ယၡါယၤ ၁၇:၁-၁၄
၁၇ တၢ်စံၣ်ညီၣ်အကစီၣ်လၢ အဘၣ်ဃးဒီး ဝ့ၢ်ဒၤမ့ၤစ့းန့ၣ် အိၣ်ဝဲဒ် လၢလာ်အံၤအသိးလီၤ.+
“ကွၢ်မီၤ, ဝ့ၢ်ဒၤမ့ၤစ့း တကဲဝ့ၢ် လၢၤဘၣ်ဒီးအကကဲထီၣ် တၢ်ဟးဂီၤ အပူၣ်လီၤ.+
၂ ဒီးဧရိၤဧ့ၢ် အဝ့ၢ်တဖၣ်န့ၣ်+ ကဘၣ် တၢ်ပာ်တ့ၢ်ကွံာ်အီၤလီၤ.
ဝ့ၢ်တဖၣ်န့ၣ် ကကဲထီၣ် တၢ်လီၢ်လၢ ဆၣ်ဖိကီၢ်ဖိ အဖုတဖၣ် ကအိၣ်ဝဲဒီးပှၤမၤပျံၤမၤဖုး အဝဲသ့ၣ် တအိၣ်နီတဂၤဘၣ်.
၃ လၢအ့ဖရဲၣ် အဟီၣ်ကဝီၤပူၤန့ၣ် ဝ့ၢ်တဖၣ်လၢ အအိၣ်ဒီး အဒူၣ်လၢအကျၢၤ ကလီၤမၢ်ကွံာ်ဝဲ+ဒီးဝ့ၢ်ဒၤမ့ၤစ့း အစိအကမီၤလၢ ကပၢဘီမုၢ်န့ၣ် ကလီၤမၢ်ကွံာ်ဝဲ စ့ၢ်ကီးလီၤ.+
ဒီးပှၤစူၤရံဖိလၢ အအိၣ်တ့ၢ်တဖၣ် အလၤကပီၤန့ၣ်ကမၤသးဒ် ပှၤအံၣ်စရ့လးဖိတဖၣ် အလၤကပီၤ အသိးလီၤ.” တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲဒ်န့ၣ်လီၤ.
၄ “ဖဲန့ၣ်အဆၢကတီၢ် စီၤယၤကိာ် အစၢၤအသွဲၣ် အလၤကပီၤ ကစှၤလီၤဝဲဒီးအနီၢ်ခိလၢ အပှဲၤဒီး တၢ်အိၣ်ဆူၣ်အိၣ်ချ့န့ၣ် ကဃဲၤလီၤဝဲလီၤ.
၅ စီၤယၤကိာ် အစၢၤအသွဲၣ် ကလီၤဂာ်ဒ် စံာ်ပျီတပျီလၢ ရၤဖၤတၢ်တြီၤပူၤဖဲပှၤကူးဘုဝံၤအလီၢ်ခံ ဒီးအိၣ်တ့ၢ်က့ၤထဲဘုချုၣ်* စှၤကိာ်ချုၣ် လၢပှၤကကူးအီၤ အဂီၢ်လီၤ.+
၆ ဒီးကလီၤဂာ် ဒ်သိးဒီး ပှၤတီၢ်လီၤတဲာ် သ့ၣ်စၤယံးအသၣ် ဝံၤအလီၢ်ခံအသၣ်မံအိၣ်တ့ၢ်က့ၤ ထဲခံဖျၢၣ်သၢဖျၢၣ်လၢ သ့ၣ်စၤယံးအဒ့လၢအအိၣ်ထီကတၢၢ် တဒ့အလိၤဒီးအသၣ် ကအိၣ်တ့ၢ်က့ၤထဲ လွံၢ်ဖျၢၣ်ယဲၢ်ဖျၢၣ် လၢအဒ့တဖၣ်အလိၤလီၤ.”+ အံၣ်စရ့လး အကစၢ် ယဟိဝၤယွၤ တဲဝဲဒ်န့ၣ်လီၤ.
၇ ဖဲန့ၣ်အဆၢကတီၢ် ပှၤကဃ့ တၢ်မၤစၢၤလၢ ပှၤလၢ အတ့လီၤအီၤတဂၤန့ၣ် အအိၣ် ဒီးအဝဲသ့ၣ်ကကွၢ်ထီၣ်တၢ်လၢ အံၣ်စရ့လး အကစၢ်ယွၤလၢ အစီဆှံတဂၤန့ၣ် အအိၣ်လီၤ.
၈ အဝဲသ့ၣ်တကွၢ်ထီၣ်တၢ်လၢ တၢ်လုၢ်လီၢ်+ လၢအတ့ဝဲတဖၣ်, တၢ်လၢအတ့ဝဲလၢ အစုတဖၣ်+ ဒ်သိးဒီး တၢ်စီဆှံအထူၣ်တဖၣ်* မ့ၢ်ဂ့ၤ တၢ်လုၢ်တၢ်နၢမူ အလီၢ်တဖၣ်မ့ၢ်ဂ့ၤ န့ၣ်ဘၣ်.
၉ ဖဲန့ၣ်အဆၢကတီၢ် အဝဲသ့ၣ်အဝ့ၢ်တဖၣ် လၢအအိၣ်ဒီးအဒူၣ်လၢအကျၢၤန့ၣ် ကကဲထီၣ် ဒ်သိးဒီး တၢ်လီၢ်လၢ အဘၣ်တၢ်ပာ်တ့ၢ်ကွံာ်အီၤ လၢပှၢ်ပူၤလီၤ.+
ဒ်သ့ၣ်ဒ့လၢ အဘၣ်တၢ်ပာ်တ့ၢ်ကွံာ်အီၤ ခီဖျိလၢ ပှၤအံၣ်စရ့လးဖိအဃိ အသိးဝ့ၢ်လၢအအိၣ်ဒီးအဒူၣ်လၢအကျၢၤန့ၣ် ကအိၣ်သယုၢ်ဝဲလီၤ.
၁၀ န* သးပ့ၤနီၣ်ကွံာ် နတၢ်အုၣ်က့ၤ ခီၣ်က့ၤကစၢ်+ဒီးနတသ့ၣ်နီၣ်ထီၣ်က့ၤ ပှၤတဂၤလၢ အလီၤဂာ်ဒီး လၢၢ်+လၢအဒီသဒၢတၢ်ဘၣ်.
လၢတၢ်န့ၣ်အဃိ နသူၣ်လီၤ ကရၢၢ်ဃံလၤတဖၣ်ဒီးနဒုးမဲထီၣ် ပှၤထံဂၤကီၢ်ဂၤဖိ* အတၢ်မုၢ်တၢ်ဘိတဖၣ် ဖဲန့ၣ်လီၤ.
၁၁ ဖဲမုၢ်ဆါခီန့ၣ် နကရၢဃာ် နတၢ်သူၣ်တၢ်ဖျးအလီၢ်ဂ့ၤဂ့ၤဒီးလၢဂီၤခီန့ၣ် တၢ်ချံတဖၣ် မဲထီၣ်ဝဲလီၤ.
ဘၣ်ဆၣ် ခီဖျိလၢ နဒိးန့ၢ်ဘၣ် တၢ်ဆါလၢ အဘျါက့ၤတသ့ဘၣ်အဃိ နတကူးဘၣ် တၢ်နီတမံၤဘၣ်.+
၁၂ ကနၣ်သၢၤ, ပှၤဂီၢ်မုၢ်တဖၣ် မၤသီၣ်မၤသဲတၢ်ဒ်ပီၣ်လဲၣ် သီၣ်ဝဲအသိးလီၤ.
ဒီးပှၤကလုာ်တဖၣ် မၤတၢထီၣ် တၢလီၤတၢ်ဒီးအသီၣ်ဒ် ထံအါသီၣ်သထြုးဝဲ ဖးဒိၣ် အသိးလီၤ.
၁၃ ပှၤကလုာ်တဖၣ် ကသီၣ်သထြုးဒ် ထံအါသီၣ်ဝဲ အသိးလီၤ.
ကစၢ်ယွၤ ကသိၣ်ဃီၣ်အဝဲသ့ၣ် ဒီး အဝဲသ့ၣ် ကဃ့ၢ်ကွံာ်ဝဲ ဖးယံၤလီၤ.
အဝဲသ့ၣ် ကဃ့ၢ်ကွံာ်ဒ် ကလံၤအူဖျိးကွံာ် ဖ့လၢကစၢၢ်ခိၣ် အသိးလီၤ.
ဒီးအဝဲသ့ၣ် ကဃ့ၢ်ကွံာ်ဒ် နီၣ်တၤဆှုၣ်လၢ ကလံၤမုၢ် အူဖျိးကွံာ်အီၤ အသိးလီၤ.
၁၄ လၢမုၢ်ဟါန့ၣ် တၢ်ပျံၤတၢ်ဖုး ကဟဲအိၣ်ထီၣ်.
ဒီးတချုးလၢ မုၢ်ဝါထီၣ်ဒံးဘၣ်န့ၣ် ဒုၣ်ဒါတဖၣ် ကလီၤမၢ်ကွံာ်ဝဲလီၤ.
တၢ်ကကဲထီၣ်အသးဒီး ပှၤလၢအဂုာ်န့ၢ် ပတၢ်ဒ်န့ၣ်လီၤ.
ဒီးပှၤလၢအဂုာ်န့ၢ်ဆူၣ် ပတၢ်န့ၣ် တၢ်ကမၤအသးဒီး အဝဲသ့ၣ်ဒ်န့ၣ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဘုစဲၤ.”
^ ကွၢ် တၢ်ကတိၤအခီပညီ.
^ အဲၣ်ဒိးတဲဝဲ ဝ့ၢ်ယရူၤၡလ့ၣ်.
^ မ့ၢ်စ့ၢ်ကီး “ယွၤလၢအကမၣ်.”
