ယံးရမံယၤ ၅၀:၁-၄၆
၅၀ တၢ်ကစီၣ်လၢ အဘၣ်ဃးဒီး ဘၤဘူၤလိၣ်+ လၢအမ့ၢ် ပှၤက့ၤစ့းဖိတဖၣ် အတၢ်လီၢ်န့ၣ် ယဟိဝၤယွၤ တဲဝဲခီဖျိ ဝံယံးရမံယၤ ဒ်လၢလာ်အံၤ အသိးလီၤ.
၂ “တဲဖျါထီၣ် တၢ်ကစီၣ်န့ၣ်လၢ ပှၤကလုာ်တဖၣ်အကျါ ဒီးဘိးဘၣ်သ့ၣ်ညါအီၤတက့ၢ်.
ဆီလီၤတၢ်ပနီၣ်တခါ ဒီးဘိးဘၣ်သ့ၣ်ညါ တၢ်ကစီၣ်န့ၣ်တက့ၢ်.
တဘၣ် ပာ်ခူသူၣ်တၢ်ဂ့ၢ် နီတမံၤတဂ့ၤ.
တဲလၢ ‘ဘၤဘူၤလိၣ် ဘၣ်တၢ်ဖီၣ်န့ၢ်အီၤလံ.+
ဘ့လးန့ၣ် ဘၣ်တၢ်မၤမဲာ်ဆှးအီၤ+ဒီးမရိဒး* ပျံၤတၢ်ဖုးတၢ်လံ.
ဘၤဘူၤလိၣ် အတၢ်ဂီၤတၢ်ဖှီၣ်တဖၣ် ဘၣ်တၢ်မၤမဲာ်ဆှးအီၤလံဒီးအတၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ်န့ၣ် ပျံၤတၢ် ဖုးတၢ်လံ.’
၃ ပှၤတကလုာ် လၢအအိၣ်လၢ ကလံၤစိးတခီန့ၣ် ဟဲထီဒါ ဘၤဘူၤလိၣ်လံ.+
ပှၤတကလုာ်န့ၣ် ဒုးကဲထီၣ် ဘၤဘူၤလိၣ်လၢ တၢ်လီၤပျံၤလီၤဖုးအလီၢ်အဃိ ပှၤတအိၣ်လၢ အပူၤ နီတဂၤလၢၤဘၣ်.
ပှၤကညီမ့ၢ်ဂ့ၤ ဆၣ်ဖိကီၢ်ဖိမ့ၢ်ဂ့ၤ တအိၣ်လၢၤဘၣ်,အဝဲသ့ၣ် ဃ့ၢ်ထီၣ်ကွံာ်လၢာ်လံ.”
၄ ယဟိဝၤယွၤ တဲဝဲလၢ “ဖဲန့ၣ်အဆၢကတီၢ် ဒီးလၢမုၢ်နံၤတဖၣ်န့ၣ် အတီၢ်ပူၤ အံၣ်စရ့လးအပှၤဂီၢ်မုၢ် ဒီးယူဒၤအပှၤဂီၢ်မုၢ် ကဟဲသကိး ဒ်သိးသိးလီၤ.+ အဝဲသ့ၣ် ကဟဲဝဲတခီခီ ကဟီၣ်ဝဲတခီခီ+ ဒီးအဝဲသ့ၣ် ကဃုတၢ်ဟံးစုနဲၣ်ကျဲလၢ အဝဲသ့ၣ် အကစၢ် ယဟိဝၤယွၤ အအိၣ်လီၤ.+
၅ အဝဲသ့ၣ် ကသံကွၢ်ဝဲ ကျဲလၢအလဲၤလၢ ဝ့ၢ်စံယိၣ်တကပၤန့ၣ် အိၣ်ဖဲလဲၣ်. ဒီးအဝဲသ့ၣ် ကဃၣ်ဃီၤအသးလၢ ကျဲတဘိန့ၣ်+ ဒီးကတဲဝဲလၢ ‘ဟဲ, ပကကဲထီၣ်ကဒါက့ၤ ယဟိဝၤယွၤ အပှၤဂီၢ်မုၢ် ခီဖျိလၢ တၢ်အၢၣ်လီၤအီလီၤ အထူအယိာ်လၢ တၢ်တသးပ့ၤနီၣ်အီၤ နီတဘျီဘၣ်လီၤ.’+
၆ ယပှၤဂီၢ်မုၢ် ကဲထီၣ်သိတဖုလၢ အလီၤမၢ်လီၤ.+ အပှၤကွၢ်သိတဖၣ်န့ၣ် ဆှၢကမၣ် အဝဲသ့ၣ်အကျဲလီၤ.+ ပှၤကွၢ်သိတဖၣ်န့ၣ် ဒုးလဲၤအဝဲသ့ၣ်လၢ ကစၢၢ်ကလိကျါ ဒီးအဝဲသ့ၣ် ဘၣ်ဟးဝ့ၤဝီၤလၢ ကစၢၢ်ခိၣ်ဒီးတၢ်လူၢ်ခိၣ်လီၤ. ဒီးအဝဲသ့ၣ် သးပ့ၤနီၣ်ကွံာ် အတၢ်အိၣ်ဘှံး အလီၢ်လီၤ.
၇ ကယဲၢ်ပှၤလၢ အထံၣ်န့ၢ် အဝဲသ့ၣ်န့ၣ် အီၣ်ကွံာ် အဝဲသ့ၣ်လီၤ.+ အဝဲသ့ၣ် အဒုၣ်အဒါတဖၣ်အံၤ တဲဝဲလၢ ‘အဝဲသ့ၣ် မၤကမၣ် ယဟိဝၤယွၤ ဒီးခီဖျိလၢ အဝဲသ့ၣ် မၤကမၣ် ယဟိဝၤယွၤ လၢအမ့ၢ် တၢ်တီတၢ်လိၤ အဂံၢ်ခီၣ်ထံး ဒီးအဝဲသ့ၣ် အမိၢ်ပၢ်ဖံဖု လၢပျၢၤတဖၣ် အတၢ်မုၢ်လၢ်အဃိ ပမၤအဝဲသ့ၣ်ဒ်အံၤ သနာ်က့ ပတၢ်ကမၣ်တအိၣ်ဘၣ်.’”
၈ “ဃ့ၢ်ထီၣ်ကွံာ်လၢ ဘၤဘူၤလိၣ် အပူၤတက့ၢ်.
ဟးထီၣ်ကွံာ်လၢ ပှၤက့ၤစ့းဖိတဖၣ် အတၢ်လီၢ်+ဒီးကဲထီၣ် ဒ်သိးဒီး သိဖါတဖၣ်လၢ အဟးထီၣ်ဆိလၢ သိတဖု အမဲာ်ညါတက့ၢ်.
၉ ခဲအံၤ ယကကိးန့ၢ် ပှၤကလုာ်ဖးဒိၣ်တဖၣ်လၢ အပာ်ဖှိၣ်ထီၣ်အသးလၢ ကီၢ်လၢကလံၤစိးတခီဒီးဒုးဟဲ အဝဲသ့ၣ်လၢ ဘၤဘူၤလိၣ် အအိၣ်လီၤ.+
ဒီးအဝဲသ့ၣ် ကလဲၤဆီလီၤအသး ဒ်သိး ကဒုး ဘၤဘူၤလိၣ်အဂီၢ်ဒီးကမၤန့ၢ် ဘၤဘူၤလိၣ်လီၤ.
အဝဲသ့ၣ် အပျၢ်တဖၣ်န့ၣ် လီၤဂာ် ဒ်သိးဒီး ပှၤသုးဖိလၢ အဂံၢ်ဆူၣ် ဘါဆူၣ် အပျၢ်တဖၣ်လၢအမၤသံ ပှၤဖိတဖၣ်လီၤ.+
အဝဲသ့ၣ် ခးဝဲအပျၢ်တဖၣ်န့ၣ် ဘၣ်ဝဲထီဘိလီၤ.
၁၀ ပှၤကဂုာ်န့ၢ် တၢ်အိၣ်လၢ ပှၤက့ၤစ့းဖိ အတၢ်လီၢ်လီၤ.+
ဒီးကယဲၢ်ပှၤလၢ အဂုာ်န့ၢ် တၢ်ဖိတၢ်လံၤလၢ အအိၣ်ဖဲန့ၣ်တဖၣ်န့ၣ် ကသူၣ်မံသးမုာ်ဝဲ သပှၢ်တၢၢ်လီၤ.”+ ယဟိဝၤယွၤ တဲဝဲဒ်န့ၣ်လီၤ.
၁၁ “ဖဲသုဂုာ်န့ၢ် ယတၢ်န့ၢ်သါအခါ+သုသးခု+ ဒီးသုသူၣ်ဖှံသးညီ သပှၢ်တၢၢ်လီၤ.
သုဟးဖုကဆဲး ဒ်သိးဒီး ကျီၢ်မိၢ်ကနီဖိလၢ နီၣ်ကျါဒီးသုကိးသီၣ် ဟံးဟံးဟဲးဟဲး ဒ်ကသ့ၣ်ဖါတဖၣ် အသိးလီၤ.
၁၂ သုမိန့ၣ် ဘၣ်တၢ်မၤမဲာ်ဆှးအီၤလံ.+
ပှၤလၢ အအိၣ်ဖျဲၣ်ထီၣ်သုန့ၣ် အသးဟးဂီၤလံ.
လၢပှၤကလုာ်တဖၣ် အကျါန့ၣ် အကဲထီၣ် ဒ်သိးဒီး ပှၤလၢအပတီၢ် ဖုၣ်ကတၢၢ်,ဒ်ပှၢ်မုၢ်ကနၢ ဒီးမဲးမုၢ်ပျီလၢ ထံတအိၣ်ဘၣ် အသိးလံ.+
၁၃ ခီဖျိလၢ ယဟိဝၤယွၤ အတၢ်သးထီၣ်အဃိ ပှၤတအိၣ်လၢ ဘၤဘူၤလိၣ်အပူၤ နီတဂၤလၢၤဘၣ်.+
အကကဲထီၣ် တၢ်အိၣ်သယုၢ်အလီၢ် သပှၢ်တၢၢ်လီၤ.+
ပှၤတဂၤဂ့ၤ တဂၤဂ့ၤလၢ အလဲၤဘၣ်ကျဲ ဖဲအကပၤန့ၣ် ကကွၢ်ထံအီၤလၢ တၢ်ပျံၤတၢ်ဖုးအပူၤဒီးခီဖျိလၢ အတၢ်နးတၢ်ဖှီၣ်အဃိ ပှၤကထံၣ်ဆံးအီၤလီၤ.*+
၁၄ ပှၤကိးဂၤဒဲးလၢ အဖ့ၣ်ထီၣ် အချံၣ်သ့ၣ်ဧၢ,ဟဲဆီလီၤသုသး ဝးတရံး ဘၤဘူၤလိၣ် ဒ်သိးသုကဒုးအီၤတက့ၢ်.
ခီဖျိလၢ အမၤကမၣ် ယဟိဝၤယွၤအဃိ+ခးအီၤ ဒီးတဘၣ်ပာ်တ့ၢ် ပျၢ်ဘိ နီတဘိတဂ့ၤ.+
၁၅ ကိးပသူထီၣ်လၢ ဘၤဘူၤလိၣ်အဃၢၤဝးဝး ဒီးဒုးအီၤတက့ၢ်.
အဟ့ၣ်ၡူကွံာ် အသးလံ.
မ့ၢ်လၢ ယဟိဝၤယွၤ ဟ့ၣ်ကၣ်က့ၤအီၤ အဃိဘၤဘူၤလိၣ်အထူၣ်တဖၣ် လီၤကူၢ်ကွံာ်ဝဲ ဒီးအဝ့ၢ်ဒူၣ်တဖၣ် လီၤပှီၢ်ကွံာ်ဝဲလံ.+
မၤကၣ်က့ၤအီၤ+ဒီးမၤအီၤဒ် တၢ်လၢအမၤတ့ၢ်ဝဲ အသိးတက့ၢ်.+
၁၆ လၢဘၤဘူၤလိၣ် အပူၤန့ၣ် ပှၤဖှံ တၢ်ချံမ့ၢ်ဂ့ၤ ပှၤလၢ အသူဝဲထါဂဲာ် ဒ်သိး ကကူးတၢ်အဂီၢ်မ့ၢ်ဂ့ၤမၤသံကွံာ် အဝဲသ့ၣ် တက့ၢ်.+
ခီဖျိလၢ နးလၢ အလီၤပျံၤလီၤဖုး တဘ့ၣ်အံၤအဃိ ပှၤတဂၤစုာ်စုာ် ကက့ၤဝဲလၢ အနီၢ်ကစၢ် အပှၤကလုာ်အအိၣ်ဒီးပှၤတဂၤစုာ်စုာ် ကက့ၤဃ့ၢ်ကွံာ်ဝဲလၢ အနီၢ်ကစၢ် အထံအကီၢ်လီၤ.+
၁၇ “အံၣ်စရ့လး အပှၤဂီၢ်မုၢ်န့ၣ် လီၤဂာ်ဒ်သိးဒီး သိလၢအလီၤပြံလီၤပြါလီၤ.+ အဝဲသ့ၣ် အဒုၣ်အဒါလၢ အလီၤဂာ်ဒ်သိးဒီး ခ့ယုၢ်တဖၣ်န့ၣ် မၤလီၤမုၢ်ပြံပြါ အဝဲသ့ၣ်လီၤ.+ အဆိကတၢၢ်န့ၣ် ကီၢ်အၤၡူၢ်အစီၤပၤ အီၣ်ကွံာ်အဝဲသ့ၣ်+ ဒီးလၢခံ ဘၤဘူၤလိၣ် အစီၤပၤနဘူၤကးန့စၢ် အ့ၣ်ဘျဲး အဝဲသ့ၣ်အဃံလီၤ.+
၁၈ အဃိ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘ယကမၤ ဘၤဘူၤလိၣ်အစီၤပၤ ဒီးအတၢ်လီၢ်န့ၣ် ဒ်ယမၤတ့ၢ် ကီၢ်အၤၡူၢ် အစီၤပၤအသိးလီၤ.+
၁၉ ယကဒုးဟဲက့ၤကဒါက့ၤ အံၣ်စရ့လး အပှၤဂီၢ်မုၢ်လၢ အတၢ်အီၣ်ဆၣ်အလီၢ်လီၤ.+ ဒီးလၢကစၢၢ်ကၢ်မ့ၤလးအလိၤ, လၢဘၤၡၣ်အတၢ်လီၢ်+ ဒီးလၢအ့ဖရဲၣ်+ ဒီးကံးလဧး+ အကစၢၢ်တဖၣ်အလိၤန့ၣ် အဝဲသ့ၣ် ကကိာ်လီၤအီၣ်ဆၣ် ဘျဲဘျဲလီၤ.’”
၂၀ ယဟိဝၤယွၤ တဲဝဲလၢ “ဖဲန့ၣ်အဆၢကတီၢ် ဒီးလၢမုၢ်နံၤတဖၣ်န့ၣ် အတီၢ်ပူၤပှၤကဃုကွၢ်ဝဲ အံၣ်စရ့လး အပှၤဂီၢ်မုၢ် အတၢ်ကမၣ်ဘၣ်ဆၣ် ပှၤတထံၣ်န့ၢ်ဝဲ နီတမံၤဘၣ်.
ဒီးယူဒၤအပှၤဂီၢ်မုၢ် အတၢ်ဒဲးဘးန့ၣ် ပှၤတထံၣ်န့ၢ်အီၤဘၣ်,မ့ၢ်လၢ ယကပျၢ်ကွံာ် ပှၤလၢ ယပာ်မူဒံးအီၤတဖၣ်အံၤ အတၢ်ကမၣ် အဃိလီၤ.”+
၂၁ ယဟိဝၤယွၤ တဲဝဲလၢ “လဲၤထီၣ်ဒုး မရၤသဲၣ် အဟီၣ်ကဝီၤ ဒီးပှၤအိၣ်လၢ ပကိးအဟီၣ်ကဝီၤ+ အပူၤ န့ၣ်တက့ၢ်.
မၤဟးဂီၤဒီး မၤသံကွံာ် အဝဲသ့ၣ် ခဲလၢာ်တက့ၢ်.
တၢ်ခဲလၢာ်လၢ ယမၤလိာ်သုန့ၣ် မၤအီၤတက့ၢ်.
၂၂ တၢ်ဒုးအကလုၢ် ဒီးတၢ်မၤဟးဂီၤတၢ်ဖးဒိၣ်အကလုၢ်သီၣ်ထီၣ်ဝဲလၢ ကီၢ်ပူၤလီၤ.
၂၃ တူၤတဘ့ၣ်လၢ အမၤသဘှံး ပှၤကလုာ်တဖၣ်လၢ ဟီၣ်ခိၣ် ဒီဘ့ၣ်ညါန့ၣ် ဘၣ်တၢ်ကျီတဲာ်ကွံာ်အီၤ ဒီးမၤကၢ်ကွံာ်အီၤလံ.+
ဘၤဘူၤလိၣ် ကဲထီၣ် တၢ်လီၤပျံၤလီၤဖုးအလီၢ် လၢပှၤကလုာ် တဖၣ် အကျါလံ.+
၂၄ အိ ဘၤဘူၤလိၣ်ဧၢ, နဘၣ်ဘျးဒီး ပျံၤသကွီၤလၢ ယပာ်လီၤလၢ နဂီၢ်န့ၣ်လံ.
ဘၣ်ဆၣ် နတသ့ၣ်ညါဘၣ်.
မ့ၢ်လၢ နထီဒါ ယဟိဝၤယွၤ အဃိပှၤထံၣ်န့ၢ်နၤ ဒီးဖီၣ်န့ၢ်နၤလံ.+
၂၅ တၢ်ပၢကစၢ် လၢအမ့ၢ် တၢ်သုးမုၢ် ဂီၢ်မုၢ် အကစၢ် ယဟိဝၤယွၤန့ၣ်ကဘၣ်မၤတၢ်လၢ ပှၤက့ၤစ့းဖိ အတၢ်လီၢ်န့ၣ် အိၣ်ဝဲလီၤ.
အဃိ တၢ်လီၢ်လၢ ယဟိဝၤယွၤ ပာ်ဖှိၣ်ထီၣ် တၢ်စုကဝဲၤန့ၣ် အဝဲ အိးထီၣ်ဝဲလံ.
ဒီးအဝဲထုးထီၣ် တၢ်စုကဝဲၤတဖၣ် လၢကပာ်ဖျါထီၣ် အတၢ်သးဒိၣ် အဂီၢ်လီၤ.+
၂၆ ပှၤအိၣ်လၢ တၢ်လီၢ်ဖးယံၤတဖၣ်သ့ၣ်ဧၢ, ဟဲထီၣ်ဒုးဘၤဘူၤလိၣ်,+အိးထီၣ်အဘုဖီတဖၣ်+ဒီးပာ်ပူၣ်ထီၣ်တၢ်လၢ သုဂုာ်န့ၢ်အီၤတဖၣ် ဒ်ဘုပူၣ်တဖၣ် အသိး န့ၣ်တက့ၢ်.
မၤဟးဂီၤကွံာ် ဘၤဘူၤလိၣ် ခဲလၢာ်ခဲဆ့+ဒီးမ်ပှၤသုတပူၤဖျဲး နီတဂၤတဂ့ၤ.
၂၇ ဘၤဘူၤလိၣ် အပှၤလၢ အလီၤဂာ်ဒီး ကျီၢ်ဖါဖိတဖၣ်န့ၣ်+ဒုးလဲၤလီၤအီၤလၢ တၢ်မၤသံတၢ်အလီၢ် ဒီးမၤသံကွံာ် အဝဲသ့ၣ် ခဲလၢာ်တက့ၢ်.
မုၢ်နံၤလၢ အဝဲသ့ၣ် ကဘၣ် တၢ်စံၣ်ညီၣ် ဟဲတုၤလံအဃိကလီၤသးအုးလၢ အဝဲသ့ၣ် အဂီၢ်ဒိၣ်မး.
၂၈ ပှၤလၢအဟးထီၣ်ကွံာ်လၢ ဘၤဘူၤလိၣ်အပူၤလၢအဃ့ၢ်ပူၤဖျဲးအသးတဖၣ်န့ၣ် အကလုၢ်သီၣ်ထီၣ်ဝဲလံ.
ဒီးလၢဝ့ၢ်စံယိၣ်အပူၤန့ၣ် အဝဲသ့ၣ် ကတဲဖျါထီၣ်လၢ ပကစၢ် ယဟိဝၤယွၤ ဟ့ၣ်ကၣ်တၢ်လံဒီးအဝဲဟ့ၣ်ကၣ်တၢ်လၢ အတၢ်လုၢ်ဟံၣ်အဂီၢ်လံ.+
၂၉ ကိးန့ၢ် ပှၤခးပျၢ်ဖိ+ဒီးပှၤလၢအဖ့ၣ်ထီၣ်ချံၣ်ခဲလၢာ် လၢကထီဒါ ဘၤဘူၤလိၣ်အဂီၢ်တက့ၢ်.
မ့ၢ်လၢ ဘၤဘူၤလိၣ် ပာ်ထီၣ်ထီအသးလၢ ယဟိဝၤယွၤ လၢအမ့ၢ်အံၣ်စရ့လး အကစၢ်ယွၤလၢ အစီဆှံတဂၤ အဖီခိၣ်အဃိ+ဆီလီၤဒဲဝးတရံးအီၤ ဒီးတဘၣ်ပျဲ ပှၤပူၤဖျဲးနီတဂၤတဂ့ၤ.
ဟ့ၣ်ကၣ်အီၤ ဒ်အတၢ်မၤအသိး+ဒီးမၤအီၤဒ် တၢ်လၢအမၤတ့ၢ်ဝဲ အသိးတက့ၢ်.+
၃၀ ဖဲတၢ်တနံၤန့ၣ် အပှၤပိာ်ခွါသးစၢ် ကလီၤဃံၢ်လၢ အတၢ်ဆါတၢ်ပှ့ၤအလီၢ်+ဒီးအပှၤသုးဖိခဲလၢာ် ကဟးဂီၤဝဲလီၤ.” ယဟိဝၤယွၤ တဲဝဲဒ်န့ၣ်လီၤ.
၃၁ တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “ပှၤလၢအပာ်ထီၣ်ထီအသးတဂၤဧၢ,+ ယကဲထီၣ်နဒုၣ်နဒါလံ.+
မုၢ်နံၤလၢ ယကဟံးန့ၢ်နၤအရ့ ဒီးတၢ်ဆၢကတီၢ်လၢ ယကစံၣ်ညီၣ်နၤန့ၣ် ကဟဲတုၤဝဲလီၤ.
၃၂ ပှၤလၢအပာ်ထီၣ်ထီ အသးတဂၤဧၢ, နခီၣ်ကဘၣ်တိၢ် ဒီးနကလီၤဃံၢ်လီၤ.
ဒီးပှၤဝံၣ်ဆၢထၢၣ်က့ၤနၤ တအိၣ်နီတဂၤဘၣ်.+
ယကဒွဲၣ်အူထီၣ် နဝ့ၢ်တဖၣ်ဒီးမ့ၣ်အူကအီၣ်ကွံာ် တၢ်လၢအအိၣ်လၢ နဃၢၤဝးဝးလီၤ.”
၃၃ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ“အံၣ်စရ့လး အပှၤဂီၢ်မုၢ် ဒီးယူဒၤ အပှၤဂီၢ်မုၢ် ဘၣ်တၢ်ဆီၣ်တံၢ်မၤနၢၤအီၤဒီးပှၤလၢအက့ၤဖီၣ် အဝဲသ့ၣ်တဖၣ်န့ၣ် ဟံးဃာ်အဝဲသ့ၣ်+ဒီးတအဲၣ်ဒိးပျၢ်ကွံာ် အဝဲသ့ၣ်ဘၣ်.+
၃၄ ဘၣ်ဆၣ် ပှၤလၢအပှ့ၤက့ၤ အဝဲသ့ၣ်န့ၣ် မ့ၢ်ပှၤလၢ အဂံၢ်ဆူၣ် ဘါဆူၣ်လီၤ.+
အမံၤမ့ၢ်ဝဲ တၢ်သုးမုၢ်ဂီၢ်မုၢ် အကစၢ် ယဟိဝၤယွၤလီၤ.+
ဒီးကစၢ်ယွၤကစံၣ်ညီၣ်န့ၢ်တၢ်လၢ အဝဲသ့ၣ်အဂီၢ်တီတီလိၤလိၤ+ဒ်သိးကပာ်အိၣ်ဘှံး အဝဲသ့ၣ်အကီၢ်+ဒီးမၤတံာ်တာ် ပှၤလၢအအိၣ်လၢ ဘၤဘူၤလိၣ်အပူၤ အဂီၢ်လီၤ.”+
၃၅ ယဟိဝၤယွၤ တဲဝဲလၢ “နးတဘ့ၣ်ကမၤဟးဂီၤ ပှၤက့ၤစ့းဖိ,ပှၤလၢအအိၣ်လၢ ဘၤဘူၤလိၣ်ပူၤ, အပဒိၣ်ဖးဒိၣ်တဖၣ် ဒီးအပှၤကူၣ်ဘၣ်ကူၣ်သ့တဖၣ်လီၤ.+
၃၆ နးတဘ့ၣ် ကမၤဟးဂီၤ ပှၤလၢ အတဲကြီတၢ်တဖၣ် အဃိ အဝဲသ့ၣ် ကမၤကြီတၢ်လီၤ.
နးတဘ့ၣ် ကမၤဟးဂီၤ ဘၤဘူၤလိၣ်အပှၤသုးဖိလၢ အဂံၢ်ဆူၣ်ဘါဆူၣ်တဖၣ် အဃိ အဝဲသ့ၣ် ကပျံၤတၢ်လီၤ.+
၃၇ နးတဘ့ၣ် ကမၤဟးဂီၤ အဝဲသ့ၣ် အကသ့ၣ်တဖၣ်, အလ့ၣ်ကဟၣ်သုးတဖၣ်, ကမၤဟးဂီၤပှၤကလုာ်ဂၤတဖၣ်လၢ အအိၣ်လၢ ဘၤဘူၤလိၣ်အပူၤအဃိ အဝဲသ့ၣ် ကမၤအသးဒ် ပိာ်မုၣ်လၢအပျံၤတၢ်အသိးလီၤ.+
နးတဘ့ၣ် ကမၤဟးဂီၤ ဘၤဘူၤလိၣ် အတၢ်လုၢ်ဒိၣ်ပှ့ၤဒိၣ်တဖၣ် ဒီးအတၢ်လုၢ်ဒိၣ်ပှ့ၤဒိၣ်တဖၣ်န့ၣ် ကဘၣ် တၢ်ဂုာ်န့ၢ်အီၤလီၤ.+
၃၈ အထံတဖၣ် ကလီၤသံးဝဲ ဒီးတၢ်ဟးဂူာ်ဟးဂီၤ ကကဲထီၣ်အသးလၢ ထံအံၤ အကပိာ်ကပၤလီၤ.+
တၢ်ကကဲထီၣ် အသးဒ်န့ၣ် မ့ၢ်လၢ ဘၤဘူၤလိၣ်အပူၤ အိၣ်ပှဲၤဒီးတၢ်ဂီၤတၢ်ဖှီၣ်+ဒီးအဝဲသ့ၣ် အတၢ်ထံၣ်လၢညါခီလၢ အလီၤပျံၤလီၤဖုးတဖၣ် မၤပျုၢ် အဝဲသ့ၣ်အဃိလီၤ.
၃၉ ဆၣ်ဖိကီၢ်ဖိအမံၤတဖၣ် ကအိၣ်တပူၤဃီဒီး ထွံၣ်မံၤတဖၣ်လၢ ဘၤဘူၤလိၣ်အပူၤဒီးထိၣ်ကီၤလၤအူးတဖၣ်စ့ၢ်ကီး ကအိၣ်ဝဲဖဲန့ၣ်လီၤ.+
ပှၤတအိၣ်လၢ ဘၤဘူၤလိၣ် အပူၤလၢၤဘၣ်ဒီးအတကဲ တၢ်အိၣ်တၢ်ဆိးအလီၢ်လၢၤဘၣ် အစိၤစိၤ အဃၣ်ဃၣ်လီၤ.”+
၄၀ ယဟိဝၤယွၤ တဲဝဲလၢ “ဒ်ယၤ, ကစၢ်ယွၤ မၤဟးဂီၤဝဲ ဝ့ၢ်စဒိၣ်ဒီးဝ့ၢ်ဂမိရၤ+ ဒီးဝ့ၢ်လၢ အခိၣ်အဃၢၤတဖၣ်+ အသိးန့ၣ် တၢ်ကကဲထီၣ်အသးဒီး ဘၤဘူၤလိၣ် ဒ်န့ၣ်လီၤ. ဒီးပှၤတအိၣ်ဖဲန့ၣ် နီတဂၤလၢၤဘၣ် ဒီးပှၤတဆီလီၤ အတၢ်အိၣ်တၢ်ဆိးအလီၢ် ဖဲန့ၣ်လၢၤဘၣ်.+
၄၁ ကွၢ်တထံၣ်, ပှၤဂီၢ်မုၢ်တဒူၣ် လၢအအိၣ်လၢ ကီၢ်လၢကလံၤစိးတခီန့ၣ် ကဟဲဝဲလီၤ.
ပှၤကလုာ်ဖးဒိၣ်တကလုာ် ဒီးစီၤပၤ ဖးဒိၣ်တဖၣ်+လၢအအိၣ်လၢ တၢ်လီၢ်လၢ အယံၤကတၢၢ်န့ၣ် အိၣ်ကတဲာ်ကတီၤသးလၢ ကဒုးတၢ်အဂီၢ်လံ.+
၄၂ ပှၤအိၣ်လၢ ဘၤဘူၤလိၣ်အပူၤသ့ၣ်ဧၢ,* ပှၤတဖၣ်န့ၣ် ကဟဲစိာ်ဝဲ ချံၣ်ဒီးဘီလီၤ.+
အဝဲသ့ၣ် အသူၣ်အၢသးသီ ဒီးတပာ်ဖျါထီၣ် တၢ်သးကညီၤ နီတစဲးဘၣ်.+
ဖဲအဝဲသ့ၣ် ဟဲဒိးဝဲကသ့ၣ်တဖၣ်အခါအသီၣ်ဝဲဒ် ပီၣ်လဲၣ်တဖၣ် သီၣ်ဝဲ အသိးလီၤ.+
ဒီးဒ်သိးအဝဲသ့ၣ် ကဒုးသုအဂီၢ် အဝဲသ့ၣ် ကဟဲထီၣ် ဆီလီၤအသး ဃူဃူလီၤ.+
၄၃ ဘၤဘူၤလိၣ် အစီၤပၤ နၢ်ဟူဘၣ် တၢ်ကစီၣ် ဘၣ်ဃးဒီး အဝဲသ့ၣ် အဂ့ၢ်အဃိ+အသးဂံၢ်ဘါ* လီၤစၢ်လီၤ.+
အဘၣ်ကိၢ်ဘၣ်ဂီၤဒီးအတူၢ်ဘၣ် တၢ်ဆါနးမး ဒ်ပိာ်မုၣ်လၢ အအိၣ်ဖျဲၣ်ထီၣ် အဖိအသိးလီၤ.
၄၄ “ပှၤတဂၤ ကဟဲထီၣ်ဒုး ဘၤဘူၤလိၣ် အတၢ်အီၣ်ဆၣ်အလီၢ်လၢ အအိၣ်ဘံၣ်ဘံၣ်ဘၢဘၢတဖၣ် ဒ်ခ့ယုၢ်တဒု ဟဲထီၣ်လၢ သ့ၣ်တပှီာ်တီၣ်အလီၢ်လၢ ထံကျိယၢ်ဒ့ၣ် အကပၤလီၤ. ဒီးလၢတဖျးမဲာ် အတီၢ်ပူၤန့ၣ် ယကဒုးဃ့ၢ်ထီၣ်ကွံာ် အဝဲသ့ၣ်လၢ အနီၢ်ကစၢ် တၢ်လီၢ်လီၤ. ဒီးယကပာ်ထီၣ် ခိၣ်နၢ်လၢ ယဃုထၢအီၤတဂၤလၢ အဝဲသ့ၣ် အတၢ်လီၢ် အဖီခိၣ်လီၤ.+ ပှၤလၢအလီၤဂာ်ဒီးယၤ အိၣ်တဂၤဂၤဧါ, ပှၤလၢအမၤပတုာ်ယၤန့ၣ် အိၣ်တဂၤဂၤဧါ. ပှၤကွၢ်သိလၢ အဆၢထၢၣ်လၢ ယမဲာ်ညါကဲန့ၣ် မ့ၢ်မတဂၤလဲၣ်.+
၄၅ အဃိ ဒိကနၣ် တၢ်ဆၢတဲာ်လၢ ယဟိဝၤယွၤ မၤဝဲလၢ အထီဒါ ဘၤဘူၤလိၣ်+ ဒီးအတၢ်ကူၣ်လၢ အထီဒါ ပှၤလၢအအိၣ်လၢ ပှၤက့ၤစ့းဖိ အတၢ်လီၢ် န့ၣ်တက့ၢ်.
ခီဖျိတၢ်လၢ အဝဲသ့ၣ်မၤတ့ၢ်ဝဲအဃိ ကစၢ်ယွၤ ကဒုးအိၣ်သယုၢ် သိဖိအတၢ်အီၣ်ဆၣ်အလီၢ်+ဒီးသိဖိတဖၣ်လၢ သိတဖုအကျါန့ၣ် ကဘၣ်တၢ်တွံၢ်ထုးန့ၢ်အီၤ သပှၢ်တၢၢ်လီၤ.
၄၆ ဖဲပှၤမၤန့ၢ် ဘၤဘူၤလိၣ်အခါ တၢ်သီၣ်ထီၣ်ဖးဒိၣ် အဃိ ဟီၣ်ခိၣ်ကဟူးဝဲဒီးတၢ်ဟီၣ်ကိးပသူ ကဟူထီၣ်လၢ ပှၤကလုာ်တဖၣ် အကျါလီၤ.”+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ အခီပညီလိၤလိၤ “ကွ့ကလံၤ လၢအဃိ.”
^ အခီပညီလိၤလိၤ “ဘၤဘူၤလိၣ်အဖိမုၣ်.”
^ အခီပညီလိၤလိၤ “အစု.”
