ယံးရမံယၤ ၂၈:၁-၁၇
-
ဝံယံးရမံယၤ ဒီးဝံလၢအဘျၣ် စီၤဃနၤနယၤ (၁-၁၇)
၂၈ ဖဲတၢ်တနံၣ်ဃီန့ၣ် ဝံဧၤစူၢ်အဖိခွါ စီၤဃနၤနယၤ လၢအဟဲလၢ ဝ့ၢ်ကံးဘိၣ်န့ၣ်+ တဲတၢ်ဒီးယၤလၢ ယဟိဝၤယွၤအဟံၣ်လၢ ပှၤလုၢ်တၢ်ဒိၣ်တဖၣ် ဒီးပှၤဂီၢ်မုၢ်ခဲလၢာ် အမဲာ်ညါလီၤ. ဖဲန့ၣ်အခါ ဘၣ်လၢ ယူဒၤအစီၤပၤစံးဒကံယၤ+ ပၢတၢ်သီသီ ပှဲၤထီၣ်လွံၢ်နံၣ်တနံၣ် ဖဲလါယဲၢ်လါတလါလီၤ. ဒီးအဝဲသ့ၣ် တဲယၤလၢ
၂ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤလၢအမ့ၢ် အံၣ်စရ့လးအကစၢ်ယွၤန့ၣ် တဲဝဲလၢ ‘ယကမၤကၢ်ကွံာ် ဘၤဘူၤလိၣ်အစီၤပၤ အနီၣ်ယိးဘိလီၤ.+
၃ တၢ်ပီးတၢ်လီတဖၣ်လၢ အအိၣ်လၢ ယၤ, ယဟိဝၤယွၤအဟံၣ်ပူၤ လၢဘၤဘူၤလိၣ်အစီၤပၤ နဘူၤကးန့စၢ် ဟံးန့ၢ်ဝဲ ဖဲတၢ်လီၢ်တတီၤအံၤ ဒီးက့ၤစိာ်ဝဲလၢ ဘၤဘူၤလိၣ်န့ၣ် လၢခံနံၣ်အတီၢ်ပူၤ ယကဟဲက့ၤစိာ်ကဒါက့ၤအီၤလၢ တၢ်လီၢ်တတီၤအံၤလီၤ.’”+
၄ “ယဟိဝၤယွၤ တဲဝဲလၢ ‘စီၤယဟိၤယါကံၣ်+ အဖိခွါ လၢအမ့ၢ် ယူဒၤအစီၤပၤ ယံးကၤနံယၤ+ ဒီးယူဒၤအပှၤဂီၢ်မုၢ်လၢ အဘၣ်တၢ်က့ၤဖီၣ်အီၤဆူ ကီၢ်ဘၤဘူၤလိၣ်န့ၣ်+ ယကဟဲက့ၤကိး အဝဲသ့ၣ် လၢတၢ်လီၢ်တတီၤအံၤ, မ့ၢ်လၢ ယကမၤကၢ်ကွံာ် ဘၤဘူၤလိၣ် အစီၤပၤ အနီၣ်ယိးဘိအဃိလီၤ.’”
၅ ဝံၤဒီး ဝံယံးရမံယၤ တဲတၢ်ဒီး ဝံဃနၤနယၤလၢ ပှၤလုၢ်တၢ်ဒိၣ်တဖၣ် ဒီးပှၤဂီၢ်မုၢ်ခဲလၢာ်လၢ အဆၢထၢၣ်လၢ ယဟိဝၤယွၤ အဟံၣ်န့ၣ် အမဲာ်ညါလီၤ.
၆ ဝံယံးရမံယၤ တဲဝဲလၢ “အၤမ့ၣ်.* မ်ယဟိဝၤယွၤ မၤဝဲဒ်န့ၣ်တက့ၢ်. မ်ယဟိဝၤယွၤ မၤလၢပှဲၤထီၣ် နတၢ်ကတိၤတဖၣ်လၢ နတဲဆိပာ်စၢၤလၢ အကဟဲက့ၤစိာ် ယဟိဝၤယွၤ အဟံၣ်အတၢ်ပီးတၢ်လီတဖၣ်လၢ အအိၣ်လၢ ဘၤဘူၤလိၣ် ဒီးဟဲက့ၤကိးက့ၤ ပှၤဂီၢ်မုၢ်လၢ အဘၣ်တၢ်က့ၤဖီၣ်အီၤခဲလၢာ် လၢတၢ်လီၢ်တတီၤအံၤန့ၣ်တက့ၢ်.
၇ ဘၣ်ဆၣ် ဝံသးစူၤ ဒိကနၣ် တၢ်ကစီၣ်လၢ ယကတဲဘၣ်နၤ ဒီးပှၤဂီၢ်မုၢ်ခဲလၢာ်အံၤတက့ၢ်.
၈ လၢအပူၤကွံာ်ဖးယံာ် တချုးလၢ နၤဒီးယၤ အိၣ်မူဒံးဘၣ်အခါ ဝံလၢပျၢၤတဖၣ် တဲဆိပာ်စၢၤဝဲ ဘၣ်ဃးဒီး ထံကီၢ်အါဘ့ၣ်, ဘီမုၢ်ဖးဒိၣ်တဖၣ်, တၢ်ဒုးတၢ်ယၤ, တၢ်ကီတၢ်ခဲ ဒီးတၢ်ဆါသံသတြိာ်အဂ့ၢ်လီၤ.
၉ ဝံတဂၤ မ့ၢ်တဲဆိပာ်စၢၤ ဘၣ်ဃးဒီး တၢ်ဃူတၢ်ဖိးအဂ့ၢ် ဒီးအတၢ်ကတိၤ မ့ၢ်ဟဲလၢထီၣ်ပှဲၤထီၣ်န့ၣ် ပှၤကသ့ၣ်ညါဝဲလၢ ယဟိဝၤယွၤ ဆှၢလီၤဝဲ ဝံတဂၤန့ၣ် နီၢ်ကီၢ်လီၤ.”
၁၀ ဖဲန့ၣ်အခါ ဝံဃနၤနယၤ ဟံးန့ၢ်ဝဲ နီၣ်ယိးဘိလၢ အအိၣ်လၢ ဝံယံးရမံယၤ အကိာ်ဘိလိၤ ဒီးမၤကၢ်ကွံာ်ဝဲလီၤ.+
၁၁ ဒီးလၢပှၤခဲလၢာ် အမဲာ်ညါန့ၣ် ဝံဃနၤနယၤ တဲဝဲလၢ “ယဟိဝၤယွၤ တဲဝဲလၢ ဒ်န့ၣ်အသိး အကမၤကၢ်ကွံာ် နီၣ်ယိးဘိလၢ စီၤပၤနဘူၤကးန့စၢ် ပာ်ထီၣ်ဝဲလၢ ပှၤကလုာ်ခဲလၢာ် အကိာ်ဘိလိၤ လၢခံနံၣ်အတီၢ်ပူၤလီၤ.”+ ဒီးဝံယံးရမံယၤန့ၣ် ဟးထီၣ်ကွံာ်ဝဲလီၤ.
၁၂ ဝံဃနၤနယၤ မၤကၢ်ကွံာ်ဝဲ နီၣ်ယိးဘိလၢ အအိၣ်လၢ ဝံယံးရမံယၤ အကိာ်ဘိလိၤ ဝံၤအလီၢ်ခံ ယဟိဝၤယွၤ တဲဘၣ် ဝံယံးရမံယၤလၢ
၁၃ “လဲၤတဲဘၣ် ဝံဃနၤနယၤလၢ ‘ယဟိဝၤယွၤ တဲဝဲလၢ “နမၤကၢ် နီၣ်ယိးဘိသ့ၣ်+ ဘၣ်ဆၣ် လၢနီၣ်ယိးဘိသ့ၣ်အလီၢ်န့ၣ် နကဘၣ်တ့ထီၣ်က့ၤ နီၣ်ယိးဘိထးလီၤ.”
၁၄ တၢ်သုးမုၢ်ဂီၢ်မုၢ် အကစၢ် ယဟိဝၤယွၤလၢအမ့ၢ် အံၣ်စရ့လးအကစၢ်ယွၤန့ၣ် တဲဝဲလၢ “ယကပာ်ထီၣ် နီၣ်ယိးဘိထးလၢ ပှၤကလုာ်တဖၣ်အံၤ အကိာ်ဘိအလိၤခဲလၢာ် ဒ်သိး အကမၤန့ၢ်တၢ်လၢ ဘၤဘူၤလိၣ်အစီၤပၤ နဘူၤကးန့စၢ်အဂီၢ်လီၤ. ဒီးအဝဲသ့ၣ် ကဘၣ်မၤန့ၢ်တၢ်လၢ အဂီၢ်လီၤ.+ ဆၣ်ဖိကီၢ်ဖိအမံၤတဖၣ်ဒၣ်လဲာ် ယကဟ့ၣ်လီၤအီၤလီၤ.”’”+
၁၅ ဒီးဝံယံးရမံယၤ တဲဘၣ် ဝံဃနၤနယၤလၢ+ “ဝံဃနၤနယၤဧၢ, ဝံသးစူၤ ကနၣ်လၢအံၤ. ယဟိဝၤယွၤ တဆှၢလီၤနၤဘၣ် ဘၣ်ဆၣ် နမၤဒ်သိး ပှၤဂီၢ်မုၢ် ကနာ်န့ၢ် တၢ်လံၣ်တၢ်လီလီၤ.+
၁၆ အဃိ ယဟိဝၤယွၤ တဲဝဲလၢ ‘ကနၣ်လၢအံၤ, ယကမၤလီၤမၢ်ကွံာ်နၤလၢ ဟီၣ်ခိၣ်ချၢလီၤ. မ့ၢ်လၢ နဟ့ၣ်သဆၣ်ထီၣ်ပှၤဂၤလၢ ကထီဒါ ယၤ, ယဟိဝၤယွၤအဃိ တနံၣ်ညါအံၤ နကဘၣ်သံလီၤ.’”+
၁၇ ဒီးဝံဃနၤနယၤ သံဝဲဖဲတၢ်တနံၣ်န့ၣ် လၢလါနွံလါတလါလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “မ်တၢ်မၤအသး ဒ်န့ၣ်တက့ၢ်.”
