ယၡါယၤ ၂၉:၁-၂၄
၂၉ “အရံၤအ့လး,* အရံၤအ့လး လၢအမ့ၢ်ဝ့ၢ်လၢ စီၤဒၤဝံး ဆီလီၤအဒဲ လၢအပူၤန့ၣ် ကဘၣ်ကီဘၣ်ခဲ သပှၢ်တၢၢ်လီၤ.+
မ်ပှၤဆဲးမၤ ဘူၣ်ပွဲ+တနံၣ်ဝံၤတနံၣ်တက့ၢ်.
၂ ဘၣ်ဆၣ် ယကဒုးလီၤဘၣ် တၢ်ကီတၢ်ခဲလၢ ဝ့ၢ်အရံၤအ့လး အလိၤလီၤ.+
တၢ်ဟီၣ်တၢ်ယၢၤ ဒီးထါဟီၣ်တဖၣ် ကဟဲအိၣ်ထီၣ်ဝဲ+ဒီးလၢယမဲာ်ညါန့ၣ် ဝ့ၢ်ဒီတဖျၢၣ် ကလီၤဂာ်ဒ်သိးဒီး တၢ်လုၢ်လီၢ် အဖၣ်ကပူၤလီၤ.+
၃ အိ ဝ့ၢ်အရံၤအ့လးဧၢ, ယကကဝီၤဃာ်နၤဝးဝး,ယကဆီလီၤ တၢၣ်ခိၣ်စူ ဝးတရံးနၤဒီးယကတ့ထီၣ် တၢ်ဒူၣ်ဝးတရံး နၤလီၤ.+
၄ နကလီၤဃံၢ် ဒီးနကဒိးန့ၢ်ဘၣ် တၢ်မဲာ်ဆှးလီၤ.
ဖဲနအိၣ်လၢ ဟီၣ်ခိၣ်လိၤ လၢဟီၣ်ခိၣ်ကမူၣ်ကျါအခါန့ၣ်နကတဲတၢ် ဒီးနတၢ်ကတိၤတဖၣ်န့ၣ် ကသီၣ်ကတူၢ်ကတူၢ်နကလုၢ်ကသီၣ်ထီၣ် လၢဟီၣ်ခိၣ်လိၤ+ဒ်ပှၤလၢ အဆဲးကျိးဒီးပှၤသံ အကလုၢ်သီၣ်အသိးဒီးနကတဲတၢ် ကသွံဒံလၢ ဟီၣ်ခိၣ်ကမူၣ်အကျါလီၤ.
၅ ဘၣ်ဆၣ် ပှၤဂီၢ်မုၢ် လၢအမ့ၢ် နဒုၣ်နဒါတဖၣ် ကကဲထီၣ် ဒ်သိးဒီး တၢ်အကမူၣ်+ဒီးပှၤဂီၢ်မုၢ်လၢ အပၢဆူၣ်ပၢစိးတၢ်တဖၣ် ကကဲထီၣ် ဒ်သိးဒီး ဖ့လၢ ကလံၤအူဖျိးကွံာ်အီၤလီၤ.+
ဒီးတၢ်ကမၤအသးဒ်န့ၣ် သတူၢ်ကလာ် လၢတဖျးမဲာ် အတီၢ်ပူၤလီၤ.+
၆ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ ကမၤပူၤဖျဲးနၤလီၤ.
ဖဲအမၤဝဲအခါ လီကသီၣ်, ဟီၣ်ခိၣ် ကဟူး, တၢ်ကသီၣ်ဖးဒိၣ်,ကလံၤမုၢ် ဒီးကလံၤမုၢ်ဖးဒိၣ် ကဟဲ ဒီးမ့ၣ်အူလၣ် ကအီၣ်တၢ်လီၤ.”+
၇ လၢခံ ပှၤကလုာ် ခဲလၢာ်လၢ အကဒုးဝဲ ဝ့ၢ်အရံၤအ့လး,+ပှၤခဲလၢာ်လၢ ကဒုးအီၤ,ပှၤလၢ အတ့ထီၣ် တၢးတဖၣ် ဒ်သိးကဒုးအီၤဒီးပှၤလၢ အဒုးလီၤ တၢ်ကီတၢ်ခဲ လၢအဖီခိၣ်န့ၣ်ကကဲထီၣ် ဒ်တၢ်မံမီၢ် လၢမုၢ်နၤခီအသိးလီၤ.
၈ ဒီးအကလီၤဂာ် ဒ်သိးဒီး ပှၤလၢအလီၤဘဲ* တဂၤ မံမီၢ်ဝဲလၢ အအီၣ်တၢ် ဘၣ်ဆၣ်ဖဲအပၢၢ်ထီၣ်အခါ အလီၤဘဲဒီးပှၤလၢ အလီၤဘဲအီထံတဂၤ မံမီၢ်ဝဲလၢ အအီထံဘၣ်ဆၣ် ဖဲအပၢၢ်ထီၣ်အခါ အလီၤဘှံး ဒီးလီၤဘဲအီထံလီၤ.
အဃိ ပှၤကလုာ်ခဲလၢာ်လၢအကဒုးဝဲ ကစၢၢ်စံယိၣ်န့ၣ် တၢ်ကမၤအသးဒီးအီၤဒ်န့ၣ်လီၤ.+
၉ သုက ကမၢကမၣ် ဒီးသုကဖုးဘၣ် သုသးလီၤ.+
မၤဒ်သိး သုမဲာ်ချံ သုတထံၣ်တၢ်တဂ့ၤအဂီၢ် န့ၣ်တက့ၢ်.+
အဝဲသ့ၣ်မူၤဝဲ ဘၣ်ဆၣ် တမ့ၢ်လၢ စပံးထံ အဃိဘၣ်.
အဝဲသ့ၣ် ဟးကနူၤကပၤ ဘၣ်ဆၣ် တမ့ၢ်လၢ သံးအဃိဘၣ်.
၁၀ ယဟိဝၤယွၤ ဒုးမံသု ယိာ်ယိာ်လီၤ.+
သုမဲာ်ချံ လၢအမ့ၢ် ဝံတဖၣ်န့ၣ် အဝဲကးဘၢဝဲ+ဒီးသုခိၣ်သၣ်ဃံ လၢအမ့ၢ် ပှၤထံၣ်တၢ်ထံၣ် လၢညါခီတဖၣ်န့ၣ် အဝဲကးဘၢဝဲလီၤ.+
၁၁ လၢသုဂီၢ်န့ၣ် တၢ်ထံၣ်လၢညါခီ ကိးခါဒဲး ကကဲထီၣ် ဒ်သိးဒီး တၢ်ကတိၤ လၢအအိၣ်လၢ လံာ်ထူလၢအဘၣ် တၢ်ကးတံာ်ဃာ်အီၤ အပူၤလီၤ.+ ဖဲအဝဲသ့ၣ် ဟ့ၣ်ဒုးဖးပှၤလၢ အဖးလံာ်ဘၣ်တဂၤ ဒီးတဲအီၤလၢ “ဝံသးစူၤ ဖးသီၣ်မ့ၢ်ဒိၣ်” အခါ ပှၤတဂၤန့ၣ် ကတဲလၢ “အဘၣ်တၢ်ကးတံာ်ဃာ်အီၤအဃိ ယဖးတသ့ဘၣ်.”
၁၂ ဒီးဖဲအဝဲသ့ၣ် ဟ့ၣ်ဒုးဖးပှၤလၢ အဖးလံာ် တဘၣ်ဘၣ်တဂၤ ဒီးတဲလၢ “ဝံသးစူၤ ဖးလံာ်ထူတခါအံၤ” အခါ ပှၤတဂၤန့ၣ် ကတဲလၢ “ယဖးလံာ်တဘၣ်ဘၣ်.”
၁၃ ယဟိဝၤယွၤ တဲဝဲလၢ “ပှၤသ့ၣ်တဖၣ်အံၤ အိၣ်ဒၣ်ထဲ အတဲလၢ အဘူၣ်ထီၣ်ဘါထီၣ်ယၤဒီးအဝဲသ့ၣ် မၤလၤကပီၤယၤ ထဲလၢ အထးခိၣ်လီၤ.+
မ့မ့ၢ် အသးန့ၣ် ယံၤဝဲဒီးယၤ ဖးယံၤလီၤ.
ဒီးအဝဲသ့ၣ် အတၢ်ပျံၤဒီး တၢ်ယူးယီၣ်ယၤန့ၣ် ဒိးသန့ၤထီၣ်အသးလၢ ပှၤဟီၣ်ခိၣ်ဖိ အတၢ်မၤလိာ်လၢ ပှၤသိၣ်လိအဝဲသ့ၣ်လီၤ.+
၁၄ လၢတၢ်န့ၣ်အဃိ ယကမၤ ကမၢကမၣ်ကဒီး ပှၤဂီၢ်မုၢ်အံၤ+ခီဖျိ တၢ်လီၤလး တခါဝံၤတခါလီၤ.
အဝဲသ့ၣ် အပှၤကူၣ်ဘၣ်ကူၣ်သ့တဖၣ် အတၢ်ကူၣ်သ့န့ၣ် ကဟးဂီၤကွံာ်ဝဲဒီးအဝဲသ့ၣ် အပှၤလၢ အသူၣ်ဆးသးဆးတဖၣ် အတၢ်နၢ်ပၢၢ်န့ၣ် ကလီၤမၢ်ကွံာ်ဝဲလီၤ.”+
၁၅ ပှၤလၢ အဂုာ်ကျဲးစၢး ပာ်ခူသူၣ်ကွံာ် အတၢ်ကူၣ်တဖၣ် လၢယဟိဝၤယွၤန့ၣ် ကဘၣ်ကီဘၣ်ခဲ သပှၢ်တၢၢ်လီၤ.+
အဝဲသ့ၣ် မၤဝဲဒ် အကူၣ်ထီၣ်တၢ်အသိး လၢတၢ်ခံးကျါဒီးတဲဝဲလၢ “ပှၤတထံၣ်ပှၤ နီတဂၤဘၣ်.
တၢ်လၢပမၤန့ၣ် ပှၤတသ့ၣ်ညါ နီတဂၤဘၣ်.”+
၁၆ သုမၤဘံဘူ တၢ်ဂ့ၢ်သပှၢ်တၢၢ်.
ပှၤတ့သပၢၤတဂၤန့ၣ် မ့ၢ်ပှၤကြၢးပာ်အီၤ အပတီၢ် တုၤသိးဒီး ကပံာ်ဧါ.+
တၢ်လၢ ပှၤတ့ဝဲန့ၣ် ဖဲအတဲ ပှၤတ့အီၤတဂၤအဂ့ၢ်အခါ မ့ၢ်အကြၢးတဲဝဲလၢ“အတတ့ယၤဘၣ်”+ န့ၣ်ဧါ.
ဒီးတၢ်လၢပှၤတ့အီၤန့ၣ် မ့ၢ်အကြၢးတဲ ပှၤလၢအတ့အီၤ တဂၤန့ၣ် အဂ့ၢ်လၢ“အတၢ်နၢ်ပၢၢ် တအိၣ်ဘၣ်”+ န့ၣ်ဧါ.
၁၇ လၢခံ တစိၢ်ဖိဒီးန့ၣ် လဘၤနိၣ်အပှၢ် ကကဲထီၣ် တၤသၣ်အလီၢ်+ဒီးတၤသၣ်အလီၢ်န့ၣ် ပှၤကပာ်အီၤ ဒ်ပှၢ်အသိးလီၤ.+
၁၈ ဖဲန့ၣ်အဆၢကတီၢ် ပှၤလၢ အတနၢ်ဟူတၢ်ဘၣ်န့ၣ် ကနၢ်ဟူဝဲ တၢ်ကတိၤတဖၣ်လၢ အအိၣ်လၢ လံာ်ထူအပူၤဒီးပှၤလၢ အမဲာ်တထံၣ်တၢ်ဘၣ်န့ၣ် ကပူၤဖျဲးထီၣ်လၢ တၢ်ကဒုဒီး တၢ်ခံးကျါ ဒီးကထံၣ်ထီၣ်က့ၤတၢ်လီၤ.+
၁၉ ပှၤလၢအဆီၣ်လီၤအသးန့ၣ် ကသးခုဖးဒိၣ် လၢယဟိဝၤယွၤအပူၤဒီးပှၤဖှီၣ်ဖိယာ်ဖိန့ၣ် ကသူၣ်ဖှံသးညီလၢ အံၣ်စရ့လး အကစၢ်ယွၤလၢ အစီဆှံတဂၤ အပူၤလီၤ.+
၂၀ လၢခံ တစိၢ်ဖိဒီးန့ၣ် ပှၤလၢ အပၢဆူၣ်ပၢစိးတၢ်တဖၣ် တအိၣ်လၢၤဘၣ်.
ပှၤလၢ အပာ်ကဖၢလၢအသးန့ၣ် အကျဲကကတၢၢ်လီၤ.
ဒီးပှၤလၢ အဃုကျဲလၢ ကမၤတၢ်အၢတၢ်သီ အဂီၢ်န့ၣ် ကဘၣ်တၢ်မၤဟးဂီၤ အဝဲသ့ၣ် ကိးဂၤဒဲးလီၤ.+
၂၁ မ့ၢ်လီၤ, ပှၤလၢအလံၣ်တၢ် ဒ်သိး ကပာ်ဒ့ၣ်ပာ်ကမၣ် ပှၤဂၤ,ပှၤလၢ အဒိးလီၤ ပျံၤသကွီၤတဖၣ်လၢ ပှၤလၢ အဒီသဒၢလီၤအသး ဖဲဝ့ၢ်တြဲၤအဂီၢ်+ဒီးပှၤလၢ အပာ်ဒ့ၣ်ပာ်ကမၣ်တၢ် ခီလီလီ ဒ်သိး ပှၤသုတစံၣ်ညီၣ်န့ၢ်တၢ်လၢ ပှၤတီပှၤလိၤအဂီၢ် တီတီလိၤလိၤတဂ့ၤ အဂီၢ်န့ၣ် ကဘၣ်တၢ်မၤဟးဂီၤ အဝဲသ့ၣ်လီၤ.+
၂၂ အဃိ ယဟိဝၤယွၤ လၢအမ့ၢ် ပှၤလၢအပှ့ၤက့ၤ စီၤအၤဘြၤဟၣ်န့ၣ်+ တဲဘၣ် စီၤယၤကိာ် အစၢၤအသွဲၣ်တဖၣ်လၢ“စီၤယၤကိာ် တတူၢ်ဘၣ် တၢ်မဲာ်ဆှးလၢၤဘၣ်.
ဒီးအမဲာ်သၣ်တဖျါလၢ အသးဟးဂီၤလၢၤဘၣ်.*+
၂၃ ဖဲအထံၣ် အဖိတဖၣ်လၢအမ့ၢ် ယစုအတၢ်ဘၣ်တ့တဖၣ် အိၣ်ဝးတရံးအီၤအခါ+အဝဲသ့ၣ် ကပာ်စီဆှံ ယမံၤလီၤ.
အဝဲသ့ၣ် ကပာ်စီဆှံ စီၤယၤကိာ် အကစၢ်ယွၤ လၢအမ့ၢ် တၢ်စီဆှံတဂၤဒီးအဝဲသ့ၣ် ကယူးယီၣ်ပာ်ကဲ အံၣ်စရ့လး အကစၢ်ယွၤ သပှၢ်တၢၢ်လီၤ.+
၂၄ ဒီးပှၤလၢ အဟးဖျိးကျဲန့ၣ် ကဒိးန့ၢ်ဘၣ် တၢ်နၢ်ပၢၢ်ဒီးပှၤလၢ အကဒူးကဒ့ၣ်တၢ်န့ၣ် ကတူၢ်လိာ် တၢ်ဟံးစုနဲၣ်ကျဲလီၤ.”
တၢ်ဂ့ၢ်အဘျဲၣ်တဖၣ်
^ ဘၣ်သ့ၣ်သ့ၣ် အခီပညီမ့ၢ်ဝဲ “ကစၢ်ယွၤအတၢ်လုၢ်လီၢ် အဖၣ်ကပူၤ.” ဖျါလၢအဲၣ်ဒိးတဲဝဲ ဝ့ၢ်ယရူၤၡလ့ၣ်.
^ မ့ၢ်စ့ၢ်ကီး “သၣ်ဝံၤ.”
^ အခီပညီလိၤလိၤ “အမဲာ် တလီၤဝါလၢၤဘၣ်.”
