ယိၤဟၣ် ၁၄:၁-၃၁
၁၄ “တဘၣ်သူၣ်ကိၢ်သးဂီၤတၢ်တဂ့ၤ.+ စူၢ်က့ၤနာ်က့ၤ ကစၢ်ယွၤ+ ဒီးစူၢ်က့ၤနာ်က့ၤ စ့ၢ်ကီးယၤတက့ၢ်.
၂ လၢယပၢ်အဟံၣ်ပူၤန့ၣ် တၢ်အိၣ်တၢ်ဆိးအလီၢ်အိၣ်ဝဲအါမးလီၤ. မ့ၢ်တအိၣ်ဘၣ်န့ၣ် ယကတဲ ပာ်စၢၤသုလီၤ. အဃိ ယကလဲၤ ကတဲာ်ကတီၤ တၢ်လီၢ်လၢသုဂီၢ်လီၤ.+
၃ တကးဒံးဘၣ် ယမ့ၢ်လဲၤတၢ်ဒီး ကတဲာ်ကတီၤ တၢ်လီၢ်လၢသုဂီၢ်န့ၣ် ယကဟဲ က့ၤကဒါက့ၤ ဒီးယကက့ၤကိးသု လၢယဟံၣ် ဒ်သိး သုဝဲစ့ၢ်ကီး သုကအိၣ်လၢ ယအိၣ်တၢ်အလီၢ်လီၤ.+
၄ ဒီးတၢ်လီၢ်လၢ ယကလဲၤန့ၣ် သုသ့ၣ်ညါကျဲလီၤ.”
၅ စီၤသိၤမါ+ တဲအီၤလၢ “ကစၢ်ဧၢ, နကလဲၤလၢ တၢ်လီၢ်ဖဲလဲၣ်န့ၣ် ပတသ့ၣ်ညါဒၢး, ပကသ့ၣ်ညါကျဲ ဒ်လဲၣ်.”
၆ ယ့ၣ်ၡူး တဲအီၤလၢ “ယမ့ၢ်ကျဲ+ ဒီးတၢ်မ့ၢ်တၢ်တီ+ ဒီးတၢ်မူလီၤ.+ မ့တမ့ၢ် ခီဖျိလၢ ယၤဘၣ်န့ၣ် ပှၤလဲၤလၢ ပၢ်အအိၣ် တသ့နီတဂၤဘၣ်.+
၇ သုမ့ၢ်သ့ၣ်ညါယၤန့ၣ် သုကသ့ၣ်ညါ ယပၢ်စ့ၢ်ကီးလီၤ. စးထီၣ်ခဲအံၤ သုသ့ၣ်ညါအီၤ ဒီးသုထံၣ်အီၤလံ.”+
၈ စီၤဖံလံးပူး တဲအီၤလၢ “ကစၢ်ဧၢ, ဒုးနဲၣ်ပှၤလၢပၢ် ဒီးပကသးမံလီၤ.”
၉ ယ့ၣ်ၡူး တဲအီၤလၢ “စီၤဖံလံးပူးဧၢ, ယအိၣ်ဒီးသု ယံာ်ထဲထဲအံၤလံဒၢး, နတသ့ၣ်ညါ ယၤဒံးဧီၤ. ပှၤလၢအထံၣ်ယၤန့ၣ် မ့ၢ်အထံၣ်စ့ၢ်ကီး ပၢ်လီၤ.+ ဘၣ်မနုၤအဃိ နတဲလၢ ‘ဒုးနဲၣ်ပှၤလၢ ပၢ်န့ၣ်လဲၣ်.’
၁၀ ယအိၣ်ဒီးပၢ် ဒီးပၢ်အိၣ်ဒီးယၤန့ၣ် မ့ၢ်နတနာ်ဘၣ်ဧါ.+ တၢ်လၢ ယတဲဘၣ်သုန့ၣ် ယတတဲဒ် ယနီၢ်ကစၢ် တၢ်ဆိကမိၣ်အသိးဘၣ်,+ မ့ၢ်ပၢ်လၢ အအိၣ်ဒီးယၤန့ၣ် မၤအတၢ်မၤတဖၣ် ဒၣ်ဝဲလီၤ.
၁၁ နာ်တၢ်လၢယတဲလၢ ယအိၣ်ဒီးပၢ် ဒီးပၢ်အိၣ်ဒီးယၤတက့ၢ်. ဘၣ်ဆၣ် သုမ့ၢ်တနာ်တၢ်လၢယတဲဘၣ်န့ၣ် နာ်တၢ်ခီဖျိ တၢ်လၢယမၤတဖၣ် အဃိတက့ၢ်.+
၁၂ ယကတဲဘၣ်သု တီတီလၢ ပှၤလၢ အစူၢ်က့ၤနာ်က့ၤယၤန့ၣ် ကမၤစ့ၢ်ကီး တၢ်မၤလၢ ယမၤတဖၣ်လီၤ. ဒီးမ့ၢ်လၢ ယကက့ၤလၢ ယပၢ်အအိၣ်အဃိ+ အဝဲသ့ၣ်ကမၤ တၢ်မၤဒိၣ်န့ၢ်ဒံး တၢ်လၢယမၤတဖၣ်အံၤလီၤ.+
၁၃ တကးဒံးဘၣ် သုမ့ၢ်ဃ့ တၢ်တမံၤဂ့ၤတမံၤဂ့ၤ လၢယမံၤန့ၣ် ယကမၤအီၤ ဒ်သိး ပၢ်ကဘၣ် တၢ်မၤလၤကပီၤအီၤ ခီဖျိဖိခွါလီၤ.+
၁၄ သုမ့ၢ်ဃ့ တၢ်တမံၤဂ့ၤတမံၤဂ့ၤလၢ ယမံၤန့ၣ် ယကမၤအီၤလီၤ.
၁၅ “သုမ့ၢ်အဲၣ်ယၤန့ၣ် သုကမၤထွဲ ယတၢ်မၤလိာ်တဖၣ်လီၤ.+
၁၆ ဒီးယကဃ့တၢ်လၢ ပၢ်အအိၣ် ဒီးအဝဲကဟ့ၣ်သု ပှၤမၤစၢၤတၢ်လၢ အဂၤတဂၤ* လၢအကအိၣ်ဒီးသု လီၤထူလီၤယိာ်လီၤ.+
၁၇ အဝဲန့ၣ် မ့ၢ်သးစီဆှံလၢ အပာ်ဖျါထီၣ် တၢ်မ့ၢ်တၢ်တီဒီး+ ဟီၣ်ခိၣ် တဒိးန့ၢ်ဘၣ်အီၤဘၣ်, မ့ၢ်လၢ ဟီၣ်ခိၣ်တထံၣ်အီၤဘၣ် ဒီးတသ့ၣ်ညါအီၤဘၣ် အဃိလီၤ.+ မ့မ့ၢ်သုန့ၣ် သုသ့ၣ်ညါအီၤ မ့ၢ်လၢ အအိၣ်ဒီးသု ဒီးအိၣ်လၢသုပူၤ အဃိလီၤ.
၁၈ ယတပာ်တ့ၢ်သု ဒ်ပှၤဖိၣ်ဃဲတဖၣ် အသိးဘၣ်. ယကဟဲက့ၤ လၢသုအိၣ်လီၤ.+
၁၉ တယံာ်လၢၤဘၣ်န့ၣ် ဟီၣ်ခိၣ် တထံၣ်ယၤလၢၤဘၣ်. ဘၣ်ဆၣ် သုကထံၣ်ယၤ+ မ့ၢ်လၢယမူ ဒီးလၢတၢ်န့ၣ်အဃိ သုကမူစ့ၢ်ကီးလီၤ.
၂၀ ဖဲတၢ်တနံၤန့ၣ် သုကသ့ၣ်ညါလၢ ယအိၣ်ဒီးပၢ် ဒီးသုအိၣ်ဒီးယၤ ဒီးယအိၣ်ဒီးသုလီၤ.+
၂၁ ပှၤလၢ အတူၢ်လိာ် ယတၢ်မၤလိာ် ဒီးမၤထွဲအီၤန့ၣ် မ့ၢ်ပှၤလၢ အအဲၣ်ယၤလီၤ. ဒီးပှၤလၢ အအဲၣ်ယၤန့ၣ် ပၢ်ကအဲၣ်အီၤလီၤ. ဒီးယကအဲၣ်အီၤ ဒီးယကလီၣ်ဖျါထီၣ် ယသးလၢအီၤ ပျီပျီလီၤ.”
၂၂ စီၤယူဒၤ+ (လၢအတမ့ၢ် စီၤအံၣ်စကၤရံၤအိာ်ဘၣ်န့ၣ်) တဲဘၣ်အီၤလၢ “ကစၢ်ဧၢ, ဘၣ်မနုၤအဃိ နကလီၣ်ဖျါထီၣ်နသး လၢပအိၣ်ပျီပျီ ဒီးနတလီၣ်ဖျါထီၣ်နသးလၢ ဟီၣ်ခိၣ်အအိၣ်ဘၣ်လဲၣ်.”
၂၃ ယ့ၣ်ၡူး တဲဆၢက့ၤအီၤလၢ “ပှၤမ့ၢ်အဲၣ်ယၤတဂၤဂၤန့ၣ် အဝဲကမၤထွဲ ယတၢ်ကတိၤ+ ဒီးယပၢ် ကအဲၣ်အီၤလီၤ. ဒီးယၤဒီးယပၢ် ကဟဲလၢအအိၣ် ဒီးပကအိၣ်ဒီးအီၤလီၤ.+
၂၄ ပှၤလၢ အတအဲၣ်ယၤဘၣ်န့ၣ် တမၤထွဲ ယတၢ်ကတိၤတဖၣ်ဘၣ်. တၢ်ကတိၤလၢ သုနၢ်ဟူဘၣ်န့ၣ် တမ့ၢ်ယတၢ်ကတိၤဘၣ်, မ့ၢ်ပၢ်လၢ အဆှၢလီၤယၤတဂၤ အတၢ်ကတိၤလီၤ.+
၂၅ “ဖဲယအိၣ်ဒံးဒီး သုအခါ ယတဲသုတၢ်ဂ့ၢ်တဖၣ်အံၤလီၤ.
၂၆ ဘၣ်ဆၣ် သးစီဆှံလၢအမ့ၢ် ပှၤမၤစၢၤတၢ်လၢ ယပၢ်ကဆှၢလီၤအီၤ လၢယမံၤန့ၣ် အကသိၣ်လိသု တၢ်ခဲလၢာ် ဒီးကဒုး သ့ၣ်နီၣ်ထီၣ်က့ၤသု တၢ်ခဲလၢာ်လၢ ယတဲတ့ၢ်သုလီၤ.+
၂၇ တၢ်သူၣ်မံသးမုာ်လၢ သုဒိးန့ၢ်ဘၣ်အီၤ ဖဲသုအိၣ်ဒီးယၤ ခဲအံၤန့ၣ် ယကဆဲးဟ့ၣ်လီၤသုလီၤ.+ ယတဟ့ၣ်လီၤသုတၢ်သူၣ်မံသးမုာ် ဒ်ဟီၣ်ခိၣ်ဟ့ၣ်ဝဲ အသိးဘၣ်. တဘၣ် သူၣ်ကိၢ်သးဂီၤတၢ်တဂ့ၤ ဒီးတဘၣ်ပျဲ သုသးကလီၤစၢ်လၢ တၢ်ပျံၤတၢ်ဖုး အဃိတဂ့ၤ.
၂၈ သုနၢ်ဟူလံလၢ ယတဲသုလၢ ‘ယကလဲၤတၢ်ဒီး ယကဟဲက့ၤလၢ သုအိၣ်လီၤ.’ သုမ့ၢ်အဲၣ်ယၤန့ၣ် သုကသးခုလၢ ယကလဲၤလၢ ပၢ်အအိၣ် မ့ၢ်လၢပၢ်န့ၣ် ဒိၣ်န့ၢ်ယၤအဃိလီၤ.+
၂၉ အဃိ တချုးလၢ တၢ်ကဲထီၣ်အသးဒံးဘၣ်န့ၣ် ခဲအံၤ ယတဲဆိသု ဒ်သိး ဖဲတၢ်မၤအသးအခါ သုကနာ်တၢ် အဂီၢ်လီၤ.+
၃၀ ယတတဲတၢ်ဒီးသု အါအါလၢၤဘၣ်, မ့ၢ်လၢ ဟီၣ်ခိၣ်အခိၣ်န့ၣ်+ ဟဲဝဲလံ ဒီးအဝဲဒိၣ်စိလၢ ယဖီခိၣ်တန့ၢ်ဘၣ်.+
၃၁ ဘၣ်ဆၣ် ဒ်သိးဟီၣ်ခိၣ် ကသ့ၣ်ညါလၢ ယအဲၣ်ပၢ်အဂီၢ် ယမၤဒ်ပၢ်မၤလိာ်ယၤ အသိးလီၤ.+ ဂဲၤဆၢထၢၣ်, ပကဟးထီၣ်ဖဲအံၤလီၤ.
တၢ်ဂ့ၢ်အဘျဲၣ်တဖၣ်
^ သးစီဆှံ ဘၣ်တၢ်ဒိလီၤအီၤဒ် အမ့ၢ်ပှၤတဂၤအသိး.
