ယၡါယၤ ၂၆:၁-၂၁
၂၆ ဖဲန့ၣ်အဆၢကတီၢ် လၢယူဒၤ အဟီၣ်ကဝီၤပူၤန့ၣ်+ ပှၤကသးဝံၣ် တၢ်သးဝံၣ်တယုၢ်+ ဒ်လၢလာ်အံၤ အသိးလီၤ.
“ပအိၣ်ဒီး ဝ့ၢ်လၢ အဂံၢ်ဆူၣ် တဖျၢၣ်လီၤ.+
ကစၢ်ယွၤ အတၢ်အုၣ်က့ၤခီၣ်က့ၤန့ၣ် လီၤဂာ်ဒ်သိးဒီး ဝ့ၢ်ဒူၣ် ဒီးအတၢ်ဒီသဒၢတဖၣ်လီၤ.+
၂ ဒ်သိး ပှၤကလုာ်တကလုာ်လၢ အတီအလိၤဒီးပှၤကလုာ်တကလုာ်လၢ အသးတီ နုာ်လီၤကသ့အဂီၢ် အိးထီၣ်တြဲၤတဖၣ်တက့ၢ်.+
၃ ပှၤလၢအသန့ၤသးလၢနၤ* န့ၣ်နကဒီသဒၢအီၤလီၤ.*
မ့ၢ်လၢ အဝဲသ့ၣ် နာ်န့ၢ်နၤအဃိ+နကဟ့ၣ်အဝဲသ့ၣ် တၢ်သူၣ်မံသးမုာ်* ထီဘိလီၤ.+
၄ မ့ၢ်လၢ ယဟိဝၤ, ယဟိဝၤယွၤန့ၣ် မ့ၢ်ဝဲ လၢၢ်အထူအယိာ်အဃိ+နာ်န့ၢ် ယဟိဝၤယွၤ လီၤထူလီၤယိာ်တက့ၢ်.+
၅ ပှၤလၢအအိၣ်လၢ တၢ်လီၢ်လၢအထီၣ်ထီ လၢဝ့ၢ်ဒိၣ်ဝ့ၢ်ထီတဖျၢၣ်န့ၣ် ကစၢ်ယွၤ ကဆီၣ်လီၤ အဝဲသ့ၣ်လီၤ.
ကစၢ်ယွၤ ကတွံၢ်လီၤဝဲ ဝ့ၢ်တဖျၢၣ်န့ၣ်ဒီးအကတွံၢ်လီၤဝဲ တုၤလီၤလၢ ဟီၣ်ခိၣ်လိၤလီၤ.
ကစၢ်ယွၤ ကကွံာ်လီၤဝဲ လၢဟီၣ်ခိၣ်ကမူၣ် အကျါလီၤ.
၆ ဒီးပှၤဘၣ်နးဘၣ်ဖှီၣ် ဒီးပှၤလၢအပတီၢ်ဖုၣ်တဖၣ်ကယီၢ်တံၢ်လီၤဝဲလၢ အခီၣ်ဖီလာ်လီၤ.”
၇ ပှၤတီပှၤလိၤ အကျဲန့ၣ် ဘျၢဝဲလီၤ.
ခီဖျိလၢ န* တီနလိၤအဃိနကမၤပၢၤထီၣ် ပှၤတီပှၤလိၤ အကျဲလီၤ.
၈ အိ ယဟိဝၤယွၤဧၢ, ဖဲပပိာ်ထွဲ နတၢ်စံၣ်ညီၣ်တီ အကျဲအခါပမုၢ်လၢ်တၢ်လၢ နအိၣ်လီၤ.
ပပာ်လုၢ်ပာ်ပှ့ၤနမံၤ ဒီးပဆၢမုၢ်လၢ်လၢ ပှၤကသ့ၣ်နီၣ်ထီၣ် နမံၤလီၤ.
၉ လၢမုၢ်နၤန့ၣ် ယသးအိၣ်နၤလၢ ယသးဒီဖျၢၣ်ညါဒီးလၢတၢ်သးဆူၣ်အပူၤန့ၣ် ယဃုနၤလီၤ.+
ဖဲနစံၣ်ညီၣ် ဟီၣ်ခိၣ်အခါပှၤအိၣ်လၢ ကီၢ်ပူၤတဖၣ် ကမၤလိ တၢ်တီတၢ်လိၤလီၤ.+
၁၀ ပှၤအၢပှၤသီ မ့ၢ်ဘၣ်တၢ်သးကညီၤအီၤ သနာ်က့အတမၤလိ တၢ်တီတၢ်လိၤဘၣ်.+
လၢတၢ်တီတၢ်လိၤ အကီၢ်ပူၤန့ၣ် အဝဲကမၤတၢ် အၢအၢသီသီ+ဒီးအဝဲ တထံၣ်ဘၣ် ယဟိဝၤယွၤ အလၤကပီၤဘၣ်.+
၁၁ အိ ယဟိဝၤယွၤဧၢ, နယၤထီၣ်နစုလံ ဘၣ်ဆၣ် ပှၤအၢပှၤသီ တထံၣ်ဝဲဘၣ်.+
အဝဲသ့ၣ် ကထံၣ်ဘၣ် နတၢ်သးဆူၣ် လၢနပှၤဂီၢ်မုၢ်အဂီၢ် ဒီးအဝဲသ့ၣ် ကဒိးန့ၢ်ဘၣ် တၢ်မဲာ်ဆှးလီၤ.
နမ့ၣ်အူ ကအီၣ်ကွံာ် နဒုၣ်နဒါတဖၣ် သပှၢ်တၢၢ်လီၤ.
၁၂ အိ ယဟိဝၤယွၤဧၢ, တၢ်ကိးမံၤဒဲးလၢ ပမၤတ့ၢ်န့ၣ်နမၤကဲထီၣ်လိၣ်ထီၣ်န့ၢ်ပှၤအဃိ နကဟ့ၣ်ပှၤ တၢ်သူၣ်မံ သးမုာ်လီၤ.*+
၁၃ အိ ကစၢ်ယဟိဝၤယွၤဧၢ, ကစၢ်အဂၤတဖၣ်ပၢပှၤ+ဘၣ်ဆၣ် ပယၢၤထီၣ်ထဲ နမံၤလီၤ.+
၁၄ အဝဲသ့ၣ်သံလံ ဒီးအဝဲသ့ၣ် တအိၣ်မူလၢၤဘၣ်.
အဝဲသ့ၣ် အစိကမီၤ တအိၣ်လၢၤဘၣ် ဒီးအဝဲသ့ၣ် တဂဲၤဆၢထၢၣ် လၢၤဘၣ်.+
နစံၣ်ညီၣ်အဝဲသ့ၣ်, မၤဟးဂီၤ အဝဲသ့ၣ်ဒီးပှၤတသ့ၣ်နီၣ်ထီၣ်က့ၤ အဝဲသ့ၣ်လၢၤဘၣ်.
၁၅ အိ ယဟိဝၤယွၤဧၢ, နမၤအါထီၣ် နပှၤဂီၢ်မုၢ်လံ.
နမၤအါထီၣ် နပှၤဂီၢ်မုၢ်လံ.
နမၤလၤကပီၤနသးလံ+ဒီးနမၤလဲၢ်ထီၣ် ကီၢ်ဆၢတဖၣ် ခဲလၢာ်လံ.+
၁၆ အိ ယဟိဝၤယွၤဧၢ, ဖဲတၢ်ကိၢ်တၢ်ဂီၤ အဆၢကတီၢ် အဝဲသ့ၣ် ဃၣ်အသး လၢနအိၣ်လီၤ.
ဖဲနသိၣ်က့ၤသီက့ၤ အဝဲသ့ၣ်အခါ အဝဲသ့ၣ် ဃ့ထုကဖၣ်ကသွံဒံ လၢနအိၣ် လၢတၢ်သးဆူၣ်အပူၤလီၤ.+
၁၇ အိ ယဟိဝၤယွၤဧၢ, လၢနဃိန့ၣ် ပကဲထီၣ် ဒ်သိးဒီးပိာ်မုၣ်လၢအဒၢတဂၤ လၢအဘူးကအိၣ်ဖျဲၣ်ထီၣ်အဖိ,အဟုးဆါထီၣ် ဒီးကိးပသူဝဲလၢ အဟုးဆါဝဲအဃိလီၤ.
၁၈ ပဒၢထီၣ် ဒီးပဟုးဆါထီၣ်ဘၣ်ဆၣ် လီၤဂာ်ဒ်သိးဒီး ပအိၣ်ဖျဲၣ်ထီၣ် ထဲကလံၤလီၤ.
ပတဒုးအိၣ်ထီၣ် တၢ်အုၣ်က့ၤခီၣ်က့ၤလၢ ကီၢ်အဂီၢ်ဘၣ်.
ပှၤတအိၣ်ဖျဲၣ်ထီၣ် အဖိလၢ အကအိၣ်ဝဲဆိးဝဲလၢ ကီၢ်ပူၤအဂီၢ် နီတဂၤဘၣ်.
၁၉ “နပှၤသံန့ၣ် ကသမူထီၣ်လီၤ.
ယပှၤဂီၢ်မုၢ်အစိၣ်တဖၣ်န့ၣ် ကဂဲၤဆၢထၢၣ်လီၤ.+
ပှၤလၢအအိၣ်လၢ ဟီၣ်ခိၣ်ကမူၣ်ကျါသ့ၣ်ဧၢ,+ပၢၢ်ထီၣ်ဒီး ကိးပသူထီၣ်လၢ တၢ်သးခုအပူၤတက့ၢ်.
ပစီၤထံလၢ အလီၤလၢသုလိၤန့ၣ် လီၤဂာ်ဒ်သိးဒီး ဂီၤခီအပစီၤထံဒီးဟီၣ်ခိၣ် ကပျၢ်ကွံာ် ပှၤသံတဖၣ် ဒီးအဝဲသ့ၣ် ကသမူထီၣ်က့ၤလီၤ.
၂၀ ယပှၤဂီၢ်မုၢ်သ့ၣ်ဧၢ, လဲၤနုာ်လီၤလၢ သုဒၢးဖိတဖၣ်အပူၤဒီးကးပံးသုတြဲၤတက့ၢ်.+
အိၣ်ခူသူၣ် တစိၢ်ဖိတုၤလၢ တၢ်သးဒိၣ်ထီၣ် လဲၤတလၢကွံာ်တက့ၢ်.+
၂၁ လၢယအိၣ်ယဆိးအလီၢ်န့ၣ် ယၤ, ယဟိဝၤယွၤ ကဟဲဒ်သိး ကစံၣ်ညီၣ် ပှၤအိၣ်လၢ ကီၢ်ပူၤတဖၣ် လၢအဝဲသ့ၣ် အတၢ်ကမၣ်အဃိလီၤ.
တၢ်သွံၣ်လၢ ပှၤလူလီၤအီၤလၢ ကီၢ်ပူၤန့ၣ် ကဘၣ်တၢ်ပာ်ဖျါထီၣ်အီၤဒီးပှၤလၢအဘၣ် တၢ်မၤသံအီၤလၢ ကီၢ်ပူၤန့ၣ် တၢ်တပာ်ခူသူၣ် အီၤလၢၤဘၣ်.”
တၢ်ဂ့ၢ်အဘျဲၣ်တဖၣ်
^ ဘၣ်သ့ၣ်သ့ၣ် ကမ့ၢ် “ပှၤလၢအသး တကဒံကဒါဘၣ်.”
^ မ့ၢ်စ့ၢ်ကီး “တၢ်ဃူတၢ်ဖိး.”
^ မ့ၢ်ဝဲ ကစၢ်ယွၤ.
^ မ့ၢ်ဝဲ ကစၢ်ယွၤ.
^ မ့ၢ်စ့ၢ်ကီး “တၢ်ဃူတၢ်ဖိး.”
