ယံးရမံယၤ ၁၉:၁-၁၅
၁၉ ယဟိဝၤယွၤ တဲဝဲလၢ “လဲၤပှ့ၤသပၢၤဟီၣ်ခိၣ်တဖျၢၣ်လၢ ပှၤတ့သပၢၤဖိတဂၤ အအိၣ်တက့ၢ်.+ လဲၤကိးဃုာ်ဒီး ပှၤဂီၢ်မုၢ် အပှၤသူၣ်က့သးပှၢ်တနီၤ ဒီးပှၤလုၢ်တၢ်ဒိၣ် အပှၤသူၣ်က့သးပှၢ်တနီၤ
၂ ဒီးလဲၤလၢ ဟံၣ်နိၣ်အတၢ်တြီၤပူၤ+ ဖဲတြဲၤသပၢၤက့ အကျဲနုာ်လီၤအလီၢ် ဒီးဖဲန့ၣ်န့ၣ် တဲဖျါထီၣ်တၢ်လၢ ယကတဲဘၣ်နၤတက့ၢ်.
၃ နကဘၣ်တဲလၢ ‘ယူဒၤအစီၤပၤတဖၣ် ဒီးပှၤလၢ အအိၣ်လၢ ဝ့ၢ်ယရူၤၡလ့ၣ်အပူၤတဖၣ်ဧၢ, ဒိကနၣ် ယဟိဝၤယွၤ အတၢ်ကတိၤတက့ၢ်. တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ
“‘“ယကဒုးလီၤဘၣ် တၢ်နးတၢ်ဖှီၣ် ဖဲတၢ်လီၢ်အံၤန့ၣ် ဘူးထီၣ်လံ. ပှၤတဂၤဂ့ၤ တဂၤဂ့ၤ လၢအနၢ်ဟူ ဘၣ်ဝဲ တၢ်ဂ့ၢ်တခါအံၤန့ၣ် ကဖုးဘၣ်အသးလီၤ.*
၄ ယကမၤဒ်အံၤန့ၣ် မ့ၢ်လၢ အဝဲသ့ၣ် ပာ်တ့ၢ်ကွံာ်ယၤ+ ဒီးအဝဲသ့ၣ် မၤဝဲတၢ်လီၢ်အံၤ ဒ်သိးယကွၢ်နီၣ်အီၤ သုတဘၣ်လၢၤတဂ့ၤ အဂီၢ်လီၤ.+ ဖဲတၢ်လီၢ်အံၤန့ၣ် အဝဲသ့ၣ် လုၢ်ထီၣ်တၢ်လၢ ယွၤအဂၤတဖၣ် လၢအဝဲသ့ၣ်မ့ၢ်ဂ့ၤ, အဝဲသ့ၣ် အမိၢ်ပၢ်ဖံဖု လၢပျၢၤတဖၣ်မ့ၢ်ဂ့ၤ ဒီးယူဒၤစီၤပၤတဖၣ်မ့ၢ်ဂ့ၤ တသ့ၣ်ညါဝဲဘၣ်လီၤ. အဝဲသ့ၣ် မၤပှဲၤတၢ်လီၢ်အံၤလၢ ပှၤလၢ အတၢ်ကမၣ်တအိၣ်ဘၣ်တဖၣ် အသွံၣ်လီၤ.+
၅ အဝဲသ့ၣ်တ့ထီၣ် တၢ်လီၢ်ထီၣ်ထီတဖၣ်လၢ ဘဧၤလးအဂီၢ် ဒ်သိးကဒွဲၣ်အူထီၣ် အဖိခွါတဖၣ်လၢ မ့ၣ်အူ ဒ်တၢ်လုၢ်ဒွဲၣ်အူ အသိးလီၤ.+ ယတမၤလိာ်အဝဲသ့ၣ် ဒီးတဲအဝဲသ့ၣ်လၢ ကမၤဝဲဒ်န့ၣ်ဘၣ် ဒီးတၢ်ဂ့ၢ်အံၤ တဟဲအိၣ်ထီၣ်လၢ ယသးပူၤနီတဘျီဘၣ်.”’*+
၆ “ယဟိဝၤယွၤ တဲဝဲလၢ ‘လၢတၢ်န့ၣ်အဃိ တၢ်ဆၢကတီၢ် ကဟဲဝဲဖဲ ပှၤတကိး တၢ်လီၢ်အဝဲန့ၣ်လၢ တိဖ့း ဒီးဟံၣ်နိၣ် အတၢ်တြီၤလၢၤဘၣ်. ဘၣ်ဆၣ် ပှၤကကိးက့ၤလၢ တၢ်မၤသံတၢ် အတၢ်တြီၤလီၤ.+
၇ ယကမၤဟးဂီၤ ယူဒၤအပှၤဂီၢ်မုၢ် ဒီးဝ့ၢ်ယရူၤၡလ့ၣ်အပှၤဂီၢ်မုၢ် အတၢ်ကူၣ်တဖၣ် လၢတၢ်လီၢ်အဝဲန့ၣ်လီၤ. ဒီးယကမၤဒ်သိး အဝဲသ့ၣ် ကသံလၢနး လၢအဒုၣ်အဒါတဖၣ် အမဲာ်ညါ ဒီးသံလၢ ပှၤလၢအဃု မၤသံအဝဲသ့ၣ်တဖၣ် အစုပူၤလီၤ. ဒီးအဝဲသ့ၣ် အစိၣ်န့ၣ် ယကဒုးအီၣ် ထိၣ်တဖၣ်လၢအယူၤလၢ တၢ်ဖးဖီ ဒီးဆၣ်ဖိကီၢ်ဖိ လၢအဒူတဖၣ်လီၤ.+
၈ ယကဒုးကဲထီၣ် ဝ့ၢ်တဖျၢၣ်အံၤလၢ တၢ်လီၤပျံၤလီၤဖုးအလီၢ် ဒီးတၢ်လီၢ်လၢ ပှၤကဆိကမိၣ်ဆံးအီၤလီၤ.* ပှၤကိးဂၤဒဲးလၢ အလဲၤဘၣ်ကျဲဖဲန့ၣ်န့ၣ် ကကွၢ်ထံဝဲလၢ တၢ်သူၣ်ပျံၤသးဖုးအပူၤ ဒီးကဆိကမိၣ်ဆံးအီၤ လၢအတၢ်နးတၢ်ဖှီၣ်ခဲလၢာ် အဃိလီၤ.+
၉ တကးဒံးဘၣ် ဖဲဒုၣ်ဒါတဖၣ် ဒီးပှၤလၢအဃုမၤသံ အဝဲသ့ၣ် ကဝီၤဃာ်ဝ့ၢ် ဒီးဆီၣ်တံၢ်မၤနၢၤ အဝဲသ့ၣ်အခါ ယကမၤဒ်သိး အဝဲသ့ၣ် ဘၣ်အီၣ်က့ၤ အဖိမုၣ်ဖိခွါတဖၣ်အညၣ် ခီဖျိလၢ အဝဲသ့ၣ် ကလီၤဒိသံအဃိ ဒီးအဝဲသ့ၣ် တဂၤစုာ်စုာ် ကအီၣ်က့ၤ အသကိးအညၣ်လီၤ.”’+
၁၀ “နတဲဒ်န့ၣ်မ့ၢ်ဝံၤန့ၣ် မၤလီၤကလဲ သပၢၤဟီၣ်ခိၣ်တဖျၢၣ်န့ၣ် လၢပှၤပိာ်ခွါလၢ အလဲၤပိာ်နခံတဖၣ် အမဲာ်ညါတက့ၢ်.
၁၁ ဒီးတဲအဝဲသ့ၣ်လၢ ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ဒ်ပှၤတဂၤ မၤလီၤကလဲ သပၢၤဟီၣ်ခိၣ်တဖျၢၣ် တုၤဒၣ်လဲာ် ပှၤဘှီဂ့ၤထီၣ်က့ၤအီၤ တန့ၢ်လၢၤဘၣ်အသိး ယကမၤလီၤကလဲ ပှၤဂီၢ်မုၢ်အံၤ ဒီးဝ့ၢ်တဖျၢၣ်အံၤ ဒ်န့ၣ်လီၤ. ဒီးပှၤကခူၣ်လီၤ ပှၤသံတဖၣ်လၢ တိဖ့း တုၤလၢ တၢ်လီၢ်တတြီၢ်လၢၤဘၣ်.”’+
၁၂ “ယဟိဝၤယွၤ တဲဝဲလၢ ‘ယကမၤ တၢ်လီၢ်အံၤ ဒီးပှၤလၢ အအိၣ်လၢ အပူၤတဖၣ် ဒ်န့ၣ်အသိးလီၤ. ဒီးယကဒုးကဲထီၣ် ဝ့ၢ်တဖျၢၣ်အံၤ ဒ်တိဖ့းအသိးလီၤ.
၁၃ လၢယူဒၤအစီၤပၤတဖၣ် အဟံၣ်ခိၣ်မ့ၢ်ဂ့ၤ, လၢဟံၣ်အဂၤတဖၣ်လၢ ဝ့ၢ်ယရူၤၡလ့ၣ်အပူၤ အဟံၣ်ခိၣ်မ့ၢ်ဂ့ၤ အဝဲသ့ၣ် လုၢ်ထီၣ်တၢ်လုၢ်တဖၣ်လၢ မူခိၣ်အသုးမုၢ်ခဲလၢာ်*+ အအိၣ် ဒီးလူလီၤစပံးထံ ဒ်တၢ်လုၢ်တၢ်ပာ်အသိးလၢ ယွၤအဂၤတဖၣ်အအိၣ်လီၤ.+ ဟံၣ်တဖၣ်အံၤ ကကဲထီၣ်တၢ်လၢ အတကဆှီဘၣ် ဒ်တိဖ့းတၢ်လီၢ်+ တကဆှီဘၣ်အသိးလီၤ.’”
၁၄ စီၤယံးရမံယၤ လဲၤတဲတၢ်ဒ်ဝံအသိး လၢတိဖ့းတၢ်လီၢ် ဒ်ယဟိဝၤယွၤ မၢအီၤအသိးဝံၤဒီး ဖဲအဟဲက့ၤအခါ အဝဲဆၢထၢၣ်လၢ ယဟိဝၤယွၤ အဟံၣ်အတၢ်ပျီပူၤ ဒီးတဲဘၣ် ပှၤဂီၢ်မုၢ်ခဲလၢာ် ဒ်အံၤလီၤ.
၁၅ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤ တဲဝဲလၢ ‘ခီဖျိလၢ အဝဲသ့ၣ် အခိၣ်ကိၤ ဒီးတအဲၣ်ဒိး ဒိကနၣ် ယတၢ်ကတိၤဘၣ်အဃိ ယကဒုးလီၤဘၣ် ဝ့ၢ်တဖျၢၣ်အံၤ ဒီးအဝ့ၢ်ဖိခဲလၢာ်လၢ တၢ်နးတၢ်ဖှီၣ်ခဲလၢာ် လၢယတဲပာ်စၢၤန့ၣ်လီၤ.’”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အနၢ်ခံခီလၢာ် ကကဆှၣ်ထီၣ်.”
^ မ့ၢ်စ့ၢ်ကီး “တဟဲနုာ်လီၤလၢ ယတၢ်ဆိကမိၣ်အပူၤဘၣ်.”
^ အခီပညီလိၤလိၤ “ကွ့ကလံၤ လၢအဃိ.”
^ ဖျါလၢအဲၣ်ဒိးတဲဝဲ မူဖျၢၣ်တဖၣ် ဒ်သိးဒီး မုၢ်, လါဒီးဆၣ်တဖၣ်.
