ယၡါယၤ ၃:၁-၂၆
၃ လၢဝ့ၢ်ယရူၤၡလ့ၣ် ဒီးယူဒၤဘီမုၢ် အပူၤန့ၣ်တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် ကစၢ်လၢ အမ့ၢ်အတီတဂၤကထုးထီၣ်ကွံာ် တၢ်ဆီၣ်ထွဲမၤစၢၤ ကိးမံၤဒဲး လၢအမ့ၢ် တၢ်အီၣ်တၢ်အီ, ထံ,+
၂ ပှၤလၢအဂံၢ်ဆူၣ်ဘါဆူၣ်, ပှၤသုးဖိ,စံၣ်ညီၣ်ကွီၢ်, ဝံ,+ ပှၤလၢအဖး တၢ်ကမၤအသးလၢ ခါဆူညါအဂ့ၢ်, ပှၤသူၣ်က့သးပှၢ်,
၃ ပှၤ ၅၀ အခိၣ်,+ ပှၤလၢအအိၣ်ဒီး အလီၢ်အလၤ, ပှၤဟ့ၣ်ကူၣ်တၢ်,ပှၤလၢ အအူတၢ်လိၢ်တၢ် သ့သ့ဘၣ်ဘၣ် ဒီးပှၤလၢ အအူတၢ်သမူတၢ် သ့ဂ့ၤဂ့ၤလီၤ.+
၄ ဖိသၣ်ပိာ်ခွါတဖၣ်န့ၣ် အဝဲကပာ်ထီၣ်လၢ အဝဲသ့ၣ် အပဒိၣ်ဖးဒိၣ်တဖၣ်ဒီးပှၤလၢ အသးတဂၢၢ်တကျၢၤဘၣ်တဖၣ် ကပၢအဝဲသ့ၣ်လီၤ.
၅ ပှၤဂီၢ်မုၢ် ကဒဲကဒဲ ကဆီၣ်တံၢ် မၤနၢၤလိာ်သးဒီးပှၤဒီသကိး ကဒဲကဒဲ ကဆီၣ်တံၢ် မၤနၢၤလိာ်သးလီၤ.+
ပှၤဖိသၣ် ကမၤဆါ ပှၤသးပှၢ်ဒီးပှၤလၢအပတီၢ်ဖုၣ်တဖၣ် တပာ်ကဲ ပှၤလၢအလီၤပာ်ကဲတဖၣ်ဘၣ်.+
၆ ပှၤတဂၤစုာ်စုာ် ကဟံးဃာ် အဘူးအတံၢ် တဂၤဂၤလၢ အပၢ်အဟံၣ်ပူၤ ဒီးကတဲဝဲလၢ“နၤန့ၣ် နဆ့ဖးထီအိၣ်အဃိ ကဲထီၣ်ပခိၣ်သၢၤ.
တီခိၣ်ရိၤမဲက့ၤ တၢ်လီၢ်လၢ အလီၤပှီၢ်အံၤသၢၤ.”
၇ ဘၣ်ဆၣ် ဖဲတၢ်တနံၤန့ၣ် အဝဲတတူၢ်လိာ်ဝဲဘၣ် ဒီးကတဲဝဲလၢ“ယတကဲန့ၢ် ပှၤလၢအဘိၣ်ဘံထီၣ် သုတၢ်ပူၤလီၢ်ဘၣ်.
လၢယဟံၣ်န့ၣ် တၢ်အီၣ် ဒီးတၢ်ကူ တၢ်ကၤ တအိၣ်ဘၣ်.
အဃိ တဘၣ်ပာ်ထီၣ်ယၤလၢ ပှၤဂီၢ်မုၢ်အခိၣ်တဂ့ၤ.”
၈ ဝ့ၢ်ယရူၤၡလ့ၣ် လီၤဃံၢ်လံဒီးယူဒၤဘီမုၢ် လီၤပှီၢ်လံ,လၢအဝဲသ့ၣ် အတၢ်ကတိၤမ့ၢ်ဂ့ၤ, လၢအတၢ်မၤမ့ၢ်ဂ့ၤ,အဝဲသ့ၣ် မၤတၢ်လၢအထီဒါ ယဟိဝၤယွၤ လၢအမ့ၢ် ကစၢ်ယွၤလၢအပှဲၤဒီး အလၤကပီၤတဂၤန့ၣ် အမဲာ်ညါလီၤ.+
၉ အဝဲသ့ၣ် အတၢ်ပာ်မဲာ်ပာ်နါန့ၣ် ပာ်ဖျါထီၣ်ဝဲလၢ အဝဲသ့ၣ်အိၣ်ဒီး တၢ်ကမၣ်လီၤ.
အဝဲသ့ၣ် တဲဖျါထီၣ် အတၢ်ဒဲးဘးပျီပျီ ဒ်ပှၤလၢအအိၣ်လၢ ဝ့ၢ်စဒိၣ်အသိး+ဒီးအဝဲသ့ၣ် တပာ်ခူသူၣ်ဝဲဘၣ်.
မ့ၢ်လၢအဝဲသ့ၣ် ဒုးလီၤဘၣ် တၢ်နးတၢ်ဖှီၣ်လၢ အနီၢ်ကစၢ်အလိၤအဃိ ကလီၤပျံၤလီၤဖုးလၢ အဝဲသ့ၣ်အဂီၢ်ထဲလဲၣ်.
၁၀ တဲဘၣ်ပှၤတီပှၤလိၤတဖၣ်လၢ တၢ်ကလဲၤအသးဒီးအဝဲသ့ၣ် ဂ့ၤဂ့ၤဘၣ်ဘၣ်န့ၣ်တက့ၢ်.
အဝဲသ့ၣ် ကဒိးန့ၢ်ဘၣ်ခိၣ်ဖး ခီဖျိလၢ တၢ်လၢအဝဲသ့ၣ် မၤဝဲတဖၣ် အဃိလီၤ.*+
၁၁ မ့မ့ၢ် ပှၤအၢပှၤသီန့ၣ် ကဘၣ်ကီ ဘၣ်ခဲ သပှၢ်တၢၢ်လီၤ.
ဒ်အဝဲ မၤပှၤဂၤအသိးန့ၣ် တၢ်ကမၤက့ၤအီၤဒ်န့ၣ်ဒီးတၢ်နးတၢ်ဖှီၣ် ကလီၤဘၣ်အီၤလီၤ.
၁၂ မ့မ့ၢ် ယပှၤဂီၢ်မုၢ်န့ၣ် ပှၤလၢ အမၢဆူၣ် အဝဲသ့ၣ်လၢ ကမၤတၢ်မၤတဖၣ် မ့ၢ်ပှၤလၢ အမၤဆူၣ်မၤစိးတၢ်ဒီးပှၤပိာ်မုၣ်တဖၣ် ပၢအဝဲသ့ၣ်လီၤ.
ယပှၤဂီၢ်မုၢ်သ့ၣ်ဧၢ, သုခိၣ်သုနၢ်တဖၣ် ဒုးဟးဝ့ၤဝီၤသုဒီးအဝဲသ့ၣ် ဆှၢကမၣ် သုကျဲလံ.+
၁၃ ယဟိဝၤယွၤ ဟံးန့ၢ်အလီၢ် ဒ်စံၣ်ညီၣ်ကွီၢ်အသိးဒီးအဝဲဆၢထၢၣ် ဒ်သိး ကစံၣ်ညီၣ် ပှၤကလုာ်တဖၣ် အဂီၢ်လီၤ.
၁၄ ယဟိဝၤယွၤ ကလဲၤကိးထီၣ် အပှၤဂီၢ်မုၢ် အပှၤသူၣ်က့သးပှၢ်တဖၣ် ဒီးအပဒိၣ်ဖးဒိၣ်တဖၣ် လၢစံၣ်ညီၣ်ကွီၢ်အရူလီၤ.
ဒီးကစၢ်ယွၤ ကတဲအဝဲသ့ၣ်လၢ “သုဒွဲၣ်အူထီၣ်ကွံာ် စပံးကျီးလံဒီးတၢ်လၢ သုဟုၣ်န့ၢ်လၢ ပှၤဖှီၣ်ဖိ ယာ်ဖိ အအိၣ်န့ၣ် အိၣ်လၢ သုဟံၣ်ပူၤလီၤ.”+
၁၅ တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲစ့ၢ်ကီးလၢ“သုမၤသဘှံး ယပှၤဂီၢ်မုၢ်တဖၣ် ဖးဘူၣ်ညါ ဒီးသုဆီၣ်တံၢ်မၤနၢၤ ပှၤလၢအဘၣ်နးဘၣ်ဖှီၣ် နးမးလီၤ.”+
၁၆ ယဟိဝၤယွၤ တဲဝဲလၢ “ပှၤပိာ်မုၣ်တဖၣ်လၢ ဝ့ၢ်စံယိၣ်အပူၤန့ၣ် ပာ်ထီၣ်ထီအသးဒီးအဝဲသ့ၣ် ဟးတကွၢ်လီၤ အခီၣ်ထံးဘၣ်.
အဝဲသ့ၣ် ဟးကွၢ်ကျ့ၣ်တၢ် ဒီးဟးယဲၤယီၤအသးဒီးခီၣ်ကျီၤလၢ အဝဲသ့ၣ် အခီၣ်ဒ့တဖၣ်အလိၤန့ၣ် သီၣ်ဝဲခြ့ခြ့လီၤ.
၁၇ ပှၤပိာ်မုၣ်တဖၣ်လၢ ဝ့ၢ်စံယိၣ်အပူၤန့ၣ် ယဟိဝၤယွၤ ကဒုးလီၤ တၢ်ပူၤလီၢ် လၢအဝဲသ့ၣ် အခိၣ်လိၤဒီးယဟိဝၤယွၤ ကမၤလ့ၤ အဝဲသ့ၣ် အခိၣ်လီၤ.+
၁၈ ဖဲတၢ်တနံၤန့ၣ် ယဟိဝၤယွၤ ကဟံးထီၣ်ကွံာ် အဝဲသ့ၣ် အတၢ်မၤဃံမၤလၤတဖၣ် လၢအမ့ၢ်ခီၣ်ကျီၤ, ခိၣ်ကျီၤ, တၢ်ကယၢကယဲ လၢအလီၤဂာ်ဒ်လါအသိး,+
၁၉ နၢ်ဒံး, ထံဖှံၣ်, နီၣ်ကျၢၢ်ဘၢမဲာ်,
၂၀ ခိၣ်ဖၢၣ်, တၢ်ကယၢကယဲ လၢ ခီၣ်ဒ့လိၤ, ယီၢ်တကိးဃံလၤ,တၢ်နၢမူအဒၢဖိ, ရဲၢ်,
၂၁ ပသံး, နါဒ့ကွီၤ,
၂၂ ဆ့ကၤလၢမူးအဂီၢ်, ဆ့ဖးထီ, ဆ့ကၤလုးဖးဒိၣ်, စ့ထၢၣ်,
၂၃ မဲာ်ထံကလၤ,+ တၢ်ကူတၢ်ကၤလၢ အညၣ်ဂ့ၤ,ခိၣ်ဖၢၣ်လီၤဆီ ဒီးနီၣ်ကျၢၢ်ဘၢမဲာ်လီၤ.
၂၄ ခဲအံၤ အဝဲသ့ၣ် မ့ၢ်နၢမူလၢ သ့ၣ်စရံအသိ+ ဘၣ်ဆၣ် အဝဲသ့ၣ် ကနၢအုၣ်က့ၤ,ခဲအံၤ အဝဲသ့ၣ် သူဝဲယီၢ်တကိး ဘၣ်ဆၣ် အဝဲသ့ၣ် ကသူက့ၤပျံၤ,ခဲအံၤ အဝဲသ့ၣ် အခိၣ်ဆူၣ် မ့ၢ်ဃံလၤ ဘၣ်ဆၣ် အဝဲသ့ၣ် အခိၣ်ကတကျိ,+ခဲအံၤ အဝဲသ့ၣ် မ့ၢ်ကၤဆ့ကၤလၢ အပှ့ၤဒိၣ် ဘၣ်ဆၣ် ကကၤက့ၤဝဲ ထၢၣ်တၢ်ကံးညာ်*+ဒီးခဲအံၤ အဝဲသ့ၣ် မ့ၢ်ဖျါဃံဖျါလၤ ဘၣ်ဆၣ် အကဖျါက့ၤထဲ တၢ်ပူၤလီၢ်အလီၢ်လီၤ.
၂၅ ဝ့ၢ်စံယိၣ် အပှၤပိာ်ခွါတဖၣ် ကသံလၢနးဒီးအပှၤလၢ အဂံၢ်ဆူၣ်ဘါဆူၣ်တဖၣ် ကသံလၢ တၢ်ဒုးပူၤလီၤ.+
၂၆ ဝ့ၢ်စံယိၣ် ကလီၤဂာ်ဒ်သိးဒီး ပိာ်မုၣ်တဂၤလၢ အဆ့ၣ်နီၤဟီၣ်လၢ ဟီၣ်ခိၣ်လိၤ+ခီဖျိလၢ ပှၤဂုာ်န့ၢ် အတၢ်ဖိတၢ်လံၤတဖၣ် အဃိလီၤ.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “အဝဲသ့ၣ် ကအီၣ်ဘၣ် တၢ်လၢအမၤဝဲတဖၣ်.”
^ ကွၢ် တၢ်ကတိၤအခီပညီ.
