ယၡါယၤ ၂၄:၁-၂၃
၂၄ ယဟိဝၤယွၤ ကနီဟးထီၣ်ကွံာ် ပှၤလၢအအိၣ်လၢ ကီၢ်ပူၤ* ဒီးအကဒုးအိၣ်သယုၢ်ကီၢ်လီၤ.+
ကစၢ်ယွၤ ကမၤဟးဂီၤဝဲကီၢ်+ ဒီးမၤလီၤပြံလီၤပြါ ပှၤအိၣ်လၢ ကီၢ်ပူၤလီၤ.+
၂ ပှၤဂီၢ်မုၢ်မ့ၢ်ဂ့ၤ, ပှၤလုၢ်တၢ်ဒိၣ်မ့ၢ်ဂ့ၤ,တၢ်ခ့တၢ်ပှၤမ့ၢ်ဂ့ၤ, ကစၢ်မ့ၢ်ဂ့ၤ,တၢ်ခ့တၢ်ပှၤပိာ်မုၣ်မ့ၢ်ဂ့ၤ, ကစၢ်မုၣ်မ့ၢ်ဂ့ၤ,ပှၤပှ့ၤတၢ်ဖိမ့ၢ်ဂ့ၤ, ပှၤဆါတၢ်ဖိမ့ၢ်ဂ့ၤ,ပှၤဟ့ၣ်လိၢ်တၢ်ဖိမ့ၢ်ဂ့ၤ, ပှၤဟံးလိၢ်တၢ်ဖိမ့ၢ်ဂ့ၤ,ပှၤလၢ ပှၤဒ့ၣ်ကမၢ် အိၣ်ဒီးအီၤမ့ၢ်ဂ့ၤ ဒီးပှၤလၢအဒ့ၣ်ကမၢ်အိၣ်မ့ၢ်ဂ့ၤတၢ်ကမၤအသးဒီး ပှၤကိးဂၤဒဲး ဒ်သိးသိးလီၤ.+
၃ ယဟိဝၤယွၤ တဲတ့ၢ် တၢ်ကတိၤ တထံၣ်အံၤအဃိပှၤကဘၣ် တၢ်နီဟးထီၣ်အီၤ လၢကီၢ်ပူၤ ကိးဂၤဒဲးဒီးတၢ်အိၣ်လၢ ကီၢ်ပူၤန့ၣ် ပှၤကဂုာ်န့ၢ်ဝဲ ခဲလၢာ်လီၤ.+
၄ ကီၢ်ကဟီၣ်ဝဲယၢၤဝဲ*+ ဒီးကလီၤညွံးလီၤဘဲဝဲလီၤ.
ဟီၣ်ခိၣ် ကဃ့ထီကွံာ် ဒီးကလီၤညွံးလီၤဘဲဝဲလီၤ.
ပှၤလၢအပတီၢ်ထီ လၢကီၢ်ပူၤန့ၣ် အဂံၢ်ဘါ ကလီၤစၢ်ဝဲလီၤ.
၅ ပှၤလၢအအိၣ်လၢ ကီၢ်ပူၤတဖၣ် မၤဘၣ်အၢဝဲကီၢ်,+မ့ၢ်လၢ အဝဲသ့ၣ် တမၤထွဲဝဲ တၢ်သိၣ်တၢ်သီတဖၣ်ဘၣ်,+ဆီတလဲကွံာ်ဝဲ တၢ်ဘျၢ+ဒီးမၤဟးဂီၤကွံာ်ဝဲ တၢ်အၢၣ်လီၤအီလီၤ လၢအဂၢၢ်အကျၢၤ အဃိလီၤ.+
၆ အဃိ ကီၢ်န့ၣ် ကဟးဂီၤကွံာ်ဝဲလၢ တၢ်ဆိၣ်အၢအဃိလီၤ.+
ဒီးပှၤအိၣ်လၢအပူၤတဖၣ် ဘၣ်တၢ်ပာ်ပနီၣ်အီၤလၢ အတၢ်ကမၣ်အိၣ်လီၤ.
ပှၤလၢအအိၣ်တ့ၢ်လၢ ကီၢ်ပူၤ ကစှၤလီၤဝဲဒီးပှၤပိာ်ခွါ ကအိၣ်တ့ၢ်က့ၤဝဲ ထဲစှၤဂၤလီၤ.+
၇ စပံးထံအသီ ကဃ့ထီကွံာ် ဒီးစပံးမုၢ်ကလီၤညွံးဝဲလီၤ.+
ဒီးပှၤလၢအသူၣ်ဖှံသးညီ ကိးဂၤဒဲးန့ၣ် အသူၣ်ကလီၤဘှံး သး ကလီၤဘှံးလီၤ.+
၈ တၢ်ခြ့ခြ့အသီၣ်လၢ အဒုးအိၣ်ထီၣ်တၢ်သးခုန့ၣ် ကကတၢၢ်ကွံာ်ဝဲလီၤ.
ပှၤလၢအမၤမူးပွဲလၢ အလီၤရၢၢ်လီၤစၢၢ်တဖၣ် အကလုၢ် တသီၣ်လၢၤဘၣ်.
ဒီးတနၢ်အသီၣ်လၢ အဒုးအိၣ်ထီၣ် တၢ်သးခုန့ၣ် ကကတၢၢ်ကွံာ်ဝဲလီၤ.+
၉ အဝဲသ့ၣ် ကအီစပံးထံ ဘၣ်ဆၣ် အတသးဝံၣ်တၢ်လၢၤဘၣ်.
ဒီးပှၤလၢအအီသံးန့ၣ် သံးကခၣ်ဘၣ်အီၤ ဒိၣ်မးလီၤ.
၁၀ ဝ့ၢ်လၢပှၤပာ်တ့ၢ်ကွံာ်အီၤန့ၣ် ကလီၤပှီၢ်+ဒီးဟံၣ်ကိးဖျၢၣ်ဒဲးန့ၣ် ပှၤကပံးတံၢ်ဃာ်အီၤအဃိ ပှၤလဲၤနုာ်လီၤ တန့ၢ် နီတဂၤဘၣ်.
၁၁ စပံးထံ တအိၣ်လၢၤဘၣ်အဃိ အဝဲသ့ၣ် ကကိးပသူထီၣ်လၢ ကျဲပူၤလီၤ.
တၢ်သးခု ကလီၤမၢ်ကွံာ်ဝဲ ခဲလၢာ်.
လၢကီၢ်ပူၤန့ၣ် တၢ်သးခု တအိၣ်လၢၤဘၣ်.+
၁၂ ဝ့ၢ်ကကဲထီၣ် တၢ်ဟးဂီၤအပူၣ်ဒီးဝ့ၢ်အတြဲၤ ကဘၣ်တၢ်မၤလီၤကလဲအီၤ သပှၢ်တၢၢ်လီၤ.+
၁၃ ဒီးယပှၤဂီၢ်မုၢ်လၢ အိၣ်တ့ၢ်လၢကီၢ်ပူၤစှၤဂၤန့ၣ် တၢ်ကမၤအသးဒီးအဝဲသ့ၣ်လၢ ပှၤကလုာ်တဖၣ်အကျါ ဒ်အံၤလီၤ.
ကမၤအသးဒ် ပှၤတီၢ်လီၤတဲာ် သ့ၣ်စၤယံးအသၣ်တဖၣ် ဒီးအိၣ်တ့ၢ်က့ၤထဲ စှၤကိာ်ဖျၢၣ် လၢအထူၣ်လိၤ+
ဒီးဒ်ပှၤဒဲးစပံးသၣ် အဆၢကတီၢ် ကတၢၢ်ဝဲအဃိ စပံးသၣ်တဖၣ် အိၣ်တ့ၢ်က့ၤထဲ တစဲးဖိအသိးလီၤ.+
၁၄ အဝဲသ့ၣ် ကမၤသီၣ်ထီၣ်အကလုၢ်ဒီးအဝဲသ့ၣ် ကကိးပသူထီၣ်လၢ တၢ်သးခုအပူၤလီၤ.
လၢမုၢ်နုာ်တကပၤန့ၣ် အဝဲသ့ၣ် ကစံၣ်တဲၤတဲလီၤ ယဟိဝၤယွၤ အလၤကပီၤအဂ့ၢ်+
၁၅ ဒီးလၢမုၢ်ထီၣ်တကပၤန့ၣ် အဝဲသ့ၣ် ကမၤလၤကပီၤ ယဟိဝၤယွၤလီၤ.+
လၢကီးတဖၣ်လၢ ပီၣ်လဲၣ်အပူၤန့ၣ် အဝဲသ့ၣ် ကမၤလၤကပီၤ အံၣ်စရ့လး အကစၢ် ယဟိဝၤယွၤ အမံၤလီၤ.+
၁၆ ပနၢ်ဟူဘၣ် တၢ်သးဝံၣ်လၢ တၢ်လီၢ်လၢ ဟီၣ်ခိၣ်အနၢၣ် အကတၢၢ်တဖၣ် ဒီးပှၤသးဝံၣ်ဝဲလၢ“မ်ပှၤမၤလၤကပီၤ ကစၢ်ယွၤလၢ အတီအလိၤတဂၤန့ၣ်တက့ၢ်.”+
ဘၣ်ဆၣ် ယတဲလၢ “ယဃဲၤလီၤဃိလီၤလၢာ်လံ, ယဃဲၤလီၤဃိလီၤလၢာ်လံ, ယဘၣ်ကီဘၣ်ခဲလံ.
ပှၤလၢ အသးတတီဘၣ်တဖၣ်န့ၣ် မၤတၢ်တတီဘၣ်လံ.
ပှၤလၢ အသးတတီဘၣ်တဖၣ်န့ၣ် မၤတၢ်တတီဘၣ် ဒီးလံၣ်အီၣ် လီအီၣ်တၢ်လံ.”+
၁၇ ပှၤလၢအအိၣ်လၢ ကီၢ်ပူၤသ့ၣ်ဧၢ, တၢ်ပျံၤတၢ်ဖုး, တၢ်ပူၤ ဒီးပျံၤသကွီၤ အိၣ်ခိးလီၤပာ်စၢၤ သုခိၣ်လံ.+
၁၈ ပှၤလၢအဃ့ၢ်ကွံာ် ခီဖျိလၢ တၢ်သီၣ် လီၤပျံၤလီၤဖုး အဃိန့ၣ် ကလီၤတဲာ်လၢ တၢ်ပူၤဒီးပှၤလၢ အဟဲက့ၤထီၣ်လၢ တၢ်ပူၤန့ၣ် ကဘျးက့ၤလၢပျံၤသကွီၤလီၤ.+
မူခိၣ်အတြဲၤတဖၣ် ကအိးထီၣ်အသးဒီးကီၢ်ကဟူးဝးဝဲလီၤ.
၁၉ ကီၢ်ကဟူးဝးဝဲဒီးအကတဲၤထီၣ်လီၤ.
ကီၢ်ကဟူးဝဲ နးမးလီၤ.+
၂၀ ကီၢ်န့ၣ် ဟးကနူၤကပၤ ဒ်ပှၤလၢ အအီမူၤသံးတဂၤအသိးဒီးဟူးဝးဝဲ လၢအံၤလၢန့ၣ် ဒ်ဒဲတဖျၢၣ်လၢ ကလံၤအူဘၣ်အီၤ အသိးလီၤ.
ကီၢ်အတၢ်ကမၣ်န့ၣ် အိၣ်ဃၢလၢ ကီၢ်အလိၤ+ဒီးကီၢ်ကလီၤဃံၢ် ဒီးအတဆၢထၢၣ်က့ၤ နီတဘျီလၢၤဘၣ်.
၂၁ ဖဲန့ၣ်အဆၢကတီၢ် ယဟိဝၤယွၤ ကစံၣ်ညီၣ် မူခိၣ်အသုးမုၢ်ဂီၢ်မုၢ် လၢထးခီဒီးဟီၣ်ခိၣ် အစီၤပၤတဖၣ်လၢ ဟီၣ်ခိၣ်ချၢလီၤ.
၂၂ ကစၢ်ယွၤ ကပာ်ဖှိၣ်ထီၣ် အဝဲသ့ၣ်တပူၤဃီဒ်ပှၤပာ်ဖှိၣ် ပှၤဃိာ်ဖိတဖၣ်လၢ တၢ်ပူၤအသိးလီၤ.
ဒီးကစၢ်ယွၤ ကပံးဃာ် ဃိာ်အတြဲၤဒီးလၢခံ အါနံၤအါသီဝံၤအလီၢ်ခံ ကစၢ်ယွၤ ကစံၣ်ညီၣ် အဝဲသ့ၣ်လီၤ.
၂၃ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ ကဲထီၣ်စီၤပၤလၢ+ ကစၢၢ်စံယိၣ်+ ဒီးလၢဝ့ၢ်ယရူၤၡလ့ၣ်အပူၤလံ.
အဝဲကပၢတၢ်လၢ အပှၤဂီၢ်မုၢ် အပှၤသူၣ်က့သးပှၢ်တဖၣ် အမဲာ်ညါ လၢတၢ်လၤကပီၤအပူၤလီၤ.+
လၢအတၢ်ပၢလၢ အပှဲၤဒီး တၢ်လၤကပီၤအမဲာ်ညါန့ၣ် လါပှဲၤဒၣ်လဲာ် ကဖျါခံးဝဲဒီးမုၢ်အတၢ်ကပီၤ ကဖျါကဒုလီၤ.+
တၢ်ဂ့ၢ်အဘျဲၣ်တဖၣ်
^ ဖျါလၢအဲၣ်ဒိးတဲဝဲ ယူဒၤအဟီၣ်ကဝီၤ ဒီးဝ့ၢ်ယရူၤၡလ့ၣ်.
^ ဘၣ်သ့ၣ်သ့ၣ် ကမ့ၢ် “ဃ့ထီကွံာ်.”
