ယံးရမံယၤ ၂၁:၁-၁၄
၂၁ စီၤပၤစံးဒကံယၤ+ မၢလီၤ စီၤမၤလကံယၤ အဖိခွါ စီၤပးၡဃူၢ်+ ဒီးပှၤလုၢ်တၢ်ဒိၣ် စီၤမၤစ့ယၤ အဖိခွါ စီၤစဖါနယၤလၢ+ စီၤယံးရမံယၤ အအိၣ်လီၤ. ဖဲန့ၣ်အခါ ယဟိဝၤယွၤ တဲတၢ်ဒီး စီၤယံးရမံယၤ ဒီးစီၤပၤမၢ စီၤပးၡဃူၢ် ဒီးစီၤစဖါနယၤ ဃ့စီၤယံးရမံယၤလၢ
၂ “ဝံသးစူၤ သံကွၢ်န့ၢ်တၢ်လၢပဂီၢ်လၢ ယဟိဝၤယွၤ အအိၣ်တက့ၢ်. ဘၤဘူၤလိၣ် အစီၤပၤနဘူၤကးန့စၢ် ဒုးပှၤအဃိ+ ဒ်သိး အကဂုၤက့ၤ အလီၢ်ခံအဂီၢ် ဘၣ်သ့ၣ်သ့ၣ် ယဟိဝၤယွၤ ကမၤန့ၢ်ပှၤ တၢ်လီၤလိၢ်လီၤလး တခါခါလီၤ.”+
၃ စီၤယံးရမံယၤ တဲဘၣ် အဝဲသ့ၣ်လၢ “သုဘၣ်တဲဘၣ် စီၤစံးဒကံယၤ ဒ်အံၤ,
၄ ‘ယၤ, အံၣ်စရ့လး အကစၢ် ယဟိဝၤယွၤ တဲဝဲလၢ “သုစုကဝဲၤလၢ အအိၣ်လၢ သုစုပူၤ ဒ်သိးသုကဒုး ဘၤဘူၤလိၣ်အစီၤပၤ+ ဒီးပှၤက့ၤစ့းဖိ လၢအကဝီၤဃာ်သုလၢ သုဝ့ၢ်ဒူၣ် အဝဲတကပၤန့ၣ် ယကဒုးဃၣ်ကဒါက့ၤသု တၢ်စုကဝဲၤတဖၣ်အံၤ လၢသုအိၣ်လီၤ. ဒီးယကပာ်ဖှိၣ်ထီၣ် တၢ်သ့ၣ်တဖၣ်န့ၣ် လၢဝ့ၢ်အံၤ အခၢၣ်သးလီၤ.
၅ ယကယၤထီၣ်ယစု ဒီးယကဒုးသုလၢ+ ယစုလၢ အဂံၢ်ဆူၣ်ဘါဆူၣ် ဒီးလၢတၢ်သးဒိၣ်, တၢ်သူၣ်ဒိၣ်သးဖျိး ဒီးတၢ်သးထီၣ်ဖးဒိၣ် အပူၤလီၤ.+
၆ ပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ လၢအအိၣ်လၢ ဝ့ၢ်တဖျၢၣ်အံၤအပူၤန့ၣ် ယကမၤဟးဂီၤအီၤလီၤ. အဝဲသ့ၣ် ကသံလၢ တၢ်ဆါသံသတြိာ် ဖးနးတခါလီၤ.”’+
၇ “‘ယၤ, ယဟိဝၤယွၤ တဲဝဲလၢ “ဒီးယူဒၤအစီၤပၤစံးဒကံယၤ, အခ့အပှၤတဖၣ် ဒီးပှၤအဂၤလၢ ဝ့ၢ်တဖျၢၣ်အံၤအပူၤလၢ အလဲၤခီဖျိဘၣ် တၢ်ဆါသံသတြိာ်, တၢ်ဒုး ဒီးတၢ်သၣ်ဝံၤလီၤဒိ ဒီးမူဒံးန့ၣ် ယကဟ့ၣ်လီၤ အဝဲသ့ၣ်လၢ စီၤနဘူၤကးန့စၢ် အစုပူၤ ဒီးအဝဲသ့ၣ် အဒုၣ်အဒါဒီး ပှၤလၢ အဃုမၤသံ အဝဲသ့ၣ်တဖၣ် အစုပူၤလီၤ.+ ဒီးစီၤပၤနဘူၤကးန့စၢ် တဒိသူၣ်ဒိသးလၢ အဝဲသ့ၣ်အဖီခိၣ်ဘၣ် ဒီးတသးကညီၤ အဝဲသ့ၣ် နီတစဲးဘၣ်. အဝဲ ကမၤသံ အဝဲသ့ၣ် လၢနးလီၤ.”’+
၈ “ဒီးနဘၣ်တဲဘၣ် ပှၤဂီၢ်မုၢ်တဖၣ်အံၤ ဒ်အံၤ, ‘ယၤ, ယဟိဝၤယွၤ တဲဝဲလၢ “ယပာ်လီၤန့ၢ်သု တၢ်မူအကျဲ ဒီးတၢ်သံအကျဲ လၢသုမဲာ်ညါလီၤ.
၉ ပှၤလၢ အဆဲးအိၣ်ဝဲလၢ ဝ့ၢ်အံၤအပူၤန့ၣ် ကသံလၢ တၢ်ဒုး, တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ. မ့မ့ၢ် ပှၤလၢအဟးထီၣ် ဒီးဟ့ၣ်လီၤအသးလၢ ပှၤက့ၤစ့းဖိ လၢအကဝီၤဃာ်သု အစုပူၤန့ၣ် အသးသမူ ကပူၤဖျဲး ဒီးကဆဲးမူဘၣ်လီၤ.”’+
၁၀ “‘ယၤ, ယဟိဝၤယွၤ တဲဝဲလၢ “ယဃၣ်ဒူၣ်ချၢကွံာ် ယသးလၢ ဝ့ၢ်အံၤလံ. ဒီးဝ့ၢ်အံၤ ကဘၣ်ကီဘၣ်ခဲ ဒီးတထံၣ်ဘၣ် တၢ်လၢအဂ့ၤ နီတမံၤဘၣ်.+ ဝ့ၢ်အံၤ ကဘၣ်တၢ်ဟ့ၣ်လီၤအီၤလၢ ဘၤဘူၤလိၣ် အစီၤပၤ အစုပူၤ+ ဒီးအဝဲ ကဒွဲၣ်အူထီၣ်အီၤ လၢမ့ၣ်အူလီၤ.”+
၁၁ “‘ယူဒၤအစီၤပၤ အဒူၣ်ဖိထၢဖိသ့ၣ်ဧၢ, ဒိကနၣ် ယဟိဝၤယွၤ အတၢ်ကတိၤတက့ၢ်.
၁၂ စီၤဒၤဝံး အစၢၤအသွဲၣ်ဧၢ,* ယၤ, ယဟိဝၤယွၤ တဲဝဲလၢ
“စံၣ်ညီၣ်တၢ် တီတီလိၤလိၤ ကိးနံၤဒဲးဒီးမၤပူၤဖျဲး ပှၤလၢ အဘၣ်တၢ်တမျာ်အီၤတဖၣ်လၢ ပှၤလံၣ်အီၣ်လီအီၣ်တၢ် အစုပူၤတက့ၢ်.+
သုမ့ၢ်တမၤဒ်န့ၣ်ဘၣ်န့ၣ် ယတၢ်သးဒိၣ် ကကဲၤထီၣ် ဒ်သိးဒီးမ့ၣ်အူ ဒီးကအီၣ်ကွံာ်တၢ်+ဒီးပှၤမၤလီၤပံာ်အီၤ တန့ၢ် နီတဂၤဘၣ်,
မ့ၢ်လၢ သုမၤတၢ် အၢအၢသီသီ အဃိလီၤ.”’+
၁၃ ယဟိဝၤယွၤ တဲဝဲလၢ ‘အိ ပှၤဂီၢ်မုၢ် လၢအအိၣ်လၢဝ့ၢ်လၢ အဆီလီၤအသးလၢ တၢ်ပၢၤခိၣ် လၢလၢၢ်အဖီခိၣ်ဧၢ, ယကစံၣ်ညီၣ်သုလီၤ.
သုမ့ၢ်ပှၤလၢ အတဲလၢ “မတဂၤ ကဟဲထီဒါပှၤလဲၣ်.
ဒီးမတဂၤ ကဟဲနုာ်လီၤလၢ ပတၢ်လီၢ်လဲၣ်.”’
၁၄ ဘၣ်ဆၣ် ယဟိဝၤယွၤ တဲဝဲလၢ ‘ယကဟံးန့ၢ်သုအရ့ဒ်အကြၢးဒီး တၢ်လၢသုမၤတဖၣ် အသိးလီၤ.+
ဒီးယကဒွဲၣ်ကဲၤထီၣ် သုပှၢ်ဒီးမ့ၣ်အူန့ၣ် ကအီၣ်ကွံာ် တၢ်လၢအအိၣ်ဝးတရံးသု ခဲလၢာ်လီၤ.’”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဟံၣ်.”
