ယံးရမံယၤ ၃၄:၁-၂၂
၃၄ ဖဲဘၤဘူၤလိၣ် အစီၤပၤ နဘူၤကးန့စၢ်ဒီး အသုးမုၢ်ခဲလၢာ်, ဘီမုၢ်လၢ ဟီၣ်ခိၣ်ချၢလၢ အအိၣ်ဝဲလၢ အတၢ်ပၢအဖီလာ်ခဲလၢာ် ဒီးပှၤခဲလၢာ် ဒုးတၢ်ဒီး ဝ့ၢ်ယရူၤၡလ့ၣ် ဒီးဝ့ၢ်လၢ အကပိာ်ကပၤတဖၣ်အခါ ယဟိဝၤယွၤ တဲစီၤယံးရမံယၤလၢ+
၂ “ယၤ, အံၣ်စရ့လး အကစၢ် ယဟိဝၤယွၤအံၤ တဲလၢ ‘လဲၤတဲဘၣ် ယူဒၤအစီၤပၤ စံးဒကံယၤလၢ+ “ယဟိဝၤယွၤ တဲဝဲဒ်အံၤ ‘ယကဟ့ၣ်လီၤကွံာ် ဝ့ၢ်တဖျၢၣ်အံၤလၢ ဘၤဘူၤလိၣ်အစီၤပၤ အစုပူၤ ဒီးအကဒွဲၣ်အူထီၣ်ကွံာ်ဝဲလီၤ.+
၃ မ့မ့ၢ်နၤန့ၣ် ပှၤကဖီၣ်န့ၢ်နၤ သပှၢ်တၢၢ် ဒီးဟ့ၣ်လီၤကွံာ်နၤလၢ ဘၤဘူၤလိၣ်အစီၤပၤ အစုပူၤ အဃိ နတပူၤဖျဲးလၢ အစုပူၤဘၣ်.+ နကထံၣ်ဘၣ်အီၤ လၢမဲာ်သကိးမဲာ် ဒီးအကတဲတၢ်ဒီးနၤလၢ မဲာ်သကိးမဲာ်လီၤ. ဒီးနကလဲၤလၢ ဝ့ၢ်ဘၤဘူၤလိၣ်လီၤ.’+
၄ ဘၣ်ဆၣ် အိ ယူဒၤ အစီၤပၤ စံးဒကံယၤဧၢ, ဒိကနၣ် ယဟိဝၤယွၤ အတၢ်ကတိၤအံၤတက့ၢ်. ‘ဘၣ်ဃးဒီးနၤန့ၣ် ယဟိဝၤယွၤ တဲဝဲလၢ “နတသံလၢ နးအဃိဘၣ်.
၅ နကသံဘၣ် မုာ်မုာ်ခုၣ်ခုၣ်+ ဒီးပှၤကမၤဝဲ တၢ်ဒွဲၣ်ထီၣ်တၢ်နၢမူအမူး လၢနဂီၢ် ဒ်ပှၤမၤတ့ၢ်လၢ နပၢ်တဖၣ် လၢအမ့ၢ် စီၤပၤလၢညါလၢ အအိၣ်မူလၢ နမဲာ်ညါတဖၣ်အဂီၢ် အသိးလီၤ. ဒီးပှၤကဟီၣ်ဝဲယၢၤဝဲ လၢနဃိ ဒီးကတဲဝဲလၢ ‘အၣ်လါ, ပကစၢ်စီၤပၤဧၢ.’ ယဟိဝၤယွၤ တဲဝဲလၢ ‘ယတဲတၢ်ကတိၤအံၤလီၤ.”’”’”’
၆ ဒီးဝံယံးရမံယၤ တဲဘၣ် ယူဒၤအစီၤပၤ စံးဒကံယၤလၢ တၢ်ကတိၤတဖၣ်အံၤ ခဲလၢာ်လၢ ဝ့ၢ်ယရူၤၡလ့ၣ်အပူၤလီၤ.
၇ ဖဲန့ၣ်အခါ ဘၣ်ဖဲ ဘၤဘူၤလိၣ် အစီၤပၤ အသုးမုၢ်တဖၣ် ဒုးဝဲ ဝ့ၢ်ယရူၤၡလ့ၣ် ဒီးယူဒၤအဝ့ၢ်တဖၣ်လၢ အအိၣ်တ့ၢ်ဒံး+ လၢအမ့ၢ် ဝ့ၢ်လၤကံၣ်+ ဒီးဝ့ၢ်ဧစ့ကၤလီၤ.+ ဝ့ၢ်တဖၣ်န့ၣ် မ့ၢ်ဝဲ ဝ့ၢ်လၢအအိၣ်ဒီး အဒူၣ်လၢအကျၢၤ လၢအအိၣ်တ့ၢ်ဒံးလၢ ယူဒၤအဝ့ၢ်တဖၣ်အကျါလီၤ.
၈ ယဟိဝၤယွၤ တဲတၢ်ဒီး စီၤယံးရမံယၤ ဖဲစီၤပၤစံးဒကံယၤ မၤတၢ်အၢၣ်လီၤအီလီၤဒီး ပှၤဂီၢ်မုၢ်ခဲလၢာ်လၢ အအိၣ်ဝဲလၢ ဝ့ၢ်ယရူၤၡလ့ၣ်အပူၤ ဒ်သိး ကမၤထူၣ်ဖျဲးထီၣ် ကုၢ်တဖၣ် အဂီၢ်လီၤ.+
၉ ဒီးပှၤကိးဂၤဒဲး ကဘၣ်ပျၢ်ကွံာ် အကုၢ်မုၣ်ဒီးအကုၢ်ခွါ လၢအမ့ၢ် ပှၤဧ့ၤဘြံၤဖိတဖၣ် ဒ်သိး ပှၤသုတအိၣ်ဒီး အကုၢ် လၢအမ့ၢ် ပှၤယူဒၤဖိ ကဒဲကဒဲလၢၤတဂ့ၤ အဂီၢ်လီၤ.
၁၀ အဃိ ပဒိၣ်ဖးဒိၣ်ခဲလၢာ် ဒီးပှၤဂီၢ်မုၢ် ခဲလၢာ် မၤထွဲဝဲလီၤ. အဝဲသ့ၣ် မၤတၢ်အၢၣ်လီၤအီလီၤလၢ အဝဲသ့ၣ် ကိးဂၤဒဲး ကပျၢ်ကွံာ်ဝဲ အကုၢ်မုၣ်ဒီးအကုၢ်ခွါ ဒီးတပာ်အဝဲသ့ၣ်လၢ ကုၢ်နီတဂၤလၢၤဘၣ်. အဝဲသ့ၣ် မၤထွဲဝဲ ဒီးပျၢ်ကွံာ်ဝဲ ကုၢ်တဖၣ်လီၤ.
၁၁ ဘၣ်ဆၣ် အကုၢ်မုၣ်ဒီးအကုၢ်ခွါလၢ အပျၢ်ကွံာ်ဝဲန့ၣ် အဝဲသ့ၣ် ဟဲက့ၤကိးကဒါက့ၤဝဲ ဒီးမၢဆူၣ်ကဒီးအဝဲသ့ၣ်လၢ ကကဲကုၢ်လီၤ.
၁၂ အဃိ ယဟိဝၤယွၤ တဲတၢ်ဒီး စီၤယံးရမံယၤ ဒီးယဟိဝၤယွၤ တဲအီၤလၢ
၁၃ “ယၤ, အံၣ်စရ့လး အကစၢ် ယဟိဝၤယွၤအံၤ တဲလၢ ‘ယမၤတၢ်အၢၣ်လီၤအီလီၤဒီး သုမိၢ်ပၢ်ဖံဖု လၢပျၢၤတဖၣ်+ လၢမုၢ်နံၤဖဲ ယဒုးဟးထီၣ် အဝဲသ့ၣ်လၢ ကီၢ်အဲၤကူပတူး ဖဲအဝဲသ့ၣ် ကဲကုၢ်အလီၢ်+ ဒီးတဲလၢ
၁၄ “ဖဲနွံနံၣ်တနံၣ်န့ၣ်* သုဝဲကိးဂၤဒဲး ဘၣ်ပျၢ်ကွံာ် သုဒီပုၢ်ဝဲၢ် ပှၤဧ့ၤဘြံၤဖိလၢ ပှၤဆါလီၤကွံာ်အီၤလၢ သုအိၣ်လီၤ. အဝဲသ့ၣ်မၤသုတၢ်မၤ ဃုနံၣ်မ့ၢ်ဝံၤဒီး သုကဘၣ်ပျၢ်ကွံာ် အဝဲသ့ၣ်လီၤ.”+ ဘၣ်ဆၣ် သုမိၢ်ပၢ်ဖံဖု လၢပျၢၤတဖၣ် တဒိကနၣ် ယကလုၢ်ဘၣ် ဒီးတကနၣ်ဃုာ်ယၤ စ့ၢ်ကီးဘၣ်.
၁၅ ဒီးတယံာ်ဒံးဘၣ်န့ၣ်* သုနီၢ်ကစၢ်ဒၣ်ဝဲ သုဆီတလဲသုသး ဒီးသုမၤတၢ်လၢ ယထံၣ်လၢအဘၣ် ခီဖျိ သုပျၢ်ကွံာ် သုကုၢ်လၢအမ့ၢ် သုပှၤကလုာ်ကဒဲကဒဲ ဒီးသုမၤတၢ်အၢၣ်လီၤအီလီၤလၢ ယမဲာ်ညါလၢ ဟံၣ်လၢ အဘၣ်ထွဲဒီးယမံၤန့ၣ် အပူၤလီၤ.
၁၆ ဘၣ်ဆၣ် လၢခံ သုဆီတလဲက့ၤသုသး ဒီးမၤစှၤလီၤယမံၤ အလၤကပီၤ+ ခီဖျိ သုဟဲက့ၤကိးကဒါက့ၤ သုကုၢ်မုၣ်ဒီးကုၢ်ခွါလၢ သုပျၢ်ကွံာ်အီၤလၢ အကလဲၤဖဲအအဲၣ်ဒိးလဲၤ ဒီးသုမၢဆူၣ်ကဒီး အဝဲသ့ၣ်လၢ ကကဲကုၢ်လီၤ.’
၁၇ “အဃိ ယဟိဝၤယွၤ တဲဝဲလၢ ‘ဖဲသုတဲလၢ သုကမၤထူၣ်ဖျဲးထီၣ်ကွံာ် သုဒီပုၢ်ဝဲၢ် ဒီးသုပှၤကလုာ်ကဒဲကဒဲအခါ+ သုတဒိကနၣ် ယကလုၢ်နီၢ်ကီၢ်ဘၣ်. အဃိ ယၤစ့ၢ်ကီး ယကဟ့ၣ်လီၤသု တၢ်ထူၣ်ဖျဲးတခါ ခီဖျိလၢ သုကသံလၢ တၢ်ဒုးတၢ်ယၤ, တၢ်ဆါသံသတြိာ် ဒီးတၢ်သၣ်ဝံၤလီၤဒိ+ အဃိလီၤ. ဒီးယကဒုးကဲထီၣ်သုလၢ တၢ်လီၤပျံၤလီၤဖုးအလီၢ် လၢဘီမုၢ်ခဲလၢာ်လၢ ဟီၣ်ခိၣ်ချၢအဂီၢ်လီၤ.’+ ယၤ, ယဟိဝၤယွၤ တဲဝဲဒ်န့ၣ်လီၤ.
၁၈ ယကပာ်ဖျါထီၣ် တၢ်လၢအကမၤအသးဒီး ပှၤလၢအမၤဟးဂီၤ ယတၢ်အၢၣ်လီၤအီလီၤလီၤ. အဝဲသ့ၣ် ကျီသ့ၣ်ဖးဝဲ ကျီၢ်ဖိတဒုန့ၣ်ခံက့ ဝံၤဒီးဟးဝဲလၢ ကျီၢ်ဖိခံက့န့ၣ် အဘၢၣ်စၢၤ+ ဒီးမၤဝဲ တၢ်အၢၣ်လီၤအီလီၤလၢ ယမဲာ်ညါလီၤ. ဘၣ်ဆၣ် အဝဲသ့ၣ် တမၤထွဲဝဲ ဒ်တၢ်ကတိၤတဖၣ်လၢ အအၢၣ်လီၤဝဲန့ၣ်ဘၣ်.
၁၉ ပှၤလၢအဟးဝဲလၢ ကျီၢ်ဖိလၢ အဘၣ်တၢ်ကျီသ့ၣ်ဖးအီၤ ခံက့န့ၣ် အဘၢၣ်စၢၤန့ၣ် မ့ၢ်ဝဲ ယူဒၤအပဒိၣ်ဖးဒိၣ်တဖၣ်, ဝ့ၢ်ယရူၤၡလ့ၣ် အပဒိၣ်ဖးဒိၣ်တဖၣ်, ပဒိၣ်တဖၣ်, ပှၤလုၢ်တၢ်ဒိၣ်တဖၣ် ဒီးပှၤထံဖိကီၢ်ဖိ ခဲလၢာ်လီၤ.
၂၀ ယကဟ့ၣ်လီၤကွံာ် အဝဲသ့ၣ်လၢ အဒုၣ်အဒါ ဒီးပှၤလၢ အဃုမၤသံအီၤတဖၣ် အစုပူၤ ဒီးအဝဲသ့ၣ် အစိၣ်န့ၣ် ကကဲထီၣ် ထိၣ်လၢအယူၤလၢ တၢ်ဖးဖီတဖၣ် အတၢ်အီၣ် ဒီးဆၣ်ဖိကီၢ်ဖိလၢအဒူတဖၣ် အတၢ်အီၣ်လီၤ.+
၂၁ ဒီးယူဒၤအစီၤပၤ စံးဒကံယၤ ဒီးအပဒိၣ်ဖးဒိၣ်တဖၣ်န့ၣ် ယကဟ့ၣ်လီၤကွံာ် အဝဲသ့ၣ်လၢ အဒုၣ်အဒါ အစုပူၤ ဒီးပှၤလၢ အဃုမၤသံအဝဲသ့ၣ် အစုပူၤလီၤ. ဒီးယကဟ့ၣ်လီၤကွံာ် အဝဲသ့ၣ်လၢ ဘၤဘူၤလိၣ် အစီၤပၤ+ အသုးမုၢ်တဖၣ်လၢ အဂုၤက့ၤအလီၢ်ခံဒီး တဒုးအဝဲသ့ၣ်လၢၤဘၣ်န့ၣ် အစုပူၤလီၤ.+
၂၂ “ယဟိဝၤယွၤ တဲဝဲလၢ ‘ယကဟ့ၣ်လီၤ တၢ်ကလုၢ် ဒီးဒုးဟဲက့ၤ သုးမုၢ်တဖၣ်န့ၣ်လၢ ဝ့ၢ်တဖျၢၣ်အံၤလီၤ. အဝဲသ့ၣ် ကဒုးဝဲ ဝ့ၢ်တဖျၢၣ်အံၤ, မၤန့ၢ်ဝဲ ဒီးဒွဲၣ်အူထီၣ်ကွံာ်အီၤလီၤ.+ ဒီးယူဒၤအဝ့ၢ်တဖၣ်န့ၣ် ယကဒုးအိၣ်သယုၢ်အီၤ ဒီးပှၤတအိၣ်လၢ အပူၤနီတဂၤလၢၤဘၣ်.’”+
