣ်တၢ်လၢ ဘူၣ်ပူၤန့ၣ် ပၣ်ဃုာ်ဒီး ပှၤကြံးဖိတနီၤလီၤ.
၂၁ ဒီးအဝဲသ့ၣ်လဲၤဆူ စီၤဖံလံးပူးလၢ+ အအိၣ်ဟဲလၢ ဝ့ၢ်ဘ့ၤသစဲဒၤ လၢကၤလံၤလါအပူၤတဂၤန့ၣ် အအိၣ်လီၤ. အဝဲသ့ၣ် တဲအီၤလၢ “ကစၢ်ဧၢ, ပအဲၣ်ဒိးထံၣ် ယ့ၣ်ၡူးလီၤ.”
၂၂ စီၤဖံလံးပူး လဲၤတဲဘၣ် စီၤအၣ်ဒရ့းလီၤ. ဒီးစီၤအၣ်ဒရ့း ဒီးစီၤဖံလံးပူး လဲၤတဲဘၣ်ယ့ၣ်ၡူးလီၤ.
၂၃ ဘၣ်ဆၣ် ယ့ၣ်ၡူးတဲဆၢက့ၤ အဝဲသ့ၣ်လၢ “တၢ်ဆၢကတီၢ်ဘၣ်လၢ ပှၤကညီဖိခွါအံၤ ကဘၣ် တၢ်မၤလၤကပီၤအီၤလီၤ.+
၂၄ ယကတဲဘၣ်သု တီတီလၢ ဘုကၠူၣ် အချံတဖျၢၣ် မ့ၢ်တလီၤတဲာ်လၢ ဟီၣ်ခိၣ်လိၤဒီး အုၣ်သံဘၣ်န့ၣ် ဘုကၠူၣ်ချံအံၤ ကအိၣ်ဒၣ် ထဲတဖျၢၣ်လီၤ. ဘၣ်ဆၣ် အမ့ၢ်အုၣ်သံန့ၣ်+ ကသၣ်ထီၣ်ဝဲ အါမးလီၤ.
၂၅ ပှၤလၢအအဲၣ် အသးသမူန့ၣ် အသးသမူ ကဟးဂီၤဝဲလီၤ. မ့မ့ၢ် ပှၤလၢ အသးအိၣ်ဟ့ၣ်လီၤကွံာ်အသးသမူ*+ လၢဟီၣ်ခိၣ်ချၢအံၤန့ၣ် မ့ၢ်အဒီသဒၢလီၤ အသးသမူ ဒ်သိးကန့ၢ်ဘၣ် တၢ်မူလီၤထူလီၤယိာ် အဂီၢ်လီၤ.+
၂၆ ပှၤလၢအအဲၣ်ဒိး မၤန့ၢ်တၢ်လၢယဂီၢ် တဂၤဂၤန့ၣ် မ်အပိာ်ယခံတက့ၢ်. ဒီးဖဲယအိၣ်အလီၢ်န့ၣ် ယခ့ယပှၤ ကအိၣ်ဖဲန့ၣ်စ့ၢ်ကီးလီၤ.+ ပှၤမ့ၢ်မၤန့ၢ်တၢ်လၢ ယဂီၢ်တဂၤဂၤန့ၣ် ယပၢ်ကမၤလၤကပီၤအီၤလီၤ.
၂၇ ခဲအံၤ ယသူၣ်ကိၢ်သးဂီၤတၢ်+ ဒီးယကဘၣ်တဲဒ်လဲၣ်. ပၢ်ဧၢ, မၤပူၤဖျဲးယၤလၢ တၢ်လၢအကဟဲကဲထီၣ်သးအံၤ* တက့ၢ်.+ ဘၣ်ဆၣ် ယဟဲလီၤလၢ တၢ်လၢအကဟဲကဲထီၣ်သးအံၤ အဂီၢ်လီၤ.
၂၈ ပၢ်ဧၢ, မၤလၤကပီၤ နမံၤတက့ၢ်.” ဒီးတၢ်ကလုၢ်သီၣ်ထီၣ်လၢ+ မူခိၣ်လၢ “ယမၤလၤကပီၤအီၤလံ ဒီးယကမၤလၤကပီၤ ကဒီးအီၤလီၤ.”+
၂၉ ပှၤဂီၢ်မုၢ်လၢ အဆၢထၢၣ်ဖဲန့ၣ်တဖၣ် နၢ်ဟူဝဲအဃိ အဝဲသ့ၣ်တနီၤ တဲဝဲလၢ လီသီၣ်ထီၣ်လီၤ. ဒီးအဂၤတနီၤ တဲဝဲလၢ “မူခိၣ်ကလူးတဂၤ တဲတၢ်ဒီးအီၤလီၤ.”
၃၀ ယ့ၣ်ၡူး တဲဝဲလၢ “တၢ်ကလုၢ်သီၣ်ထီၣ်န့ၣ် တမ့ၢ်လၢယဂီၢ်ဘၣ်, မ့ၢ်ဝဲလၢသုဂီၢ်လီၤ.
၃၁ ဆၢကတီၢ်ခဲအံၤ ဟီၣ်ခိၣ် ဘၣ်တၢ်စံၣ်ညီၣ်လီၤ. ဒီးဟီၣ်ခိၣ်အခိၣ်န့ၣ်+ ကဘၣ် တၢ်နီဟးထီၣ်ကွံာ်အီၤလီၤ.+
၃၂ မ့မ့ၢ်ယၤန့ၣ် ယမ့ၢ်ဘၣ် တၢ်ဘျးထီၣ်ယၤန့ၣ်+ ယကမူၤဃီၤ ပှၤအကလုာ် ကလုာ်လၢ ယအိၣ်လီၤ.”
၃၃ အဝဲတဲ တၢ်ဂ့ၢ်အံၤ ဒ်သိး ကပာ်ဖျါထီၣ်ဝဲလၢ အကဘၣ်သံဝဲ ဒ်လဲၣ်လီၤ.+
၃၄ ပှၤဂီၢ်မုၢ်တဖၣ် တဲဆၢအီၤလၢ “လၢစီၤမိၤၡ့ အတၢ်သိၣ်တၢ်သီအပူၤန့ၣ် ပနၢ်ဟူဘၣ်လၢ ခရံာ်ကအိၣ်ဝဲ လီၤထူလီၤယိာ်လီၤ.+ ဘၣ်မနုၤအဃိ နတဲလၢ ပှၤကညီဖိခွါန့ၣ် ကဘၣ်တၢ်ဘျးထီၣ်အီၤလဲၣ်.+ ပှၤကညီဖိခွါတဂၤအံၤ မ့ၢ်မတဂၤလဲၣ်.”
၃၅ ယ့ၣ်ၡူးတဲဘၣ် အဝဲသ့ၣ်လၢ “တၢ်ကပီၤ ကအိၣ်ဒံးလၢ သုကျါတစိၢ်ဖိလီၤ. အဃိ ဒ်သိးတၢ်ခံး သုတမၤနၢၤ သုတဂ့ၤအဂီၢ် ဖဲတၢ်ကပီၤအိၣ်ဒံးအခါ ဟးဟီ. ပှၤလၢ အဟးလၢတၢ်ခံးကျါန့ၣ် မ့ၢ်အလဲၤဖဲလဲၣ်န့ၣ် အတသ့ၣ်ညါဝဲဘၣ်.+
၃၆ အဃိ ဒ်သိးသု ကကဲထီၣ်တၢ်ကပီၤ အဖိခွါတဖၣ်အဂီၢ် ဖဲတၢ်ကပီၤ အိၣ်ဒီးသုအခါ စူၢ်က့ၤနာ်က့ၤ တၢ်ကပီၤတက့ၢ်.”+
ယ့ၣ်ၡူးတဲ တၢ်ဂ့ၢ်တဖၣ်န့ၣ် ဝံၤဒီးဟးထီၣ်အိၣ်ခူသူၣ် အဝဲသ့ၣ်လီၤ.
၃၇ အဝဲမၤ တၢ်ပနီၣ်လီၤလးလၢ အဝဲသ့ၣ် အမဲာ်ညါအါမး ဘၣ်ဆၣ် အဝဲသ့ၣ် တစူၢ်က့ၤနာ်က့ၤအီၤဘၣ်.
၃၈ အဃိ ဝံယၡါယၤ အတၢ်ကတိၤ လၢထီၣ်ပှဲၤထီၣ်ဝဲလီၤ. အဝဲတဲပာ်စၢၤဝဲလၢ “ယဟိဝၤယွၤဧၢ, မ့ၢ်မတဂၤနာ်ဝဲ တၢ်လၢအနၢ်ဟူဘၣ်လၢ ပအိၣ်လဲၣ်.+ ဒီးယဟိဝၤယွၤ အစုန့ၣ် ဘၣ်တၢ် ပာ်ဖျါထီၣ်အီၤလၢ မတဂၤအအိၣ်လဲၣ်.”+
၃၉ ဘၣ်မနုၤအဃိ အဝဲသ့ၣ် တနာ်တၢ်ဘၣ်လဲၣ်န့ၣ် ဝံယၡါယၤ တဲပာ်စၢၤကဒီးဝဲလၢ
၄၀ “အဝဲမၤဘျီၣ် အဝဲသ့ၣ်အမဲာ် ဒီးမၤဝဲဒ်သိးအဝဲသ့ၣ် အခိၣ်ကကိၤအဂီၢ် ဒီးဒ်သိးအသု တထံၣ်တၢ်လၢ အမဲာ်ချံတဂ့ၤ ဒီးအသးသု တသ့ၣ်ညါနၢ်ပၢၢ်တၢ်တဂ့ၤ ဒီးအဝဲသ့ၣ် သုတဃၣ်ကဒါက့ၤအသး ဒ်သိးယကမၤဘျါကွံာ် အဝဲသ့ၣ် တဂ့ၤအဂီၢ်လီၤ.”+
၄၁ မ့ၢ်လၢ ဝံယၡါယၤ ထံၣ်ဘၣ်ဝဲ ခရံာ်အလၤအကပီၤအဃိ အတဲဝဲ တၢ်ဂ့ၢ်တဖၣ်န့ၣ် ဒီးအတဲတၢ်ဘၣ်ဃးဒီး ခရံာ်အဂ့ၢ်လီၤ.+
၄၂ ဒ်လဲၣ်ဂ့ၤ ဒ်လဲၣ်ဂ့ၤ ပှၤခိၣ်ပှၤနၢ်ဒၣ်လဲာ် စူၢ်က့ၤနာ်က့ၤအီၤ အါဂၤလီၤ.+ ဘၣ်ဆၣ် မ့ၢ်လၢ ပှၤဖၤရံၤၡဲတဖၣ်အဃိ ဒီးဒ်သိးအဝဲသ့ၣ် သုတဘၣ်တၢ်ဟီထီၣ်ကွံာ်အီၤလၢ ဘူၣ်ဘျီၣ်ပူၤတဂ့ၤအဂီၢ် အဝဲသ့ၣ် တအၢၣ်လီၤဝဲလၢ အနာ်ခရံာ်ဘၣ်.+
၄၃ အဝဲသ့ၣ် အဲၣ်ဝဲ တၢ်လၤတၢ်ကပီၤလၢ အဟဲလၢ ပှၤဟီၣ်ခိၣ်ဖိအအိၣ် ဒိၣ်န့ၢ်ဒံး တၢ်လၤကပီၤလၢ ကစၢ်ယွၤအအိၣ်လီၤ.+
၄၄ ဒီးယ့ၣ်ၡူးတဲဝဲလၢ အကလုၢ်ဒိၣ်ဒိၣ်လၢ “ပှၤလၢ အစူၢ်က့ၤနာ်က့ၤယၤန့ၣ် တမ့ၢ်လၢ အစူၢ်က့ၤနာ်က့ၤ ထဲယၤတဂၤဘၣ်, မ့ၢ်အစူၢ်က့ၤနာ်က့ၤစ့ၢ်ကီး ပှၤလၢ အဆှၢလီၤယၤတဂၤလီၤ.+
၄၅ ဒီးပှၤလၢ အထံၣ်ယၤန့ၣ် ထံၣ်စ့ၢ်ကီးပှၤလၢ အဆှၢလီၤယၤ တဂၤန့ၣ်လီၤ.+
၄၆ ပှၤလၢ အနာ်ယၤကိးဂၤဒဲးန့ၣ် ဒ်သိးအသုတအိၣ်လၢ တၢ်ခံးကျါလၢၤတဂ့ၤအဂီၢ်+ ယဟဲလီၤလၢဟီၣ်ခိၣ် ဒ်တၢ်ကပီၤအသိးလီၤ.+
၄၇ ယတဟဲဒ်သိး ယကစံၣ်ညီၣ် ဟီၣ်ခိၣ်အဂီၢ်ဘၣ်, မ့ၢ်ဒ်သိး ကအုၣ်က့ၤခီၣ်က့ၤ ဟီၣ်ခိၣ်အဂီၢ်လီၤ. အဃိ ပှၤမ့ၢ်နၢ်ဟူတၢ်လၢ ယတဲတဖၣ်ဒီး မ့ၢ်တမၤထွဲဘၣ်သနာ်က့ ယတစံၣ်ညီၣ်အီၤဘၣ်.+
၄၈ ပှၤလၢ အတကနၣ်ဃုာ်ယၤ ဒီးတတူၢ်လိာ် ယတၢ်ကတိၤဘၣ်န့ၣ် ပှၤလၢအကစံၣ်ညီၣ်အီၤ အိၣ်ဝဲတဂၤလီၤ. တၢ်ကတိၤလၢ ယတဲတ့ၢ်န့ၣ် ကစံၣ်ညီၣ်အီၤဖဲ မုၢ်နံၤအကတၢၢ် တနံၤအတီၢ်ပူၤလီၤ.
၄၉ ယတတဲတၢ်ဒ် ယနီၢ်ကစၢ် အတၢ်ဆိကမိၣ်အသိးဘၣ်. ပၢ်လၢ အဆှၢလီၤယၤတဂၤန့ၣ် ဟ့ၣ်လီၤယၤ တၢ်မၤလိာ်ဘၣ်ဃးဒီး တၢ်လၢယကဘၣ်တဲ ဒီးတၢ်လၢယကဘၣ် သိၣ်လိလီၤ.+
၅၀ ဒီးယသ့ၣ်ညါလၢ အတၢ်မၤလိာ်န့ၣ် မ့ၢ်ဝဲတၢ်မူအထူအယိာ်လီၤ.+ အဃိ တၢ်လၢယတဲန့ၣ် ယတဲအီၤဒ်ယပၢ် တဲပာ်စၢၤယၤအသိးလီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ရိမ့ၤအပီၣ် ဒီးကအိၣ်ဝဲ ၃၂၇ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်ဝဲ တၢ်ဃ့ကညးလၢ ကစၢ်ယွၤအအိၣ်လၢ အကမၤပူၤဖျဲးယ့ၣ်ၡူးအဂီၢ်.
^ အခီပညီလိၤလိၤ “ဟီၣ်ခိၣ်ခဲလၢာ်.”
^ အခီပညီလိၤလိၤ “ပှၤလၢ အသးဟ့အသးသမူ.”
^ အခီပညီလိၤလိၤ “နၣ်ရံၣ်.”
