ယၡါယၤ ၂၁:၁-၁၇
၂၁ တၢ်စံၣ်ညီၣ်အကစီၣ် လၢအဘၣ်ဃးဒီး ပှၢ်မုၢ်ကနၢ လၢအလီၤဂာ်ဒီး ပီၣ်လဲၣ်န့ၣ်* အိၣ်ဝဲဒ်လၢလာ်အံၤအသိးလီၤ.+
တၢ်နးတၢ်ဖှီၣ် ကဟဲဒ်သိးဒီး ကလံၤမုၢ်လၢ အအိၣ်ဟဲလၢ ကလံၤထံးတခီဒီးအအိၣ်ဟဲလၢ ပှၢ်မုၢ်ကနၢလၢ အလီၤပျံၤလီၤဖုးလီၤ.+
၂ ယထံၣ်ဘၣ် တၢ်ထံၣ်လၢညါခီ လၢအလီၤပျံၤလီၤဖုး ဒ်လၢလာ်အံၤအသိးလီၤ.
ပှၤလၢအသးတတီဘၣ်န့ၣ် မၤတၢ်လၢ တၢ်သးတတီဘၣ်အပူၤလီၤ.
ပှၤမၤဟးဂီၤတၢ်ဖိန့ၣ် မၤဟးဂီၤတၢ်လီၤ.
အိ ပှၤဧ့ၤလၣ်ဖိသ့ၣ်ဧၢ, လဲၤထီၣ်ဒုးတၢ်တက့ၢ်. အိ ပှၤမၤဒဲဖိသ့ၣ်ဧၢ, လဲၤကဝီၤတၢ်တက့ၢ်.+
ယကမၤကတၢၢ်ကွံာ် တၢ်ကအုကစွါ လၢအ* ဒုးအိၣ်ထီၣ်ဝဲခဲလၢာ်လီၤ.+
၃ ခီဖျိလၢ တၢ်ထံၣ်လၢညါခီအံၤအဃိ ယသူၣ်ကိၢ်သးဂီၤဒိၣ်မး.+
ယဆါဝံာ်ပကံ ဒ်သိးဒီးပိာ်မုၣ်တဂၤလၢ အဟုးဆါထီၣ်လီၤ.
ယဘၣ်ကိၢ်ဘၣ်ဂီၤ တုၤလၢ ယကနၣ် တကဲလၢၤဘၣ်.
ယသးဘၣ်တံာ်တာ် တုၤလၢ ယကွၢ်မး တကဲလၢၤဘၣ်.
၄ ယသူၣ်ကိၢ်သးဂီၤ ဒီးယကနိးလၢ တၢ်ပျံၤတၢ်ဖုး အပူၤလီၤ.
လၢညါခါ မုၢ်လီၤနုာ် အဆၢကတီၢ်န့ၣ် မုာ်ဘၣ်ယၤဒိၣ်မး ဘၣ်ဆၣ် တဘျီအံၤဒု အိၣ်ထဲ အမၤပျံၤ မၤဖုးယၤလီၤ.
၅ ဆီလီၤ စီၢ်နီၤခိၣ် ဒီးရဲၣ်လီၤ လီၢ်ဆ့ၣ်နီၤတဖၣ်သၢၤ.
အီၣ်တၢ်အီတၢ်သၢၤ.+
သုဝဲ ပဒိၣ်ပပှၢ်သ့ၣ်ဧၢ, ဂဲၤဆၢထၢၣ် ဖှူကတီၤတဖၣ်သၢၤ.
၆ ယဟိဝၤယွၤ တဲယၤလၢ“လဲၤဆီလီၤ ပှၤခိးကွၢ်တၢ်ဖိတဂၤ ဒီးအထံၣ်တၢ်မနုၤလဲၣ်န့ၣ် မၢအတဲဖျါထီၣ်တက့ၢ်.”
၇ ဒီးအဝဲထံၣ်ဘၣ် လ့ၣ်ကဟၣ်သုးလၢ ကသ့ၣ်တဖၣ်တွံၢ်ဝဲ,လ့ၣ်ကဟၣ်သုးလၢ ကသ့ၣ်ယီၤတဖၣ်တွံၢ်ဝဲ,ဒီးလ့ၣ်ကဟၣ်သုးလၢ ကီၤလၤအူးတဖၣ်တွံၢ်ဝဲလီၤ.
ဒီးအဝဲကွၢ်ဝဲ ထံထံဆးဆးလီၤ.
၈ ဝံၤဒီး အဝဲကိးထီၣ်ဝဲ ဒ်ခ့ယုၢ် ကညီၤတၢ်အသိး ဒီးတဲဝဲလၢ“အိ ယဟိဝၤယွၤဧၢ, လၢမုၢ်ဆါခီန့ၣ် ယဆၢထၢၣ်ခိးတၢ်လၢ တၢးထီခိးတၢ် အဖီခိၣ်ထီဘိဒီးယအိၣ်လၢ ယခိးတၢ်အလီၢ် ကိးနၤဒဲးလီၤ.+
၉ လၢန့ၣ် ပှၤပိာ်ခွါတဖၣ်လၢအဒိးဝဲ လ့ၣ်ကဟၣ်သုးလၢ ကသ့ၣ်တဖၣ်တွံၢ်ဝဲန့ၣ် ဟဲလံ.”+
ဝံၤဒီး ပှၤခိးတၢ်ဖိန့ၣ် တဲဝဲလၢ“အလီၤပှီၢ်လံ. ဘၤဘူၤလိၣ် လီၤပှီၢ်လံ.+
အတၢ်ဂီၤတၢ်ဖှီၣ်တဖၣ်န့ၣ် ဘၣ်တၢ်မၤလီၤကရဲအီၤလၢ ဟီၣ်ခိၣ်လိၤလၢာ်လံ.”+
၁၀ အိ ယပှၤဂီၢ်မုၢ်လၢ အဘၣ်တၢ်ယီၢ်တံၢ်အီၤ ဒ်သိးဒီးဘု,ဘုလၢ ယကြဲၢ်ပူၤ သ့ၣ်ဧၢ,+တၢ်လၢယနၢ်ဟူဘၣ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤ အအိၣ်န့ၣ် ယတဲဘၣ်သုလံ.
၁၁ တၢ်စံၣ်ညီၣ်အကစီၣ် လၢအဘၣ်ဃးဒီး ဒူမၤန့ၣ်* အိၣ်ဝဲဒ်လၢ လာ်အံၤအသိးလီၤ.
ပှၤတဂၤလၢအအိၣ်လၢ စ့ဧၢ်အတၢ်လီၢ်န့ၣ် ကိးဃီၤတၢ်ဆူယအိၣ်လၢ+“ပှၤခိးကွၢ်တၢ်ဖိဧၢ, မုၢ်နၤကလၢာ်ကွံာ်ဝဲ အခါဖဲလဲၣ်.
ပှၤခိးကွၢ်တၢ်ဖိဧၢ, မုၢ်နၤကလၢာ်ကွံာ်ဝဲ အခါဖဲလဲၣ်.”
၁၂ ပှၤခိးကွၢ်တၢ်ဖိတဂၤန့ၣ် တဲဝဲလၢ“မုၢ်ကဝါထီၣ်လီၤ. ဒီးမုၢ်ကဟါလီၤ စ့ၢ်ကီးလီၤ.
သုမ့ၢ် အဲၣ်ဒိးသံကွၢ်တၢ်န့ၣ် သံကွၢ်ဟီ.
ဟဲက့ၤသံကွၢ်ဟီ.”
၁၃ တၢ်စံၣ်ညီၣ်အကစီၣ် လၢအဘၣ်ဃးဒီး မဲးမုၢ်ခိၣ်န့ၣ်* အိၣ်ဝဲဒ် လၢလာ်အံၤ အသိးလီၤ.
သုဝဲ ပှၤဒဒၣ်ဖိ လၢအလဲၤသကိးတၢ် ဒီတဖုသ့ၣ်ဧၢ,သုကအိၣ်တ့ၢ်ဒီတနၤ ဖဲသ့ၣ်တပှီာ်တီၣ်အလီၢ် လၢမဲးမုၢ်ခိၣ်လီၤ.+
၁၄ ပှၤလၢအအိၣ်လၢ တ့မၤ အတၢ်လီၢ်တၢ်ကျဲ သ့ၣ်ဧၢ,+လဲၤစိာ်န့ၢ်ထံလၢ ပှၤလၢ အလီၤဘဲအီထံဒီးပှၤလၢ အဃုတၢ်အိၣ်သဒၢအလီၢ်န့ၣ် လဲၤစိာ်န့ၢ် အဝဲသ့ၣ်လၢ တၢ်အီၣ်တက့ၢ်.
၁၅ အဝဲသ့ၣ်န့ၣ် ဃ့ၢ်ပူၤဖျဲးအသးလၢ နးတဖၣ်, နးလၢပှၤထုးထီၣ်ဃာ်အီၤ,ချံၣ်လၢ ပှၤဖ့ၣ်ထီၣ်ပာ်စၢၤအီၤ ဒီးလၢတၢ်ဒုးအၢအၢသီသီ အဃိလီၤ.
၁၆ ယဟိဝၤယွၤ တဲယၤလၢ “လၢတနံၣ်အတီၢ်ပူၤ* က့ဒၢ်အဒူၣ်+ အလၤကပီၤ ကကတၢၢ်ဝဲလီၤ.
၁၇ လၢပှၤဒူပှၤဃိၤလၢ က့ဒၢ်အဒူၣ်အကျါန့ၣ် ပှၤခးပျၢ်ဖိတဖၣ် ကအိၣ်တ့ၢ်က့ၤ ထဲစှၤဂၤ မ့ၢ်လၢ ယၤ, အံၣ်စရ့လး အကစၢ် ယဟိဝၤယွၤ တဲဝဲဝံၤလံ အဃိလီၤ.”
တၢ်ဂ့ၢ်အဘျဲၣ်တဖၣ်
^ ဖျါလၢအဲၣ်ဒိးတဲဝဲ တၢ်လီၢ် လၢအမ့ၢ် ဘၤဘူၤလိၣ်လၢပျၢၤ.
^ ဖျါလၢအဲၣ်ဒိးတဲဝဲ ဘၤဘူၤလိၣ်.
^ အခီပညီမ့ၢ်ဝဲ “တၢ်ဘှ့ၣ်တၢ်ဘှီၣ်.” မ့ၢ်ဝဲ မံၤလၢအအဲၣ်ဒိးတဲဝဲ ကီၢ်အဒိၣ်လၢ ဝံအတၢ်စံးပာ်အပူၤ.
^ ဖျါလၢအဲၣ်ဒိးတဲဝဲ ဧ့ရ့းတၢ်လီၢ်.
^ မ့ၢ်စ့ၢ်ကီး “နံၣ်အံၤ ဘၣ်တၢ်ဂံၢ်အီၤ လီၤတံၢ်လီၤဆဲး ဒ်သိးဒီး ပှၤမၤတၢ်ဖိလၢ ပှၤငါအီၤတဖၣ် ဂံၢ်ဝဲလီၤတံၢ်လီၤဆဲး.”
