ယံးရမံယၤ ၃၀:၁-၂၄
-
တၢ်အၢၣ်လီၤလၢ တၢ်မၤဂ့ၤထီၣ်က့ၤ ဒီးတၢ်မၤဘျါက့ၤတၢ်အဂီၢ် (၁-၂၄)
၃၀ ယဟိဝၤယွၤ တဲဘၣ် ဝံယံးရမံယၤလၢ
၂ “ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲလၢ ‘တၢ်ကတိၤတဖၣ်လၢ ယတဲဘၣ်နၤန့ၣ် ကွဲးလီၤအီၤလၢ လံာ်ပူၤခဲလၢာ်တက့ၢ်.
၃ ယၤ, ယဟိဝၤယွၤ တဲလၢ “တၢ်ဆၢကတီၢ်ကဟဲဝဲ ဖဲယကကိးဖှိၣ်က့ၤ ယပှၤဂီၢ်မုၢ်လၢအမ့ၢ် ယူဒၤ ဒီးအံၣ်စရ့လးအပှၤဂီၢ်မုၢ် လၢအဘၣ်တၢ်က့ၤဖီၣ်အီၤတဖၣ်န့ၣ်လီၤ.+ ဒီးယကဟဲက့ၤကိးကဒါက့ၤ အဝဲသ့ၣ်လၢ ကီၢ်လၢ ယဟ့ၣ်ပာ်စၢၤ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် ဒီးအဝဲသ့ၣ် ကအိၣ်ဘၣ်ကဒီး လၢအပူၤလီၤ.”+ ယဟိဝၤယွၤ တဲဝဲဒ်န့ၣ်လီၤ.’”
၄ ယဟိဝၤယွၤ တဲဘၣ် ယူဒၤ ဒီးအံၣ်စရ့လးအပှၤဂီၢ်မုၢ် လၢတၢ်ကတိၤတဖၣ်အံၤလီၤ.
၅ ယဟိဝၤယွၤ တဲဝဲလၢ“ပနၢ်ဟူ ပှၤလၢအကနိးကစုာ်တဖၣ် အကလုၢ်လီၤ.
တၢ်မုာ်တၢ်ခုၣ် တအိၣ်ဘၣ် ဒီးအိၣ်ထဲတၢ်လီၤပျံၤလီၤဖုးလီၤ.
၆ ဝံသးစူၤသံကွၢ်လၢ တၢ်လၢပိာ်ခွါန့ၣ် အိၣ်ဖျဲၣ်ထီၣ်အဖိသ့ဧါ.
မ့ၢ်တသ့ဘၣ်န့ၣ် ဘၣ်မနုၤအဃိ ယထံၣ်လၢ ပှၤပိာ်ခွါလၢအဂံၢ်ဆူၣ်ဘါဆူၣ်ကိးဂၤဒဲး ပာ်ထီၣ်အစုလၢ အဟၢဖၢအလိၤ ဒ်ပိာ်မုၣ်လၢအကအိၣ်ဖျဲၣ်ထီၣ် အဖိန့ၣ်လဲၣ်.+ ဒီးဘၣ်မနုၤအဃိ ပှၤကိးဂၤဒဲး အမဲာ်သၣ်လီၤဝါလဲၣ်.
၇ တၢ်လၢမုၢ်နံၤအဝဲန့ၣ် ကမ့ၢ်ဝဲမုၢ်နံၤလၢ အလီၤပျံၤလီၤဖုးလီၤ.+
မုၢ်နံၤအဂၤလၢ အလီၤဂာ်ဒီး မုၢ်နံၤအဝဲန့ၣ် တအိၣ်ဘၣ်.
ဒီးကမ့ၢ်ဝဲ တၢ်ကိၢ်တၢ်ဂီၤ အဆၢကတီၢ်လၢ စီၤယၤကိာ် အစၢၤအသွဲၣ်တဖၣ် အဂီၢ်လီၤ.
ဘၣ်ဆၣ် ယကမၤပူၤဖျဲး အဝဲသ့ၣ်လီၤ.”
၈ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ဖဲတၢ်တနံၤန့ၣ် ယကမၤကၢ်ကွံာ် နီၣ်ယိးဘိ လၢအအိၣ်လၢ အဝဲသ့ၣ် အကိာ်ဘိလိၤ ဒီးပျံၤတဖၣ်န့ၣ် ယကမၤတဲာ်ကွံာ်အီၤ ခံကူာ်လီၤ. ဒီးအဝဲသ့ၣ် တကဲဘၣ် ပှၤထံဂၤကီၢ်ဂၤဖိတဖၣ် အကုၢ်လၢၤဘၣ်.
၉ အဝဲသ့ၣ် ကမၤန့ၢ်တၢ်လၢ ယၤ, ယဟိဝၤယွၤ ဒီးအဝဲသ့ၣ် အစီၤပၤဒၤဝံးလၢ ယကဃုထၢထီၣ်န့ၢ် အဝဲသ့ၣ်တဂၤန့ၣ် အဂီၢ်လီၤ.”+
၁၀ ယဟိဝၤယွၤ တဲဝဲလၢ “စီၤယၤကိာ် အစၢၤအသွဲၣ်ဧၢ, ပျံၤတၢ်တဂ့ၤ.
ပှၤအံၣ်စရ့လးဖိဧၢ, ပျံၤတၢ် ဖုးတၢ်တဂ့ၤ.+
ယကမၤပူၤဖျဲးသုလၢ တၢ်လီၢ်အယံၤဒီးယကမၤပူၤဖျဲး သုစၢၤသုသွဲၣ်လၢ တၢ်လီၢ်လၢ ပှၤက့ၤဖီၣ်သု အလီၢ်လီၤ.+
စီၤယၤကိာ် အစၢၤအသွဲၣ် ကဟဲက့ၤဘၣ်ဝဲ ဒီးကအိၣ်ဘၣ်ဝဲ မုာ်မုာ်ခုၣ်ခုၣ် ဒီးတၢ်တမၤတံာ်တာ် အဝဲသ့ၣ် နီတမံၤဘၣ်.
ဒီးပှၤတမၤပျံၤမၤဖုး အဝဲသ့ၣ် နီတဂၤလၢၤဘၣ်.”+
၁၁ ယဟိဝၤယွၤ တဲဝဲလၢ “ယကအိၣ်ဒီးသု ဒီးယကမၤပူၤဖျဲးသုလီၤ.
ဒီးယကမၤဟးဂီၤကွံာ် ကယဲၢ်ပှၤကလုာ်တဖၣ်လၢ ယမၤ လီၤပြံလီၤပြါသုလၢအကျါ+ဘၣ်ဆၣ် မ့မ့ၢ်သုန့ၣ် ယတမၤဟးဂီၤသုဘၣ်.+
ယကသိၣ်က့ၤသီက့ၤသု ဖဲအကြၢးဝဲဘၣ်ဝဲဒီးလ့ၤတက့ၤ ယတပျဲပူၤသုလၢ တၢ်သိၣ်ဃီၣ်ဘၣ်.”+
၁၂ ယဟိဝၤယွၤ တဲဝဲလၢ“န* ဘၣ်ဒိဘၣ်ထံးန့ၣ် တၢ်မၤဘျါက့ၤအီၤတသ့ဘၣ်.+
နတၢ်ပူၤလီၢ်အံၤ ဘျါက့ၤတသ့ဘၣ်.
၁၃ ပှၤလၢ အကဃ့ကညးန့ၢ်တၢ်လၢနဂီၢ် တအိၣ်နီတဂၤဘၣ်.
အဃိ လၢနတၢ်ပူၤလီၢ်ကဘျါဝဲအဂီၢ် ကျဲတအိၣ်ဘၣ်.
တၢ်ကူစါယါဘျါလၢနဂီၢ် တအိၣ် နီတမံၤဘၣ်.
၁၄ နတၢ်အဲၣ်တီတဖၣ် သးပ့ၤနီၣ်ကွံာ် နၤလံ.+
ဒီးအဝဲသ့ၣ် တကနၣ်ဃုာ်နၤ လၢၤဘၣ်.
ခီဖျိလၢ နတၢ်ကမၣ်ဒိၣ်ဝဲ ဒီးန တၢ်ဒဲးဘးအါဝဲအဃိ+ယတီၢ်နၤ ဒ်ဒုၣ်ဒါတဂၤ တီၢ်တၢ်အသိး+ဒီးယစံၣ်ညီၣ်နၤ ဒ်ပှၤလၢအသးအၢတဂၤ စံၣ်ညီၣ်တၢ်အသိးလီၤ.
၁၅ ဘၣ်မနုၤအဃိ နကဒူးကဒ့ၣ်လၢ နဘၣ်ဒိဘၣ်ထံး အဃိလဲၣ်.
နသးဘၣ်ဒိန့ၣ် ဘျါက့ၤတသ့ဘၣ်.
ခီဖျိလၢ နတၢ်ကမၣ်ဒိၣ်ဝဲ ဒီးန တၢ်ဒဲးဘးအါဝဲအဃိ+ယမၤနၤဒ်န့ၣ်လီၤ.
၁၆ အဃိ ပှၤလၢ အမၤဟးဂီၤနၤန့ၣ် ကဘၣ်တၢ်မၤဟးဂီၤကွံာ်အီၤ ခဲလၢာ်+ဒီးနဒုၣ်နဒါခဲလၢာ် ကဘၣ်တၢ်က့ၤဖီၣ်အီၤလီၤ.+
ပှၤလၢ အတမျာ်နၤန့ၣ် ကဘၣ်တၢ်တမျာ်အီၤဒီးပှၤလၢ အဂုာ်န့ၢ်ဆူၣ်နတၢ်န့ၣ် ယကဟ့ၣ်လီၤကွံာ်အီၤလၢ ပှၤဂုာ်န့ၢ်ဆူၣ်တၢ် အစုပူၤခဲလၢာ်လီၤ.”+
၁၇ ယဟိဝၤယွၤ တဲဝဲလၢ “ဒီးအဝဲသ့ၣ် မ့ၢ်တတူၢ်လိာ်နၤ နီတဂၤဘၣ်ဒီးမ့ၢ်တဲနၤလၢ ‘စံယိၣ်ဧၢ, ပှၤတကနၣ်ဃုာ်နၤ နီတဂၤဘၣ်+သနာ်က့ ယကမၤဂ့ၤထီၣ်က့ၤ နတၢ်အိၣ်ဆူၣ်အိၣ်ချ့ ဒီးမၤဘျါက့ၤ နတၢ်ပူၤလီၢ်တဖၣ်လီၤ.’”+
၁၈ ယဟိဝၤယွၤ တဲဝဲလၢ“ယကပာ်ဖှိၣ်ထီၣ်က့ၤ စီၤယၤကိာ် အစၢၤအသွဲၣ်လၢ အဘၣ် တၢ်က့ၤဖီၣ်အီၤတဖၣ်+ဒီးယကပာ်ဖျါထီၣ် တၢ်သးကညီၤ ဒီးမၤဂ့ၤထီၣ်က့ၤအဝဲသ့ၣ် အတၢ်အိၣ်တၢ်ဆိး အလီၢ်တဖၣ်လီၤ.
ဒီးဝ့ၢ်န့ၣ် ပှၤကတ့ထီၣ်က့ၤအီၤ ဖဲတၢ် လူၢ်လၢ အအိၣ်ဝဲလၢညါအလိၤ+ဒီးတၢးထီလၢအကျၢၤန့ၣ် ကအိၣ်က့ၤဖဲ အကြၢးအိၣ်ဝဲအလီၢ်လီၤ.
၁၉ ဒီးတၢ်စံးဘျုးစံးဖှိၣ် အတၢ်သးဝံၣ် ဒီးတၢ်နံၤတၢ်အ့ ကသီၣ်ထီၣ်လၢ အဝဲသ့ၣ်အအိၣ်လီၤ.+
ယကမၤအါထီၣ် အဝဲသ့ၣ် ဒီးအဝဲသ့ၣ် တအိၣ်ထဲစှၤဂၤဘၣ်.+
ယကမၤအါထီၣ် အဝဲသ့ၣ်အနီၣ်ဂံၢ် အါအါဂီၢ်ဂီၢ်ဒီးပှၤတဆိကမိၣ်ဆံး အဝဲသ့ၣ်ဘၣ်.+
၂၀ စီၤယၤကိာ် အဖိအလံၤတဖၣ်န့ၣ် ကဘီၣ်ထီၣ်ညီထီၣ်ဝဲ ဒ်လၢညါအသိးဒီးအပှၤဂီၢ်မုၢ်တဖၣ်န့ၣ် ကကဲထီၣ် ပှၤလၢအဆူၣ်တကလုာ် လၢယမဲာ်ညါလီၤ.+
ဒီးပှၤလၢ အဆီၣ်တံၢ်မၤနၢၤ အဝဲသ့ၣ်န့ၣ် ယကစံၣ်ညီၣ်အီၤခဲလၢာ်လီၤ.+
၂၁ အဝဲသ့ၣ်အခိၣ်အနၢ်တဂၤ ကမ့ၢ်ဝဲ အဝဲသ့ၣ် အနီၢ်ကစၢ် အပှၤကလုာ်ဒီးပှၤပၢတၢ်တဂၤအံၤ ကဟဲအိၣ်ထီၣ်လၢ အဝဲသ့ၣ်အကျါလီၤ.
ပှၤတဂၤန့ၣ် ယကမၢအဟဲဘူးထီၣ် ဒီးအဝဲကဟဲ လၢယအိၣ်လီၤ.”
“မ့တမ့ၢ်ဒ်န့ၣ်ဘၣ်န့ၣ် မတဂၤ ဟဲဘူးဒီးယၤ ကဘူၣ်လဲၣ်.” ယၤ, ယဟိဝၤယွၤ တဲဝဲဒ်န့ၣ်လီၤ.
၂၂ “သုကကဲထီၣ် ယပှၤဂီၢ်မုၢ်+ ဒီးယကကဲထီၣ် သုကစၢ်ယွၤလီၤ.”+
၂၃ ကွၢ်မီၤ, ယဟိဝၤယွၤ အတၢ်သးဒိၣ် ကဖျိးထီၣ်ဝဲ ဒ်ကလံၤမုၢ် အသိးလီၤ.+
ဒီးဒ်ကလံၤသဝံးအသိး အတၢ်သးဒိၣ် ကအူသဝံးလၢ ပှၤအၢပှၤသီ အခိၣ်သၣ်ဃံ အဖီခိၣ်လီၤ.
၂၄ တချုးလၢ ယဟိဝၤယွၤ မၤလၢပှဲၤ ဒီးမၤဝံၤဝဲ တၢ်လၢအတိာ်ပာ်လၢ အသးပူၤတဖၣ် ဒံးဘၣ်န့ၣ်+အတၢ်သးထီၣ်လၢ အကဲၤဝဲဒ်မ့ၣ်အူအသိးန့ၣ် တခုၣ်လီၤဘၣ်.
ဖဲမုၢ်နံၤခံကတၢၢ်တဖၣ် အတီၢ်ပူၤန့ၣ် သုကနၢ်ပၢၢ် တၢ်ဂ့ၢ်တခါအံၤလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ဝ့ၢ်ယရူၤၡလ့ၣ် လၢအမ့ၢ် ဝ့ၢ်စံယိၣ်.
