ယံးရမံယၤ ၃၉:၁-၁၈
၃၉ ဖဲစီၤစံးဒကံယၤ ပၢတၢ်ခွံနံၣ်တနံၣ်, ဖဲလါအလါတဆံန့ၣ် ဘၤဘူၤလိၣ် အစီၤပၤနဘူၤကးန့စၢ် ဒီးအသုးမုၢ်ခဲလၢာ် လဲၤဝဲလၢ ဝ့ၢ်ယရူၤၡလ့ၣ် ဒီးအဝဲသ့ၣ် ကဝီၤဃာ်ဝ့ၢ်လီၤ.+
၂ ဖဲစီၤပၤစံးဒကံယၤ ပၢတၢ် ၁၁ နံၣ်အနံၣ်, ဖဲလါလွံၢ်လါတလါ, လါထီၣ်ခွံသီတသီန့ၣ် စီၤပၤနဘူၤကးန့စၢ် ဒီးအသုးမုၢ် ဘၢၣ်ဖျိကွံာ်ဝဲ ဝ့ၢ်ဒူၣ်လီၤ.+
၃ ဒီးဘၤဘူၤလိၣ် အစီၤပၤ အပဒိၣ်ဖးဒိၣ်ခဲလၢာ် လဲၤနုာ်လီၤလၢဝ့ၢ်ပူၤ ဒီးဆ့ၣ်နီၤဝဲလၢ တြဲၤလၢတၢ်ခၢၣ်သး တတီၤလီၤ.+ အဝဲသ့ၣ်မ့ၢ်ဝဲ စၤမကၢ်* စီၤန့ရကၤလးၡရ့ၢ်စၢ်, ရၤဘစါရံၣ်* စီၤနဘိစၢ်စကံၣ်, ရၤမဲး* စီၤန့ရကၤလးၡရ့ၢ်စၢ် ဒီးဘၤဘူၤလိၣ် အစီၤပၤ အပဒိၣ်ဖးဒိၣ်အဂၤ ခဲလၢာ်လီၤ.
၄ ဖဲယူဒၤအစီၤပၤ စံးဒကံယၤ ဒီးအသုးဖိခဲလၢာ် ထံၣ်ဘၣ် ပဒိၣ်ဖးဒိၣ်တဖၣ်အခါ အဝဲသ့ၣ် ဃ့ၢ်ထီၣ်ကွံာ်လၢဝ့ၢ်ပူၤ+ ဖဲမုၢ်နၤခီအဆၢကတီၢ် ဒီးဟးထီၣ်ကွံာ်ဝဲလၢ တြဲၤလၢအအိၣ်လၢ တၢ်ဒူၣ်ခံခါ အဘၢၣ်စၢၤလၢ စီၤပၤအတၤသၣ်လီၢ် အကပၤလီၤ. ဒီးအဝဲသ့ၣ် ဆဲးလဲၤဝဲလၢ ဧၤရဘၤ အကျဲလီၤ.+
၅ ဘၣ်ဆၣ် ပှၤက့ၤစ့းဖိအသုးမုၢ် လူၤအဝဲသ့ၣ် ဒီးသုးမုၢ်န့ၣ် ချုးန့ၢ် စီၤစံးဒကံယၤ ဖဲဝ့ၢ်ယရံၤဃိ+ အတၢ်ပၢၤခိၣ်လီၤ. သုးမုၢ်န့ၣ် ဖီၣ်န့ၢ်အီၤဒီး ဆှၢထီၣ်အီၤလၢ ဘၤဘူၤလိၣ် အစီၤပၤ နဘူၤကးန့စၢ်အအိၣ် ဖဲဝ့ၢ်ရံးဘလၤ+ လၢဃမါသး အဟီၣ်ကဝီၤလီၤ.+ ဒီးစီၤပၤနဘူၤကးန့စၢ် ဟ့ၣ်အီၤတၢ်စံၣ်ညီၣ်လီၤ.
၆ ဖဲဝ့ၢ်ရံးဘလၤန့ၣ် ဘၤဘူၤလိၣ်အစီၤပၤ မၢပှၤမၤသံကွံာ် စီၤစံးဒကံယၤ အဖိခွါတဖၣ်လၢအမဲာ်ညါ ဒီးဘၤဘူၤလိၣ်အစီၤပၤ မၢပှၤမၤသံကွံာ် ယူဒၤ အပှၤဒိၣ်ပှၤပှၢ် ခဲလၢာ်လီၤ.+
၇ ဒီးစီၤနဘူၤကးန့စၢ် တူခွဲးထီၣ်ဝဲ စီၤစံးဒကံယၤ အမဲာ်ချံ ဝံၤဒီး စၢဃာ်အီၤလၢ ထးသွဲတိၢ်ဘီတဖၣ် ဒ်သိးကက့ၤကိးအီၤလၢ ဘၤဘူၤလိၣ် အဂီၢ်လီၤ.+
၈ ဒီးပှၤက့ၤစ့းဖိ ဒွဲၣ်အူထီၣ်ကွံာ်ဝဲ စီၤပၤအဟံၣ်* ဒီးပှၤဂီၢ်မုၢ်တဖၣ်အဟံၣ်လီၤ.+ ဒီးအဝဲသ့ၣ် မၤလီၤပှီၢ်ကွံာ်ဝဲ ယရူၤၡလ့ၣ် အဝ့ၢ်ဒူၣ်လီၤ.+
၉ ပှၤခိးတၢ်ဖိအခိၣ် စီၤနဘူစၢ်ရဒၣ်န့ၣ်+ က့ၤဖီၣ်ဝဲ ပှၤဂီၢ်မုၢ်လၢ အအိၣ်တ့ၢ်ဒံးလၢ ဝ့ၢ်ပူၤ, ပှၤလၢ အလဲၤအိၣ်ဃူအီၤ ဒီးပှၤအဂၤလၢ အအိၣ်တ့ၢ်တဖၣ်န့ၣ်လၢ ဘၤဘူၤလိၣ် အပူၤလီၤ.
၁၀ ဘၣ်ဆၣ် ပှၤခိးတၢ်ဖိအခိၣ် စီၤနဘူစၢ်ရဒၣ်န့ၣ် ပာ်တ့ၢ်ဝဲ ပှၤလၢ အဖှီၣ်ကတၢၢ်တနီၤလၢ အတၢ်တအိၣ်နီတမံၤဘၣ်တဖၣ် လၢယူဒၤအဟီၣ်ကဝီၤပူၤလီၤ. ဖဲတၢ်တနံၤန့ၣ် စီၤနဘူစၢ်ရဒၣ် ဟ့ၣ်စ့ၢ်ကီး အဝဲသ့ၣ်လၢ စပံးကျီးတဖၣ် ဒီးပျီတဖၣ် လၢကမၤတၢ်အဂီၢ်လီၤ.+
၁၁ ဘၣ်ဃးဒီး ဝံယံးရမံယၤန့ၣ် ဘၤဘူၤလိၣ်အစီၤပၤ နဘူၤကးန့စၢ် မၤလိာ် ပှၤခိးတၢ်ဖိအခိၣ် စီၤနဘူစၢ်ရဒၣ်လၢ
၁၂ “က့ၤကိးအီၤ ဒီးကွၢ်ထွဲအီၤတက့ၢ်. တဘၣ်မၤဆါအီၤ နီတမံၤတဂ့ၤ. ဒီးအမ့ၢ်ဃ့နၤ တၢ်တမံၤမံၤန့ၣ် ဟ့ၣ်အီၤတက့ၢ်.”+
၁၃ အဃိ ပှၤခိးတၢ်ဖိအခိၣ် စီၤနဘူစၢ်ရဒၣ်, ရၤဘစါရံၣ် စီၤနဘူၤၡၤစဘၣ်, ရၤမဲး စီၤန့ရကၤလးၡရ့ၢ်စၢ် ဒီးပှၤဒိၣ်ပှၤပှၢ်လၢ ဘၤဘူၤလိၣ်အစီၤပၤ ဆှၢလီၤဝဲ ကိးဂၤဒဲးန့ၣ်
၁၄ မၢပှၤလဲၤကိးထီၣ် ဝံယံးရမံယၤလၢ ပှၤခိးတၢ်ဖိတဖၣ် အကရၢၢ်ပူၤ+ ဒီးဟ့ၣ်လီၤအီၤလၢ စီၤကဒါလယၤ အစုပူၤ+ ဒ်သိး အကက့ၤကိး ဝံယံးရမံယၤလၢ အဟံၣ်အဂီၢ်လီၤ. စီၤကဒါလယၤ အပၢ်မ့ၢ်ဝဲ စီၤအဃံကၣ်+ ဒီးစီၤအဃံကၣ် အပၢ်မ့ၢ်ဝဲ စီၤၡၤဖၣ်လီၤ.+ ဒီးဝံယံးရမံယၤန့ၣ် အိၣ်ဘၣ်ဝဲလၢ ပှၤဂီၢ်မုၢ် အကျါလီၤ.
၁၅ ဘၣ်ဆၣ်လၢညါ ဖဲပှၤဖီၣ်ဃာ် ဝံယံးရမံယၤလၢ ပှၤခိးတၢ်ဖိတဖၣ် အကရၢၢ်ပူၤအခါ+ ယဟိဝၤယွၤ တဲဘၣ်အီၤလၢ
၁၆ “လဲၤတဲဘၣ် ပှၤအဲၤသံအီးပးဖိ စီၤဧ့ၤဘ့းမ့လ့းလၢ+ ‘တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ “ယကမၤလၢထီၣ်ပှဲၤထီၣ် ယတၢ်ကတိၤလၢ အဘၣ်ထွဲဒီး ဝ့ၢ်တဖျၢၣ်အံၤအဃိ တၢ်ကီတၢ်ခဲ ကအိၣ်ထီၣ် ဒီးတမ့ၢ်တၢ်လၢ အဂ့ၤလၢ ဝ့ၢ်အံၤအဂီၢ်ဘၣ်. ဒီးဖဲတၢ်တနံၤန့ၣ် နကထံၣ်ဘၣ် တၢ်မၤအသးတဖၣ်န့ၣ်လီၤ.”’
၁၇ “ယဟိဝၤယွၤ တဲဝဲလၢ ‘ဘၣ်ဆၣ် ဖဲတၢ်တနံၤန့ၣ် ယကမၤပူၤဖျဲးနၤ ဒီးနတဘၣ် တၢ်ဟ့ၣ်လီၤကွံာ်နၤလၢ ပှၤလၢနပျံၤအီၤတဖၣ် အစုပူၤဘၣ်.’
၁၈ “ယဟိဝၤယွၤ တဲဝဲလၢ ‘ယကဟ့ၣ်နၤ တၢ်ပူၤဖျဲး သပှၢ်တၢၢ် ဒီးနတသံဘၣ်လၢ နးအဃိဘၣ်. နသးသမူ ကပူၤဖျဲး+ မ့ၢ်လၢ နနာ်န့ၢ်ယၤ+ အဃိလီၤ.’”
တၢ်ဂ့ၢ်အဘျဲၣ်တဖၣ်
^ ဖျါလၢ အမ့ၢ်ဝဲ မံၤလၤသၣ်ကပီၤတခါ.
^ မ့ၢ်စ့ၢ်ကီး “ပဒိၣ်လၢ အဒိၣ်ကတၢၢ်တဂၤ.”
^ မ့ၢ်စ့ၢ်ကီး “ပှၤအူတၢ်သမူတၢ်အခိၣ်.”
^ မ့ၢ်စ့ၢ်ကီး “နီ.”
