ယံးရမံယၤ ၅၁:၁-၆၄
၅၁ ယဟိဝၤယွၤ တဲဝဲလၢ“ယကဒုးဟဲထီၣ် ကလံၤလၢ အမၤဟးဂီၤတၢ်လၢကမၤဟးဂီၤ ဘၤဘူၤလိၣ်+ ဒီးပှၤလၢအအိၣ်လၢ လဲးခးမဲၤ* အပူၤလီၤ.
၂ ယကဆှၢလီၤ ပှၤလၢ ဘၤဘူၤလိၣ်ဒ်သိး ကမၤလီၤပြံလီၤပြါ ပှၤလၢအအိၣ်ဖဲန့ၣ်တဖၣ် ဒ်ကလံၤအူဒံကွံာ် လီၢ်ဘိအသိး ဒီးအဝဲသ့ၣ် ကဒုး အိၣ်သယုၢ်ကီၢ်လီၤ.
ဖဲတၢ်ကီတၢ်ခဲဖးဒိၣ် အမုၢ်နံၤအံၤ ဟဲတုၤဝဲအခါ အဝဲသ့ၣ် ကဟဲထီၣ်ဒုး ဘၤဘူၤလိၣ် ကိးကပၤဒဲးလီၤ.+
၃ ဘၤဘူၤလိၣ် အပှၤခးချံၣ်ဖိ တဖ့ၣ်ထီၣ်အချံၣ်ဘၣ်.
အပှၤသုးဖိလၢ အကၤဝဲ အဆ့ကၤသုးန့ၣ် ဆၢထၢၣ်တကဲ နီတဂၤဘၣ်.
ပာ်ဖျါထီၣ် တၢ်သးကညီၤလၢ အပှၤပိာ်ခွါသးစၢ်တဖၣ် အဖီခိၣ်တဂ့ၤ.+
မၤဟးဂီၤကွံာ် အသုးမုၢ် ခဲလၢာ်တက့ၢ်.
၄ အပှၤပိာ်ခွါတဖၣ် ကဘၣ်တၢ်မၤသံအီၤလၢ ပှၤက့ၤစ့းဖိ အတၢ်လီၢ်ဒီးကဘၣ်တၢ်ဆဲးဖျိအီၤလၢ အကျဲတဖၣ် အပူၤလီၤ.+
၅ နီၢ်ကီၢ်န့ၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တပာ်တ့ၢ်ကွံာ် အံၣ်စရ့လး ဒီးယူဒၤ အပှၤဂီၢ်မုၢ်ဘၣ်.*+
မ့မ့ၢ် ပှၤက့ၤစ့းဖိ အတၢ်လီၢ်န့ၣ် ပှဲၤဝဲဒီး တၢ်ကမၣ်လၢ အံၣ်စရ့လး အကစၢ်ယွၤလၢ အစီဆှံတဂၤ အမဲာ်ညါလီၤ.
၆ ဃ့ၢ်ထီၣ်ကွံာ်လၢ ဘၤဘူၤလိၣ်အပူၤဒီးဃ့ၢ်ပူၤဖျဲးသုသးသၢၤ.+
ယဟိဝၤယွၤ ကမၤကၣ်က့ၤအီၤန့ၣ် တၢ်ဆၢကတီၢ်ဘၣ်လံ အဃိတဘၣ်ဟးဂီၤ ဃုာ်ဒီးအီၤလၢ အတၢ်ကမၣ် အဃိတဂ့ၤ.
ကစၢ်ယွၤ ကဟ့ၣ်ကၣ်က့ၤ ဘၤဘူၤလိၣ် ဒ်တၢ်လၢ ဘၤဘူၤလိၣ် မၤတ့ၢ်ဝဲအသိးလီၤ.+
၇ လၢညါ ဘၤဘူၤလိၣ်န့ၣ် လီၤဂာ်ဒ်သိးဒီး ခွးထူတဖျၢၣ်လၢ ယဟိဝၤယွၤ အစုပူၤလၢအဒုးအီမူၤ ဟီၣ်ခိၣ်ဒီဘ့ၣ်ညါလီၤ.
ပှၤကလုာ်တဖၣ် ပျုၢ်ထီၣ်ဝဲ+ခီဖျိလၢ အဝဲသ့ၣ် အီစပံးထံအံၤ အဃိလီၤ.+
၈ ဘၤဘူၤလိၣ် လီၤပှီၢ် ဒီးဟးဂီၤကွံာ် သတူၢ်ကလာ်လံ.+
ဟီၣ်လၢအဃိတက့ၢ်.+
ဟံးန့ၢ် သ့ၣ်စရံအထုး လၢအတၢ်ဆါအဂီၢ်တက့ၢ်. ဘၣ်သ့ၣ်သ့ၣ် အကဘျါက့ၤလီၤ.”
၉ “ပဂုာ်ကျဲးစၢး မၤဘျါက့ၤ ဘၤဘူၤလိၣ် ဘၣ်ဆၣ် အတဘျါက့ၤဘၣ်.
ပာ်တ့ၢ်ကွံာ်အီၤ ဒီးမ်ပက့ၤကဒါက့ၤလၢ ပနီၢ်ကစၢ်ဒၣ်ဝဲ ပထံပကီၢ်ဟီ.+
အတၢ်ကမၣ်န့ၣ် တုၤထီၣ်လၢ မူခိၣ်ဒီးထီဝဲတုၤလၢ တၢ်အၢၣ်လံ.+
၁၀ ယဟိဝၤယွၤ စံၣ်ညီၣ်န့ၢ်တၢ်လၢပဂီၢ် တီတီလိၤလိၤလံ.+
တၢ်လၢ ပကစၢ် ယဟိဝၤယွၤ မၤဝဲန့ၣ် ပကတဲဖျါထီၣ်က့ၤလၢ ဝ့ၢ်စံယိၣ်အပူၤလီၤ.”+
၁၁ “ထူးကပီၤထီၣ် ပျၢ်ဘိတဖၣ်+ ဒီးဟံးထီၣ် ကတီၤကဝီၤကျီၤ တဖၣ်တက့ၢ်.
ခီဖျိလၢ ယဟိဝၤယွၤ ပာ်လီၤ အသးလၢ ကမၤဟးဂီၤ ဘၤဘူၤလိၣ်အဃိအဝဲ ထိၣ်ဟူးထိၣ်ဂဲၤထီၣ် ကီၢ်မၤဒဲ အစီၤပၤတဖၣ် အသးလံ.+
ယဟိဝၤယွၤ ကဟ့ၣ်ကၣ်က့ၤ ဘၤဘူၤလိၣ် ဒီးအဝဲကဟ့ၣ်ကၣ်တၢ်လၢ အတၢ်လုၢ်ဟံၣ် အဂီၢ်န့ၣ် တၢ်ဆၢကတီၢ်ဘၣ်လံ.
၁၂ ယဟိဝၤယွၤ ကူၣ်ထီၣ်တၢ်ကူၣ်ဝံၤလံ ဒီးအကမၤလၢပှဲၤ အတၢ်အၢၣ်လီၤ ဘၣ်ဃးဒီး ပှၤအိၣ်လၢ ဘၤဘူၤလိၣ် အပူၤလီၤ.+
အဃိ ဆီလီၤတၢ်ပနီၣ်အတၢၣ်+ ဒ်သိး ပှၤကဟဲလၢ ဘၤဘူၤလိၣ် အဝ့ၢ်ဒူၣ်အအိၣ်,မၤအါထီၣ် ပှၤပၢၤတၢ်ဖိတဖၣ်,ဆီလီၤ ပှၤခိးတၢ်ဖိတဖၣ်ဒီးကတဲာ်ကတီၤ ပှၤခိးခူသူၣ်တၢ်တဖၣ်တက့ၢ်.”
၁၃ “ပိာ်မုၣ်လၢ အအိၣ်လၢ ထံအါမးအဖီခိၣ်+ဒီးအိၣ်ဒီး တၢ်ထူးတၢ်တီၤ အါအါဂီၢ်ဂီၢ် တဂၤဧၢ,+နကျဲကတၢၢ်လံအဃိ ပာ်ဖှိၣ်ထီၣ် တၢ်ထူးတၢ်တီၤလၢ တၢ်တတီတလိၤအပူၤ ပှဲၤန့ၣ်ဘၣ်လံ.+
၁၄ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အၢၣ်လီၤတၢ်လၢ အနီၢ်ကစၢ်လၢ‘ယကမၤပှဲၤနၤဒီး ပှၤပိာ်ခွါ ဒီးအဝဲသ့ၣ် ကအါထဲသိးဒီး ဒွဲၣ်တဖၣ်ဒီးအဝဲသ့ၣ် ကကိးပသူထီၣ်လၢ တၢ်သးခုအပူၤ မ့ၢ်လၢ အမၤနၢၤ နၤအဃိလီၤ.’+
၁၅ ကစၢ်ယွၤ မ့ၢ်ပှၤတဂၤလၢ အတ့လီၤဟီၣ်ခိၣ်လၢ အစိကမီၤ,အဒုးအိၣ်ထီၣ် ခိခိၣ်လၢ အတၢ်ကူၣ်သ့+ဒီးအဝဲထုးသလၣ်ထီၣ် မူခိၣ်လၢ အတၢ်သ့ၣ်ညါနၢ်ပၢၢ်လီၤ.+
၁၆ ဖဲအဝဲဒုးသီၣ်ထီၣ် အကလုၢ်အခါထံတဖၣ်လၢ မူခိၣ်န့ၣ် ဟူးဝး ဆှဲးဆှိးဝဲလီၤ.
အဝဲဒုးဟဲထီၣ် တၢ်အၢၣ်လၢ ဟီၣ်ခိၣ်အနၢၣ် အကတၢၢ်,မၤကပီၤထီၣ် လီဝၢ်ဒံးလၢ မူခိၣ်စူၤကျါဒီးဒုးဟဲထီၣ် ကလံၤလၢ အတၢ်ပာ်ဖှိၣ်အလီၢ်တဖၣ်လီၤ.+
၁၇ ပှၤကိးဂၤဒဲးန့ၣ် မၤတၢ်လၢ တအိၣ်ဒီး တၢ်သူၣ်ဆးသးဆး ဒီးတအိၣ်ဒီး တၢ်သ့ၣ်ညါဘၣ်.
ပှၤပိာ်ထးဖိ ကိးဂၤဒဲးန့ၣ် ကတူၢ်ဘၣ်တၢ်မဲာ်ဆှး ခီဖျိလၢ တၢ်ဂီၤတၢ်ဖှီၣ်အဃိလီၤ.+
အတၢ်ဂီၤတၢ်ဖှီၣ်ထးန့ၣ် မ့ၢ်ဝဲ တၢ်လံၣ်တၢ်လီဒီးအသးသမူ တအိၣ်ဘၣ်.+
၁၈ တၢ်ဂီၤတၢ်ဖှီၣ်တဖၣ်အံၤ မ့ၢ်တၢ်ကလီကလီ+ ဒီးမ့ၢ်တၢ်လၢ အလီၤဒုၣ်ဒွဲၣ်စံးအၢလီၤ.
အခါမ့ၢ်ဘၣ်လၢ ကစၢ်ယွၤ ကကျဲၤက့ၤ တၢ်ဂီၤတၢ်ဖှီၣ်တဖၣ်အံၤန့ၣ် တၢ်ဂီၤတၢ်ဖှီၣ်တဖၣ်အံၤ ကလီၤမၢ်ကွံာ်ဝဲလီၤ.
၁၉ စီၤယၤကိာ် အကစၢ်ယွၤန့ၣ် တလီၤဂာ်ဒီး တၢ်သ့ၣ်တဖၣ်န့ၣ်ဘၣ်.
အဝဲမ့ၢ် ပှၤတဂၤလၢ အတ့လီၤ တၢ်ခဲလၢာ်ဒီးတ့လီၤစ့ၢ်ကီး အတၢ်န့ၢ်သါလၢ အလုၢ်ဒိၣ်ပှ့ၤဒိၣ်ကတၢၢ် တမံၤလီၤ.*+
ဒီးအမံၤမ့ၢ်ဝဲ တၢ်သုးမုၢ်ဂီၢ်မုၢ်အကစၢ် ယဟိဝၤယွၤလီၤ.”+
၂၀ “န* မ့ၢ်နီၣ်ဒိလၢအမ့ၢ် ယတၢ်စုကဝဲၤလၢ တၢ်ဒုးအဂီၢ်လီၤ.
ယကသူနၤလၢ ယကမၤသဘှံး ပှၤကလုာ်တဖၣ်ဒီးမၤဟးဂီၤ ဘီမုၢ်တဖၣ်အဂီၢ်လီၤ.
၂၁ ယကသူနၤလၢ ယကမၤသဘှံး ကသ့ၣ် ဒီးပှၤလၢ အဒိးကသ့ၣ်ဒီးယကသူနၤလၢ ယကမၤသဘှံး လ့ၣ်ကဟၣ် ဒီးပှၤလၢ အဒိးလ့ၣ်ကဟၣ်အဂီၢ်လီၤ.
၂၂ ယကသူနၤလၢ ယကမၤသဘှံး ပှၤပိာ်ခွါ ဒီးပှၤပိာ်မုၣ်,ယကသူနၤလၢ ယကမၤသဘှံး ပှၤသးပှၢ် ဒီးပှၤဖိသၣ်ဒီးယကသူနၤလၢ ယကမၤသဘှံး ပိာ်ခွါသးစၢ် ဒီးပိာ်မုၣ်သးစၢ်အဂီၢ်လီၤ.
၂၃ ယကသူနၤလၢ ယကမၤသဘှံး ပှၤကွၢ်သိဒီး အသိတဖု,ယကသူနၤလၢ ယကမၤသဘှံး ပှၤမၤစံာ်ဖိဒီး အဆၣ်ဖိကီၢ်ဖိလၢ အထဲၣ်တၢ်တဖၣ်ဒီးယကသူနၤလၢ ယကမၤသဘှံး ပဒိၣ်ဒီး ပဒိၣ်ဖးဒိၣ်တဖၣ်အဂီၢ်လီၤ.
၂၄ ယကဟ့ၣ်ကၣ်က့ၤ ဘၤဘူၤလိၣ် ဒီးပှၤခဲလၢာ်လၢ အအိၣ်လၢ ပှၤက့ၤစ့းဖိ အတၢ်လီၢ်ခီဖျိလၢ တၢ်အၢတၢ်သီခဲလၢာ်လၢ အဝဲသ့ၣ် မၤတ့ၢ်ဝဲလၢ ဝ့ၢ်စံယိၣ် အပူၤ လၢသုမဲာ်ညါအဃိလီၤ.”+ ယဟိဝၤယွၤ တဲဝဲဒ်န့ၣ်လီၤ.
၂၅ ယဟိဝၤယွၤ တဲဝဲလၢ “ကစၢၢ်လၢ အမၤဟးဂီၤတၢ်ဧၢ, ယကဲထီၣ် နဒုၣ်နဒါလံ.+
နမၤဟးဂီၤ ဟီၣ်ခိၣ်ဒီဘ့ၣ်အဃိ+ယကယၤထီၣ် ယစုလၢနအိၣ် ဒီးတလ့ၣ်လီၤနၤလၢ လ့ဖးထီ တဖၣ်အလိၤဒီးဒုးကဲထီၣ်နၤလၢ ကစၢၢ်လၢ မ့ၣ်အူအီၣ်ကွံာ်အီၤလီၤ.”
၂၆ ယဟိဝၤယွၤ တဲဝဲလၢ “နကအိၣ်သယုၢ် လီၤထူလီၤယိာ်အဃိပှၤတဟံးန့ၢ် လၢၢ်သနၢၣ်ထံး မ့တမ့ၢ် တၢ်သူၣ်ထီၣ်အခီၣ်ထံးအလၢၢ် လၢနအိၣ် နီတဖျၢၣ်လၢၤဘၣ်.”+
၂၇ “ဆီလီၤတၢ်ပနီၣ်အတၢၣ်လၢ သုးဖိတဖၣ် ကပာ်ဖှိၣ်ထီၣ်အသးလၢ ကီၢ်ပူၤအဂီၢ်,+အူထီၣ်ကွဲၤလၢ ပှၤကလုာ် တဖၣ်အကျါဒီးဃုထၢထီၣ် ပှၤကလုာ်တဖၣ်လၢ ကဒုးအီၤ* တက့ၢ်.
ကိးန့ၢ် ဘီမုၢ်တဖၣ် လၢအမ့ၢ် အရၤရး,+ မံးနံး, အၤၡကံနး+ လၢကလဲၤဒုးအီၤအဂီၢ်ဒီးဟ့ၣ်လီၤ ပှၤထၢသုးဖိ မူဒါလၢ ကထၢသုးဖိအသီတဖၣ် အဂီၢ်တက့ၢ်.
ဒုးဟဲထီၣ် ကသ့ၣ်တဖၣ် ဒ်သိးဒီး ဒွဲၣ်အဖုတဖၣ် တက့ၢ်.
၂၈ ဃုထၢထီၣ် ပှၤကလုာ်တဖၣ်လၢ ကဒုးအီၤ,ဃုထၢထီၣ် ကီၢ်မၤဒဲအစီၤပၤတဖၣ်,+ အဝဲသ့ၣ် အပဒိၣ်ဖးဒိၣ်တဖၣ်, အပဒိၣ်ခဲလၢာ်ဒီးကယဲၢ်ထံကီၢ်လၢ အဝဲသ့ၣ်ပၢဝဲ ခဲလၢာ်တက့ၢ်.
၂၉ ဒ်သိး ဘၤဘူၤလိၣ် ကကဲထီၣ် တၢ်လီၤပျံၤလီၤဖုးအလီၢ်လၢ ပှၤတအိၣ်တဆိးလၢ အပူၤနီတဂၤလၢၤတဂ့ၤအဂီၢ်တၢ်လၢ ယဟိဝၤယွၤ ဆိကမိၣ်ထီၣ် ဘၣ်ဃးဒီး ဘၤဘူၤလိၣ်န့ၣ် ကဟဲလၢထီၣ်ပှဲၤထီၣ်လီၤ.
လၢတၢ်န့ၣ်အဃိ ဟီၣ်ခိၣ် ကဟူးဒီး ကကနိးကစုာ်ဝဲလီၤ.+
၃၀ ဘၤဘူၤလိၣ် အပှၤသုးဖိလၢ အဂံၢ်ဆူၣ်ဘါဆူၣ်တဖၣ် တဒုးတၢ်လၢၤဘၣ်.
အဝဲသ့ၣ် ဆ့ၣ်နီၤလၢ အတၢ်အိၣ်သဒၢအလီၢ်တဖၣ် အပူၤလီၤ.
အဝဲသ့ၣ် လီၤဂာ်ဒ်သိးဒီး ပိာ်မုၣ်လၢအပျံၤတၢ်တဖၣ်+ဒီးအဝဲသ့ၣ် အဂံၢ်အဘါလၢာ်လံ.+
ဟံၣ်တဖၣ်လၢ ဘၤဘူၤလိၣ်အပူၤန့ၣ် ဘၣ်တၢ်ဒွဲၣ်အူထီၣ်ကွံာ်အီၤဒီးဘၤဘူၤလိၣ် အတြဲၤအနီၣ်ဘိတဖၣ် ကၢ်ကွံာ်ဝဲလံ.+
၃၁ ပှၤစိာ်တၢ်ကစီၣ်ဖိ လဲၤဃ့ၢ်ဝဲလၢ ဘၤဘူၤလိၣ် အစီၤပၤအအိၣ်တဂၤဝံၤတဂၤ ဒ်သိးကတဲစီၤပၤလၢအဝ့ၢ်န့ၣ် ဘၣ်တၢ်မၤန့ၢ်အီၤ ကိးကပၤဒဲးလံ.+
၃၂ ဒီးအဝဲသ့ၣ် တဲဘၣ်အီၤလၢ ထံဒီၣ်အလီၢ်တဖၣ်န့ၣ် ဘၣ်တၢ်မၤန့ၢ်အီၤ,+ချံတဖၣ်လၢ ပှၤတ့အီၤဒီးတပိၢ်ဆှဲန့ၣ် ဘၣ်တၢ်ဒွဲၣ်အူထီၣ်ကွံာ်အီၤဒီးသုးဖိတဖၣ် ပျံၤတၢ်ဖုးတၢ် ဒိၣ်မးလံ.”
၃၃ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ“ဘၤဘူၤလိၣ်န့ၣ်* လီၤဂာ်ဒ် ကြဲၢ်အသိးလီၤ.
တယံာ်လၢၤဘၣ်န့ၣ် တၢ်ဆၢကတီၢ်လၢ ပှၤကကူးဘၤဘူၤလိၣ် အဂီၢ် ကဘၣ်ဝဲအဃိ ဘၤဘူၤလိၣ်ကဘၣ် တၢ်ယီၢ်တံၢ်လီၤအီၤလီၤ.”
၃၄ “ဘၤဘူၤလိၣ်အစီၤပၤ နဘူၤကးန့စၢ် အီၣ်ကွံာ်ယၤ*+ဒီးအမၤဘံဘူ ယခိၣ်နူာ်လံ.
အဝဲပာ်လီၤယၤ ဒ်ပှၤပာ်လီၤလီခီလၢ တၢ်တအိၣ်တ့ၢ်လၢ အပူၤ နီတမံၤလၢၤဘၣ်အသိး,အဝဲယူၢ်လီၤကွံာ်ယၤ ဒ်ဂုၢ်ဖးဒိၣ် ယူၢ်လီၤကွံာ်တၢ်အသိး,+အဝဲမၤပှဲၤ အဟၢဖၢဒီး ယတၢ်လုၢ်ဒိၣ်ပှ့ၤဒိၣ်တဖၣ်ဒီးတၢၤကွံာ်ယၤလံ.
၃၅ ဝ့ၢ်စံယိၣ် အပှၤဂီၢ်မုၢ် တဲဝဲလၢ ‘တၢ်မၤဆူၣ်မၤစိးလၢ ပတူၢ်ဘၣ်န့ၣ် မ်အဘၣ်ကဒါက့ၤ ဘၤဘူၤလိၣ်တက့ၢ်.’+
ဒီးဝ့ၢ်ယရူၤၡလ့ၣ် တဲဝဲလၢ ‘မ်ယသွံၣ်လီၤတီက့ၤလၢ ပှၤက့ၤစ့းဖိတဖၣ် အခိၣ်လိၤ တက့ၢ်.’”
၃၆ ယဟိဝၤယွၤ တဲဝဲလၢ“ယကစံၣ်ညီၣ်န့ၢ်တၢ်လၢနဂီၢ်* တီတီလိၤလိၤ+
ဒီးယကဟ့ၣ်ကၣ်န့ၢ်တၢ် လၢနဂီၢ်လီၤ.+ယကမၤလီၤသံးကွံာ် ဘၤဘူၤလိၣ် အပီၣ်လဲၣ် ဒီးမၤလီၤသံးကွံာ် အထံကမျၢ* တဖၣ်လီၤ.+
၃၇ ဘၤဘူၤလိၣ် ကကဲထီၣ် လၢၢ်ပူၣ်တဖၣ်+ဒီးတၢ်လီၢ်လၢ ထွံၣ်မံၤကအိၣ်ဝဲ အဂီၢ်လီၤ.+
ဘၤဘူၤလိၣ် ကကဲထီၣ် တၢ်လီၤပျံၤလီၤဖုးအလီၢ်, ပှၤကဆိကမိၣ် ဆံးအီၤ*ဒီးပှၤတအိၣ်လၢ အပူၤ နီတဂၤလၢၤဘၣ်.+
၃၈ အဝဲသ့ၣ်* ကကညီၤတၢ် ဒ်သိးဒီးခ့ယုၢ်ဒီးကကညီၤတၢ် ဒ်ခ့ယုၢ်ဖိ အသိးလီၤ.”
၃၉ ယဟိဝၤယွၤ တဲဝဲလၢ “ဖဲအဝဲသ့ၣ် အတၢ်သးကွံ ဟဲထီၣ်အခါ ယကကတဲာ်ကတီၤန့ၢ် အဝဲသ့ၣ် တၢ်အီၣ်အမူး ဒီးဒုးအီမူၤ အဝဲသ့ၣ်ဒ်သိး အဝဲသ့ၣ် ကသူၣ်ဖှံသးညီ အဂီၢ်လီၤ.+
ဒီးဖဲန့ၣ်အခါ အဝဲသ့ၣ် ကမံဝဲဖးယံာ်ဒီးတပၢၢ်ထီၣ် နီတဘျီလၢၤဘၣ်.”+
၄၀ “ယကဟဲမူၤ အဝဲသ့ၣ် ဒ်သိးဒီး သိဖိ, သိဖါ ဒီးမဲာ်တဲးလဲးတဖၣ်လၢတၢ်ကမၤသံအီၤ အဂီၢ်လီၤ.”
၄၁ “ပှၤမၤန့ၢ် ၡံၡး* လံ.+
ဝ့ၢ်လၢ ပှၤပတြၢၤအီၤလၢ ဟီၣ်ခိၣ် ဒီဘ့ၣ်အံၤ ဘၣ်တၢ်မၤန့ၢ်အီၤလံ.+
ဘၤဘူၤလိၣ် ကဲထီၣ်က့ၤဝဲ တၢ်လီၤပျံၤလီၤဖုးအလီၢ်လၢ ပှၤကလုာ်တဖၣ် အကျါလံ.
၄၂ ပီၣ်လဲၣ်အထံ ဟဲထီၣ်တုၤလၢ ဘၤဘူၤလိၣ်လံ.
အလပီတဖၣ် လုၢ်ဘၢကွံာ် ဘၤဘူၤလိၣ်လံ.
၄၃ အဝ့ၢ်တဖၣ် ကဲထီၣ် တၢ်လီၤပျံၤ လီၤဖုးအလီၢ်, တၢ်လီၢ်လၢ ထံတအိၣ်ဘၣ် ဒီးအကဲထီၣ် မဲးမုၢ်ပျီလံ.
အကဲထီၣ် တၢ်လီၢ်လၢ ပှၤတအိၣ်လၢအပူၤ နီတဂၤဘၣ် ဒီးပှၤတလဲၤ ခီဂာ်တၢ်လၢ အပူၤဘၣ်.+
၄၄ ယကစံၣ်ညီၣ် ဘ့လး*+ လၢဘၤဘူၤလိၣ်အပူၤဒီးတၢ်လၢ အယူၢ်လီၤဝဲ လၢအ ကိာ်ပူၤန့ၣ် ယကထုးထီၣ်ကွံာ် အီၤလီၤ.+
ပှၤကလုာ်တဖၣ် တလဲၤပာ်ဖှိၣ်ထီၣ်အသး လၢအအိၣ်လၢၤဘၣ်ဒီးဘၤဘူၤလိၣ် အဝ့ၢ်ဒူၣ် ကလီၤပှီၢ်ကွံာ်ဝဲလီၤ.+
၄၅ ယပှၤဂီၢ်မုၢ်သ့ၣ်ဧၢ, ဟးထီၣ်ကွံာ်လၢ ဘၤဘူၤလိၣ်အပူၤတက့ၢ်.+
ဃ့ၢ်ပူၤဖျဲးသုသးလၢ+ ယဟိဝၤယွၤ အတၢ်သးဒိၣ်ထီၣ်န့ၣ်တက့ၢ်.+
၄၆ တဘၣ်သးလီၤစၢ် မ့တမ့ၢ် ပျံၤတၢ်လၢ တၢ်ကစီၣ်လၢ သုကနၢ်ဟူဘၣ် လၢကီၢ်ပူၤအဃိ တဂ့ၤ.
တနံၣ်ဝံၤတနံၣ်န့ၣ် တၢ်ကစီၣ် ကဟဲဝဲ တခါဘၣ်တခါလၢအဘၣ်ဃးဒီး တၢ်မၤဆူၣ်မၤစိးလၢ ထံလီၢ်ကီၢ်ပူၤဒီးအဘၣ်ဃးဒီး တၢ်မၤဆူၣ်မၤစိးလၢ ပှၤပၢတၢ် တဂၤဒီးတဂၤ အဘၢၣ်စၢၤလီၤ.
၄၇ အဃိ တၢ်ဆၢကတီၢ်လၢ ယကမၤဟးဂီၤဘၤဘူၤလိၣ် အတၢ်ဂီၤတၢ်ဖှီၣ်တဖၣ်န့ၣ် ကဟဲဝဲလီၤ.
အကီၢ်ဒီဘ့ၣ်ညါ ကဘၣ်တၢ်မၤ မဲာ်ဆှးအီၤဒီးဘၤဘူၤလိၣ် အပှၤလၢ အကဘၣ်တၢ်မၤသံအီၤခဲလၢာ်န့ၣ် ကလီၤဃံၢ်သံလၢ ဘၤဘူၤလိၣ် အပူၤလီၤ.+
၄၈ ပှၤလၢအမၤဟးဂီၤတၢ်တဖၣ် လၢအအိၣ်လၢ ကလံၤစိးတခီန့ၣ် ကဟဲလၢဘၤဘူၤလိၣ် အအိၣ်လီၤ.+
ဒီးဖဲဘၤဘူၤလိၣ် လီၤပှီၢ်အခါ မူခိၣ်, ဟီၣ်ခိၣ် ဒီးတၢ်လၢအအိၣ်လၢ အပူၤခဲလၢာ်ကကိးပသူထီၣ်လၢ တၢ်သူၣ်ဖှံသးညီအပူၤလီၤ.”+ ယဟိဝၤယွၤ တဲဝဲ ဒ်န့ၣ်လီၤ.
၄၉ “လၢဘၤဘူၤလိၣ်အဃိ ပှၤအံၣ်စရ့လးဖိတဖၣ် ဘၣ်သံဝဲ+တကးဒံးဘၣ် ပှၤလၢအအိၣ်ဟဲလၢ ဟီၣ်ခိၣ်ဒီဘ့ၣ်န့ၣ် ဘၣ်တၢ်မၤသံအီၤလၢ ဘၤဘူၤလိၣ်အပူၤလီၤ.
၅၀ သုဝဲလၢ အပူၤဖျဲးလၢနးဧၢ, ဆဲးလဲၤဆူညါ ဒီးတဘၣ်ဆၢထၢၣ် ဂၢၢ်တပၢၢ်တဂ့ၤ.+
သုဝဲလၢ အအိၣ်လၢတၢ်လီၢ်အယံၤဧၢ, သ့ၣ်နီၣ်ထီၣ်က့ၤ ယဟိဝၤယွၤဒီးဆိကမိၣ်ထီၣ်ဘၣ်ဃး ဝ့ၢ်ယရူၤၡလ့ၣ် အဂ့ၢ်တက့ၢ်.”+
၅၁ “ပနၢ်ဟူဘၣ် အဝဲသ့ၣ် အတၢ်တဲဆဲးအဲး ဒီးပဒိးန့ၢ်ဘၣ် တၢ်မဲာ်ဆှးလီၤ.
ပှၤထံဂၤကီၢ်ဂၤဖိ ဟဲဒုးဝဲ တၢ်လီၢ်လၢအစီဆှံတဖၣ်လၢ အဘၣ်ထွဲဒီးယဟိဝၤယွၤအဟံၣ်အဃိ ပမဲာ်ဆှးလၢာ်လံ.”+
၅၂ ယဟိဝၤယွၤ တဲဝဲလၢ “အဃိ တၢ်ဆၢကတီၢ်လၢ ယကမၤဟးဂီၤဘၤဘူၤလိၣ် အတၢ်ဂီၤတၢ်ဖှီၣ်တဖၣ်န့ၣ် ကဟဲဝဲလီၤ.
ဒီးပှၤလၢ အဘၣ်ဒိဘၣ်ထံးတဖၣ် ကကအုကစွါထီၣ်ဝဲလၢ ကီၢ်ဒီဘ့ၣ်ညါ အပူၤလီၤ.”+
၅၃ ယဟိဝၤယွၤ တဲဝဲလၢ “ဘၤဘူၤလိၣ် မ့ၢ်လဲၤထီၣ်လၢမူခိၣ်+ဒီးအမ့ၢ်မၤကျၢၤထီၣ် အတၢ်အိၣ်သဒၢအလီၢ်ဖးထီတဖၣ် သနာ်က့ပှၤလၢကမၤဟးဂီၤအီၤတဖၣ် ကအိၣ်ဟဲလၢ ယအိၣ်လီၤ.”+
၅၄ “ကနၣ်တထံၣ်, တၢ်ဟီၣ်ကိးပသူ သီၣ်ထီၣ်ဝဲလၢ ဘၤဘူၤလိၣ်+ဒီးတၢ်မၤဟးဂီၤတၢ်ဖးဒိၣ် သီၣ်ထီၣ်ဝဲလၢ ပှၤက့ၤစ့းဖိအတၢ်လီၢ်,+
၅၅ ယဟိဝၤယွၤ မၤဟးဂီၤဝဲ ဘၤဘူၤလိၣ်,အကမၤဘှ့ၣ် ဘၤဘူၤလိၣ် အကလုၢ်လၢအသီၣ်ဒိၣ်ဒီးအဒုၣ်အဒါတဖၣ် ကသီၣ်ဝဲဒ် ပီၣ်လဲၣ်အလပီ သီၣ်ဝဲအသိးလီၤ.
အဒုၣ်အဒါတဖၣ် အကလုၢ်န့ၣ် ပှၤကနၢ်ဟူဝဲလီၤ.
၅၆ ပှၤမၤဟးဂီၤတၢ်ဖိန့ၣ် ကလဲၤလၢ ဘၤဘူၤလိၣ်လီၤ.+
ဘၤဘူၤလိၣ် အပှၤသုးဖိလၢ အဂံၢ်ဆူၣ်ဘါဆူၣ်တဖၣ် ကဘၣ်တၢ်ဖီၣ်န့ၢ်အီၤ+ဒီးအဝဲသ့ၣ် အချံၣ်တဖၣ် ကဘၣ်တၢ်မၤကၢ်ကွံာ်အီၤ,မ့ၢ်လၢ ယဟိဝၤယွၤန့ၣ် မ့ၢ်ကစၢ်ယွၤလၢ အမၤကၣ်က့ၤတၢ် အဃိလီၤ.+
ကစၢ်ယွၤ ကဟ့ၣ်ကၣ်က့ၤတၢ် သပှၢ်တၢၢ်လီၤ.+
၅၇ ယကဒုးအီမူၤ အပဒိၣ်ဖးဒိၣ်တဖၣ်, အပှၤကူၣ်ဘၣ်ကူၣ်သ့တဖၣ်,+အပှၤပၢတၢ်တဖၣ်, အပှၤခိၣ်ပှၤနၢ်တဖၣ် ဒီးအသုးဖိတဖၣ်လီၤ.
အဝဲသ့ၣ် ကမံဝဲဖးယံာ် ဒီးတပၢၢ်ထီၣ် နီတဘျီလၢၤဘၣ်.”+
စီၤပၤ လၢအမံၤမ့ၢ်ဝဲ တၢ်သုးမုၢ်ဂီၢ်မုၢ် အကစၢ် ယဟိဝၤယွၤန့ၣ် တဲဝဲဒ်န့ၣ်လီၤ.
၅၈ ယဟိဝၤယွၤ တဲဝဲလၢ“ဘၤဘူၤလိၣ် အဝ့ၢ်ဒူၣ်န့ၣ် မ့ၢ်တီၣ်သနာ်က့ ပှၤကမၤဟးဂီၤအီၤ လၢာ်လၢာ်ဆ့ဆ့လီၤ.+
ဒီးအတြဲၤတဖၣ် မ့ၢ်ထီသနာ်က့ အကဘၣ် တၢ်ဒွဲၣ်အူထီၣ်ကွံာ်အီၤလီၤ.
တၢ်လၢ ပှၤဂီၢ်မုၢ်မၤဝဲတဖၣ် ကကဲထီၣ် တၢ်ကလီကလီဒီးတၢ်လၢ ပှၤကလုာ်တဖၣ် ဘၣ်မၤဝဲ လီၤဘှံးလီၤတီၤန့ၣ် ကကဲထီၣ် မ့ၣ်အူဆၣ်လီၤ.”+
၅၉ ဖဲယူဒၤအစီၤပၤ စံးဒကံယၤ ပၢတၢ် လွံၢ်နံၣ်တနံၣ်န့ၣ် စီၤစရါယၤ လဲၤဒီးအီၤလၢ ဘၤဘူၤလိၣ်လီၤ. ဖဲန့ၣ်အခါ ဝံယံးရမံယၤ ဟ့ၣ်လီၤပာ်စၢၤ တၢ်ဟံးစုနဲၣ်ကျဲလၢ စီၤစရါယၤအအိၣ် ဒ်လၢလာ်အံၤအသိးလီၤ. စီၤစရါယၤန့ၣ် မ့ၢ်ဝဲ ပှၤလၢအကွၢ်ထွဲ စီၤပၤအတၢ်ဖိတၢ်လံၤတဖၣ် ဒီးမ့ၢ်ဝဲ စီၤန့ၤရံယၤ+ အဖိခွါ ဒီးစီၤန့ၤရံယၤန့ၣ် မ့ၢ်ဝဲ စီၤမၤစ့ယာ် အဖိခွါလီၤ.
၆၀ တၢ်နးတၢ်ဖှီၣ် ခဲလၢာ်လၢ အကဟဲဘၣ် ဘၤဘူၤလိၣ်န့ၣ် ဝံယံးရမံယၤ ကွဲးဝဲလၢ လံာ်တဘ့ၣ်အပူၤလီၤ. ဒီးမ့ၢ်ဝဲတၢ်ကတိၤခဲလၢာ်လၢ အဘၣ်တၢ်ကွဲးလီၤပာ်စၢၤအီၤတဖၣ်အံၤ လၢအဘၣ်ဃးဒီး တၢ်စံၣ်ညီၣ် ဘၤဘူၤလိၣ်အဂ့ၢ်လီၤ.
၆၁ တကးဒံးဘၣ် ဝံယံးရမံယၤ တဲဘၣ် စီၤစရါယၤလၢ “ဖဲနထံၣ်ဘၣ် ဘၤဘူၤလိၣ် ဒီးလဲၤတုၤဖဲန့ၣ်အခါ နဘၣ်ဖး တၢ်ကတိၤတဖၣ်အံၤခဲလၢာ် လၢကလုၢ်ဒိၣ်ဒိၣ်လီၤ.
၆၂ ဒီးတဲလၢ ‘အိ ယဟိဝၤယွၤဧၢ, ဘၣ်ဃးဒီး တၢ်လီၢ်တတီၤအံၤန့ၣ် နတဲလၢ အကဘၣ်တၢ်မၤဟးဂီၤအီၤ ဒီးပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ တအိၣ်လၢ အပူၤလၢၤဘၣ်. ဒီးအကကဲထီၣ် တၢ်အိၣ်သယုၢ်အလီၢ် လီၤထူလီၤယိာ်လီၤ.’+
၆၃ ဒီးဖဲနဖးလံာ်တဘ့ၣ်အံၤ ဝံၤအခါ စၢထီၣ်အီၤဒီးလၢၢ်တဖျၢၣ် ဒီးကွံာ်လီၤအီၤလၢ ထံကျိဖရၤသး အပူၤတက့ၢ်.
၆၄ ဒီးတဲလၢ ‘ကစၢ်ယွၤ ကဒုးလီၤဘၣ် တၢ်ကီတၢ်ခဲဖးဒိၣ်လၢ ဘၤဘူၤလိၣ် အဖီခိၣ်အဃိ ဘၤဘူၤလိၣ် ကလီၤဒးဝဲဒ်န့ၣ် ဒီးအတထီၣ်ဖီကဒီး နီတဘျီလၢၤဘၣ်.+ ဒီးပှၤလၢအအိၣ် ဖဲန့ၣ်တဖၣ် ကလီၤဘှံးလီၤတီၤလီၤ.’”+
တၢ်ကတိၤတဖၣ်န့ၣ် မ့ၢ်ဝဲ ဝံယံးရမံယၤ အတၢ်ကတိၤတဖၣ်လီၤ.
တၢ်ဂ့ၢ်အဘျဲၣ်တဖၣ်
^ ဖျါလၢ အမ့ၢ်ဝဲ ပှၤက့ၤစ့းဖိ အမံၤလီၤဘၢတဖျၢၣ်.
^ အခီပညီလိၤလိၤ “အံၣ်စရ့လးဒီးယူဒၤ တကဲမုၣ်ကမဲလၢ အလီၤဖးဒီး ကစၢ်ယွၤဘၣ်.”
^ အခီပညီလိၤလိၤ “အတၢ်န့ၢ်သါ အနီၣ်ထိးဘိ.”
^ ဘၣ်သ့ၣ်သ့ၣ် အဲၣ်ဒိးတဲဝဲ ဘၤဘူၤလိၣ် မ့တမ့ၢ် စီၤနဘူၤကးန့စၢ်.
^ မ့ၢ်ဝဲ ဘၤဘူၤလိၣ်.
^ အခီပညီလိၤလိၤ “ဘၤဘူၤလိၣ်အဖိမုၣ်.”
^ ဖဲအံၤန့ၣ် ဝံယံးရမံယၤဒိလီၤအသးလၢ ယရူၤၡလ့ၣ်ဒီးယူဒၤ.
^ မ့ၢ်ဝဲ ဝ့ၢ်စံယိၣ် လၢအမ့ၢ် ဝ့ၢ်ယရူၤၡလ့ၣ်.
^ မ့ၢ်စ့ၢ်ကီး “ထံပူၤ.”
^ အခီပညီလိၤလိၤ “ကွ့ကလံၤ လၢအဃိ.”
^ မ့ၢ်ဝဲ ပှၤလၢအအိၣ်လၢ ဘၤဘူၤလိၣ်.
^ ဖျါလၢ အမ့ၢ်ဝဲ ဘၤဘူၤလိၣ် အမံၤလီၤဘၢတဖျၢၣ်.
^ မ့ၢ်ဝဲ ဘၤဘူၤလိၣ်အယွၤတဂၤ.
