ယံးရမံယၤ ၂၅:၁-၃၈
၂၅ ဖဲစီၤယိၤၡံယၤ အဖိခွါ ယူဒၤအစီၤပၤယဟိၤယါကံၣ်+ ပၢတၢ် လွံၢ်နံၣ်တနံၣ်န့ၣ် ဝံယံးရမံယၤ ဒိးန့ၢ်ဘၣ် တၢ်ကစီၣ်လၢ ကစၢ်ယွၤအအိၣ် ဘၣ်ဃးဒီး ယူဒၤအပှၤဂီၢ်မုၢ် ခဲလၢာ်လီၤ. ဖဲန့ၣ်အခါ ဘၣ်လၢ ဘၤဘူၤလိၣ် အစီၤပၤနဘူၤကးန့စၢ် ပၢတၢ်အဆိကတၢၢ်တနံၣ်လီၤ.
၂ ဘၣ်ဃးဒီး ယူဒၤအပှၤဂီၢ်မုၢ် ဒီးပှၤလၢအအိၣ်လၢ ဝ့ၢ်ယရူၤၡလ့ၣ် ခဲလၢာ်န့ၣ် ဝံယံးရမံယၤတဲဝဲလၢ
၃ “လၢ ၂၃ နံၣ်အတီၢ်ပူၤ, စးထီၣ်လၢ စီၤအၤမိၣ်အဖိခွါ ယူဒၤအစီၤပၤယိၤၡံယၤ+ ပၢတၢ် ၁၃ နံၣ်တနံၣ်လံၤလံၤန့ၣ် ယဟိဝၤယွၤ တဲတၢ်ဒီးယၤ ဒီးယတဲတၢ်ဒီးသု တဘျီဝံၤတဘျီ* ဘၣ်ဆၣ် သုတကနၣ်ဘၣ်.+
၄ ဒီးယဟိဝၤယွၤ ဆှၢလီၤ အခ့အပှၤ လၢအမ့ၢ် ဝံတဖၣ် တဘျီဝံၤတဘျီ ဘၣ်ဆၣ် သုတဒိကနၣ်ဘၣ် ဒီးသုတကနၣ်ဃုာ်တၢ်* စ့ၢ်ကီးဘၣ်.+
၅ အဝဲသ့ၣ် တဲသုလၢ ‘ဝံသးစူၤ ပတုာ်ကွံာ် သုသကဲာ်ပဝး ဒီးသုတၢ်မၤလၢ အအၢအသီတက့ၢ်.+ သုမ့ၢ်မၤဒ်န့ၣ်န့ၣ် ကီၢ်လၢ ယဟိဝၤယွၤ ဟ့ၣ်လီၤ သုမိၢ်ပၢ်ဖံဖု လၢပျၢၤတဖၣ် လၢအပူၤကွံာ်ဖးယံာ်န့ၣ် သုကဆဲးအိၣ်ဘၣ်ဖဲန့ၣ် လၢတၢ်ဆၢကတီၢ် ဖးယံာ်ဒံးလီၤ.
၆ တဘၣ်ဘူၣ်ထီၣ်ဘါထီၣ် ယွၤအဂၤတဖၣ်, မၤအဝဲသ့ၣ်အတၢ်, ထိၣ်လီၤပှီၤအသးလၢ အဝဲသ့ၣ် အမဲာ်ညါတဂ့ၤ. တဘၣ်မၤဆါ ကစၢ်ယွၤအသး ခီဖျိသုတ့ထီၣ် တၢ်ဂီၤတၢ်ဖှီၣ်တဖၣ်တဂ့ၤ. သုမ့ၢ်မၤန့ၣ် အဝဲကဒုးလီၤဘၣ်သုလၢ တၢ်နးတၢ်ဖှီၣ်လီၤ.’
၇ “ယဟိဝၤယွၤ တဲဝဲလၢ ‘ဘၣ်ဆၣ် သုတဒိကနၣ် ယကလုၢ်ဘၣ်. လၢတၢ်န့ၣ်အလီၢ် သုမၤဆါယသး ခီဖျိသုတ့ထီၣ် တၢ်ဂီၤတၢ်ဖှီၣ်တဖၣ် အဃိ ယဒုးလီၤဘၣ်သုလၢ တၢ်နးတၢ်ဖှီၣ်လီၤ.’+
၈ “အဃိ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘ခီဖျိလၢ သုတဒိကနၣ် ယတၢ်ကတိၤတဖၣ်ဘၣ်အဃိ
၉ ယၤ, ယဟိဝၤယွၤ တဲဝဲလၢ “ယကကိးန့ၢ် ကယဲၢ်ပှၤအဒူၣ်လၢ ကလံၤစိးတခီ+ ဒီးယကကိးန့ၢ် ယခ့ယပှၤ ဘၤဘူၤလိၣ် အစီၤပၤနဘူၤကးန့စၢ်လီၤ.+ ယကဒုးဟဲ အဝဲသ့ၣ် ဒ်သိး အကဒုးကီၢ်တဘ့ၣ်အံၤ,+ ပှၤအိၣ်ဝဲဆိးဝဲလၢ အပူၤတဖၣ် ဒီးပှၤကလုာ်လၢ အအိၣ်ဝးတရံးအီၤတဖၣ်အံၤ ခဲလၢာ်လီၤ.+ ကီၢ်အံၤဒီးပှၤတဖၣ်န့ၣ် ကဘၣ်တၢ်မၤဟးဂီၤအီၤ ဒီးယကဒုးကဲထီၣ်အီၤလၢ တၢ်လီၤပျံၤလီၤဖုးအလီၢ်, တၢ်ဒုၣ်ဒွဲၣ်စံးအၢအလီၢ်* ဒီးတၢ်ဟးဂူာ်ဟးဂီၤအလီၢ်လၢ တၢ်ဆၢကတီၢ်ဖးယံာ်လီၤ.
၁၀ တၢ်သးခုအကလုၢ်, တၢ်သူၣ်ဖှံသးညီအကလုၢ်,+ တလးမူးပိာ်ခွါ အကလုၢ်, တလးမူးပိာ်မုၣ် အကလုၢ်+ ဒီးဆၢၣ်ဂူာ်အသီၣ်န့ၣ် ယကမၤကတၢၢ်ကွံာ်လီၤ. ဒီးယကမၤပံာ်ကွံာ် မ့ၣ်အူဒၢ အတၢ်ကပီၤလီၤ.
၁၁ တၢ်လီၢ်တဖၣ်အံၤန့ၣ် ကဘၣ်တၢ်မၤဟးဂီၤကွံာ်အီၤ ခဲလၢာ် ဒီးအကကဲထီၣ် တၢ်လီၤပျံၤလီၤဖုးအလီၢ်လီၤ. ဒီးပှၤကလုာ်တဖၣ်အံၤ ကဘၣ်မၤဝဲ ဘၤဘူၤလိၣ်အစီၤပၤအတၢ် အနံၣ် ၇၀ လီၤ.”’+
၁၂ “ယဟိဝၤယွၤ တဲဝဲလၢ ‘ဘၣ်ဆၣ် ဖဲအနံၣ် ၇၀ ပှဲၤထီၣ်အခါ+ ယကစံၣ်ညီၣ် ဘၤဘူၤလိၣ်အစီၤပၤ ဒီးအပှၤတကလုာ်လၢ အဝဲသ့ၣ် အတၢ်ကမၣ်အဃိလီၤ.+ ဒီးယကမၤကဲထီၣ် ပှၤက့ၤစ့းဖိအတၢ်လီၢ်လၢ အအိၣ်သယုၢ် လီၤထူလီၤယိာ်လီၤ.+
၁၃ တၢ်လၢ ယတဲပာ်စၢၤ ဘၣ်ဃးဒီး တၢ်လီၢ်အဝဲန့ၣ် ယကမၤလၢပှဲၤထီၣ်အီၤခဲလၢာ်, ပၣ်ဃုာ်ဒီး ကယဲၢ်တၢ်ကွဲးအသးလၢ လံာ်အံၤအပူၤလၢ ဝံယံးရမံယၤ တဲဆိပာ်စၢၤ ဘၣ်ဃးဒီး ပှၤကလုာ်ခဲလၢာ်လီၤ.
၁၄ ပှၤကလုာ်အါကလုာ် ဒီးစီၤပၤဖးဒိၣ်တဖၣ်+ ကဒုးကဲထီၣ် ပှၤက့ၤစ့းဖိ လၢကုၢ်လီၤ.+ ဒီးယကဟ့ၣ်ကၣ်က့ၤ အဝဲသ့ၣ် ဒ်တၢ်လၢ အဝဲသ့ၣ်မၤဝဲအသိးလီၤ.’”+
၁၅ အံၣ်စရ့လး အကစၢ် ယဟိဝၤယွၤ တဲယၤလၢ “ဟံးန့ၢ် တၢ်သးဒိၣ် အစပံးထံတခွးအံၤ လၢယစုပူၤတက့ၢ်. ဒီးပှၤကလုာ်ခဲလၢာ်လၢ ယမၢနလဲၤလၢ အအိၣ်န့ၣ် ဒုးအီအီၤတက့ၢ်.
၁၆ အဝဲသ့ၣ် ကအီဝဲ ဒီးကဟးကနူၤကပၤ ဒီးကမၤထီၣ်အသး ဒ်သိးဒီးပှၤပျုၢ် ဖဲယဆှၢလီၤ တၢ်ဒုးလၢ အဝဲသ့ၣ်အအိၣ်အခါလီၤ.”+
၁၇ အဃိ ယဟံးန့ၢ်ခွးလၢ ယဟိဝၤယွၤ အစုပူၤ ဒီးဒုးအီ ပှၤကလုာ်ခဲလၢာ်လၢ ယဟိဝၤယွၤ မၢယလဲၤဒုးအီအီၤတဖၣ်လီၤ.+
၁၈ ယစးထီၣ်ဒုးအီဆိ ပှၤလၢအအိၣ်လၢ ဝ့ၢ်ယရူၤၡလ့ၣ် ဒီးယူဒၤအဝ့ၢ်တဖၣ်,+ အစီၤပၤတဖၣ် ဒီးအပဒိၣ်ဖးဒိၣ်တဖၣ် ဒ်သိး ကမၤဟးဂီၤအဝဲသ့ၣ် ဒီးဒုးကဲထီၣ်အီၤလၢ တၢ်လီၤပျံၤလီၤဖုးအလီၢ်လီၤ. ဒီးပှၤကဆိကမိၣ်ဆံး အဝဲသ့ၣ် ဒီးကယၢၤထီၣ် အဝဲသ့ၣ်ဒ်တၢ်ဆိၣ်အၢအသိး+ ဒ်လၢမုၢ်မဆါတနံၤအံၤ အသိးလီၤ.
၁၉ ဝံၤဒီး ယဒုးအီ ကီၢ်အဲၤကူပတူး အစီၤပၤဖၤရိၤ, အခ့အပှၤတဖၣ်, အပဒိၣ်ဖးဒိၣ်တဖၣ်, အပှၤဂီၢ်မုၢ်ခဲလၢာ်,+
၂၀ ပှၤကလုာ်ဂၤတဖၣ်လၢ အအိၣ်လၢ အဝဲသ့ၣ်အကျါ, စီၤပၤခဲလၢာ်လၢ အအိၣ်လၢ ကီၢ်ဧူစး, စီၤပၤခဲလၢာ်လၢ အအိၣ်လၢ ပှၤဖလ့ၡသးဖိအကီၢ်+ လၢအမ့ၢ် ဝ့ၢ်အၤၡကလိၣ်+ အစီၤပၤ, ဝ့ၢ်ဂါစၤ အစီၤပၤ, ဝ့ၢ်ဧ့ကြိၣ် အစီၤပၤ ဒီးပှၤလၢအအိၣ်တ့ၢ်ဒံးလၢ ဝ့ၢ်အၤစဒိာ်အပူၤတဖၣ် အစီၤပၤလီၤ.
၂၁ ဒီးယဒုးအီ ပှၤအဒိၣ်ဖိ,+ ပှၤမိၤအးဖိ,+ ပှၤဧၣ်မိၣ်ဖိ,+
၂၂ ဝ့ၢ်စိၢ်အစီၤပၤ ကိးဂၤဒဲး, ဝ့ၢ်စံဒိၣ်အစီၤပၤ ကိးဂၤဒဲး+ ဒီးစီၤပၤတဖၣ်လၢ အအိၣ်လၢကီးလၢ ပီၣ်လဲၣ်ပူၤ,
၂၃ ပှၤဒဒၣ်ဖိ,+ ပှၤတ့မၤဖိ, ပှၤဘူစးဖိ ဒီးပှၤခဲလၢာ်လၢ အတံာ်ဖုၣ်လီၤ အနၢ်သက့ၤထံး,+
၂၄ ပှၤဧ့ရ့းဖိ အစီၤပၤခဲလၢာ်,+ ပှၤကလုာ်ဂၤတဖၣ် လၢအအိၣ်လၢ ပှၢ်မုၢ်ကနၢန့ၣ် အစီၤပၤခဲလၢာ်,
၂၅ ပှၤစံၣ်ရံၤဖိ အစီၤပၤခဲလၢာ်, ပှၤဧ့ၤလၣ်ဖိ အစီၤပၤခဲလၢာ်+ ဒီးပှၤမၤဒဲဖိ အစီၤပၤခဲလၢာ်လီၤ.+
၂၆ ကလံၤစိး အစီၤပၤခဲလၢာ် လၢအအိၣ်ယံၤမ့ၢ်ဂ့ၤ, ဘူးမ့ၢ်ဂ့ၤ ကအီဘၣ်ဝဲတဂၤဝံၤတဂၤ ဒီးဘီမုၢ်အဂၤခဲလၢာ်လၢ အအိၣ်လၢဟီၣ်ခိၣ်ချၢန့ၣ် ကအီဘၣ်ဝဲလီၤ. ဒီးပှၤလၢကအီဘၣ်ဝဲ လၢခံကတၢၢ်န့ၣ် မ့ၢ်ဝဲ ၡံၡး*+ အစီၤပၤလီၤ.
၂၇ “ဒီးနဘၣ်တဲ အဝဲသ့ၣ်လၢ ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ “သုကဘၣ်အီ တုၤလၢ သုမူၤဒီးဘှီး ဒီးလီၤဃံၢ် ဒီးဆၢထၢၣ်က့ၤ တကဲလၢၤဘၣ်+ ခီဖျိလၢ တၢ်ဒုးလၢ ယကဆှၢလီၤလၢ သုအိၣ်အဃိလီၤ.”’
၂၈ ဒီးအဝဲသ့ၣ် မ့ၢ်တအဲၣ်ဒိးဟံးန့ၢ် ခွးလၢအအိၣ်လၢ နစုပူၤ ဒီးအီအီၤဘၣ်န့ၣ် တဲအဝဲသ့ၣ်လၢ ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “သုကဘၣ်အီသၢၤ.
၂၉ ယမ့ၢ်ဒုးလီၤဘၣ်ဆိ တၢ်နးတၢ်ဖှီၣ်လၢ ဝ့ၢ်လၢ အဘၣ်တၢ်ကိးအီၤလၢ ယမံၤန့ၣ်+ မ့ၢ်သုတကြၢးဘၣ် တၢ်စံၣ်ညီၣ်စ့ၢ်ကီးဧီၤ.”’+
“‘သုကဘၣ်တၢ်စံၣ်ညီၣ် သပှၢ်တၢၢ်, ခီဖျိလၢ ယကဆှၢလီၤ တၢ်ဒုးလၢ ပှၤလၢအအိၣ်လၢ ဟီၣ်ခိၣ်ချၢခဲလၢာ် အအိၣ် အဃိလီၤ.’ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲဒ်န့ၣ်လီၤ.
၃၀ “နကဘၣ်တဲ အဝဲသ့ၣ် ဝံအတၢ်စံးပာ်တဖၣ်အံၤခဲလၢာ် ဒီးတဲအဝဲသ့ၣ်လၢ‘ယဟိဝၤယွၤ အိၣ်လၢ အလီၢ်ထီၣ်ထီ ဒီးကကညီၤထီၣ်တၢ် ဒ်ခ့ယုၢ် တဒုအသိးဒီးအအိၣ်လၢ အတၢ်အိၣ်တၢ်ဆိးအလီၢ်စီဆှံ ဒီးကခါလီၤ အကလုၢ်လီၤ.
ပှၤလၢအအိၣ်လၢ ကစၢ်ယွၤ အတၢ်အိၣ်တၢ်ဆိးအလီၢ်လၢ ဟီၣ်ခိၣ်ချၢန့ၣ် အဝဲကကညီၤအီၤ ဒိၣ်ဒိၣ်လီၤ.
ဒီးအကကိးပသူထီၣ်ဝဲ ဒ်ပှၤလၢ အယီၢ်စပံးသၣ်လၢ စပံးထံကျိး အပူၤအသိးဒီးအကသးဝံၣ်ထီၣ် တၢ်မၤနၢၤ အတၢ်သးဝံၣ်လၢ အမၤနၢၤ ပှၤဟီၣ်ခိၣ်ဖိခဲလၢာ် အဃိလီၤ.’
၃၁ ယဟိဝၤယွၤ တဲဝဲလၢ ‘ယဟိဝၤယွၤ အိၣ်ဒီး တၢ်မူးတၢ်ရၢ်ဒီး ပှၤကလုာ်တဖၣ်အဃိ တၢ်အသီၣ်တခါ ကဟူဝဲတုၤ လၢ ဟီၣ်ခိၣ်အနၢၣ် အကတၢၢ်လီၤ.
ကစၢ်ယွၤ ကသမံသမိး ပှၤဟီၣ်ခိၣ်ဖိ ခဲလၢာ်+ဒီးအကဟ့ၣ်လီၤကွံာ် ပှၤအၢပှၤသီ ဒ်သိး ကဘၣ်တၢ်မၤသံအီၤလၢ နးအဂီၢ်လီၤ.’
၃၂ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ‘တၢ်ကီတၢ်ခဲဖးဒိၣ် ကရၤလီၤအသးလၢ ပှၤတကလုာ်ဘၣ် တကလုာ်+ဒီးယကပျၢ်လီၤ ကလံၤမုၢ်ဖးဒိၣ်လၢ အကဟဲလၢ ဟီၣ်ခိၣ်အနၢၣ် အကတၢၢ်လီၤ.+
၃၃ “‘ဖဲတၢ်တနံၤန့ၣ် ပှၤလၢ ယဟိဝၤယွၤ မၤသံဝဲတဖၣ် ကအိၣ်ဝဲလၢ ဟီၣ်ခိၣ်ဒီဘ့ၣ်ညါလီၤ. ပှၤတဟီၣ်လၢ အဝဲသ့ၣ်အဃိဘၣ်, ပှၤတပာ်ဖှိၣ်ထီၣ် ဒီးခူၣ်လီၤအဝဲသ့ၣ်ဘၣ်. အဝဲသ့ၣ် ကကဲထီၣ်ဒ်သိးဒီး တၢ်အ့ၣ်တၢ်ဆံၣ်လၢ ဟီၣ်ခိၣ်လိၤလီၤ.’
၃၄ ပှၤကွၢ်သိသ့ၣ်ဧၢ, ဟီၣ်ကိးပသူ ထီၣ်သၢၤ.
ပှၤလၢ အရ့ဒိၣ်တဖၣ်လၢ သိကျါသ့ၣ်ဧၢ, လံာ်လူာ်သုသးလၢ ဟီၣ်ခိၣ်လိၤသၢၤ.
တၢ်ဆၢကတီၢ်တုၤဝဲလၢ တၢ်ကမၤသံသု ဒီးတၢ်ကမၤလီၤပြံလီၤပြါ သုအဂီၢ်ဒီးသုကလီၤတဲာ် ဒီးသ့ၣ်ဖးကွံာ် ဒ်သပၢၤဟီၣ်ခိၣ်လၢ အလုၢ်ဒိၣ်ပှ့ၤဒိၣ်အသိးလီၤ.
၃၅ ပှၤကွၢ်သိတဖၣ် ဃ့ၢ်ပူၤဖျဲးအသး တဘၣ်နီတပူၤဘၣ်.
ဒီးပှၤလၢအရ့ဒိၣ်တဖၣ်လၢ သိကျါန့ၣ် ဃ့ၢ်ပူၤဖျဲးအသး တန့ၢ်ဘၣ်.
၃၆ ကနၣ်သၢၤ, မ့ၢ်လၢယဟိဝၤယွၤ မၤဟးဂီၤကွံာ် ပှၤကွၢ်သိတဖၣ်ဒီးပှၤလၢ အရ့ဒိၣ်တဖၣ်လၢသိကျါ အတၢ်အီၣ်ဆၣ်အလီၢ်တဖၣ်လံအဃိပှၤကွၢ်သိတဖၣ် ဟီၣ်ကိးပသူထီၣ်ဝဲ ဒီးပှၤလၢ အရ့ဒိၣ်တဖၣ်လၢသိကျါန့ၣ် ဟီၣ်ဝဲယၢၤဝဲလီၤ.
၃၇ ဒီးတၢ်အိၣ်တၢ်ဆိးအလီၢ်လၢ အမုာ်အခုၣ်တဖၣ်န့ၣ် ကဟးဂီၤဝဲခီဖျိလၢ ယဟိဝၤယွၤ အတၢ်သးထီၣ်လၢ အကဲၤဝဲဒ် မ့ၣ်အူအသိး အဃိလီၤ.
၃၈ ကစၢ်ယွၤ ဟးထီၣ်လၢအလီၢ် ဒ်ခ့ယုၢ်တဒုဟးထီၣ်လၢ အလၢၢ်ကအိပူၤ အသိးလီၤ.+
ဒီးအဝဲသ့ၣ် အကီၢ်ကကဲထီၣ် တၢ်လီၤပျံၤလီၤဖုးအလီၢ်ခီဖျိလၢ နးလၢအလီၤပျံၤ လီၤဖုးတဘ့ၣ်ဒီးအတၢ်သးထီၣ်လၢ အကဲၤဝဲဒ် မ့ၣ်အူအသိးအဃိလီၤ.”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ပၢၢ်ထီၣ်ဂီၤဂီၤ ဒီးတဲတၢ်.”
^ အခီပညီလိၤလိၤ “တဒိးသုနၢ်.”
^ အခီပညီလိၤလိၤ “ကွ့ကလံၤ လၢအဃိ.”
^ ဖျါလၢအဲၣ်ဒိးတဲဝဲ ဘၤဘူၤလိၣ်.
