ယံးရမံယၤ ၁၃:၁-၂၇
၁၃ ယဟိဝၤယွၤ တဲယၤလၢ “လဲၤပှ့ၤန့ၢ် ယီၢ်တကိး* လၢအညၣ်ဂ့ၤတဘ့ၣ် လၢနဂီၢ် ဒီးစၢထီၣ်အီၤလၢ နယီၢ်ဒ့လိၤတက့ၢ်. တဘၣ်မၤဘၣ်စီၣ်အီၤ လၢထံတဂ့ၤ.”
၂ အဃိ ယပှ့ၤန့ၢ် ယီၢ်တကိးတဘ့ၣ် ဒ်ယဟိဝၤယွၤ တဲဝဲအသိး ဒီးယစၢထီၣ်အီၤလၢ ယယီၢ်ဒ့လိၤလီၤ.
၃ ယဟိဝၤယွၤ တဲကဒီးယၤလၢ
၄ “ယီၢ်တကိးလၢ နပှ့ၤအီၤ ဒီးစၢထီၣ်အီၤလၢ နယီၢ်ဒ့လိၤန့ၣ် လဲၤစိာ်အီၤလၢ ထံကျိဖရၤသး ဒီးပာ်ခူသူၣ်အီၤ ဖဲန့ၣ်လၢ လ့ကိပူၤတက့ၢ်.”
၅ အဃိ ယလဲၤပာ်ခူသူၣ် ယီၢ်တကိးလၢ ထံကျိဖရၤသး အကပၤ ဒ်ယဟိဝၤယွၤ မၤလိာ်ယၤအသိးလီၤ.
၆ ဘၣ်ဆၣ် အါနံၤအါသီ ဝံၤအလီၢ်ခံ ယဟိဝၤယွၤ တဲဘၣ်ယၤလၢ “လဲၤလၢ ထံကျိဖရၤသး ဒီးဟံးန့ၢ် ယီၢ်တကိးလၢ ယမၢနလဲၤပာ်ခူသူၣ်အီၤ တဘ့ၣ်န့ၣ်တက့ၢ်.”
၇ အဃိ ယလဲၤလၢ ထံကျိဖရၤသး, ခူၣ်ထီၣ်ကွံာ် ယီၢ်တကိး ဒီးဟံးန့ၢ်အီၤဖဲ တၢ်လီၢ်လၢ ယပာ်ခူသူၣ်တ့ၢ်အီၤန့ၣ်လီၤ. ဒီးယထံၣ်လၢ ယီၢ်တကိးန့ၣ် ဟးဂီၤလံ ဒီးပှၤသူအီၤတသ့ နီတစဲးလၢၤဘၣ်.
၈ ဒီးယဟိဝၤယွၤ တဲဘၣ်ယၤဒ်အံၤလီၤ.
၉ “ယဟိဝၤယွၤ တဲဝဲလၢ ‘ယူဒၤ အတၢ်ပာ်ထီၣ်ထီအသး ဒီးဝ့ၢ်ယရူၤၡလ့ၣ် အတၢ်ပာ်ထီၣ်ထီသး ဒိၣ်ဒိၣ်မုၢ်မုၢ်န့ၣ် ယကမၤဟးဂီၤအီၤ ဒ်ယီၢ်တကိးအံၤ အသိးလီၤ.+
၁၀ ပှၤဂီၢ်မုၢ်လၢ အအၢအသီ တဖၣ်အံၤ တအဲၣ်ဒိး ဒိကနၣ် ယတၢ်ကတိၤဘၣ်.+ အဝဲသ့ၣ် အခိၣ်ကိၤ ဒီးမၤထွဲဒ်အသး ဟံးစုနဲၣ်ကျဲအီၤအသိး,+ ဘူၣ်ထီၣ်ဘါထီၣ် ယွၤအဂၤတဖၣ်, မၤယွၤအဂၤတဖၣ်အတၢ် ဒီးထိၣ်လီၤပှီၤအသးလၢ အဝဲသ့ၣ်အမဲာ်ညါလီၤ. ပှၤဂီၢ်မုၢ်တဖၣ်အံၤ အကကဲထီၣ်ဒ်သိးဒီး ယီၢ်တကိးလၢ ပှၤသူအီၤတသ့ နီတစဲးလၢၤဘၣ် တဘ့ၣ်အံၤလီၤ.’
၁၁ ယဟိဝၤယွၤ တဲဝဲလၢ ‘ဒ်ယီၢ်တကိးလၢ ပှၤစၢဃာ်အီၤလၢ ပှၤယီၢ်ဒ့လိၤ ဃံးဃံးအသိး အံၣ်စရ့လး အပှၤဂီၢ်မုၢ် ဒီးယူဒၤ အပှၤဂီၢ်မုၢ်ခဲလၢာ်န့ၣ် ယစၢဃာ်အီၤ လၢယလိၤဃံးဃံး ဒ်န့ၣ်အသိးလီၤ. ယမၤအီၤဒ်န့ၣ် ဒ်သိးအဝဲသ့ၣ် ကကဲထီၣ် ယပှၤဂီၢ်မုၢ်+ ဒီးတၢ်မံၤဟူသၣ်ဖျါ,+ တၢ်စံးထီၣ်ပတြၢၤ ဒီးတၢ်ဃံတၢ်လၤ လၢယဂီၢ်လီၤ. ဘၣ်ဆၣ် အဝဲသ့ၣ် တဒိကနၣ် ယကလုၢ်ဘၣ်.’+
၁၂ “နကဘၣ်တဲဘၣ်စ့ၢ်ကီး အဝဲသ့ၣ်လၢ တၢ်ကစီၣ်အံၤလီၤ. ‘အံၣ်စရ့လး အကစၢ် ယဟိဝၤယွၤ တဲဝဲလၢ “ပှၤကဘၣ်မၤပှဲၤ ကိဖးဒိၣ် ကိးဖျၢၣ်ဒဲးဒီး စပံးထံလီၤ.”’ ဒီးအဝဲသ့ၣ် ကတဲဆၢနၤလၢ ‘ပှၤကဘၣ်မၤပှဲၤ ကိဖးဒိၣ် ကိးဖျၢၣ်ဒဲးဒီး စပံးထံန့ၣ် ပသ့ၣ်ညါလံဧဲၤ.’
၁၃ ဒီးတဲဘၣ်အဝဲသ့ၣ်လၢ ‘ယဟိဝၤယွၤ တဲဝဲလၢ “ပှၤအိၣ်လၢ ကီၢ်အံၤအပူၤခဲလၢာ် ပၣ်ဃုာ်ဒီး စီၤပၤတဖၣ်လၢ အဆ့ၣ်နီၤလၢ စီၤဒၤဝံးအလီၢ်ပစိာ်အလိၤ, ပှၤလုၢ်တၢ်ဒိၣ်တဖၣ်, ဝံတဖၣ် ဒီးပှၤအိၣ်လၢ ဝ့ၢ်ယရူၤၡလ့ၣ်ပူၤခဲလၢာ်န့ၣ် ယကမၤပှဲၤ အဝဲသ့ၣ်လၢ စပံးထံတုၤလၢ အဝဲသ့ၣ်မူၤဝဲလီၤ.”+
၁၄ ဒီးယဟိဝၤယွၤ တဲဝဲလၢ “ဝံၤဒီး ပၢ်မ့ၢ်ဂ့ၤ, ဖိခွါမ့ၢ်ဂ့ၤ ယကဒုးဘၣ်ထံး အဝဲသ့ၣ် တဂၤဒီးတဂၤလီၤ.+ ယတဒိသူၣ်ဒိသးလၢ အဝဲသ့ၣ်အဖီခိၣ်ဘၣ်, ယသးတဘၣ်ဒိဘၣ် ဒီးယတသးကညီၤ အဝဲသ့ၣ်လၢၤဘၣ်. ဒီးတၢ်လၢ အကတြီယၤ ဒ်သိးယသုတမၤဟးဂီၤ အဝဲသ့ၣ် တဂ့ၤအဂီၢ်န့ၣ် တအိၣ်နီတမံၤဘၣ်.”’+
၁၅ ယဟိဝၤယွၤ တဲတၢ်လံအဃိ ဒိကနၣ် ဒီးသးစၢၢ်ဆၢတက့ၢ်.
တဘၣ်ပာ်ထီၣ်ထီ သုသးတဂ့ၤ.
၁၆ တချုးလၢ သုကစၢ် ယဟိဝၤယွၤမၤခံးလီၤ မုၢ်နံၤဒီးတချုးဖဲတၢ်ခံးလီၤ ဒီးသုခီၣ် ဘၣ်တိၢ်လၢ ကစၢၢ်ကျါဒံးဘၣ်န့ၣ် မၤလၤကပီၤအီၤတက့ၢ်.
သုကခိးကွၢ်လၢ် တၢ်ကပီၤဘၣ်ဆၣ် အဝဲကဒုးလီၤ တၢ်ခံးယိာ်ဒီးတၢ်ကပီၤန့ၣ် အဝဲကမၤကဲထီၣ်က့ၤလၢ တၢ်ခံးသူလီၤ.+
၁၇ ဒီးသုမ့ၢ်တသးအိၣ် ဒိကနၣ် အကလုၢ်ဘၣ်န့ၣ်ယကဟီၣ်ခူသူၣ် ခီဖျိလၢ သုတၢ်ပာ်ထီၣ်ထီသး အဃိလီၤ.
မ့ၢ်လၢ ယဟိဝၤယွၤ အသိန့ၣ်+ ဘၣ်တၢ်က့ၤဖီၣ်အီၤလံအဃိယမဲာ်ထံကလီၤ ဒီးကယွၤလီၤ ဒီဒူၣ်လီၤ.+
၁၈ ကစၢ်ယွၤ တဲယၤလၢ “တဲဘၣ်စီၤပၤ ဒီးစီၤပၤအမိလၢ+ ‘သုခိၣ်သလုး လၢအဃံလၤန့ၣ် ကဘၣ်တၢ်ဟံးန့ၢ်ကွံာ်အီၤလၢ သုခိၣ်လိၤအဃိ
ဆ့ၣ်နီၤလၢ တၢ်လီၢ်လၢ အပတီၢ်ဖုၣ်တက့ၢ်.’
၁၉ ဝ့ၢ်တဖၣ်လၢ ကလံၤထံး တခီန့ၣ် အတြဲၤကးပံးဃာ် အသးလံ.* ပှၤလၢ အကအိးထီၣ်အီၤန့ၣ် တအိၣ်နီတဂၤဘၣ်.
ပှၤက့ၤဖီၣ် ယူဒၤအပှၤဂီၢ်မုၢ် ခဲလၢာ်ခဲဆ့လံ.+
၂၀ ကွၢ်ထီၣ်တၢ်သၢၤ. ပှၤလၢ အအိၣ်လၢ ကလံၤစိးတခီန့ၣ် ဟဲလံ.+
န* သိလၢ အလီၤအဲၣ်လီၤကွံလၢ အဘၣ်တၢ်ဟ့ၣ်လီၤနၤန့ၣ် အိၣ်ဖဲလဲၣ်.+
၂၁ တၢ်စံၣ်ညီၣ် ကဟဲဘၣ်နၤ ခီဖျိ နသကိးဘူးဘူးလၢနဒီသကိးဒီး အဝဲသ့ၣ်လၢ အခီၣ်ထံးလံၤလံၤလီၤ. ဖဲန့ၣ်အခါ နကတဲဒ်လဲၣ်.+
နဟုးကဆါထီၣ် ဒ်ပိာ်မုာ်တဂၤလၢ အကအိၣ်ဖျဲၣ်ထီၣ် အဖိ အသိး တမ့ၢ်ဧီၤ.+
၂၂ ဒီးနကသံကွၢ်လီၤနသးလၢ ‘ဘၣ်မနုၤအဃိ တၢ်ကဲထီၣ်အသးဒီးယၤ ဒ်အံၤလဲၣ်.’+
ဖဲန့ၣ်အခါ နကဘၣ်သ့ၣ်ညါလၢ နစကၢး ဘၣ်တၢ်ဘ့ၣ်လီၤကွံာ်အီၤ+ဒီးနခီၣ်နၢၣ်ခံ ဆါဒိၣ်မး ခီဖျိလၢ နတၢ်ကမၣ်ဒိၣ်ဝဲ အဃိလီၤ.
၂၃ မ့ၢ်ပှၤကူၤၡးဖိ* တဂၤ ဆီတလဲ အဘ့ၣ်အလွဲၢ် ကသ့ဧါ. မ့ၢ်ခ့စံၣ်ပိၣ်တဒု ဆီတလဲ အဘ့ၣ်ကံၣ်ဃ့ ကသ့ဧါ.+
အဝဲသ့ၣ် မၤဝဲ မ့ၢ်သ့န့ၣ် သုဝဲလၢ အမၤလိသ့ပာ်စၢၤသုသးလၢ ကမၤတၢ်အၢန့ၣ်သုမၤတၢ်ဂ့ၤ ကသ့စ့ၢ်ကီးလီၤ.
၂၄ အဃိ ယကမၤလီၤပြံလီၤပြါသု ဒ်သိးဒီး လီၢ်ဘိလၢ အဒံကွံာ် ခီဖျိလၢ မဲးမုၢ်ပျီ အကလံၤအူတၢ် အဃိလီၤ.+
၂၅ တၢ်ကမၤအသးဒီးနၤ* ဒ်န့ၣ် ဒီးအဝဲန့ၣ် မ့ၢ်တၢ်န့ၢ်သါလၢ နဂီၢ်လီၤ.” ယဟိဝၤယွၤ တဲဝဲဒ်န့ၣ်လီၤ.
“နသးပ့ၤနီၣ်ကွံာ်ယၤ+ ဒီးနနာ်န့ၢ် တၢ်လံၣ်တၢ်လီလီၤ.+
၂၆ အဃိ ယကတလဲထီၣ် နစကၢး တုၤလၢ အကျၢၢ်ဘၢနမဲာ်သၣ်ဒီးနတၢ်အိၣ်ဘ့ၣ်ဆ့ ကအိၣ်ဖျါထီၣ် ဝဲလီၤ.+
၂၇ ဒီးနတၢ်အဲၣ်ဘၢမါ အဲၣ်ဘၢဝၤ,+ နတၢ်သးကတၢဒီးနတၢ်ဆါလီၤအီၣ်သးလၢ အလီၤမဲာ်ဆှးဒိၣ်မးန့ၣ် ကအိၣ်ဖျါထီၣ် ဝဲလီၤ.
နလုၢ်လၢ်လၢ အလီၤသးဘၣ်အၢတဖၣ်လၢတၢ်လူၢ်ခိၣ်မ့ၢ်ဂ့ၤ, တၢ်ပျီပူၤမ့ၢ်ဂ့ၤ ယထံၣ်ဘၣ်လံ.+
ဝ့ၢ်ယရူၤၡလ့ၣ်ဧၢ, နကဘၣ်ကီဘၣ်ခဲ သပှၢ်တၢၢ်လီၤ.
မ့ၢ်နကကဆှီထီၣ် ဆံးယံာ်လဲၣ်.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ခါပး.”
^ မ့ၢ်စ့ၢ်ကီး “ဘၣ်တၢ်ကဝီၤဃာ်အီၤလံ.”
^ ဘၣ်သ့ၣ်သ့ၣ် အဲၣ်ဒိးတဲဝဲ ဝ့ၢ်ယရူၤၡလ့ၣ်.
^ မ့ၢ်စ့ၢ်ကီး “ပှၤအဲၤသံအီးပးဖိ.”
^ အဲၣ်ဒိးတဲဝဲ ဝ့ၢ်ယရူၤၡလ့ၣ်.
