ယိၤဟၣ် ၁၃:၁-၃၈
၁၃ ဒီးဘူၣ်လဲၤကပာ် တချုးဘၣ်ဒံးဘၣ်န့ၣ် ယ့ၣ်ၡူး သ့ၣ်ညါဝဲလၢ တၢ်ဆၢကတီၢ်ဘၣ်လၢ+ အကဘၣ်ဟးထီၣ်လၢ ဟီၣ်ခိၣ်ချၢဒီး က့ၤလၢပၢ်အအိၣ်လီၤ.+ ယ့ၣ်ၡူးအဲၣ်ဘၣ် အပျဲၢ်အဘီၣ်တဖၣ် လၢအအိၣ်လၢ ဟီၣ်ခိၣ်ချၢဒီး အဲၣ်အဝဲသ့ၣ်တုၤလၢ အကတၢၢ်လီၤ.+
၂ ဒီးမုၣ်ကီၤလံၢ် ဖၢနုာ်လီၤပာ်စၢၤ တၢ်ဆိကမိၣ်လၢ စီၤၡံမိၣ်အဖိခွါ စီၤယူဒၤအံၣ်စကၤရံၤအိာ် အသးပူၤ+ ဒ်သိး အကဟ့ၣ်လီၤကွံာ် ယ့ၣ်ၡူးအဂီၢ်လီၤ.+ ဒီးဖဲအဝဲသ့ၣ် အီၣ်ဟါခီ တၢ်အီၣ်အခါ
၃ ယ့ၣ်ၡူး သ့ၣ်ညါပာ်စၢၤဝဲလၢ ပၢ်ဟ့ၣ်လီၤတၢ်ခဲလၢာ်လၢ အစုပူၤလံ ဒီးသ့ၣ်ညါစ့ၢ်ကီးဝဲလၢ အဟဲလၢ ကစၢ်ယွၤအအိၣ် ဒီးကက့ၤလၢ ကစၢ်ယွၤအအိၣ်လီၤ.+
၄ အဃိ အဝဲဆၢထၢၣ်လၢ ဟါခီတၢ်အီၣ်အလီၢ် ဒီးပာ်လီၤဝဲအဆ့ကၤ အဖီခိၣ်တဘ့ၣ်လၢ တၢ်ကပၤလီၤ. ဒီးအဝဲဟံးန့ၢ်ဝဲ ခိၣ်ဖၢၣ် ဒီးစၢဃာ်ဝဲလၢ အယီၢ်ဒ့လိၤလီၤ.+
၅ ဒီးအဝဲလူလီၤထံလၢ ခွးဖးဒိၣ် အပူၤ ဒီးသ့ဝဲ အပျဲၢ်အဘီၣ်တဖၣ်အခီၣ် ဒီးထွါသူကွံာ်ဝဲဒီး ခိၣ်ဖၢၣ်လၢ အစၢဃာ်ဝဲလၢ အယီၢ်ဒ့လိၤလီၤ.
၆ ဒီးဖဲအတုၤလၢ စီၤၡံမိၣ်ပ့းတရူး အအိၣ်အခါ စီၤပ့းတရူး တဲအီၤလၢ “ကစၢ်ဧၢ, နကသ့န့ၢ်ယခီၣ်ဧါ.”
၇ ယ့ၣ်ၡူး တဲဆၢအီၤလၢ “တၢ်လၢယမၤန့ၣ် ခဲအံၤနတနၢ်ပၢၢ်ဒံးဘၣ်. ဘၣ်ဆၣ် လၢခံ နကနၢ်ပၢၢ်ထီၣ်လီၤ.”
၈ စီၤပ့းတရူး တဲအီၤလၢ “လ့ၤတက့ၤ နတဘၣ်သ့ယခီၣ် နီတဘျီဘၣ်.” ယ့ၣ်ၡူး တဲဆၢက့ၤအီၤလၢ “ယမ့ၢ်တသ့ဘၣ်န့ၣ်+ နတဘၣ်ဃးဒီးယၤဘၣ်.”
၉ စီၤၡံမိၣ်ပ့းတရူး တဲအီၤလၢ “ကစၢ်ဧၢ, သ့ယခီၣ်တကးဒံးဘၣ် သ့ဃုာ်ဒီးယစု ဒီးယခိၣ်မီၤ.”
၁၀ ယ့ၣ်ၡူး တဲအီၤလၢ “ပှၤလၢ အလုၢ်ထံဝံၤလံန့ၣ် အကဆှီဒီဂၤညါလံအဃိ ကဘၣ်သ့က့ၤထဲ အခီၣ်လီၤ. ဒီးသုဝဲသ့ၣ်အံၤ သုကဆှီလံ ဘၣ်ဆၣ် သုတကဆှီ ကိးဂၤဒဲးဘၣ်.”
၁၁ မ့ၢ်လၢ ယ့ၣ်ၡူးသ့ၣ်ညါဝဲ ပှၤလၢ ကဟ့ၣ်လီၤကွံာ်အီၤတဂၤ+ အဃိ အဝဲတဲဝဲလၢ “သုတကဆှီ ကိးဂၤဒဲးဘၣ်.”
၁၂ ဖဲယ့ၣ်ၡူးသ့န့ၢ် အဝဲသ့ၣ် အခီၣ်ဝံၤအခါ အဝဲသိးထီၣ်က့ၤဝဲ အဆ့ကၤ အဖီခိၣ်တဘ့ၣ် ဒီးက့ၤဆ့ၣ်နီၤ သန့ၤအသးလၢ စီၢ်နီၤခိၣ် ဒီးတဲအဝဲသ့ၣ်လၢ “ဘၣ်မနုၤအဃိ ယမၤန့ၢ်သု ဒ်န့ၣ်လဲၣ်န့ၣ် သုနၢ်ပၢၢ်ဧါ.
၁၃ သုကိးယၤလၢ ‘သရၣ်’ ဒီး ‘ကစၢ်’ လီၤ. ဒီးမ့ၢ်လၢ ယမ့ၢ်သရၣ်ဒီးကစၢ်အဃိ သုတဲတၢ်န့ၣ် ဘၣ်ဝဲလီၤ.+
၁၄ အဃိ ယမ့မ့ၢ်သရၣ်ဒီးကစၢ် သနာ်က့ ယမ့ၢ်သ့န့ၢ်သုခီၣ်န့ၣ်+ သုဝဲစ့ၢ်ကီး သုကြၢး* သ့န့ၢ်လိာ်သးသုခီၣ် ကဒဲကဒဲလီၤ.+
၁၅ ယပာ်လီၤ တၢ်အဒိလၢသုဂီၢ်လီၤ. အဃိ ဒ်ယမၤသုအသိးန့ၣ် သုကြၢးမၤဒ်န့ၣ် စ့ၢ်ကီးလီၤ.+
၁၆ ယကတဲဘၣ်သု တီတီလၢ ကုၢ်န့ၣ်တဒိၣ်န့ၢ် အကစၢ်ဘၣ်. ဒီးပှၤလၢ အဘၣ်တၢ်ဆှၢလီၤအီၤတဂၤန့ၣ် တဒိၣ်န့ၢ် ပှၤလၢ အဆှၢလီၤအီၤ တဂၤဘၣ်.
၁၇ သုမ့ၢ်သ့ၣ်ညါ တၢ်ဂ့ၢ်တဖၣ်အံၤ ဒီးသုမ့ၢ် မၤထွဲအီၤန့ၣ် သုကသးခုလီၤ.+
၁၈ တမ့ၢ်ယတဲတၢ် ဘၣ်ဃးဒီး သုခဲလၢာ်ဘၣ်, ယသ့ၣ်ညါ ပှၤလၢ ယဃုထၢထီၣ်အီၤတဖၣ်လီၤ. ဘၣ်ဆၣ် တၢ်ကဲထီၣ်အသးဒ်အံၤန့ၣ် ဒ်သိး တၢ်ကွဲးအသး လၢအမ့ၢ် ‘ပှၤလၢအအီၣ် ယကိၣ်တဂၤန့ၣ် ထီဒါက့ၤယၤ’*+ န့ၣ် ကလၢထီၣ်ပှဲၤထီၣ်ဝဲ အဂီၢ်လီၤ.+
၁၉ စးထီၣ်ခဲအံၤ တချုးလၢ တၢ်မၤအသးဒံးဘၣ်န့ၣ် ယတဲဆိသု ဒ်သိး ဖဲတၢ်မ့ၢ်မၤအသးအခါ သုကနာ်လၢ တၢ်ကွဲးအသးတဆၢအံၤ တဲယဂ့ၢ်လီၤ.+
၂၀ ယကတဲဘၣ်သု တီတီလၢ ပှၤလၢအတူၢ်လိာ် ပှၤလၢ ယဆှၢလီၤအီၤတဂၤဂ့ၤ တဂၤဂ့ၤန့ၣ် မ့ၢ်အတူၢ်လိာ်ယၤ စ့ၢ်ကီးလီၤ.+ ဒီးပှၤလၢ အတူၢ်လိာ်ယၤန့ၣ် မ့ၢ်အတူၢ်လိာ်စ့ၢ်ကီး ပှၤလၢ အဆှၢလီၤယၤလီၤ.”+
၂၁ ဖဲယ့ၣ်ၡူးတဲဝဲ တၢ်ဂ့ၢ်တဖၣ်န့ၣ် ဝံၤအခါ အဝဲ သူၣ်ကိၢ်သးဂီၤတၢ်ဒိၣ်မး ဒီးအုၣ်အသးလၢ “ယကတဲဘၣ်သု တီတီလၢ ပှၤလၢ သုကျါတဂၤန့ၣ် ကဟ့ၣ်လီၤကွံာ်ယၤလီၤ.”+
၂၂ ယ့ၣ်ၡူး အဲၣ်ဒိးတဲဝဲ မတဂၤလဲၣ်န့ၣ် အပျဲၢ်အဘီၣ်တဖၣ် တသ့ၣ်ညါဘၣ်အဃိ အဝဲသ့ၣ် ကွၢ်လိာ်အသး တဂၤဒီးတဂၤလီၤ.+
၂၃ ယ့ၣ်ၡူးအပျဲၢ်အဘီၣ် လၢအအဲၣ်ဝဲတဂၤန့ၣ်+ ဆ့ၣ်နီၤသန့ၤအသး ဘူးဒီး* ယ့ၣ်ၡူးလီၤ.
၂၄ အဃိ စီၤၡံမိၣ်ပ့းတရူး ကျၢၢ်ကျာ် အခိၣ်ဆူအအိၣ် ဒီးတဲအီၤလၢ “ယ့ၣ်ၡူးအဲၣ်ဒိးတဲဝဲ မတဂၤလဲၣ်န့ၣ် တဲဘၣ်ပှၤသၢၤ.”
၂၅ ဒီးအပျဲၢ်အဘီၣ်တဂၤအံၤ သုးဘူးအသးဆူ ယ့ၣ်ၡူးအသးနါပှၢ် ဒီးတဲအီၤလၢ “ကစၢ်ဧၢ, အကဲ မတဂၤလဲၣ်.”+
၂၆ ယ့ၣ်ၡူး တဲဆၢအီၤလၢ “မ့ၢ်ပှၤလၢ ယကဟ့ၣ်လီၤအီၤ ကိၣ်တက့လၢ ယကဘျၢလီၤအီၤလၢ လီခီအပူၤလီၤ.”+ အဃိ အဝဲဘျၢလီၤကိၣ်ဝံၤဒီး ဟ့ၣ်လီၤဝဲ စီၤယူဒၤ လၢအမ့ၢ်စီၤၡံမိၣ် အံၣ်စကၤရံၤအိာ် အဖိခွါလီၤ.
၂၇ စီၤယူဒၤ ဟံးန့ၢ်ကိၣ်တက့ ဝံၤဒီး မုၣ်ကီၤလံၢ်* နုာ်လီၤလၢအပူၤလီၤ.+ အဃိ ယ့ၣ်ၡူး တဲဘၣ်အီၤလၢ “တၢ်လၢ နစးထီၣ်မၤလံန့ၣ် မၤဝံၤက့ၤအီၤ မ့ၢ်ချ့ဟီ.”
၂၈ ဘၣ်ဆၣ် ဘၣ်မနုၤအဃိ ယ့ၣ်ၡူး တဲအီၤဒ်န့ၣ်လဲၣ်န့ၣ် ပှၤလၢအဆ့ၣ်နီၤ သန့ၤအသးလၢ စီၢ်နီၤခိၣ်န့ၣ် တသ့ၣ်ညါဝဲ နီတဂၤဘၣ်.
၂၉ မ့ၢ်လၢ စီၤယူဒၤပၢၤဝဲ စ့အတလါအဃိ+ အဝဲသ့ၣ်တနီၤ ဆိကမိၣ်ဝဲလၢ ယ့ၣ်ၡူး မၢအလဲၤ ပှ့ၤတၢ်လၢ အဝဲသ့ၣ်လိၣ်ဘၣ်လၢ ဘူၣ်အဂီၢ် မ့တမ့ၢ် အဝဲကြၢးဟ့ၣ်လီၤ ပှၤဖှီၣ်ဖိယာ်ဖိ တၢ်တမံၤမံၤလီၤ.
၃၀ အဃိ အဝဲဟံးန့ၢ် ကိၣ်တက့ဝံၤဒီး အဟးထီၣ်ဝဲ တဘျီဃီလီၤ. ဒီးဘၣ်လၢ မုၢ်နၤခီလီၤ.+
၃၁ အဝဲဟးထီၣ် ဝံၤအလီၢ်ခံ ယ့ၣ်ၡူး တဲဝဲလၢ “ခဲအံၤ ပှၤကညီဖိခွါ ဘၣ်တၢ်မၤလၤကပီၤအီၤ+ ဒီးကစၢ်ယွၤ ဘၣ်တၢ်မၤလၤကပီၤအီၤ ခီဖျိလၢ ပှၤကညီဖိခွါအဃိလီၤ.
၃၂ ကစၢ်ယွၤ အနီၢ်ကစၢ်ဒၣ်ဝဲ ကမၤလၤကပီၤပှၤကညီဖိခွါ+ ဒီးကမၤလၤကပီၤအီၤ တဘျီဃီလီၤ.
၃၃ ဖိဆံးသ့ၣ်ဧၢ, ယကအိၣ်ဒံးဒီးသု တစိၢ်ဖိလီၤ. သုကဃုယၤ ဒီးဒ်ယတဲ ပှၤယူဒၤဖိတဖၣ်အသိး ‘တၢ်လီၢ်လၢ ယကလဲၤန့ၣ် သုဟဲတသ့ဘၣ်,’+ ခဲအံၤ ယတဲသု ဒ်န့ၣ်စ့ၢ်ကီးလီၤ.
၃၄ ယဟ့ၣ်သု တၢ်မၤလိာ် အသီတထံၣ်လၢ အဲၣ်လိာ်သုသး တဂၤဒီးတဂၤတက့ၢ်. ဒ်ယအဲၣ်သုအသိးန့ၣ်+ သုဝဲစ့ၢ်ကီး အဲၣ်လိာ်သုသး တဂၤဒီးတဂၤတက့ၢ်.+
၃၅ သုမ့ၢ် အဲၣ်လိာ်ကွံလိာ် သုသးကဒဲကဒဲန့ၣ် ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်လီၤ.”+
၃၆ စီၤၡံမိၣ်ပ့းတရူး တဲအီၤလၢ “ကစၢ်ဧၢ, နကလဲၤဖဲလဲၣ်.” ယ့ၣ်ၡူး တဲဆၢအီၤလၢ “တၢ်လီၢ်လၢ ယကလဲၤန့ၣ် နလဲၤပိာ်ယခံ ခဲအံၤတသ့ဘၣ်. ဘၣ်ဆၣ် နကလဲၤပိာ် လၢခံလီၤ.”+
၃၇ စီၤပ့းတရူး တဲအီၤလၢ “ကစၢ်ဧၢ, ဘၣ်မနုၤအဃိ ယလဲၤပိာ်နခံ ခဲအံၤ တသ့ဘၣ်လဲၣ်. ယကဟ့ၣ်လီၤ ယသးသမူလၢ နဂီၢ်လီၤ.”+
၃၈ ယ့ၣ်ၡူး တဲဆၢဝဲလၢ “နကဟ့ၣ်လီၤ နသးသမူ လၢယဂီၢ်ဧါ. ယကတဲဘၣ်နၤ တီတီလၢ တချုးလၢ ဆီဖါအိၣ်အိထီၣ် ဒံးဘၣ်န့ၣ် နကသမၢယၤ သၢဘျီလီၤ.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သုအိၣ်ဒီးမူဒါလၢ.”
^ မ့ၢ်စ့ၢ်ကီး “ထုးထီၣ်အခီၣ်နၢၣ်ခံ ဒ်သိးကထီဒါယၤ.”
^ အခီပညီလိၤလိၤ “လၢအသးနါပှၢ်.”
^ အခီပညီလိၤလိၤ “စၤတၣ်.” မံၤအံၤ အခီပညီမ့ၢ်ဝဲ “ပှၤလၢအထီဒါတၢ်.”
