ယံးရမံယၤ ၄၉:၁-၃၉
-
ဝံအတၢ်စံးပာ်လၢ အဘၣ်ဃးဒီး တၢ်စံၣ်ညီၣ် ပှၤဧၣ်မိၣ်ဖိအဂ့ၢ် (၁-၆)
-
ဝံအတၢ်စံးပာ်လၢ အဘၣ်ဃးဒီး တၢ်စံၣ်ညီၣ် ပှၤအဒိၣ်ဖိအဂ့ၢ် (၇-၂၂)
-
ပှၤအဒိၣ်ဖိ တကဲဒ်ပှၤတကလုာ်အသိး လၢၤဘၣ် (၁၇, ၁၈)
-
-
ဝံအတၢ်စံးပာ်လၢ အဘၣ်ဃးဒီး တၢ်စံၣ်ညီၣ် ဝ့ၢ်ဒၤမ့ၤစ့းအဂ့ၢ် (၂၃-၂၇)
-
ဝံအတၢ်စံးပာ်လၢ အဘၣ်ဃးဒီး တၢ်စံၣ်ညီၣ် ကီၢ်က့ဒၢ် ဒီးဃါစိၢ်အဘီမုၢ်တဖၣ်အဂ့ၢ် (၂၈-၃၃)
-
ဝံအတၢ်စံးပာ်လၢ အဘၣ်ဃးဒီး တၢ်စံၣ်ညီၣ် ပှၤဧ့ၤလၣ်ဖိအဂ့ၢ် (၃၄-၃၉)
၄၉ ဘၣ်ဃးဒီး ပှၤဧၣ်မိၣ်ဖိန့ၣ်+ ယဟိဝၤယွၤ တဲဝဲဒ်အံၤလီၤ.
“စီၤအံၣ်စရ့လး အဖိခွါ တအိၣ် နီတဂၤဧီၤ.
ပှၤလၢ ကန့ၢ်သါဘၣ်အတၢ် တအိၣ် နီတဂၤဧီၤ.
ဘၣ်မနုၤအဃိ မၤလက့ၣ်*+ ဟံးန့ၢ်ဝဲ ပှၤကးဖိ အဟီၣ်ကဝီၤလဲၣ်.+
ဒီးဘၣ်မနုၤအဃိ မၤလက့ၣ် အပှၤဂီၢ်မုၢ်တဖၣ် အိၣ်ဝဲလၢ ပှၤအံၣ်စရ့လးဖိ အဝ့ၢ်တဖၣ်အပူၤလဲၣ်.”
၂ “ယဟိဝၤယွၤ တဲဝဲလၢ ‘တၢ်ဆၢကတီၢ် ကဟဲဝဲလၢယကဒုးနၢ်ဟူ ပှၤဧၣ်မိၣ်ဖိလၢ+ ဝ့ၢ်ရးဘးအပူၤ+ လၢတၢ်ဒုး အတၢ်ကိးပသူထီၣ်လီၤ.
ဒီးဝ့ၢ်န့ၣ် ကကဲထီၣ် တၢ်ဟးဂီၤအပူၣ်ဒီးအသဝီတဖၣ်န့ၣ် ပှၤကဒွဲၣ်အူထီၣ်ကွံာ်အီၤလီၤ.’
‘ပှၤအံၣ်စရ့လးဖိ ကမၤန့ၢ်ကဒါက့ၤ တၢ်လီၢ်တၢ်ကျဲလၢ ပှၤတဖၣ်န့ၣ် ဟံးန့ၢ်ဝဲလၢ အဝဲသ့ၣ် အအိၣ်လီၤ.’+ ယဟိဝၤယွၤ တဲဝဲ ဒ်န့ၣ်လီၤ.
၃ ‘ဝ့ၢ်ဂဲ ဘၣ်တၢ်မၤဟးဂီၤကွံာ်အီၤလံ. အဃိ ဝ့ၢ်ဃ့ၡဘိၣ် အပှၤဂီၢ်မုၢ်သ့ၣ်ဧၢ, ဟီၣ်ကိးပသူထီၣ်တက့ၢ်.
ပှၤအိၣ်လၢ ဝ့ၢ်ရးဘး အသဝီတဖၣ် အပူၤဧၢ, ကိးပသူထီၣ်တက့ၢ်.
ကူထီၣ်သိးထီၣ် ထၢၣ်တၢ်ကံးညာ်* တက့ၢ်.
ပှၤကက့ၤစိာ်ကွံာ် မၤလက့ၣ် ဒီးကက့ၤဖီၣ်အပှၤလုၢ်တၢ်ဒိၣ်တဖၣ် ဒီးအပဒိၣ် ဖးဒိၣ်တဖၣ် တပူၤဃီ+ အဃိဟီၣ်ကိးပသူ ဒီးဃ့ၢ်ဝ့ၤဝီၤလၢ ကရၢၢ်တဖၣ်အပူၤတက့ၢ်.
၄ ပိာ်မုၣ်လၢ အသးတတီဘၣ်ဧၢ, ဘၣ်မနုၤအဃိ နပာ်ကဖၢလၢ နသးလၢ နတၢ်တြီၤတဖၣ်ဒီးနတၢ်ပၢၤခိၣ်လၢ ထံယွၤလီၤဝဲ ဖဲန့ၣ် အဃိန့ၣ်လဲၣ်.
နသန့ၤနသးလၢ နတၢ်ထူး တၢ်တီၤတဖၣ်ဒီးနတဲလၢ ပှၤဟဲဒုးနၤ တဘူၣ်နီ တဂၤဘၣ်.’”
၅ “တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘ယကဒုးလီၤဘၣ်နၤလၢ တၢ်လီၤပျံၤလီၤဖုးတခါ လၢအဟဲလၢပှၤလၢအအိၣ်ဝးတရံးနၤန့ၣ် အအိၣ်လီၤ.
နကဘၣ် တၢ်မၤလီၤပြံလီၤပြါနၤ လၢတၢ်လီၢ်ကိးကပၤဒဲးဒီးပှၤလၢအဃ့ၢ်ကွံာ်တဖၣ်န့ၣ် ပှၤတပာ်ဖှိၣ်ထီၣ်က့ၤ အဝဲသ့ၣ် နီတဂၤဘၣ်.’”
၆ “ယဟိဝၤယွၤ တဲဝဲလၢ ‘ဘၣ်ဆၣ် လၢခံ ယကပာ်ဖှိၣ်ထီၣ်က့ၤ ပှၤဧၣ်မိၣ်ဖိလၢ အဘၣ်တၢ်က့ၤဖီၣ်အီၤ တဖၣ်လီၤ.’”
၇ ဘၣ်ဃးဒီး ကီၢ်အဒိၣ်န့ၣ် ယဟိဝၤယွၤ တဲဝဲဒ်အံၤလီၤ.
“လၢဝ့ၢ်တ့ၤမၣ်+ အပူၤန့ၣ် တၢ်ကူၣ်သ့ တအိၣ်လၢၤဧီၤ.
ပှၤလၢအအိၣ်ဒီး တၢ်သ့ၣ်ညါနၢ်ပၢၢ်တဖၣ် အတၢ်ကူၣ်သ့လၢအဂ့ၤန့ၣ် ဟးဂီၤကွံာ်လံဧါ.
အဝဲသ့ၣ် အတၢ်ကူၣ်သ့ ကဲထီၣ် တၢ်ကလီကလီလံဧါ.
၈ ဖဲတၢ်ဆၢကတီၢ်ဘၣ်လၢ ယက စံၣ်ညီၣ် စီၤဧ့ၡီၤ အစၢၤအသွဲၣ်တဖၣ်အခါယကမၤဟးဂီၤ အဝဲသ့ၣ်လီၤ.
သုဝဲလၢ အအိၣ်လၢ ဒဒၣ်တၢ်လီၢ်သ့ၣ်ဧၢ,+ ဂုၤက့ၤသုလီၢ်ခံ ဒီးဃ့ၢ်ထီၣ်ကွံာ်သၢၤ.
လဲၤအိၣ်ခူသူၣ်လၢ တၢ်တြီၤလၢအယိာ်တဖၣ် အပူၤတက့ၢ်.
၉ ပှၤလၢ အဒဲးစပံးသၣ်တဖၣ် မ့ၢ်လဲၤလၢနအိၣ်န့ၣ်အဝဲသ့ၣ် ကပာ်တ့ၢ်ဝဲ စပံးသၣ်တနီၤလၢ ပှၤဂၤကထၢဖှိၣ်ဝဲ အဂီၢ်လီၤ.
ဒီးတၢ်ဟုၣ်တၢ်ဘျၣ် မ့ၢ်ဟဲဝဲလၢ မုၢ်နၤခီန့ၣ်အဝဲသ့ၣ် ကဟံးန့ၢ်ဝဲ ထဲတၢ်လၢ အဝဲသ့ၣ် လီကီဝဲတဖၣ်လီၤ.+
၁၀ မ့မ့ၢ်ယၤန့ၣ် ယကဟံးန့ၢ်ကွံာ် တၢ်လၢအအိၣ်ဒီး စီၤဧ့ၡီၤ အစၢၤအသွဲၣ် ခဲလၢာ်ခဲဆ့လီၤ.
ဒ်သိး အဝဲသ့ၣ် အိၣ်ခူသူၣ် သုတသ့တဂ့ၤအဂီၢ်ယကမၤဖျါထီၣ် အတၢ်အိၣ်ခူသူၣ် အလီၢ်တဖၣ်လီၤ.
ဒီးအဝဲသ့ၣ် ကဟးဂီၤကွံာ် တကးဒံးဘၣ် အဝဲသ့ၣ်အဖိ, အဘူးအတံၢ် ဒီးပှၤလၢအခိၣ်အဃၢၤတဖၣ်+ကဘၣ်တၢ်မၤဟးဂီၤအီၤ ခဲလၢာ်လီၤ.+
၁၁ ပာ်တ့ၢ် နပှၤဖိၣ်ဃဲဖိတဖၣ်ဒီးယကပာ်မူ အဝဲသ့ၣ်လီၤ.
ဒီးနပှၤမုၣ်ကမဲတဖၣ် ကသန့ၤအသးလၢယၤလီၤ.”
၁၂ ယဟိဝၤယွၤ တဲဝဲလၢ “ပှၤအိၣ်တနီၤလၢ တၢ်တဟ့ၣ်လီၤ တၢ်ကလုၢ်လၢ အဘၣ်အီ တၢ်အိၣ်လၢ တၢ်သးဒိၣ်အခွးပူၤဘၣ် သနာ်က့ အဝဲသ့ၣ် ဘၣ်အီဒံးဝဲလီၤ. မ့မ့ၢ်ဒ်န့ၣ်န့ၣ် နၤန့ၣ် မ့ၢ်နတကြၢးဘၣ် တၢ်စံၣ်ညီၣ် နီတစဲးဧီၤ. နတပူၤဒီး တၢ်စံၣ်ညီၣ်ဘၣ်, နဘၣ်အီ တၢ်အိၣ်လၢ တၢ်သးဒိၣ်အခွးပူၤ သပှၢ်တၢၢ်လီၤ.”+
၁၃ ယဟိဝၤယွၤ တဲဝဲလၢ “ယအၢၣ်လီၤတၢ်လၢ ယနီၢ်ကစၢ်လၢ ဝ့ၢ်ဘိးစရၤ ကကဲထီၣ် တၢ်လီၤပျံၤလီၤဖုးအလီၢ်,+ တၢ်ဒုၣ်ဒွဲၣ်အလီၢ်, တၢ်ဟးဂူာ်ဟးဂီၤအလီၢ် ဒီးတၢ်ဆိၣ်အၢအလီၢ်လီၤ. ဒီးအဝ့ၢ်ခဲလၢာ် ကကဲထီၣ် တၢ်ဟးဂီၤအလီၢ် လီၤထူလီၤယိာ်လီၤ.”+
၁၄ ယနၢ်ဟူဘၣ် တၢ်ကစီၣ်လၢ အဟဲလၢ ယဟိဝၤယွၤအအိၣ်ဒီးအဝဲဆှၢလီၤ ပှၤခၢၣ်စးတၢ်လၢ ပှၤကလုာ်တဖၣ် အအိၣ်လၢ အတဲဝဲလၢ“ကတဲာ်ကတီၤထီၣ်သးလၢ တၢ်ဒုးအဂီၢ်တက့ၢ်.
ပာ်ဖှိၣ်ထီၣ်သုသး တပူၤဃီ ဒီးလဲၤထီၣ်ဒုးအီၤ* တက့ၢ်.”+
၁၅ “ယမၤကဲထီၣ်နၤလၢ ပှၤလၢ အရ့တဒိၣ်ဘၣ်လၢ ပှၤကလုာ် တဖၣ်အကျါဒီးပှၤဆိမိၣ်ဆံးနၤလံ.+
၁၆ နအိၣ်နဆိးလၢ တၢ်အိၣ်သဒၢအလီၢ်လၢ လ့ဖးထီဖဲတၢ်လူၢ်လၢ အအိၣ်ထီၣ်ထီကတၢၢ် အလိၤလီၤ.
နမၤပျံၤမၤဖုးပှၤဂၤဒီးနတၢ်ပာ်ထီၣ်ထီသးန့ၣ် မ့ၢ်တၢ်လၢ အဆှၢကမၣ်နၤလီၤ.
နတ့ထီၣ်နသွံလၢ တၢ်လီၢ်ဖးထီ ဒ်သိးဒီး လံာ်ကြီကြာ် ဘၣ်ဆၣ်
ယကတွံၢ်လီၤက့ၤနၤ ဖဲန့ၣ်လီၤ.” ယဟိဝၤယွၤ တဲဝဲဒ်န့ၣ်လီၤ.
၁၇ “ကီၢ်အဒိၣ် ကဘၣ်ကဲထီၣ် တၢ်လီၤပျံၤလီၤဖုးအလီၢ်လီၤ.+ ပှၤကိးဂၤဒဲး လၢအလဲၤဘၣ်ကျဲ ဖဲအကပၤန့ၣ် ကကွၢ်ထံအီၤ လၢတၢ်ပျံၤတၢ်ဖုးအပူၤ ဒီးခီဖျိလၢ အတၢ်နးတၢ်ဖှီၣ် အဃိ ပှၤကထံၣ်ဆံးအီၤလီၤ.*
၁၈ ပှၤတအိၣ်ဖဲန့ၣ် နီတဂၤလၢၤဘၣ် ဒီးပှၤတဆီလီၤ အတၢ်အိၣ်တၢ်ဆိးအလီၢ် ဖဲန့ၣ်လၢၤဘၣ်.+ အကဘၣ်တၢ်မၤဟးဂီၤအီၤ ဒ်ဝ့ၢ်စဒိၣ်ဒီး ဝ့ၢ်ဂမိရၤ ဒီးအဝ့ၢ်ဖိလၢ အခိၣ်အဃၢၤတဖၣ် အသိးလီၤ.”+ ယဟိဝၤယွၤ တဲဝဲဒ်န့ၣ်လီၤ.
၁၉ “ပှၤတဂၤ ကဟဲထီၣ်ဒုးကီၢ်အဒိၣ် အတၢ်အီၣ်ဆၣ်အလီၢ်လၢ အအိၣ်ဘံၣ်ဘံၣ်ဘၢဘၢတဖၣ် ဒ်ခ့ယုၢ်တဒု+ ဟဲထီၣ်လၢ သ့ၣ်တပှီာ်တီၣ်အလီၢ်လၢ ထံကျိယၢ်ဒ့ၣ် အကပၤလီၤ. ဒီးလၢတဖျးမဲာ် အတီၢ်ပူၤန့ၣ် ယကဒုးဃ့ၢ်ထီၣ်ကွံာ် ပှၤအဒိၣ်ဖိလၢ အနီၢ်ကစၢ် တၢ်လီၢ်လီၤ. ဒီးယကပာ်ထီၣ် ခိၣ်နၢ်လၢ ယဃုထၢအီၤတဂၤလၢ အဝဲသ့ၣ် အတၢ်လီၢ် အဖီခိၣ်လီၤ. ပှၤလၢအလီၤဂာ်ဒီးယၤ အိၣ်တဂၤဂၤဧါ, ပှၤလၢအမၤပတုာ်ယၤန့ၣ် အိၣ်တဂၤဂၤဧါ. ပှၤကွၢ်သိလၢ အဆၢထၢၣ်လၢ ယမဲာ်ညါကဲန့ၣ် မ့ၢ်မတဂၤလဲၣ်.+
၂၀ အဃိ ဒိကနၣ် တၢ်ဆၢတဲာ်လၢ ယဟိဝၤယွၤ မၤဝဲလၢ အထီဒါ ကီၢ်အဒိၣ် ဒီးအတၢ်ကူၣ်လၢ အထီဒါ ပှၤလၢအအိၣ်လၢ ဝ့ၢ်တ့ၤမၣ်အပူၤန့ၣ်တက့ၢ်.+
ခီဖျိတၢ်လၢ အဝဲသ့ၣ်မၤတ့ၢ်ဝဲအဃိ ကစၢ်ယွၤ ကဒုးအိၣ်သယုၢ် သိဖိ အတၢ်အီၣ်ဆၣ်အလီၢ်ဒီးသိဖိတဖၣ်လၢ သိတဖုအကျါန့ၣ် ကဘၣ်တၢ်တွံၢ်ထုးကွံာ်အီၤ သပှၢ်တၢၢ်လီၤ.+
၂၁ ဖဲအဝဲသ့ၣ် လီၤပှီၢ်အခါ တၢ်သီၣ်ထီၣ်ဖးဒိၣ်အဃိ ဟီၣ်ခိၣ်ဟူးဝဲလီၤ.
ဖဲန့ၣ်န့ၣ် တၢ်ဟီၣ်ကိးပသူ သီၣ်ထီၣ်ဝဲဒီးတၢ်အသီၣ်န့ၣ် ဟူဝဲပၢၢ်တုၤလၢ ပီၣ်လဲၣ်ဂီၤလီၤ.+
၂၂ ကွၢ်မီၤ, ဒ်လံာ်ကြီကြာ် ယူၤလီၤ ဖီၣ်စှီၤတၢ်အသိး+ပှၤတဂၤ ကသလၣ်ထီၣ်အဒံးလၢ ဝ့ၢ်ဘိးစရၤ အဖီခိၣ်လီၤ.+
ဖဲတၢ်တနံၤန့ၣ် ကီၢ်အဒိၣ်အသုးဖိလၢ အဂံၢ်ဆူၣ်ဘါဆူၣ်တဖၣ် ကပျံၤတၢ်ဖုးတၢ်ဒ်ပှၤပိာ်မုၣ်လၢ အဟုးဆါ ဒီးဘူးကအိၣ်ဖျဲၣ်ထီၣ်အဖိ အသိးလီၤ.”
၂၃ တၢ်ကစီၣ်လၢ ဝ့ၢ်ဒၤမ့ၤစ့းအဂီၢ် အိၣ်ဝဲဒ် လၢလာ်အံၤအသိးလီၤ.+
“ပှၤအိၣ်လၢ ဝ့ၢ်ဃမါသး+ ဒီးဝ့ၢ်အၢ်ပးအပူၤန့ၣ် နၢ်ဟူဘၣ် တၢ်ကစီၣ်လၢ အတဂ့ၤဘၣ်အဃိအဝဲသ့ၣ် ဖုးဘၣ်အသးဒီးအဝဲသ့ၣ် အသးဂံၢ်ဘါ လီၤစၢ်လၢာ်လံ.
ပှၤဂီၢ်မုၢ်အံၤ ဘၣ်ကိၢ်ဘၣ်ဂီၤ လီၤဂာ်ဒ်သိးဒီး ပီၣ်လဲၣ်လၢ အဟူးဝးဆှဲးဆှိးလီၤ.
၂၄ ပှၤလၢအအိၣ်လၢ ဝ့ၢ်ဒၤမ့ၤစ့းန့ၣ် အတၢ်သးဒူ လီၤမၢ်ကွံာ်လံ.
အဝဲသ့ၣ် အဲၣ်ဒိးဃ့ၢ်ကွံာ် ဘၣ်ဆၣ် အဝဲသ့ၣ် ပျံၤတၢ်ဒိၣ်မးလီၤ.
အဝဲသ့ၣ် ဘၣ်ကိၢ်ဘၣ်ဂီၤ ဒီးတူၢ်ဘၣ်တၢ်ဆါနးမးဒ်ပိာ်မုၣ်လၢ အအိၣ်ဖျဲၣ်ထီၣ်အဖိ အသိးလီၤ.
၂၅ ဝ့ၢ်လၢအပှဲၤဒီး တၢ်လၤကပီၤ ဒီးတၢ်သူၣ်ခုသးခုန့ၣ်ဘၣ်မနုၤအဃိ ပှၤတပာ်တ့ၢ်ကွံာ်အီၤ ဒံးဘၣ်လဲၣ်.
၂၆ ဖဲတၢ်တနံၤန့ၣ် အပှၤပိာ်ခွါသးစၢ် ကလီၤဃံၢ်လၢ အတၢ်ဆါတၢ်ပှ့ၤအလီၢ်ဒီးအပှၤသုးဖိခဲလၢာ် ကဟးဂီၤဝဲလီၤ.” တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲဒ်န့ၣ်လီၤ.
၂၇ “ယကဒွဲၣ်အူထီၣ်ကွံာ် ဝ့ၢ်ဒၤမ့ၤစ့း အဝ့ၢ်ဒူၣ်ဒီးမ့ၣ်အူကအီၣ်ကွံာ် စီၤဘ့ၣ်ဟဒး အတၢးလၢအကျၢၤတဖၣ်လီၤ.”+
၂၈ ဘၣ်ဃးဒီး ကီၢ်က့ဒၢ်+ ဒီးဃါစိၢ်အဘီမုၢ်တဖၣ် လၢဘၤဘူၤလိၣ် အစီၤပၤနဘူၤကးန့စၢ် မၤနၢၤတ့ၢ်ဝဲန့ၣ် ယဟိဝၤယွၤ တဲဝဲဒ်အံၤလီၤ.
“ဂဲၤဆၢထၢၣ်လဲၤလၢ ကီၢ်က့ဒၢ်ဒီးမၤဟးဂီၤကွံာ် ပှၤမုၢ်ထီၣ်ဖိတဖၣ်န့ၣ်တက့ၢ်.
၂၉ ဟံးန့ၢ်ကွံာ် အဝဲသ့ၣ် အဒဲတဖၣ် ဒီးအသိတဖၣ်,အဝဲသ့ၣ် အဒဲအတၢ်ကံးညာ်တဖၣ် ဒီးအတၢ်ဖိတၢ်လံၤလၢ အဂ့ၤ ခဲလၢာ်တက့ၢ်.
ဟံးန့ၢ်ကွံာ်အဝဲသ့ၣ် အကီၤလၤအူးတဖၣ်တက့ၢ်.
ဒီးပှၤကကိးပသူထီၣ်လၢ ပှၤက့ဒၢ်ဖိအအိၣ်လၢ ‘တၢ်ပျံၤတၢ်ဖုး အိၣ်ဝဲဝးဝးလီၤ.’”
၃၀ ယဟိဝၤယွၤ တဲဝဲလၢ “ပှၤဃါစိၢ်ဖိသ့ၣ်ဧၢ,ဘၤဘူၤလိၣ် အစီၤပၤနဘူၤကးန့စၢ် ကူၣ်ထီၣ်တၢ်လၢ ကထီဒါသုဒီးအဝဲရဲၣ်ကျဲၤဝဲလၢ ကဒုးသုလံ.
အဃိ ဃ့ၢ်ကွံာ်မ့ၢ်ယံၤ ဒီးလဲၤ အိၣ်ခူသူၣ်လၢ တၢ်တြီၤလၢ အယိာ်တဖၣ် အပူၤတက့ၢ်.”
၃၁ ယဟိဝၤယွၤ တဲဝဲလၢ “ဆၢထၢၣ်, လဲၤထီၣ်ဒုး ပှၤတကလုာ်လၢ အအိၣ်ဒီးတၢ်မုာ်တၢ်ခုၣ်ဒီးအိၣ်ဘၣ် ဘံၣ်ဘံၣ်ဘၢဘၢတက့ၢ်.
ဖဲန့ၣ်န့ၣ် တြဲၤဒီး နီၣ်ဘိတဖၣ် တအိၣ်ဘၣ် ဒီးအဝဲသ့ၣ် အိၣ်ယံၤဒီးပှၤဂၤတဖၣ်လီၤ.
၃၂ အဝဲသ့ၣ် အကီၤလၤအူးတဖၣ်ဒီးအဆၣ်ဖိကီၢ်ဖိတဖၣ် ကဘၣ်တၢ်ဂုာ်န့ၢ်အီၤလီၤ.
ပှၤဂီၢ်မုၢ်လၢတံာ်ဖုၣ်လီၤ အနၢ်သက့ၤထံးတဖၣ်အံၤ+ယကမၤလီၤပြံလီၤပြါ အဝဲသ့ၣ်လၢ တၢ်လီၢ်အဂၤဝးဝး*ဒီးယကဒုးဟဲဘၣ် အဝဲသ့ၣ်လၢ တၢ်ကီတၢ်ခဲလၢ တၢ်လီၢ်ကိးကပၤဒဲးလီၤ.” ယဟိဝၤယွၤ တဲဝဲ ဒ်န့ၣ်လီၤ.
၃၃ “ဃါစိၢ်အဟီၣ်ကဝီၤ ကကဲထီၣ် တၢ်လီၢ်လၢ ထွံၣ်မံၤတဖၣ် ကအိၣ်ဝဲဒီးကအိၣ်သယုၢ်ဝဲ လီၤထူလီၤယိာ်လီၤ.
ပှၤတအိၣ်ဖဲန့ၣ် နီတဂၤလၢၤဘၣ်ဒီးပှၤတဆီလီၤ အတၢ်အိၣ်တၢ်ဆိးအလီၢ် ဖဲန့ၣ်လၢၤဘၣ်.”
၃၄ ဖဲယူဒၤ အစီၤပၤစံးဒကံယၤ+ စးထီၣ်ပၢတၢ် သီသီအခါ ဘၣ်ဃးဒီး ပှၤဧ့ၤလၣ်ဖိန့ၣ်+ ယဟိဝၤယွၤ တဲဘၣ် ဝံယံးရမံယၤ ဒ်အံၤလီၤ.
၃၅ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘ယကမၤကၢ်ကွံာ် ပှၤဧ့ၤလၣ်ဖိ+ အချံၣ်လၢအမ့ၢ် အဝဲသ့ၣ် အတၢ်ဂံၢ်တၢ်ဘါ အဂံၢ်ခီၣ်ထံးလီၤ.
၃၆ ယကဒုးဟဲဘၣ် ပှၤဧ့ၤလၣ်ဖိလၢ ကလံၤလၢ အကဟဲလၢ ဟီၣ်ခိၣ်အနၢၣ်လွံၢ်နၢၣ်လၢာ် ဒီးယကမၤလီၤပြံလီၤပြါ အဝဲသ့ၣ်ဆူ တၢ်လီၢ်ခဲလၢာ်လီၤ.* ပှၤဧ့ၤလၣ်ဖိလၢ အလီၤပြံလီၤပြါတဖၣ်အံၤန့ၣ် ကလဲၤအိၣ်လၢ ပှၤကိးကလုာ်ဒဲးအကျါလီၤ.’”
၃၇ ယဟိဝၤယွၤ တဲဝဲလၢ “ယကမၤပျံၤမၤဖုး ပှၤဧ့ၤလၣ်ဖိလၢ အဝဲသ့ၣ် အဒုၣ်အဒါ ဒီးပှၤလၢ အဃုမၤသံ အဝဲသ့ၣ်တဖၣ် အမဲာ်ညါလီၤ. ဒီးယကဒုးဘၣ် အဝဲသ့ၣ်လၢ တၢ်ကီတၢ်ခဲ ဒီးယကပာ်ဖျါထီၣ် ယတၢ်သးထီၣ်လၢ အဝဲသ့ၣ်အဖီခိၣ်လီၤ. ယကဆှၢလီၤ နးတဘ့ၣ်လၢ အကလဲၤလူၤအဝဲသ့ၣ် တုၤလၢ ယမၤဟးဂီၤကွံာ် အဝဲသ့ၣ် ခဲလၢာ်လီၤ.”
၃၈ ယဟိဝၤယွၤ တဲဝဲလၢ “ယကဆီလီၤ ယလီၢ်ပစိာ်လၢ ပှၤဧ့ၤလၣ်ဖိ အဟီၣ်ကဝီၤ+ ဒီးယကမၤဟးဂီၤကွံာ် ပှၤဧ့ၤလၣ်ဖိအစီၤပၤ ဒီးအပဒိၣ်ဖးဒိၣ်တဖၣ်လီၤ.”
၃၉ ယဟိဝၤယွၤ တဲဝဲလၢ “ဘၣ်ဆၣ် လၢမုၢ်နံၤအကတၢၢ်တဖၣ် အတီၢ်ပူၤန့ၣ် ယကပာ်ဖှိၣ်ထီၣ်က့ၤ ပှၤဧ့ၤလၣ်ဖိလၢ အဘၣ်တၢ်က့ၤဖီၣ်အီၤတဖၣ်လီၤ.”
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ ကွၢ် တၢ်ကတိၤအခီပညီ.
^ မ့ၢ်ဝဲ ပှၤအဒိၣ်ဖိ.
^ အခီပညီလိၤလိၤ “ကွ့ကလံၤ လၢအဃိ.”
^ အခီပညီလိၤလိၤ “ကလံၤကျိၤ ကိးကျိၤဒဲး.”
^ အခီပညီလိၤလိၤ “ဆူကလံၤတဖၣ်အံၤခဲလၢာ်.”
