ယိၤၡူ ၁၃:၁-၃၃
၁၃ စီၤယိၤၡူ အသးပှၢ်ထီၣ် ဒီးဘူးထီၣ်လၢ အကသံလံ+ အဃိ ယဟိဝၤယွၤ တဲအီၤလၢ “နသးပှၢ်ထီၣ်လံ, ဘၣ်ဆၣ် တၢ်လီၢ်လၢ တၢ်ကဘၣ်မၤန့ၢ်အီၤန့ၣ် အိၣ်တ့ၢ် ဒီဒူၣ်ဒံးလီၤ.
၂ တၢ်လီၢ်လၢ အအိၣ်တ့ၢ်ဒံးတဖၣ်န့ၣ်+ မ့ၢ်ဝဲ ပှၤဖလ့ၡသးဖိ ဒီးပှၤကၡူၢ်ဖိ+ အဟီၣ်ကဝီၤခဲလၢာ်
၃ (စးထီၣ်လၢ ထံကျိနံၤလါအဒ့ လၢအအိၣ်လၢ ကီၢ်အဲၤကူပတူး အမုၢ်ထီၣ်တခီ တုၤလီၤလၢ ဝ့ၢ်ဧ့ကြိၣ် အကပၤ လၢကလံၤစိးတခီ ဒီးလၢညါန့ၣ် တၢ်လီၢ်အံၤ ဘၣ်တၢ်ပာ်ပနီၣ်အီၤလၢ ပှၤကနၤဧၣ်ဖိ အဟီၣ်ကဝီၤ)+ ဃုာ်ဒီး ပှၤဖလ့ၡသးဖိ+ အခိၣ်အနၢ် ယဲၢ်ဂၤ အဟီၣ်ကဝီၤတဖၣ် လၢအမ့ၢ် ဂါစၤ, အၤစဒိာ်,+ အၤၡကလိၣ်,+ ကၤသး+ ဒီးဧ့ကြိၣ်+ လၢအမ့ၢ် တၢ်လီၢ်လၢ ပှၤဧ့ၤဝံဖိတဖၣ်+ အိၣ်ဝဲအလီၢ်လီၤ.
၄ ဒီးလၢ ကလံၤထံး တခီန့ၣ် မ့ၢ်ဝဲ ပှၤကနၤဧၣ်ဖိ အတၢ်လီၢ်ခဲလၢာ်, ဝ့ၢ်မၤရါ လၢပှၤစံဒိၣ်ဖိ+ ပၢဝဲ ဒီးတုၤလၢ ဝ့ၢ်အဖ့းလၢအအိၣ်လၢ ပှၤအမိၢ်ဖိ အကီၢ်ဆၢလီၤ.
၅ ဒီးပှၤကံးဘလးဖိ+ အတၢ်လီၢ် ဒီးလဘၤနိၣ် အတၢ်လီၢ် ခဲလၢာ် လၢမုၢ်ထီၣ်တခီ, စးထီၣ်လၢ ဘဧၤလးကး လၢကစၢၢ်ဃ့ရမိၣ် အခီၣ်ထံး တုၤလၢ လံၤဘိၤဃမါသး,*+
၆ တၢ်လီၢ်လၢ ကစၢၢ်ကလိကျါ ခဲလၢာ် စးထီၣ်လၢ လဘၤနိၣ်+ တုၤလၢ မံးစြဖိးမၤယံၣ်+ ဒီးပှၤစံဒိၣ်ဖိ အတၢ်လီၢ် ခဲလၢာ်လီၤ.+ ယကဟီထီၣ်ကွံာ် အဝဲသ့ၣ်လၢ ပှၤအံၣ်စရ့လးဖိ အမဲာ်ညါလီၤ.+ တၢ်လၢနဘၣ်မၤန့ၣ် အိၣ်ဒၣ်ထဲ နကဘၣ်နီၤလီၤ တၢ်လီၢ်အံၤလၢ ပှၤအံၣ်စရ့လးဖိအအိၣ် လၢတၢ်န့ၢ်သါ ဒ်ယမၤလိာ်ပာ်စၢၤ နၤအသိးလီၤ.+
၇ ဒီးနကဘၣ်နီၤဖးလီၤ တၢ်လီၢ်အံၤ ဒ်တၢ်န့ၢ်သါလၢ ပှၤခွံဒူၣ် ဒီးပှၤမနၤၡ့ၤဖိ အဒူၣ်တဝာ် အဂီၢ်လီၤ.”+
၈ မ့မ့ၢ် ပှၤမနၤၡ့ၤဖိအဒူၣ် လၢအဂၤတဝာ်, ပှၤရူၤဘ့ၣ်ဖိ ဒီးပှၤကးဖိန့ၣ် ဒိးန့ၢ်ဘၣ်ဝဲ တၢ်န့ၢ်သါလၢ ထံကျိယၢ်ဒ့ၣ် အမုၢ်ထီၣ်တခီလၢ ယဟိဝၤယွၤ အခ့အပှၤ စီၤမိၤၡ့ဟ့ၣ်လီၤ အဝဲသ့ၣ်န့ၣ်လီၤ.+
၉ အဝဲသ့ၣ် အတၢ်လီၢ်တဖၣ်န့ၣ် စးထီၣ်လၢ ဝ့ၢ်ဧရိၤဧ့ၢ်+ လၢအအိၣ်လၢ အၢ်နိၣ် အတၢ်တြီၤ အကပၤ,+ ဝ့ၢ်လၢ အအိၣ်လၢ တၢ်တြီၤအခၢၣ်သး ဒီးမ့ဒဘၤ အတၢ်ပၢၤခိၣ်ထီၣ်ထီ ခဲလၢာ် ပၢၢ်တုၤလၢ ဝ့ၢ်ဒံၤဘိၣ်
၁၀ ဒီးပှၤအမိၢ်ဖိ အစီၤပၤစံဃိၣ် အဝ့ၢ်ခဲလၢာ်လီၤ. ဒီးစီၤပၤအံၤ ပၢတၢ်စးထီၣ်လၢ ဝ့ၢ်ဃ့ၡဘိၣ် တုၤလၢ ပှၤဧၣ်မိၣ်ဖိ အကီၢ်ဆၢလီၤ.+
၁၁ ဒီးအဝဲသ့ၣ် အတၢ်လီၢ်တဖၣ်န့ၣ် ပၣ်ဃုာ်စ့ၢ်ကီးဒီး ကံးလဧး အဟီၣ်ကဝီၤ, ပှၤကၡူၢ်ဖိ ဒီးပှၤမၤကးဖိ+ အဟီၣ်ကဝီၤ ဒီးလၢ ကစၢၢ်ဃ့ရမိၣ် အတၢ်လီၢ်ခဲလၢာ်, ဘၤၡၣ်+ အတၢ်လီၢ်ခဲလၢာ် ပၢၢ်တုၤလၢ စၤလကး+
၁၂ ဒီးစီၤဧိာ်အဘီမုၢ်လၢ အအိၣ်လၢ ကီၢ်ဘၤၡၣ် အပူၤလီၤ. စီၤဧိာ်န့ၣ် ပၢတၢ်လၢ ဝ့ၢ်ဧၤၡတြိး ဒီးဝ့ၢ်အ့ဒြံၤအပူၤလီၤ. (အဝဲမ့ၢ် ပှၤရၤဖၤဖိ လၢအလီၢ်ခံကတၢၢ်တဖၣ် အကျါတဂၤလီၤ.)+ စီၤမိၤၡ့ မၤနၢၤ ပှၤတဖၣ်အံၤ ဒီးနီဟးထီၣ်ကွံာ် အဝဲသ့ၣ်လီၤ.+
၁၃ ဘၣ်ဆၣ် ပှၤကၡူၢ်ဖိ ဒီးပှၤမၤကးဖိန့ၣ် ပှၤအံၣ်စရ့လးဖိ တနီဟးထီၣ်ကွံာ် အဝဲသ့ၣ်ဘၣ်.+ အဃိ ပှၤကၡူၢ်ဖိ ဒီးပှၤမၤကးဖိ အိၣ်လၢ ပှၤအံၣ်စရ့လးဖိ အကျါ တုၤလၢ မုၢ်မဆါတနံၤအံၤလီၤ.
၁၄ မ့မ့ၢ် ပှၤလ့ၤဝံဖိအဒူၣ်န့ၣ် စီၤမိၤၡ့ တဟ့ၣ်လီၤအီၤ တၢ်န့ၢ်သါဘၣ်.+ ဒ်အံၣ်စရ့လး အကစၢ် ယဟိဝၤယွၤ အၢၣ်လီၤပာ်စၢၤဝဲအသိး+ အဝဲသ့ၣ်အတၢ်န့ၢ်သါ မ့ၢ်ဝဲ တၢ်လၢ ပှၤဟ့ၣ်လုၢ်ထီၣ်အီၤ လၢမ့ၣ်အူ လၢကစၢ်ယွၤ အအိၣ်န့ၣ်လီၤ.+
၁၅ ဒီးလၢခံ စီၤမိၤၡ့ဟ့ၣ်လီၤ တၢ်န့ၢ်သါ ဆူရူၤဘ့ၣ်အဒူၣ် ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ.
၁၆ ဒီးအဝဲသ့ၣ် အဟီၣ်ကဝီၤန့ၣ် စးထီၣ်လၢ ဝ့ၢ်ဧရိၤဧ့ၢ် လၢအအိၣ်လၢ အၢ်နိၣ်အတၢ်တြီၤ အကပၤ ဒီးပၣ်ဃုာ်ဒီး ဝ့ၢ်လၢအအိၣ်ဝဲလၢ တၢ်တြီၤအခၢၣ်သး, မ့ဒဘၤ အတၢ်ပၢၤခိၣ်ထီၣ်ထီ ခဲလၢာ်,
၁၇ ဝ့ၢ်ဃ့ၡဘိၣ် ဒီးအဝ့ၢ်ဖိခဲလၢာ်+ လၢအအိၣ်လၢ တၢ်ပၢၤခိၣ်ထီၣ်ထီ, ဝ့ၢ်ဒံၤဘိၣ်, ဝ့ၢ်ဘၤမိးဘဧၤလး, ဝ့ၢ်ဘ့ၤသဘဧၤလးမဧိၣ်,+
၁၈ ဝ့ၢ်ယါစၤ,+ ဝ့ၢ်ကဒ့မိး,+ ဝ့ၢ်မ့ဖၤ,+
၁၉ ဝ့ၢ်ကံးရယးသံၣ်, ဝ့ၢ်စံးဘမၤ+ ဒီးစ့ၤရ့းၡဃၢ် လၢအအိၣ်လၢ ကစၢၢ် အတၢ်တြီၤ,
၂၀ ဘ့ၤသပဧိၢ်, ပံးစကၤ အတၢ်လီၤဘံ+ အလီၢ်တဖၣ်, ဘ့းသၤယၡံမိး,+
၂၁ ဝ့ၢ်ခဲလၢာ်လၢ တၢ်ပၢၤခိၣ်ထီၣ်ထီ ဒီးပှၤအမိၢ်ဖိ အစီၤပၤစံဃိၣ် အဘီအမုၢ်ခဲလၢာ်လီၤ. စီၤပၤအံၤ ပၢတၢ်လၢ ဝ့ၢ်ဃ့ၡဘိၣ်လီၤ.+ စီၤမိၤၡ့ မၤနၢၤ စီၤပၤအံၤ+ ဃုာ်ဒီးပှၤမံးဒယၣ်ဖိ အပှၤခိၣ်ပှၤနၢ် လၢအမ့ၢ် စီၤအဝံၤ, စီၤရ့က့ၣ်, စီၤစူၢ်, စီၤဃူၢ် ဒီးစီၤရ့ဘၤန့ၣ်လီၤ.+ အဝဲသ့ၣ် မ့ၢ်ပှၤလၢ အဒိးပၢအသး* လၢစီၤပၤစံဃိၣ် အတၢ်ပၢဖီလာ်န့ၣ်လီၤ.
၂၂ ဒီးပှၤလၢ ပှၤအံၣ်စရ့လးဖိ မၤသံဝဲ လၢနးန့ၣ် ပၣ်ဃုာ်ဒီး စီၤဘဧိၢ်အဖိခွါ စီၤဘံးလၣ်+ လၢအမ့ၢ် ပှၤတဂၤလၢ အဖးတၢ်ကမၤအသး ခါဆူညါအဂ့ၢ်လီၤ.+
၂၃ ပှၤရူၤဘ့ၣ်ဖိ အကီၢ်ဆၢန့ၣ် မ့ၢ်ဝဲ ထံကျိယၢ်ဒ့ၣ်လီၤ. ဒီးဟီၣ်ကဝီၤအံၤ ဃုာ်ဒီးဝ့ၢ် ဒီးဒူသဝီတဖၣ်န့ၣ် မ့ၢ်ဝဲ တၢ်န့ၢ်သါလၢ ပှၤရူၤဘ့ၣ်ဖိ ဒိးန့ၢ်ဘၣ်ဝဲ ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ.
၂၄ တကးဒံးဘၣ် စီၤမိၤၡ့ ဟ့ၣ်လီၤဝဲ ကးအဒူၣ် အတၢ်န့ၢ်သါ ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ.
၂၅ ဒီးအဝဲသ့ၣ် အတၢ်လီၢ်တၢ်ကျဲန့ၣ် ပၣ်ဃုာ်ဒီး ဝ့ၢ်ယၤစ့ၢ်,+ ကံးလဧး အဟီၣ်ကဝီၤ အဝ့ၢ်ခဲလၢာ်, ပှၤဧၣ်မိၣ်ဖိ+ အတၢ်လီၢ်တဝာ် ပၢၢ်တုၤလၢ ဝ့ၢ်ဧရိၤဧ့ၢ် လၢဝ့ၢ်ရးဘး အဃၢၤ,+
၂၆ ဒီးစးထီၣ်လၢ ဝ့ၢ်ဃ့ၡဘိၣ်+ ပၢၢ်တုၤလၢ ဝ့ၢ်ရၤမါမံးစပၤ ဒီးဝ့ၢ်ဘတိနံၣ် ဒီးစးထီၣ်လၢ မၤဃန့ၤ+ တုၤလၢ ဝ့ၢ်ဒဘံၢ် အဃၢၤ
၂၇ ဒီးဝ့ၢ်တဖၣ်လၢ အအိၣ်လၢ တၢ်တြီၤပူၤ လၢအမ့ၢ် ဝ့ၢ်ဘ့ၤသဟၤရံၣ်, ဝ့ၢ်ဘ့ၤသနံးမရၤ,+ စူးကိၤသး,+ ဝ့ၢ်စၤဖိၣ် ဒီးဝ့ၢ်ဃ့ၡဘိၣ် အစီၤပၤစံဃိၣ် အဘီအမုၢ်+ လၢအအိၣ်တ့ၢ်ဒံး ခဲလၢာ်လီၤ. အဝဲသ့ၣ် အတၢ်လီၢ်တၢ်ကျဲန့ၣ် အိၣ်ဝဲလၢ ထံကျိယၢ်ဒ့ၣ်အကပၤလၢ မုၢ်ထီၣ်တခီ တုၤလီၤလၢ ပီၣ်လဲၣ် ကံးန့ၤရ့သး အလာ်ခီလီၤ.+
၂၈ ဟီၣ်ကဝီၤအံၤ ဃုာ်ဒီးဝ့ၢ် ဒီးဒူသဝီတဖၣ်န့ၣ် မ့ၢ်ဝဲ တၢ်န့ၢ်သါလၢ ပှၤကးဖိတဖၣ် ဒိးန့ၢ်ဘၣ်ဝဲ ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ.
၂၉ တကးဒံးဘၣ် စီၤမိၤၡ့ ဟ့ၣ်လီၤဝဲ တၢ်န့ၢ်သါလၢ ပှၤမနၤၡ့ၤဖိ အဒူၣ် တဝာ်အဂီၢ် ဒ်အဒူၣ်ဖိထၢဖိတဖၣ် အိၣ်ဝဲအသိးလီၤ.+
၃၀ ဒီးအဝဲသ့ၣ် အဟီၣ်ကဝီၤ စးထီၣ်အသးလၢ မၤဃန့ၤ+ ဒီးပၣ်ဃုာ်ဒီး ကီၢ်ဘၤၡၣ် အတၢ်လီၢ်ခဲလၢာ်, ကီၢ်ဘၤၡၣ် အစီၤပၤဧိာ် အဘီအမုၢ် ခဲလၢာ် ဒီးစီၤယၤအံၢ်+ အဒူသဝီခဲလၢာ် လၢအအိၣ်လၢ ကီၢ်ဘၤၡၣ် အပူၤလီၤ. အဃိ အဝဲသ့ၣ် အဟီၣ်ကဝီၤပူၤ ပၣ်ဃုာ်ဒီး သဝီအဖျၢၣ် ၆၀ န့ၣ်လီၤ.
၃၁ ဒီးကံးလဧး အဟီၣ်ကဝီၤ တဝာ် ဒီးဝ့ၢ်ဧၤၡတြိး ဒီးဝ့ၢ်အ့ဒြံၤ+ လၢအမ့ၢ် ဝ့ၢ်တဖၣ်လၢ စီၤဧိာ်အဘီအမုၢ်လၢ ကီၢ်ဘၤၡၣ် အပူၤန့ၣ် ဘၣ်တၢ်ဟ့ၣ်နီၤလီၤအီၤလၢ စီၤမနၤၡ့ၤ အဖိခွါ စီၤမၤကံၢ်+ အဖိအလံၤ တဝာ်အအိၣ် ဒ်အဝဲသ့ၣ် အဒူၣ်ဖိထၢဖိတဖၣ် အိၣ်ဝဲအသိးလီၤ.
၃၂ ဖဲအဝဲသ့ၣ်အိၣ်လၢ ကီၢ်မိၤအး အပှၢ်မုၢ်ကနၢအပူၤအခါ စီၤမိၤၡ့ ဟ့ၣ်နီၤလီၤအဝဲသ့ၣ် တၢ်န့ၢ်သါတဖၣ်အံၤ လၢအအိၣ်လၢ ထံကျိယၢ်ဒ့ၣ် အမုၢ်ထီၣ်တခီ ဒီးဝ့ၢ်ယရံၤဃိ အမုၢ်ထီၣ်တခီန့ၣ်လီၤ.+
၃၃ ဘၣ်ဆၣ် ပှၤလ့ၤဝံဖိအဒူၣ်န့ၣ် စီၤမိၤၡ့ တဟ့ၣ်အဝဲသ့ၣ် တၢ်န့ၢ်သါဘၣ်.+ အံၣ်စရ့လး အကစၢ် ယဟိဝၤယွၤန့ၣ် မ့ၢ်အဝဲသ့ၣ် အတၢ်န့ၢ်သါ ဒ်ကစၢ်ယွၤ အၢၣ်လီၤပာ်စၢၤ အဝဲသ့ၣ်အသိးလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဃမါသး အခိၣ်ထိး.”
^ မ့ၢ်ဝဲ စီၤပၤတဖၣ်လၢ အဒိးပၢအသးလၢ စံဃိၣ် အတၢ်ပၢဖီလာ်.
