ယံးရမံယၤ ၁၁:၁-၂၃
၁၁ ယဟိဝၤယွၤတဲ စီၤယံးရမံယၤလၢ
၂ “မ်ပှၤဂီၢ်မုၢ် ဒိကနၣ် တၢ်အၢၣ်လီၤအီလီၤအံၤ အတၢ်ကတိၤတဖၣ်တက့ၢ်.
“တဲဘၣ်* ယူဒၤအပှၤပိာ်ခွါ ဒီးပှၤလၢအအိၣ်လၢ ဝ့ၢ်ယရူၤၡလ့ၣ်လၢ တၢ်ကတိၤတဖၣ်အံၤ
၃ ဒီးတဲအဝဲသ့ၣ်လၢ ‘အံၣ်စရ့လး အကစၢ်ယဟိဝၤယွၤ တဲဝဲလၢ “ပှၤလၢအတဒိကနၣ် တၢ်အၢၣ်လီၤအီလီၤအံၤ အတၢ်ကတိၤတဖၣ်ဘၣ်န့ၣ် ဘၣ်ဆိၣ်အၢလီၤ.+
၄ ဖဲမုၢ်နံၤလၢ ယထုးထီၣ် သုမိၢ်ပၢ်ဖံဖု လၢပျၢၤတဖၣ်လၢ ဖၣ်ကပူၤထး+ လၢအမ့ၢ် ကီၢ်အဲၤကူပတူးအပူၤန့ၣ်+ ယမၤလိာ်အဝဲသ့ၣ်လၢ တၢ်ကတိၤတဖၣ်န့ၣ်လီၤ. ဒီးယတဲလၢ ‘ဒိကနၣ်ယကလုၢ် ဒီးမၤထွဲတၢ်လၢ ယမၤလိာ်သုကိးမံၤဒဲး ဒီးသုကကဲထီၣ် ယပှၤဂီၢ်မုၢ် ဒီးယကကဲထီၣ် သုကစၢ်ယွၤလီၤ.+
၅ အန့ၣ်မး ယကမၤလၢပှဲၤ တၢ်အၢၣ်လီၤလၢ ယအၢၣ်လီၤတ့ၢ် သုမိၢ်ပၢ်ဖံဖု လၢပျၢၤတဖၣ်လၢ ယကဟ့ၣ်လီၤအဝဲသ့ၣ် ကီၢ်တဘ့ၣ်လၢ တၢ်နုၢ်ထံ ဒီးကနဲစီ+ ယွၤလီၤလၢ အပူၤလီၤ. ဒီးတၢ်အၢၣ်လီၤတခါန့ၣ် အိၣ်ဝဲဒ်အလီၢ်လီၢ် တုၤလၢ မုၢ်မဆါတနံၤအံၤလီၤ.’”’”
ဒီးယတဲဆၢက့ၤလၢ “အိ ယဟိဝၤယွၤဧၢ, အၤမ့ၣ်.”*
၆ ဝံၤဒီး ယဟိဝၤယွၤ တဲယၤလၢ “တဲဖျါထီၣ် တၢ်ကတိၤတဖၣ်အံၤခဲလၢာ် လၢယူဒၤ အဝ့ၢ်တဖၣ်အပူၤ ဒီးလၢ ဝ့ၢ်ယရူၤၡလ့ၣ် အကျဲတဖၣ်အပူၤ ဒီးတဲလၢ ‘ဒိကနၣ် တၢ်အၢၣ်လီၤအီလီၤအံၤ အတၢ်ကတိၤတဖၣ် ဒီးမၤထွဲအီၤတက့ၢ်.
၇ စးထီၣ်လၢ ယဒုးဟးထီၣ် သုမိၢ်ပၢ်ဖံဖု လၢပျၢၤတဖၣ် လၢကီၢ်အဲၤကူပတူးအပူၤ ဒီးတုၤလၢ မုၢ်မဆါတနံၤအံၤန့ၣ် ယသိၣ်က့ၤသီက့ၤ အဝဲသ့ၣ် သပှၢ်ကတၢၢ် တဘျီဝံၤတဘျီ* ဒီးတဲလၢ “ဒိကနၣ် ယကလုၢ်တက့ၢ်.”+
၈ ဘၣ်ဆၣ် အဝဲသ့ၣ် တဒိကနၣ် ယကလုၢ်ဘၣ် ဒီးတကနၣ်ဃုာ်တၢ်* စ့ၢ်ကီးဘၣ်. အဝဲသ့ၣ်အခိၣ်ကိၤ ဒီးမၤထွဲဒ်အနီၢ်ကစၢ် အသးလၢအအၢအသီ ဟံးစုနဲၣ်ကျဲအီၤ အသိးလီၤ.+ အဃိ ယစံၣ်ညီၣ် အဝဲသ့ၣ်ဒ် တၢ်လၢအအိၣ်ကွဲးအသးလၢ တၢ်အၢၣ်လီၤအီလီၤအံၤ အပူၤလီၤ. ယမၤလိာ်အဝဲသ့ၣ်လၢ အဝဲသ့ၣ် ကမၤထွဲဝဲ ဘၣ်ဆၣ် အဝဲသ့ၣ် တမၤထွဲဝဲဘၣ်.’”
၉ ဝံၤဒီး ယဟိဝၤယွၤ တဲယၤလၢ “လၢယူဒၤ အပှၤပိာ်ခွါအကျါ ဒီးလၢပှၤလၢ အအိၣ်လၢ ဝ့ၢ်ယရူၤၡလ့ၣ် အကျါန့ၣ် ပှၤကူၣ်ထီၣ်တၢ်အၢလီၤ.
၁၀ တၢ်ကမၣ်လၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ်လၢ အတအဲၣ်ဒိး ဒိကနၣ် ယတၢ်ကတိၤဘၣ်တဖၣ်+ မၤတ့ၢ်ဝဲန့ၣ် အဝဲသ့ၣ် မၤကဒါက့ၤဝဲလံ. အဝဲသ့ၣ်စ့ၢ်ကီး ဘူၣ်ထီၣ်ဘါထီၣ် ယွၤအဂၤတဖၣ် ဒီးမၤယွၤတဖၣ်န့ၣ် အတၢ်လီၤ.+ အံၣ်စရ့လး အပှၤဂီၢ်မုၢ် ဒီးယူဒၤ အပှၤဂီၢ်မုၢ် မၤဟးဂီၤကွံာ် တၢ်အၢၣ်လီၤအီလီၤ လၢယမၤတ့ၢ်ဒီး အဝဲသ့ၣ် အမိၢ်ပၢ်ဖံဖု လၢပျၢၤတဖၣ်လံ.+
၁၁ အဃိ ယၤ, ယဟိဝၤယွၤ တဲဝဲလၢ ‘ယကဒုးလီၤဘၣ် တၢ်ကီတၢ်ခဲလၢ+ အဝဲသ့ၣ်အလိၤ ဒီးအဝဲသ့ၣ် ဃ့ၢ်ပူၤဖျဲးအသး တသ့ဘၣ်. ဖဲအဝဲသ့ၣ် ကိးထီၣ်ယၤလၢ တၢ်မၤစၢၤအဂီၢ်အခါ ယတဒိကနၣ် အဝဲသ့ၣ်ဘၣ်.+
၁၂ ဖဲန့ၣ်အခါ ပှၤအိၣ်လၢ ယူဒၤအဝ့ၢ်တဖၣ်အပူၤ ဒီးပှၤအိၣ်လၢ ဝ့ၢ်ယရူၤၡလ့ၣ်အပူၤန့ၣ် ကလဲၤလၢ အဝဲသ့ၣ် အယွၤတဖၣ်အအိၣ်လီၤ. အဝဲသ့ၣ် လုၢ်ထီၣ်တၢ်လၢ ယွၤတဖၣ်အံၤအအိၣ် ဒီးဃ့တၢ်မၤစၢၤလၢ ယွၤတဖၣ်အံၤအအိၣ်လီၤ.+ ဘၣ်ဆၣ် ဖဲအဝဲသ့ၣ် ဘၣ်ကီဘၣ်ခဲအခါ လ့ၤတက့ၤ ယွၤတဖၣ်အံၤ မၤပူၤဖျဲးအဝဲသ့ၣ် တသ့ဘၣ်.
၁၃ ယူဒၤအပှၤဂီၢ်မုၢ်သ့ၣ်ဧၢ, သုယွၤတဖၣ် အိၣ်ဝဲအါထဲသိးဒီး သုဝ့ၢ်တဖၣ်လီၤ. ဒီးတၢ်လုၢ်လီၢ်လၢ သုဆီလီၤလၢ တၢ်လၢအလီၤမဲာ်ဆှးတခါ* အဂီၢ်န့ၣ် အိၣ်ဝဲအဖျၢၣ်အါထဲသိးဒီး ကျဲတဖၣ်လၢ အအိၣ်လၢ ဝ့ၢ်ယရူၤၡလ့ၣ်အပူၤလီၤ. တၢ်လုၢ်လီၢ်တဖၣ်န့ၣ် မ့ၢ်ဝဲလၢ သုကလုၢ်ထီၣ်တၢ်လၢ ဘဧၤလး အဂီၢ်လီၤ.’+
၁၄ “စီၤယံးရမံယၤဧၢ, မ့မ့ၢ်နၤန့ၣ် တဘၣ်ဃ့ထုကဖၣ်န့ၢ်တၢ်လၢ အဝဲသ့ၣ် အဂီၢ်တဂ့ၤ. တဘၣ်ကိးပသူထီၣ် လၢအဝဲသ့ၣ်အဂီၢ် ဒီးဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်တဂ့ၤ.+ ဖဲအဝဲသ့ၣ် ကိးထီၣ်ယၤလၢ အဘၣ်ကီဘၣ်ခဲ အဃိဒၣ်လဲာ် ယတဒိကနၣ် အဝဲသ့ၣ်ဘၣ်.
၁၅ ယပှၤဂီၢ်မုၢ်လၢ ယအဲၣ်အီၤန့ၣ် အဝဲသ့ၣ်အါဂၤ မၤတၢ်အၢတၢ်သီအဃိမ့ၢ်ယပှၤဂီၢ်မုၢ်အံၤ ကြၢးအိၣ်လၢ ယဟံၣ်ပူၤဧါ.
ဖဲတၢ်ကီတၢ်ခဲဖးဒိၣ် ဟဲဘၣ်နၤ* အခါ မ့ၢ်နကပူၤဖျဲး ခီဖျိ အဝဲသ့ၣ် လုၢ်ထီၣ်ဆၣ်ဖိကီၢ်ဖိတဖၣ် အဃိန့ၣ် ကန့ၢ်ဧါ.
ဖဲန့ၣ်အခါ မ့ၢ်နကသူၣ်ဖှံသးညီဧါ.
၁၆ တဘျီခါ ယၤ, ယဟိဝၤယွၤအံၤ ယကိးနၤလၢ သ့ၣ်စၤယံး အဃံအလၤတထူၣ်လၢအပှဲၤဒီးအလၣ် ဒီးအသၣ်ဂ့ၤလီၤ.
ဘၣ်ဆၣ် တၢ်ကသီၣ်ထီၣ်ဖးဒိၣ်တမံၤ ဒီးယဒုးကဲၤထီၣ်နၤလၢ မ့ၣ်အူလီၤ.
ဒီးဒုၣ်ဒါတဖၣ် ကမၤကၢ်ကွံာ် နဒ့တဖၣ်လီၤ.
၁၇ “ယူဒၤအပှၤဂီၢ်မုၢ်ဧၢ, ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် ပှၤလၢ အသူၣ်လီၤတ့ၢ်သုန့ၣ်+ တဲဝဲလၢ တၢ်ကီတၢ်ခဲဖးဒိၣ် ကလီၤဘၣ်သု ခီဖျိလၢ သုမၤတၢ်အၢတၢ်သီ ဃုာ်ဒီးအံၣ်စရ့လး အပှၤဂီၢ်မုၢ် ဒီးမၤဆါယသး ခီဖျိလၢ သုလုၢ်ထီၣ်တၢ်လၢ ဘဧၤလးအအိၣ် အဃိလီၤ.”+
၁၈ ယဟိဝၤယွၤဧၢ, နဒုးသ့ၣ်ညါဆိယၤ ဒ်သိးယကသ့ၣ်ညါအဂီၢ်လီၤ.
ဒီးဖဲန့ၣ်အခါ နဒုးထံၣ်ယၤတၢ်လၢ အဝဲသ့ၣ် မၤဝဲတဖၣ်လီၤ.
၁၉ လၢညါန့ၣ် ယလီၤဂာ် ဒ်သိးဒီး သိလၢအဘှါတဒု လၢဘၣ်တၢ်ဆှၢထီၣ်အီၤ လၢတၢ်ကမၤသံအီၤ အဂီၢ်လီၤ.
အဝဲသ့ၣ် ကူၣ်အၢယၤန့ၣ် ယတသ့ၣ်ညါဘၣ်.+
အဝဲသ့ၣ် တဲဝဲလၢ “ပကမၤဟးဂီၤကွံာ် သ့ၣ်ထူၣ် ဃုာ်ဒီးအသၣ်လီၤ.
ဒီးပကမၤသံအီၤဒ်သိး ပှၤသုတသ့ၣ်နီၣ်ထီၣ် အမံၤလၢၤတဂ့ၤအဂီၢ်လီၤ.”
၂၀ ဘၣ်ဆၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ စံၣ်ညီၣ် တၢ်တီတီလိၤလိၤဒီးအဝဲ သမံသမိးဝဲ ပှၤတၢ်ဆိကမိၣ်လၢအယိာ်* ဒီးပှၤသူၣ်ပှၤသးလီၤ.+
ကစၢ်ယွၤဧၢ, မ့ၢ်လၢ ယအးလီၤ ယတၢ်မူးတၢ်ရၢ်လၢ နအိၣ်အဃိပျဲယထံၣ်ဘၣ် နဟ့ၣ်ကၣ် အဝဲသ့ၣ်တက့ၢ်.
၂၁ ပှၤဧၤနသိးဖိ+ အပှၤပိာ်ခွါတဖၣ်လၢ အဃုမၤသံယၤ ဒီးတဲလၢ “နတဘၣ် တဲတၢ်ဒ်ဝံအသိးလၢ ယဟိဝၤယွၤ အမံၤလၢၤဘၣ်.+ နမ့ၢ်ဆဲးမၤဒ်န့ၣ်န့ၣ် ပကမၤသံနၤ” န့ၣ်ယဟိဝၤယွၤတဲ အဝဲသ့ၣ် ဒ်အံၤလီၤ.
၂၂ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ယကဟံးန့ၢ် အဝဲသ့ၣ် အရ့လီၤ. ပှၤပိာ်ခွါသးစၢ်တဖၣ် ကသံလၢနးအဃိ+ ဒီးအဝဲသ့ၣ် အဖိမုၣ် ဒီးအဖိခွါတဖၣ် ကသံလၢ တၢ်သၣ်ဝံၤလီၤဒိ အဃိလီၤ.+
၂၃ ဖဲနံၣ်လၢ ယဟံးန့ၢ် ပှၤဧၤနသိးဖိ+ အပှၤပိာ်ခွါတဖၣ်န့ၣ် အရ့အခါ ယကဒုးလီၤဘၣ် တၢ်ကီတၢ်ခဲလၢ အဝဲသ့ၣ်အလိၤ အဃိ လၢအဝဲသ့ၣ်အကျါန့ၣ် ပှၤတဂၤမး တအိၣ်တ့ၢ်လၢၤဘၣ်.”
တၢ်ဂ့ၢ်အဘျဲၣ်တဖၣ်
^ ဖျါလၢ ကစၢ်ယွၤ တဲတၢ်ဒီး စီၤယံးရမံယၤ.
^ မ့ၢ်စ့ၢ်ကီး “မ်တၢ်မၤအသး ဒ်န့ၣ်တက့ၢ်.”
^ အခီပညီလိၤလိၤ “ဂဲၤဆၢထၢၣ်ဂီၤဂီၤ ဒီးသိၣ်က့ၤသီက့ၤတၢ်.”
^ အခီပညီလိၤလိၤ “ဒိးအနၢ်.”
^ မ့ၢ်စ့ၢ်ကီး “ယွၤလၢ အလီၤမဲာ်ဆှးတဂၤ.”
^ မ့ၢ်ဝဲ ယူဒၤအဘီမုၢ်.
^ မ့ၢ်စ့ၢ်ကီး “တၢ်တူၢ်ဘၣ်လၢအယိာ်.” အခီပညီလိၤလိၤ “ကလ့ၢ်တဖၣ်.”
