ယိၤအ့လး ၃:၁-၂၁
၃ “ဖဲန့ၣ်အဆၢကတီၢ်ယကဒုးဟဲက့ၤ ယူဒၤ ဒီးယရူၤၡလ့ၣ် အပှၤဂီၢ်မုၢ် လၢအဘၣ်တၢ်က့ၤဖီၣ်အီၤတဖၣ်လီၤ.+
၂ ဒီးယကပာ်ဖှိၣ် ပှၤကလုာ်တဖၣ် ခဲလၢာ်ဒီးယကဒုးလဲၤလီၤ အဝဲသ့ၣ်လၢ ယဟိၤၡၤဖး* အတၢ်တြီၤပူၤလီၤ.
ဖဲန့ၣ်န့ၣ် ယကစံၣ်ညီၣ်အဝဲသ့ၣ်+လၢယပှၤဂီၢ်မုၢ် ဒီးယတၢ်န့ၢ်သါ လၢအမ့ၢ် ပှၤအံၣ်စရ့လးဖိအဂီၢ်လီၤ.
လၢပှၤတဖၣ်န့ၣ်အဃိ ယပှၤဂီၢ်မုၢ် ပှၤအံၣ်စရ့လးဖိ ဘၣ်လီၤပြံလီၤပြါလၢ ပှၤကလုာ်တဖၣ်အကျါဒီးပှၤတဖၣ်န့ၣ် နီၤဖးလီၤ ယထံယကီၢ်လၢ အဝဲသ့ၣ် အကျါဒၣ်ဝဲလီၤ.+
၃ ဒီးအဝဲသ့ၣ်ဖးတၢ် ဒ်သိး ကနီၤဖးလီၤ ယပှၤဂီၢ်မုၢ် လၢအဝဲသ့ၣ် အနီၢ်ကစၢ်အဂီၢ်လီၤ.+
အဝဲသ့ၣ် ဆါကွံာ် ဖိသၣ်ပိာ်ခွါ ဒ်သိးကဟ့ၣ်လီၤ ပိာ်မုၣ်ဆါလီၤအီၣ်သး အပှ့ၤအဂီၢ်ဒီးအဝဲသ့ၣ် ဆါကွံာ် ဖိသၣ်ပိာ်မုၣ် ဒ်သိး ကန့ၢ်ဘၣ် စပံးထံအဂီၢ်လီၤ.
၄ ဝ့ၢ်စိၢ်, ဝ့ၢ်စံဒိၣ် ဒီးကီၢ်ဖလ့ၡသး အဟီၣ်ကဝီၤ ခဲလၢာ်သ့ၣ်ဧၢ,သုသးတမုာ်ယၤဘၣ် ခီဖျိလၢ တၢ်ဂ့ၢ်မနုၤ အဃိလဲၣ်.
မ့ၢ်သုဟ့ၣ်ကၣ်ယၤလၢ တၢ်ဂ့ၢ်တမံၤမံၤ အဃိဧါ.
သုမ့ၢ်ဟ့ၣ်ကၣ်ယၤ ဒ်အံၤန့ၣ်ယကဟ့ၣ်ကၣ်က့ၤသု ချ့ချ့ ဒ်သုမၤတ့ၢ်အသိးလီၤ.+
၅ သုဟံးန့ၢ် ယထူဒီးယစ့+ဒီးယတၢ်လုၢ်ဒိၣ်ပှ့ၤဒိၣ်လၢ အဂ့ၤကတၢၢ်တဖၣ်န့ၣ် သုပာ်အီၤလၢ သုတၢ်လုၢ်ဟံၣ်တဖၣ် အပူၤလီၤ.
၆ ဒီးသုဆါကွံာ် ယူဒၤ ဒီးယရူၤၡလ့ၣ် အပှၤဂီၢ်မုၢ်လၢ ပှၤကြံးဖိတဖၣ်အအိၣ်+ဒ်သိး သုကဒုးအိၣ်ယံၤထီၣ် အဝဲသ့ၣ် လၢအတၢ်လီၢ်တၢ်ကျဲအဂီၢ်လီၤ.
၇ လၢတၢ်န့ၣ်အဃိ ယကဒုးဟးထီၣ်က့ၤ ယပှၤဂီၢ်မုၢ် လၢတၢ်လီၢ်လၢ သုဆါလီၤကွံာ် အဝဲသ့ၣ်+ဒီးယကဟ့ၣ်ကၣ်က့ၤသု လၢတၢ်လၢ သုမၤအီၤတဖၣ် အဃိလီၤ.
၈ ယကဆါလီၤကွံာ် သုဖိမုၣ်ဒီးသုဖိခွါတဖၣ် လၢယူဒၤအပှၤဂီၢ်မုၢ် အစုပူၤ+ဒီးယူဒၤအပှၤဂီၢ်မုၢ် ကဆါလီၤကွံာ် အဝဲသ့ၣ်လၢ ပှၤၡဘၤဖိ လၢအမ့ၢ်ပှၤကလုာ် လၢအအိၣ်လၢ တၢ်လီၢ်လၢအယံၤလီၤ.
ယၤ ယဟိဝၤယွၤ တဲဝဲဒ်န့ၣ်လီၤ.
၉ ဘိးဘၣ်သ့ၣ်ညါလီၤ ပှၤကလုာ် တဖၣ်လၢ+‘ကတဲာ်ကတီၤထီၣ်တၢ် လၢတၢ်ဒုးအဂီၢ် ဒီးမၢပှၤလၢ အဂံၢ်ဆူၣ်ဘါဆူၣ်တဖၣ် ဟူးထီၣ်ဂဲၤထီၣ်ဒီးမ်ပှၤသုးဖိတဖၣ် လဲၤထီၣ် ဒုးတၢ်တက့ၢ်.+
၁၀ ပိာ်က့ၤ သုထဲၣ်ကနၣ်လၢနး ဒီးသုထါဂဲာ်လၢ ဘီတက့ၢ်.
မ်ပှၤလၢ အဂံၢ်စၢ်ဘါစၢ်န့ၣ် တဲလၢ “ယဂံၢ်ဆူၣ်ဘါဆူၣ်” တက့ၢ်.
၁၁ ပှၤကလုာ်လၢ အအိၣ်လၢ တၢ်လီၢ်ကိးတီၤဒဲးသ့ၣ်ဧၢ, ပာ်ဖှိၣ်ထီၣ်သုသး ဒီးဟဲမၤစၢၤလိာ်သး တဂၤဒီးတဂၤသၢၤ.’”+
အိ ယဟိဝၤယွၤဧၢ, ပျၢ်လီၤ နသုးမုၢ်ဂီၢ်မုၢ် လၢအဂံၢ်ဆူၣ်ဘါဆူၣ်တဖၣ် ဖဲတၢ်လီၢ်အဝဲန့ၣ်တက့ၢ်.
၁၂ “မ်ပှၤကလုာ်တဖၣ် ဟူးထီၣ်ဂဲၤထီၣ် ဒီးလဲၤလၢ ယဟိၤၡၤဖး အတၢ်တြီၤပူၤတက့ၢ်.
ယကဆ့ၣ်နီၤဖဲန့ၣ် ဒ်သိးယကစံၣ်ညီၣ် ပှၤကလုာ်လၢအအိၣ်လၢ တၢ်လီၢ်ကိးတီၤဒဲးလီၤ.+
၁၃ ကူးတၢ် အဆၢကတီၢ် ဘၣ်လံအဃိ သူထါဂဲာ်ဒီး ကူးတၢ်တက့ၢ်.
မ့ၢ်လၢစပံးထံအကျိး ပှဲၤဝဲလံအဃိ ဟဲလီၤယီၢ်စပံးသၣ်တက့ၢ်.+
ဒီးတၢ်ဒၢတဖၣ် ပှဲၤလီၤလာ် မ့ၢ်လၢ ပှၤကလုာ်တဖၣ် အတၢ်အၢတၢ်သီ အိၣ်ဝဲဒီဒူၣ် အဃိလီၤ.
၁၄ ပှၤဂီၢ်မုၢ်တဖၣ်, ပှၤဂီၢ်မုၢ်တဖၣ်န့ၣ် အိၣ်ဝဲလၢ တၢ်စံၣ်ညီၣ် အတၢ်တြီၤပူၤ,မ့ၢ်လၢယဟိဝၤယွၤ အမုၢ်နံၤ လၢအကစံၣ်ညီၣ်တၢ်လၢ တၢ်စံၣ်ညီၣ် အတၢ်တြီၤပူၤန့ၣ် ဟဲဘူးထီၣ်လံ.+
၁၅ မုၢ်ဒီးလါ ကခံးလီၤဒီးဆၣ်တဖၣ် တကပီၤလၢၤဘၣ်.
၁၆ ယဟိဝၤယွၤ ကကညီၤထီၣ် လၢစံယိၣ်အဝဲ ကမၤဒိၣ်ထီၣ်အကလုၢ်လၢ ဝ့ၢ်ယရူၤၡလ့ၣ်လီၤ.
ဒီးမူခိၣ်ဒီး ဟီၣ်ခိၣ် ကဟူးဝးဝဲဘၣ်ဆၣ် ယဟိဝၤယွၤ ကကဲထီၣ်တၢ်အိၣ်သဒၢအလီၢ်လၢ အပှၤဂီၢ်မုၢ်အဂီၢ်+ဒီးကကဲထီၣ် တၢးလၢအကျၢၤ လၢအပှၤအံၣ်စရ့လးဖိ အဂီၢ်လီၤ.
၁၇ ဒီးသုကသ့ၣ်ညါဘၣ် လၢယမ့ၢ် သုကစၢ်ယဟိဝၤယွၤ လၢအအိၣ်လၢ ယကစၢၢ်စီဆှံ စံယိၣ်လီၤ.+
ယရူၤၡလ့ၣ် ကကဲထီၣ် တၢ်လီၢ်စီဆှံ+ဒီးပှၤထံဂၤကီၢ်ဂၤဖိတဖၣ် တယီၢ်လီၤဘၣ်လၢ တၢ်လီၢ် ဖဲန့ၣ်လၢၤဘၣ်.+
၁၈ ဖဲတၢ်တနံၤန့ၣ် စပံးထံအဆၢ ကလီၤစီၤဝဲလၢ ကစၢၢ်ကလိ တဖၣ်အလိၤ+ဒီးတၢ်နုၢ်ထံ ကယွၤလီၤလၢ တၢ်လူၢ်တဖၣ် အလိၤလီၤ.
ဒီးယူဒၤ အထံကျိဖိခဲလၢာ်န့ၣ် ထံကယွၤလီၤဝဲလီၤ.
ထံထီၣ်ပၢၢ်လၢ အအိၣ်လၢ ယဟိဝၤယွၤအဟံၣ်န့ၣ် ကယွၤလီၤဝဲလီၤ.+
ဒီးကမၤဘၣ်စီၣ်ဝဲ ၡံးတံၣ်* အတၢ်တြီၤလီၤ.
၁၉ ဘၣ်ဆၣ် ကီၢ်အဲၤကူပတူး ကဘၣ် အိၣ်သယုၢ်+ဒီးကီၢ်အဒိၣ် ကကဲထီၣ် ပှၢ်မုၢ်ကနၢ လၢအအိၣ်သယုၢ်,+မ့ၢ်လၢ အဝဲသ့ၣ် မၤဆူၣ်မၤစိးဝဲ ယူဒၤအပှၤဂီၢ်မုၢ်+ဒီးလူလီၤဝဲ ပှၤလၢအတၢ်ကမၣ် တအိၣ်ဘၣ်တဖၣ်အသွံၣ် လၢယူဒၤအပှၤဂီၢ်မုၢ် အကီၢ်ပူၤ အဃိလီၤ.+
၂၀ ပှၤကအိၣ်လၢ ယူဒၤအပူၤထီဘိဒီးပှၤကအိၣ်လၢ ယရူၤၡလ့ၣ်အပူၤ တစိၤဘၣ်တစိၤလီၤ.+
၂၁ လၢညါန့ၣ် တၢ်သွံၣ်လီၤတီလၢ အဝဲသ့ၣ်အခိၣ်လိၤ ဘၣ်ဆၣ် တဘျီအံၤ ယကပာ်အဝဲသ့ၣ် ဒ်ပှၤလၢအတၢ်ကမၣ်တအိၣ်ဘၣ် အသိးလီၤ.+
ဒီးယၤ ယဟိဝၤယွၤ ကအိၣ်လၢ စံယိၣ်အပူၤလီၤ.”+
တၢ်ဂ့ၢ်အဘျဲၣ်တဖၣ်
^ အခီပညီမ့ၢ်ဝဲ “ယဟိဝၤ မ့ၢ်စံၣ်ညီၣ်ကွီၢ်.”
^ အခီပညီမ့ၢ်ဝဲ “သ့ၣ်ဖှ့ၡံးတၤ.”
