ယံးရမံယၤ ၄:၁-၃၁
၄ ယဟိဝၤယွၤ တဲဝဲလၢ “အံၣ်စရ့လး အပှၤဂီၢ်မုၢ်သ့ၣ်ဧၢ, ဟဲက့ၤတက့ၢ်.
သုမ့ၢ်ဟဲက့ၤလၢယအိၣ်ဒီးသုမ့ၢ်မၤလီၤမၢ်ကွံာ် သုတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်လၢ ယမဲာ်ညါန့ၣ်သုတဘၣ်တၢ်က့ၤဖီၣ်သုဘၣ်.+
၂ လၢတၢ်မ့ၢ်တၢ်တီ, တၢ်စံၣ်ညီၣ်တီ ဒီးလၢတၢ်တီတၢ်လိၤအပူၤ သုမ့ၢ်အၢၣ်လီၤတၢ်လၢ‘ဒ်ယဟိဝၤယွၤ မ့ၢ်ပှၤလၢ အမူဝဲသပှၢ်ကတၢၢ်အသိး’ န့ၣ်ပှၤကလုာ်တဖၣ် ကဃုတၢ်ဆိၣ်ဂ့ၤ ခီဖျိလၢအီၤ*ဒီးကပာ်ကဖၢလၢသးလၢ အဃိလီၤ.”+
၃ ယဟိဝၤယွၤ တဲဘၣ် ယူဒၤ ဒီးဝ့ၢ်ယရူၤၡလ့ၣ် အပှၤဂီၢ်မုၢ်လၢ“ထဲၣ်ထီၣ်ဟီၣ်ခိၣ် ဒ်သိးအကဂ့ၤလၢ တၢ်သူၣ်တၢ်ဖျးတၢ်အဂီၢ်ဒီးတဘၣ်ဆဲးဖှံလီၤတၢ်လၢ တၤဆှုၣ်တၤမဲအကျါ လၢၤတဂ့ၤ.+
၄ ယူဒၤဒီးဝ့ၢ်ယရူၤၡလ့ၣ် အပှၤဂီၢ်မုၢ်သ့ၣ်ဧၢ,သုမၤတၢ်အၢအၢသီသီအဃိသုကဘၣ်ဒိးတၢ်ကူးတရံးလၢ ယဟိဝၤယွၤအဂီၢ် ဒီးဒိးတၢ်ကူးတရံး လၢသးလီၤ.+သုမ့ၢ်တမၤဒ်န့ၣ်ဘၣ်န့ၣ်ယတၢ်သးဒိၣ်ကကဲၤထီၣ် ဒ်သိးဒီးမ့ၣ်အူဒီးပှၤကမၤလီၤပံာ်ကွံာ်အီၤ တအိၣ်နီတဂၤဘၣ်.”+
၅ ဘိးဘၣ်သ့ၣ်ညါ တၢ်ဂ့ၢ်အံၤလၢ ယူဒၤအဟီၣ်ကဝီၤ ဒီးတဲဖျါထီၣ်အီၤလၢ ဝ့ၢ်ယရူၤၡလ့ၣ်တက့ၢ်.
ကိးပသူထီၣ် ဒီးအူထီၣ်ကွဲၤလၢ ကီၢ်ပူၤဝးဝးတက့ၢ်.+
ကိးပသူထီၣ်ဖးဒိၣ်လၢ “ပာ်ဖှိၣ်ထီၣ် သကိးသးဒီးလဲၤဃ့ၢ်သကိးလၢ ဝ့ၢ်တဖၣ်လၢအအိၣ်ဒီး အဒူၣ်လၢအကျၢၤတက့ၢ်.+
၆ ဆီလီၤတၢ်ပနီၣ်တခါ လၢအနဲၣ်ကျဲဆူ ဝ့ၢ်စံယိၣ် တကပၤတက့ၢ်.
တဘၣ်ဆၢထၢၣ် ဂၢၢ်တပၢၢ်တဂ့ၤ. ဃုတၢ်အိၣ်သဒၢအလီၢ်တက့ၢ်.”
ကစၢ်ယွၤတဲဝဲလၢ “ယကဒုးလီၤ တၢ်နးတၢ်ဖှီၣ် ဒိၣ်ဒိၣ်မုၢ်မုၢ်တခါလၢ အအိၣ်ဟဲလၢ ကလံၤစိးတခီလီၤ.+
၇ ဒ်ခ့ယုၢ်တဒု ဟဲထီၣ်လၢ တပှီာ်ကျါ အသိးန့ၣ်+ပှၤတဂၤလၢ အမၤဟးဂီၤ ပှၤကလုာ်တဖၣ် ဟဲထီၣ်လံ.+
အဝဲဟးထီၣ်လၢအလီၢ် ဒ်သိးအကဒုးကဲထီၣ် သုကီၢ်လၢ တၢ်လီၤပျံၤ လီၤဖုးအလီၢ်လီၤ.
သုဝ့ၢ်တဖၣ် ကဘၣ်တၢ်မၤဟးဂီၤအီၤ ဒီးပှၤတအိၣ်တဆိး လၢအပူၤ နီတဂၤလၢၤဘၣ်.”+
၈ အဃိ ကူထီၣ်ကၤထီၣ် ထၢၣ်တၢ်ကံးညာ်*+သူၣ်အုးသးအုး* ဒီးဟီၣ်တက့ၢ်.
ယဟိဝၤယွၤ သးဒိၣ်ထီၣ်ပှၤ တလီၤမၢ်ဒံးဘၣ်.
၉ ယဟိဝၤယွၤ တဲဝဲလၢ “ဖဲန့ၣ်အဆၢကတီၢ် စီၤပၤအတၢ်သးဒူ ကလီၤမၢ်ကွံာ်+ဒီးပဒိၣ်ပပှၢ်တဖၣ် အတၢ်သးဒူ ကလီၤမၢ်ကွံာ်စ့ၢ်ကီးလီၤ.
ပှၤလုၢ်တၢ်ဒိၣ်တဖၣ် ကပျံၤတၢ် ဖုးတၢ် ဒီးဝံတဖၣ် ကကမၢ ကမၣ်လီၤ.”+
၁၀ ဒီးယတဲလၢ “အၣ်လါ, တၢ်ပၢကစၢ် ယဟိဝၤယွၤဧၢ, နကွဲန့ၢ်လွဲန့ၢ် ပှၤဂီၢ်မုၢ်အံၤ+ ဒီးပှၤလၢအအိၣ်လၢ ဝ့ၢ်ယရူၤၡလ့ၣ်အပူၤတဖၣ် ခီဖျိနတဲလၢ ‘သုကအိၣ်ဒီး တၢ်ဃူတၢ်ဖိး.’+ ဘၣ်ဆၣ် နးတဖၣ်အိၣ်လၢ ပကိာ်ယူၢ်ဘိလိၤလီၤ.”
၁၁ ဖဲန့ၣ်အဆၢကတီၢ် တၢ်ကတဲဘၣ် ပှၤဂီၢ်မုၢ်အံၤ ဒီးပှၤလၢအအိၣ်လၢ ဝ့ၢ်ယရူၤၡလ့ၣ်အပူၤ တဖၣ်လၢ“ကလံၤကိၢ်သွး ကဟဲထီၣ်လၢ မဲးမုၢ်ခိၣ် အတၢ်စိခိၣ်တဖၣ်,ကအူဘၣ် ယပှၤဂီၢ်မုၢ်*ဒီးအတဟဲဒ်သိး ကဃၤဘု မ့တမ့ၢ် ကမၤကဆှီတၢ်အဂီၢ်ဘၣ်.
၁၂ ကလံၤလၢ အသဟီၣ်ဆူၣ်ကတၢၢ်အံၤ ဟဲအူထီၣ် ခီဖျိလၢ ယဟ့ၣ်လီၤ တၢ်ကလုၢ်အဃိလီၤ.
ခဲအံၤန့ၣ် ယကကိးထီၣ် တၢ်စံၣ်ညီၣ်တဖၣ်လၢ အကဘၣ် ယပှၤဂီၢ်မုၢ်လီၤ.
၁၃ ဒုၣ်ဒါ ကဟဲ လီၤဂာ်ဒ်သိးဒီး တၢ်အၢၣ်လၢ အဒုးစူၤလီၤ မူခိၣ်ထံဒီးအလ့ၣ်ကဟၣ်တဖၣ် ကဟဲလီၤဂာ်ဒ်သိးဒီး ကလံၤမုၢ်လီၤ.+
ဒီးအကသ့ၣ်တဖၣ်န့ၣ် ချ့ဒိၣ်န့ၢ်ဒံး လံာ်ကြီကြာ်လီၤ.+
“ပဟးဂီၤလံအဃိ ပတၢ်မုၢ်လၢ် တအိၣ်လၢၤဘၣ်.”
၁၄ ဝ့ၢ်ယရူၤၡလ့ၣ်ဧၢ, ဒ်သိးနကပူၤဖျဲးအဂီၢ် မၤကဆှီထီၣ်ကွံာ် တၢ်အၢတၢ်သီလၢ အအိၣ်လၢ နသးပူၤတက့ၢ်.+
နကဆဲးအိၣ်ဒီး တၢ်ဆိကမိၣ်လၢ အအၢအသီ ယံာ်ဒံးထဲလဲၣ်.
၁၅ တၢ်ကလုၢ်တခါ တဲဝဲတၢ်ကစီၣ်လၢ အဘၣ်ဃးဒီး ဝ့ၢ်ဒၣ်+ဒီးအတဲဖျါထီၣ် တၢ်ကီတၢ်ခဲလၢ အကဟဲဘၣ် အ့ဖရဲၣ်အကစၢၢ် တဖၣ်လီၤ.
၁၆ တဲဘၣ် ပှၤကလုာ်တဖၣ်လၢ တၢ်ဂ့ၢ်တခါအံၤဒီးတဲဖျါထီၣ်န့ၢ် ပှၤအိၣ်လၢ ဝ့ၢ်ယရူၤၡလ့ၣ်အပူၤတဖၣ် တက့ၢ်.”
“ပှၤကွၢ်ဟုၣ်တၢ်တဖၣ်လၢ အအိၣ်လၢ ထံယံၤကီၢ်ယံၤန့ၣ် ဟဲလံ.
ဒီးအဝဲသ့ၣ် ကကိးပသူထီၣ်ဒ်သိး ကဒုးယူဒၤအဝ့ၢ်တဖၣ် အဂီၢ်လီၤ.
၁၇ အဝဲသ့ၣ် ဟဲထီဒါ ဝ့ၢ်ယရူၤၡလ့ၣ် ဝးဝး ဒ်ပှၤခိးကွၢ်တၢ်ဖိတဖၣ် လၢ အခိးကွၢ်တၢ်လၢ ပျီပူၤ+မ့ၢ်လၢ ဝ့ၢ်ယရူၤၡလ့ၣ် ထီဒါက့ၤယၤ အဃိလီၤ.”+ ယဟိဝၤယွၤ တဲဝဲ ဒ်န့ၣ်လီၤ.
၁၈ “ဒ်တၢ်လၢသုမၤ ဒီးသုသကဲာ်ပဝး အိၣ်ဝဲအသိး သုကတူၢ်ဘၣ်က့ၤ တၢ်လီၤ.+
တၢ်ကီတၢ်ခဲ ကဟဲဘၣ်သုနးမးမ့ၢ်လၢ သးလၢအထီဒါတၢ်န့ၣ် ဆဲးဖျိတၢ်တုၤလၢ သုသးပူၤအဃိလီၤ.”
၁၉ ယနၢ်ဟူ ကွဲၤအသီၣ်ဒီးတၢ်ဒုး အတၢ်ကိးပသူထီၣ်လံ.+
အဃိ ယသူၣ်ကိၢ်သးဂီၤညါ,* ယသူၣ်ကိၢ်သးဂီၤညါ.
ယသးဘၣ်ဒိဒိၣ်မး,ယသးကနိး သပှၢ်တၢၢ်ဒီးယအိၣ်ဃိဒိမး တသ့ဘၣ်.
၂၀ ကီၢ်ဒီတဘ့ၣ်န့ၣ် ဘၣ်တၢ်မၤဟးဂီၤအီၤလံအဃိ တၢ်ကီတၢ်ခဲအကစီၣ် အိၣ်ထီၣ်ဝဲ တခါဝံၤ တခါလီၤ.
ယဒဲတဖၣ် ဘၣ်တၢ်မၤဟးဂီၤအီၤ သတူၢ်ကလာ်ဒီးယဒဲ အတၢ်ကံးညာ်တဖၣ် ဘၣ်တၢ်မၤဟးဂီၤအီၤ တဘျီဃီလီၤ.+
၂၁ ယကဘၣ်ဆဲးထံၣ် တၢ်ပနီၣ်ဒီးဆဲးနၢ်ဟူ ကွဲၤအသီၣ် ယံာ်ဒံးထဲလဲၣ်.+
၂၂ ကစၢ်ယွၤ တဲဝဲလၢ “ယပှၤဂီၢ်မုၢ်န့ၣ် မ့ၢ်ပှၤဟးဂီၤဖိ+ဒီးအဝဲသ့ၣ် တကနၣ်ဃုာ်ယၤ နီတစဲးဘၣ်.
အဝဲသ့ၣ် မ့ၢ်ပှၤနါစိၤ ဒီးအ တၢ်သ့ၣ်ညါ နၢ်ပၢၢ်တအိၣ်ဘၣ်.
မ့မ့ၢ် လၢအဝဲသ့ၣ် ကမၤတၢ်အၢ တကပၤန့ၣ် ဖၠဲးဒိၣ်မးဘၣ်ဆၣ် အဝဲသ့ၣ် ကဘၣ်မၤတၢ်ဂ့ၤ ဒ်လဲၣ်န့ၣ် တသ့ၣ်ညါဝဲဘၣ်.”
၂၃ ယထံၣ်အဝဲသ့ၣ်အကီၢ် အိၣ်ခီလီလီ ဒီးအိၣ်သယုၢ်ဝဲလီၤ.+
ယကွၢ်ထီၣ်တၢ်လၢ မူခိၣ် ဒီးယတထံၣ်ဘၣ် တၢ်ကပီၤလၢၤဘၣ်.+
၂၄ ယထံၣ် ကစၢၢ်တဖၣ် ဟူးဝးဝဲဒီးတၢ်လူၢ်တဖၣ် တရုၤအသးလီၤ.+
၂၅ ယတထံၣ် ပှၤနီတဂၤဘၣ်.
ထိၣ်လၢအယူၤ လၢတၢ်ဖးဖီန့ၣ် ယူၤကွံာ်ဝဲလၢာ်လံ.+
၂၆ ယထံၣ်လၢ တၤသူတၤသၣ်အကရၢၢ် ကဲထီၣ်က့ၤ ပှၢ်မုၢ်ကနၢလံဒီးအဝ့ၢ်တဖၣ် ဘၣ်တၢ်မၤလီၤပှီၢ်ကွံာ်အီၤ ခဲလၢာ်လံ.+
တၢ်ကဲထီၣ်အသးအံၤန့ၣ် ခီဖျိလၢ ယဟိဝၤယွၤအဃိဒီးခီဖျိလၢ အသးဒိၣ်ထီၣ်တၢ် အဃိလီၤ.
၂၇ ယဟိဝၤယွၤ တဲဝဲလၢ “ကီၢ်ဒီတဘ့ၣ် ကအိၣ်သယုၢ်+ဘၣ်ဆၣ် ယတမၤဟးဂီၤကွံာ်အီၤ လၢာ်လၢာ်ဆ့ဆ့ဘၣ်.
၂၈ အဃိ ထံကီၢ် ကသးအုးဝဲ+ဒီးမူခိၣ် ကခံးလီၤဝဲလီၤ.+
ယတဲဝံၤလံ ဒီးယဆၢတဲာ်လီၤယသး ဝံၤလံ.
ယတက့ၤဆိကမိၣ် ကဒါက့ၤလၢၤဘၣ် ဒီးယတဆီတလဲ ယတၢ်ဆၢတဲာ်လၢၤဘၣ်.+
၂၉ ခီဖျိလၢ ပှၤဒိးကသ့ၣ်ဖိ ဒီးပှၤခးပျၢ်ဖိတဖၣ် အကလုၢ်သီၣ်အဃိပှၤဝ့ၢ်ဖိကိးဂၤဒဲး ဃ့ၢ်ကွံာ်ဝဲလီၤ.+
အဝဲသ့ၣ် လဲၤဃ့ၢ်နုာ်လၢ တပှီာ်ကျါဒီးအဝဲသ့ၣ် ထီၣ်လၢ လၢၢ်လိၤလီၤ.+
ဝ့ၢ်န့ၣ် ဘၣ်တၢ်ပာ်တ့ၢ်ကွံာ်အီၤ ကိးဝ့ၢ်ဒဲးဒီးပှၤတအိၣ်လၢ အပူၤ နီတဂၤလၢၤဘၣ်.”
၃၀ န* ဟးဂီၤလံအဃိ နကမၤဒ်လဲၣ်.
လၢညါန့ၣ် နကူထီၣ်ကၤထီၣ် တၢ်ကူတၢ်ကၤလၢ အဂီၤဆှုၣ်ကလာ်,နမၤဃံမၤလၤထီၣ်နသးလၢ တၢ်ကယၢကယဲလၢ ပှၤတ့အီၤလၢထူဒီးနဒွံးသူထီၣ် နမဲာ်လီၤ.
ဘၣ်ဆၣ် ပှၤလၢအလူၤနၤလၢ တၢ်သးကတၢအပူၤတဖၣ်န့ၣ် ပာ်တ့ၢ်နၤလံ.
ဒီးအဝဲသ့ၣ် ဃုမၤသံနၤလံ+အဃိ နဆဲၣ်ဃံဆဲၣ်လၤထီၣ်နသးန့ၣ် ခီလီလီလီၤ.+
၃၁ ယနၢ်ဟူတၢ်အသီၣ်လၢ အလီၤဂာ်ဒ်သိးဒီး ပိာ်မုၣ်လၢ အဆိးက့တဂၤ ဟီၣ်ကိးပသူဒီးဒ်ပိာ်မုၣ်တဂၤလၢ အအိၣ်ဖျဲၣ်ထီၣ် အဖိအဆိကတၢၢ်တဘျီ ကအုကစွါသီၣ်ဝဲလီၤ.
တၢ်အသီၣ်န့ၣ်မ့ၢ်ဝဲ စံယိၣ်အဖိမုၣ် အကလုၢ်သီၣ် ခီဖျိလၢ အဂုာ်ကသါအဃိလီၤ.
အဝဲ သလၣ်ထီၣ် အစုညါသး ဒီးတဲဝဲလၢ+“ခီဖျိလၢ ပှၤမၤသံတၢ်တဖၣ်အဃိ ယလီၤဘှံး ဒီးဘၣ်နးဘၣ်ဖှီၣ် လၢာ်လံ.”
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ယဟိဝၤယွၤ.
^ မ့ၢ်စ့ၢ်ကီး “ဒဲလီၤသုသးနါပှၢ်.”
^ ကွၢ် တၢ်ကတိၤအခီပညီ.
^ အခီပညီလိၤလိၤ “ယပှၤဂီၢ်မုၢ်အဖိမုၣ်.” မ့ၢ်ဝဲ တၢ်အဒိလၢထါပူၤ ဒီးဘၣ်သ့ၣ်သ့ၣ် မ့ၢ်ဝဲဒ်သိး ကပာ်ဖျါထီၣ် တၢ်သးကညီၤအဂီၢ်.
^ အခီပညီလိၤလိၤ “ယပှံာ်.”
^ မ့ၢ်ဝဲ ဝ့ၢ်ယရူၤၡလ့ၣ် လၢအမ့ၢ် ဝ့ၢ်စံယိၣ်.
